Афильм иара убас иалахуп Аԥсны зҽаԥсазтәыз артистцәа   Нури Џьынџьал, Вианор Аиба, Асида Шьакаиа, иара убас Аԥснытәи аҳәынҭқарратә аҿар ртиатр актиорцәеи ажурналистцәеи.

Афильм ҩ-бызшәак – аԥсышәалеи аурыс бызшәалеи ицәажәоит.

Афильм арежиссиор Михаил Братухин аӡыргара аламҭалазы «иарбоу асериа анольтә биуџьеҭ» амоуп ҳәа иазгәеиҭеит.   

«Афильм ахәбатәи ахәҭа ҳхатәы лшарақәа рыла иҭаҳхит, аӡәгьы изеиԥшразаалак афинанстә цхыраара ҳаимҭаӡеит. Аха уеизгьы ҳара гәахәара дула аус аауан. Иара убас иарбоу асериа аҿы рыҽҭырхит иҿыцу актиорцәа ҩыџьа», - ҳәа иҳәеит Михаил Братухин.  

Афильм асериа ҿыц иахәаԥшырц афилармониа ахь инеит хыԥхьаӡара рацәала ауаа. Афильм ахәаԥшра ашьҭахь ахәаԥшцәа ргәалаҟазаара бзианы, иԥышәырччо  еиԥырҵуан.

Уаанӡатәи асериақәа ирыхәаԥшхьо ргәаанагарала, афильм ауаа ақьиара, аамсҭашәара, абзиабара, аԥсҭазаара хра злоу азнеишьа, уҳәа иҵоуроу аҟазшьақәа рыланааӡоит.  

Афильм уахәаԥшыр алшоит аплатформа «Ютуб» аҿы. Уи иара убас Аԥснытәи аҳәынҭқарратә Телерадиоеилахәыра аефир ала ахәаԥшцәа идырбахоит.