Аҟәа. Цәыббрмза 21, 2023 шықәса. Аԥсныпресс. Татарсҭан аделегациа Аԥсныҟа аусуратә визит амҩаԥгара аҳәаақәа ирҭагӡаны, Ареспубликатә ҳәынҭқарратә усбарҭа «Аԥснымедиеи» Акционертә еилазаара «Татмедиеи» аусеицуразы Аиқәшаҳаҭра рыбжьарҵеит.
Аусшәҟы рнапы аҵарҩит Ареспублиатә ҳәынҭқарратә Усбарҭа «Аԥснымедиа» адиректор Хада Роберт Џьопуа, Акционертә Еилазаара «Татмедиа» адиректор Хада Шамиль Садыков.
Знапаҵыҩра мҩаԥгаз аусшәҟәы инақәыршәаны, аганқәа аинформациа ала аимадара аганахьала аусеицура рыбжьарҵоит.
«Аԥснымедиа» адиректор Хада Роберт Џьопуа асасцәа бзиала шәаабеит ҳәа раҳәо иазгәеиҭеит: «Ҳара Ҭаҭарсҭанҟа ҳцара шәара ишәымоу аԥышәа шәымадара иазкын. Хымзтәи ҳаибадырра иалагӡаны аинформациала аимдара ҳабжьан, изныкамкәа-иҩынтәымкәа онлаин-семинарқәа мҩаԥысуан, иахьа аусеицуразы аиқәшаҳаҭра ҳабжьаҳҵараны ҳаҟоуп».
Акционертә Еилазаара «Татмедиа» адиректор Хада Шамиль Садыков 15 шықәса раԥхьа ареспубликатәи амуниципалтәи амассатә инфорациа ахархәагақәа зегьы ааизакны аҳәынҭқарратә еилакны аҟаҵаразы аӡбамҭа рыдыркылеит ҳәа еиҭеиҳәеит.
«Ҳаилазаара ауникалра, апроцессқәа зегьы, аредакциатә усура инаркны, агазеҭқәа рҭыжьра аума, урҭ рыларҵәара аума, аконтент зегьы ахьеизо аинтеграциатә еиҿкаара аҳасабала ашьақәгылара, ажәакала амассатә информациа ахархәагақәа зегьы структурак аҿы реизакра алыршара иадҳәалоуп. Уи иабзоураны анапхгараҭаратә процессқәа реизакреи иситемаркны аҿиареи, зегьы ирыцку – аҳәанҭқарра исистеракны аус ацуразы алшара аԥҵахеит», – ҳәа иазгәеиҭеит Шамиль Садыков.
Акьыԥхьреи амассатә коммуникациақәеи рзы Ареспубликатә агентра «Татмедиа» анапхгаҩы Аидар Салимгараев, аԥснытәи рколлегацәа ацхыраара рыҭара азы агәазыҳәара ду ыҟоуп, избан акәзар идуум аредациақәа рҿы иахәҭоу акомпетенциақәа рышьақәыргылара даара иуадаҩуп ҳәа иазгәеиҭеит.
«Аиқәшаҳаҭра аиҳарак ала аинформациатә еимадара иадҳәалахоит. Аҵыхәтәантәи аамҭазы аинформациатә дунеи даара ирласны аҽеиҭакра иаҿуп, убри аганахьала ҳалшарақәа еибыҭаны аидгылара алҳаршар ҳҭахуп. Ҳара аҵаратә программақәа рыла аимдара, аинформациатә технологиақәа русхкы аҿы аусеицура ҳазхиоуп», – ҳәа иазгәеиҭеит иара.
Аԥсны аминистрцәа Реилазаара Аппарат анапхгаҩы ихаҭыԥуаҩ Кристиан Бжьаниа аҳәынҭқарратә массатә информациатә хархәагақәа амедиа-холдинг ахь реидкылара азы аԥшьгара шцәырҵызи уи аԥсҭазаара ишаларҵәахази ртәы еиҭеиҳәеит.
Абиуџьети акредиттә еиҿкаарақәеи ашәахтәқәеи афинансқәеи рзы апарламенттә Еилакы ахантәаҩы Беслан Ҳалуашь Аԥсни Ҭаҭарсҭани рыбжьара аинформацила аимадарагьы ухь иналаҵаны, еиуеиԥшым аусхкқәа рҿы, аусеицура арҿиара иаҵоу аҵакы ахадара дазааҭгылеит. Уи иуадаҩыз аибашьрашьҭахьтәи ашықәсқәа раан Ҭаҭарсҭан мҽхакы ҭбаала Аԥсны ацхыраара шанаҭоз атәы ҷыдала иазгәеиҭеит.
Аредактор хада Манана Гәыргәылиа аинформациатә агентра «Аԥсныпресс» аусура далацәажәеит.
Аиқәшаҳаҭра анапаҵыҩра ацеремониа ашьҭахь аганқәа агәаларшәагатә ҳамҭақәа еимырдеит.
Ҭаҭарсҭан аделегациа аилазаараҿы иара убас иҟоуп: Акционертә Еилазаара «ТАТМЕДИА» PR-директор Лиаисан Сафина, амедиа-директор Алсу Исмагилова, анагӡаратә директор Нииаз Гареев, Аполиграфиа-ҭыжьратә Комплекс «Идел-пресс» адиректор Хада Анас Аскаров.
