Аҟәа. Абҵарамза 22, 2022 шықәса. Аԥсныпресс. Лаша Ашәба Жәларбжьаратәи аҭҵаарадырратә конференциа аиҿкааҩцәеи алахәцәеи дрыдныҳәалеит.

Иахьа Д. И. Гәлиа ихьӡ зху Аԥсуаҭҵааратә институт аҟны аусура хацнаркит  Аԥсуа ҭҵаарадырратә еилазаара аԥҵоижьҭеи 100 аҵра иазку Жәларбжьаратәи аҭҵаарадырратә конференциа «Аԥсуа ҭҵаарадырратә Еилазаара – Аԥсны аҭҵаарадыррақәа ракадемиа ахыҵхырҭа».

Аԥсны Жәлар Реизара – Апарламент Аиҳабы Лаша Ашәба иҟаиҵаз адҵала  Аԥсны Жәлар Реизара – Апарламент Аппарат анапхгаҩы Вадим Бжьаниа Аԥсны Жәлар Реизара – Апарламент ахьӡада аконференциа аиҿкааҩцәеи алахәцәеи рзы иҟаҵаз адныҳәалара атекст даԥхьеит.

Адныҳәалараҟны иҳәоуп:

«Аԥсны Аҭҵаарадыррақәа Ракадемиа асистема иаҵанакуа Дырмит Иосиф-иԥа Гәлиа ихьӡ зху Аԥсуаҭҵааратә институт иналукааша ҭҵаарадырратә усбарҭоуп. Аинститут аҭоурыхтә мҩа хацыркын 1922 шықәсазы Аԥсуа ҭҵаарадырратә еилазаара иатәыз Аҟәатәи ақыҭанхамҩатә еилазаара ашьаҭала. Раԥхьа ари аилазаара Аԥсны аарыхратә мчқәа, уи афлора, ақыҭанхамҩа азҵаарақәа, атәыла археологиеи аетнографиеи рызҵаарақәа рыҭҵаара иазкын.

Аҟәа. Абҵарамза 21, 2022 шықәса. Аԥсныпресс.  Урыстәылатәи аидгьылуаа асоциалтәии азинтәии ацхыраара рыҭара азы Ассоциациа згәабзиаара алшарақәа ԥку ахәыҷқәа ацхыраара рызҭо агәыҳалалратә фонд «Поддержка» ианаҭеит 100 цырак инарзынаԥшуа, акоррекциатә усура иазку ашәҟәқәа.

«Ҳамҭас ирыҭаз алитература иахьатәи амш азы апрофиссионалтә практика аҿы акыр актуалра злоу, Аԥсны инхо, згәабзиара алшарақәа ԥку ахәыҷқәа ацхыраара рыҭара иазку аусура аҿы ахархәара змоу материалны иҟоуп. Иҷыдоу ахәыҷқәа аус рыдызуло аспециалистцәа ацхыраара рыҭара аҿы ихадоу акакәны иҟоуп иарбоу аиҿкаарақәа реиԥш иҟоу аҵара-методикатә литература ала реиқәыршәара.  Даараӡа иҭабуп ҳәа шәаҳҳәоит иҳашәҭаз ацхыраара азы», - ҳәа илҳәеит афонд «Поддержка» адиректор Анетта Бганба-Павелкова.

Аҟәа. Абҵарамза 21, 2022 шықәса. Аԥсныпресс.  Москваҟа иусуратә ҭаара аҳәаақәа ирҭагӡаны, Аԥсны Иҷыдоу аҭагылазаашьақәа рминистр Лев Кәыҵниа Урыстәылатәи Афедерациа Иҷыдоу аҭагылазаашьақәа рзы Аминистрра иатәу аҳәынҭқарратә абылрацәыхьчаратә маҵзура Академиа анапхгараҭара ахаҭарнакцәеи, иара убас Аԥснынтәи иарбоу аҵараиурҭа аҿы аҵара зҵо акурсантцәеи дырԥылеит.

Лев Кәыҵниа Академиа анапхгараҭара ахаҭарнакцәа дрыҿцәажәо Аԥсны аиқәырхаратә Хылаԥшырҭа азы ззанааҭдырра ҳараку акадрқәа разыҟаҵара аганахьала анаҩстәи аусеицура аперспективақәа дрылацәажәеит.  

Акурсантцәа дырԥыло Лев Кәыҵниа  рҵаратә процесс амҩаԥысшьеи қәҿиарақәас ирымоуи рыбзазара аиҿкаашьеи дрызҵааит.

Ас еиԥш аминистри Урыстәылатәи Афедерациа Иҷыдоу аҭагылазаашьақәа рзы Аминистрра апрофилтә ҵараиурҭақәа рҿы аҵара зҵо аԥснытәи акурсантцәеи реиԥыларақәа 2011 шықәса инаркны инеиԥынкыланы имҩаԥысуеит.

Аҟәа. Абҵарамза 21, 2022 шықәса. Аԥсныпресс. Иахьа иазгәарҭоит Адунеизегьтәи ателехәаԥшра Амшныҳәа (World Television Day). Ари аныҳәа аԥҵан ԥхынҷкәынмза 17, 1996 шықәса рзы Еиду Амилаҭқәа Реиҿкаара (ООН) Ассамблеиа Хада ала.

Аԥсны ареспублика зегьы аҟны адырраҭарақәа алазырҵәо ателехәаԥшратә еилазаарақәа ҩба ыҟоуп.  Уи – абҵарамза 6, 1978 шықәсазы иаԥҵаз  Аԥснытәи аҳәынҭқарратә телерадҳио Еилахәыреи рашәарамза   26,  2007 шықәса рзы раԥхьаӡа аефир ахь ицәырҵыз «Абаза-ТВ» роуп.  Иара убас Аԥсны аус руеит иҭыԥырку ателестудиақәа – «Гәдоуҭа-ТВ», «Гал –ТВ».

«Гәдоуҭа-ТВ» адиректор Лариса Ҷанба Аԥсныпресс акорреспондент диҿцәажәо напхгара зылҭо ателестудиа аиҳарак араион аҿы имҩаԥысуа ажәабжь ҿыцқәа аланарҵәоит ҳәа иазгәалҭеит.

«Ҳара 2012 шықәса инаркны Гәдоуҭа араион аҿы имҩаԥысуа ахҭысқәа рзы адыррақәа ауааԥсыра ирылаҳарҵәоит. Аефир ахь ҳара ҳцәырҵуеит мчыбжьык ахь ҩынтә: амҽыша, ашәахьазы аиҭарбара ҳамоуп.  Аштат ала ҳара ҳтелестудиа аҿы 14-ҩык аус руеит», – ҳәа илҳәеит лара.

Аҟәа. Абҵарамза 21, 2022 шықәса. Аԥсныпресс.  Аԥсны Иҷыдоу аҭагылазаашьақәа рзы Аминистрра аусзуҩцәа ареспублика ашколқәа рҿы абылрацәыхьчаратә шәарҭадареи абылрақәа раан ахымҩаԥгашьа аԥҟарақәеи рзы атеориатәии аԥышәаратәии аҽазыҟаҵарақәа мҩаԥыргоит.

Уажәазы аҳҭнықалақь аиқәырхаҩцәа иаҭааит аҟәатәи абжьаратәи ашкол №10. 11-тәи аклассқәа рҵаҩцәа абылрақәа рыҟалара мзызс иамоуи, амца еимга-еицарак ала алаҵәара афакторқәас иамоу, убри аан ахыхьчашьеи уааигәа иҟоу реиқәырхара азы иҟаҵатәуи рганахьала инарҭбаау адыррақәа роуит.  

Аҟәа. Абҵарамза 21, 2022 шықәса. Аԥсныпресс. Аԥснытәи аҵаақәшьқьырҩы қәыԥш Шорена Гәыниаԥҳа Елец ақалақь Аԥхьахәгара аҿы ахԥатәи аҭыԥ аанылкылеит, иара убри ала 1-тәи ақәыԥштә разриад шьақәлырӷәӷәеит, ҳәа адырра ҟанаҵоит аҿари аспорти рзы Аҳәынҭқарратә Еилакы апресс-маҵзура.  Убас ала, 8 шықәса зхыҵуа Шорена Гәыниаԥҳа ақәыԥштә разриадқәа зегьы шьақәлырӷәӷәеит.

Шорена Гәыниа аицлабрақәа рҿы Шәача ақалақь аҵаақәшьқьырратә спорт Академиа «Олимпийский лед» ахьӡала дықәгылон.

Аҟәа. Абҵарамза 21, 2022 шықәса. Аԥсныпресс. Абҵарамза 20 рзы Аҟәа ақалақь аҿы ихыркәшахеит ахацәа ркомандақәа рыбжьара анапылампыл азы Ачемпионт.   Атурнир рхы аладырхәит аа-командак: Аҟәа, Очамчыра, Гагра, Пицунда, Агәыӡера, Аҷандара, иара убас Аԥснытәи аҳәынҭқарратә Университет акомандақәа.

Ахԥатәи аҭыԥ азы аматч аҿы еиԥылеит ААУ акомандеи Аҷандара-2 акомандеи. Ари аиндаҭлара аҿы асчиот 3:2 ҳәа аҷандаратәи акоманда аиааит.  Афиналтә еиндаҭлара аҿы еиԥылон «Аҟәа» акомандеи 2021 шықәсазы Аԥсны ачемпион ҳәа ахьӡ занашьахаз Аҷандҳаратәи акомандеи. Акомандақәа ахәаԥшцәа дыргәырӷьеит иԥшӡоу анапылампыл ахәмарра ала. Аматч хыркәшахеит асчиотом 3:1 ҳәа аҟәатәи акоманда аиааирала.

Аҟәа.  Абҵарамза 20, 2022 шықәса. Аԥсныпресс.  Аԥснытәи аԥкьаҭмпыласыҩ қәыԥш Мира Родионова абҵарамза 18-19 рзы Краснодар ақалақь имҩаԥысыз атурнир «Ҳара зегьы ҳчемпионцәоуп» аҿы аиааира лгеит.

Мира лазыҟаҵаҩ, Арзамеҭ Тарба ихьӡ зху Аԥсны Ареспубликатә ԥкьаҭмпылтә школ адиректор, аԥкьаҭмпыл азы Аԥсны аспорт азҟаза Елизабет Акәыциа лажәақәа рыла, аспортсменка 8 шықәса зхымҵыц рықәратә категориа иаҵанакуа рыбжьара дықәгылон. Мира лзы ари атурнир Аԥсны анҭыҵ имҩаԥысуа раԥхьатәи атурнир акәхеит.  

Аҟәа. Абҵарамза 20, 2022 шықәса. Аԥсныпресс. Аԥснытәи аконкурсантка Лиана Алхас-иԥҳа Аиба ателехәаԥшратә олимпиада «Умницы и умники» афиналбжа аҟынӡа днаӡеит.

Ателедырраҭара «Умницы и умники» аҭыхра рхы аладырхәит Аԥснынтәи х-ҩык аконкурс алахәылацәа:

Аҟәа. Абҵарамза 20, 2022 шықәса. Аԥсныпресс /Алексеи Шамба/. Абҵарамза 19 рзы Р.Гәымба ихьӡ зху Аԥснытәи аҳәынҭқарратә филармониа аҿы имҩаԥысит Георги Гараниан ихьӡ зху Краснодартәи абиг-бенд  ааџьазтә концерт. 

Аконцерт амҩаԥгаҩ, амузыкадырҩы Есма Џьениа иарбоу аколлектив 1997шықәсазы арҿиаратә еидгылара «Премьера» ашьаҭаркҩы   Леонард Гатов ила иаԥҵан ҳәа еиҭалҳәеит.

Усҟантәи аамҭазы аколлектив  Краснодартәи абиг-бенд ҳәа ахьӡ аман. Аоркетр анапхгара аҭара азы Леонард Григори-иԥа ааԥхьара ииҭеит Асовет Еидгыла ахьынӡанаӡааӡоз еицырдыруаз аџьазтә музыкант, апопулиартә ансамбль «Мелодия» анапхгаҩы Георги Арам-иԥа Гараниан.  1998 шықәсазы Георги Арам-иԥа Краснодарҟа аара азы иоуз ааԥхьара идикылеит, дагьалагеит апрофессионалтә џьазтә ансамбль аԥҵара иазкыз аусура. Убри аан уи амузыкнтцәа аӡәгьы имԥсахӡеит. 2010 шықәсазы Георги Арам-иԥа иԥсҭазаара далҵит, аха иара иус аанымкылаӡеит, уи иахьа уажәраанӡагьы қәҿиарала имҩаԥысуеит.

Иахьа Георги Гараниан ихьӡ зху краснодартәи Абиг-бенд напхгара аиҭоит Ҟәбина зҽаԥсазтәыз артист Илиа Филиппов. Ансамбль Урыстәыла еиԥш уи анҭыҵгьы, уи моу адунеи зегьы аҿы еицырдыруа иԥхьагылоу арҿиаратә коллективқәа рхыԥхьаӡараҿы иҟоуп.