Аҟәа. Цәыббрамза 21, 2023 шықәса. Аԥсныпресс. Атуризм аминистр Ҭеимураз Хишба атәыла аԥыза-министр Алеқсандр Анқәаб Ҟазахсҭанҟа иусуратә ҭаара аихшьаалақәа ртәы изеиҭеиҳәеит. Иарбоу усуратә ҭаара аҳәаақәа ирҭагӡаны аминистр Ҭеимураз Хишба I Жәларбжьаратәи атуристтә форум «Иҭышәынтәалам адунеи аҿы аҭышәынтәалоу атуризм аҿиара астратегиа», иара убас атуроператорцәа жәларбжьаратәи рконгресс «Жәларбжьаратәи атуристтә џьармыкьа ҳаамҭазтәи аҭагылазаашьақәа рҿы атрансфрмациа, аҿиареи апартниорреи рперспективақәа» ихы алаирхәит.
Аԥсны аминистрцәа Реилазаара апресс-маҵзура иҟанаҵо адыррақәа рыла, аԥснытәи аделегациа ахаҭарнакцәа аусмҩаԥгатәқәа ирылахәыз атәылақәа рхаҭарнакцәа атуризм аусхкы аҿы жәларбжьаратәи аусеицура арҿиара аганахьала ирымоу ажәалагалақәа рыдгалара еиҿнакааит.
Атуризм аминистр иажәақәа рыла, иахьатәи амш азы Аминистрра ахыдҵа хадақа иреиуаны иҟоу апартниорра апринцип хадақәеи ирласны зҽеиҭазкуа аџьармыкьа акониуктура ҳасаб азуны аусуратә еикәыршареи, ахырхарҭа рацәала Урыстәыла адиалог абжьаҵареи аҿиареи иазҿлымҳау апартниорцәеи аҳәынҭқаррақәеи рыла аекономикатә еимадара арӷәӷәара, атуризм аусхкы иҭышәынтәалоу аҿиара аҿы ҷыдала аҵакы змоу аперспектива злоу апроектқәеи аԥшьгарақеи рылацәажәара ауп.
Атәыла аԥыза-министр Алеқсандр Анқәаб атурбизнес аусхкы аҿы иӷәӷәоу аимадарақәа рышьақәыргылара иаҵоу аҵакы ахадара аеконоикатә приоритетқәа рганахьала адагьы, зегьы раԥхьаӡа иргыланы, Аԥсны Аҳәынҭқарра акультуратә ҭынха апопулиаризациа иаҵоу аҵакы хада ҳасаб азуны иахәаԥшлатәуп ҳәа инаҵшьны иазгәеиҭеит.
