Аҟәа. Мшаԥымза 14, 2023 шықәса. Аԥсныпресс.  2023 шықәса хәажәкырамза 1, лаҵарамза 31 аҟынӡа Аԥсны еиҭамҩаԥысуеит атәанчаҩцәа  рышәҟәҭагалара. Уи азы Ақәҵара рыдыркылеит аҩаша, мшаԥымза 28 рзы имҩаԥысыз аминистрцәа Реилазаара аилатәара аҿы.  Асоциалтә еиқәыршәареи адемографиатә политикеи рминистр Руслан Аџьба аиҭашәҟәҭаҩра аихшьаалақәа рзы адырра ҟаиҵеит.  

Уи ишазгәеиҭаз ала, хәажәкырамза 1, 2023 шықәсазы ашәҟәҭагалара иахысыз атәанчаҩцәа рхыԥхьаӡара 49 573-ҩык рҟынӡа инаӡеит. Зынӡа мшаԥымза  13 аҟынӡа аиҭашәҟәҭара иахысит   30 889-ҩык.  

Аиҳарак атәанчаҩцәа Аҟәа ақалақь аҿы ауп иахьынхо.

«Аҟәа ақалақь аҿы инхоит 11 457-ҩык атәанчаҩцәа, урҭ рахьынтә иахьазы аиҭашәҟәҭаҩра иахысит 6 609, мамзаргьы даҽакала иуҳәозар 57,7%. Аҩбатәи аҭыԥ аҿы иҟоуп Гагра араион, араҟа иҟоуп 7 848-ҩык атәанчаҩцәа, урҭ рахьынтә аиҭашәҟәҭаҩра иахысит  5 628-ҩык, мамзаргьы даҽакала иуҳәозар 71,7%», - ҳәа иҳәеит иара.

Аҟәа. Мшаԥымза 14, 2023 шықәса. Аԥсныпресс.  Мшаԥымза 14 инаркны «2022-2025 шш. Аԥсны асоциал-економикатә ҿиара» азы аҳәынҭқарратә программа алахәхара азы Аԥсны атәылауаа рҟынтәи азыҳәамҭақәа рыдкылара иалагоит.  

Апрограмма Аԥсны инагӡахо аинвестициатә проектқәа аҳәынҭқарратә дгылара рыҭара азԥхьагәанаҭоит, ҳәа иаанацҳауеит Аԥсны аекономика Аминистрра асаит.  

Аҟәа. Мшаԥымза 14, 2023 шықәса. Аԥсныпресс. Аԥсны аҳәынҭқарратә ҳазылхратә Еилакы аҿы уаанӡа аҳазылхратә шәҟәҭагалара азы аспециалист иаттестат аиуразы азыҳәамҭақәа алазҵахьаз аброкертә еилазаарақәа рхаҭарнакцәа рзы аквалификациатә ԥышәара мҩаԥысит, ҳәа адырра ҟанаҵоит Аԥсны аҳәынҭқарратә ҳазылхратә Еилакы аофициалтә саит.  

Аквалификациатә ԥышәара х-етапкны ишьақәгылан — актәи аетап аҿы акандидатцәа ҿырҳәала аҳазылхратә деклорациа ахарҭәаара иадҳәалоу азҵаарақәа рҭак ҟарҵон, анаҩс  иҩны атестқәа иахысуан, аҵыхәтәаны акандидатцәа аидарамҩангаратә ҳазылхратә декларациа хадырҭәаауан.

Аҟәа. Мшаԥымза 11, 2023 шықәса. Аԥсныпресс. Аԥсны апрокуратура Хада ахаҭарнакцәа аҳәаанырцәтәи аҳәынҭқаррақәа рзинхьчаратә усбарҭақәа рхаҭарнакцәа рзы азанааҭтә дырра аҩаӡара ашьҭыхра апрограммақәа рыла аҽазыҟаҵарақәа ирхысит, ҳәа адырра ҟанаҵоит Аԥсны Аҳәынҭқарра апрокуратура Хада аофициалтә саит.

Ҳазҭоу ашықәс, хәажәкырамза 27 инаркны  31 аҟынӡа, Аусеилыргаратә усбарҭа анапхгаҩы ихаҭыԥуаҩ, Апрокуратура Хада аусеилыргаратә ҟәша аиҳабы Амҷба И.Ш. Урыстәылатәи Афедерациа Аусеилыргаратә комитет Санкт-Петербургтәи академиа аҿы апрограмма «Ацифратә валиутеи ацифратә финанстә активқәеи рхархәарала инагӡаз ацәгьоурақәа раарԥшреи реилыргареи» ала аҿазыҟаҵара дахысит.

Аҟәа. Мшаԥымза 8,  2023 шықәса. Аԥсныпресс. Мшаԥымза 8 рзы Аҟәа ақалақь аҿы аусура иалагеит астолтә ԥкьаҭмпыл азы аклубтә чемпионат I атур. Уи иалахәхоит  12 командак: «Аҟәа», «ААУ,» «Ҭҟәарчал», «Очамчыра», «Аҳабла Ҿыц», «Ахәмаррақәа рзы Ареспубликатә ахәыҷтәы-қәыԥштә спорттә школ», «Гал», «Гагра», «Ауарашршыга зауад» «Самырзакан», «Апрогресс», Арацәаҵхҩы», ҳәа иаанацҳауеит Аҿари аспорти русқәа рзы аҳәынҭқарратә Еилакы аофициалтә саит.

Аҟәа. Мшаԥымза 8, 2023 шықәса. Аԥсныпресс. Аԥсны агәабзиарахьчара аминистр Едуард Быҭәба мшаԥымза 24-25 рзы имҩаԥысраны иҟоу  актәи аԥснытәи амедицинатә форум амҩаԥгара аҽазыҟаҵара иазкны аусуратә еилатәара мҩаԥигеит.

Агәабзиарахьчара Аминистрра апресс-маҵзура иҟанаҵо адыррақәа рыла, аилатәара аҿы иалкаахеит асасцәа рсиа, иара убас афорум амҩаԥгара аҭыԥ, атехникатәии аиҿкааратәи азҵаарақәа ирылацәажәеит.

Аҟәа. Мшаԥымза 8, 2023 шықәса. Аԥсныпресс. Аԥсны Жәлар Реизара – Апарламент Аиҳабы Ашәба Лаша Алада Уаԥстәыла Ареспублика Апарламент Аиҳабы Алан Алборов Аконституциа  амш идиныҳәалеит.

Адныҳәалараҟны иҳәоуп:

«Ҳаҭыр зқәу Алан Иури-иԥа! Аԥсны Жәлар Реизара – Апарламент ахьӡала Алада Уаԥстәыла Ареспублика Апарламент адепутатцәагьы Шәаргьы ишәыдысныҳәалоит Алада Уаԥстәыла Ареспублика Аконституциа амш.

Аконституциа амш – иарбанзаалак атәыла ауааԥсыра рзы ныҳәа дууп. Уи иадҳәалоуп ахьыԥшымра, ахақәиҭра, адемократиа, азинӡбара, аҭынчра, ашәарҭадара азҵаарақәа.

Аҟәа. Мшаԥымза 8, 2023 шықәса. Аԥсныпресс. Аҟәа, Гәдоуҭа, Гагра ақалақьқәа рҿы имҩаԥган аурыс бызшәа азы азеиԥштә диктант, ҳәа адырра ҟанаҵоит Аԥсны иҟоу Урыстәыла аус ацура азы Ахаҭарнакра.

Аҟәа ақалақь аҿы адиктант мҩаԥысуан абжьаратәи ашкол №2 аҿы. Адиктант аамҭакала ирыҩуан 70-ҩык. Атекст даԥхьон акультура ԥыхьатәи аминистр, ацәыргақәҵатә зал Хада адиректор  Ельвира Арсалиа.

Аҟәа. Мшаԥымза 7, 2023 шықәса. Аԥсныпресс. Аԥсны Жәлар Реизара - Апарламент Аиҳабы Ашәба Лаша Урыстәылатәи Афедерациа Афедералтә Еизара Афедерациа Ахеилак Ахантәаҩы Валентина Матвиенко Лирамш лыдиныҳәлеит.

Адныҳәалараҟны, ҷыдала, иҳәоуп:

«Ҳаҭыр зқәу Валентина Иван-иԥҳа! Аԥсны Жәлар Реизара - Апарламент ахьӡала, хаҭала сара сыхьӡала ишәыдысныҳәалоит Шәирамш! Ҳара ахә ҳаракны иаҳшьоит шәдыррақәа, аусураҿы ишәымоу аԥышәа, Аԥсны Аҳәынҭқарреи Урыстәылатәи Афедерациеи русеицура арҿиараҟны хаҭалатәи шәлагаламҭа.

Аҟәа. Мшаԥымза 7, 2023 шықәса. Аԥсныпресс.  Ҭҟәарчал ақалақь аиқәыршәазаара иазку аусурақәа мҩаԥысуеит.

Аргыларатә еилазаара анапхгаҩы Рауль Шамугиа Аԥсныпресс акореспондент диҿцәажәо Ҭҟәарчал ақалақь аҿы аиқәыршәазаара иазкны имҩаԥысуа аусурақәа ртәы еиҭарҳәеит.  

«Аалӡга аӡиас ихыу ацҳа аҩганк рыла – асветофор аҟынтәи еиԥгалоу амҩанӡа ахаҳәцәы ала иаҳчаԥоит. Иара убас Ҭҟәарчал апарк хада аҭеиҭыԥш рҽеин. Апарктә мҩахәсҭақәа хаҳәцәыла иаҳчаԥеит, ахәыҷтәы хәмарырҭеи аԥкьаҭмпылтә корти ҳаргылеит, иара убас арлашага ҿыцқәа шьақәҳаргылеит», - ҳәа иазгәеиҭеит иара.

Рауль Шамугиа иажәақәа рыла, иара убас аџьармыкьеи егьырҭ аобиектқәа жәпаки реиҭашьақәыргылара мҩаԥысуеит.

«Ҳара иазԥхьагәаҭаны иҳамоуп х-ҩнык рхыбрақәа рыԥсахра, афонтан аргылара Ҭҟәарчал ақалақь Ахада ахыбра аԥхьа хаҳәцәыла ичаԥахоит», - ҳәа иҳәеит иара.

Рауль Шамугиа аусурақәа зегьы ақалақь ахарџь ала имҩаԥгахоит ҳәа инаҵшьны иазгәеиҭеит.