Аҟәа. Цәыббрамза 21, 2023 шықәса. Аԥсныпресс. Ареспублика Аԥсны Анапхгареи Ареспублика Никарагуа Анапхгареи аамҭарацәа зҵазкуа аҿиара азы аҩганктәи аусеицуразы ирыбжьарҵаз Аиқәшаҳаҭра, иара убас 2023 шықәсазы аусмҩаԥгатәқәа рыпрограмма анагӡара аҳәаақәа ирҭагӡаны, цәыббрамза 20 рзы Аҿари аспорти русқәа рзы аҳәынҭқарратә Еилакы аҿы онлаин режим ала Никарагуатәи рколлегацәа рԥылара мҩаԥысит, ҳәа адырра ҟанаҵеит Аҿари аспорти русқәа рзы аҳәынҭқарратә Еилакы.
Аԥсуа ган аҟынтәи аиԥылара рхы аладырхәит Аҿари аспорти русқәа рзы аҳәынҭқарратә Еилакы ахантәаҩы ицхырааҩ Рафаель Амԥари Аилак аспециалист хадақәа Алиса Инаԥшьбеи Адгәыр Киути.
Никарагуантәи аган аҟынтәи: Манагуа ақалақь Ахадара аспорттә департамент адиректор Ноель Гонсалес, Аспорт Аминистрра Никарагуантәи аспорт Аинститут (IND) ахаҭарнак Фредди Араика, Алексис Аргуелио ихьӡ зху аспорттә еиҿкаара (МDAA) амилаҭтә координатор Даниель Секеира.
Никарагуа ахаҭарнакцәа аспорт, амилаҭтә спорттә турнирқәеи аусмҩаԥгатәқәеи рыҿиареи рпопулиаризациеи аспорттә инфраструктура ахь аинвестициақәа ралагалареи рзы имҩаԥысуа ауснагӡатәқәа ирылацәажәеит.
Рафаель Амԥар ниарагуантәи иколлегацәа Ареспублика Аԥсны абҩарҵәыреи аспорти рыҿиареи рҭоурыхи атәы рзеиҭеиҳәеит, иара убас аԥсуа спортсменцәа жәларбжьаратәи арена аҿы реихьӡарақәеи Аҿари аспорти русқәа рзы аҳәынҭқарратә Еилакы ареспубликаҿы аспорт аҿиареи апопулиаризациеи рзы имҩаԥнаго аусура далацәажәеит.
Аиԥылараҿы ҩ-тәылак аспорттә усхкы аҿы русеицура традициала ишьақәгылаз аҩганктәи аусеицуреи аимабзиаратә аԥсуа-ниарагуантәи аизыҟазаашьақәеи рырӷәӷәареи рырҭбаареи аус аҿы хра злоу алагала аланаҵоит ҳәа иазгәарҭеит.
«Аиашазы иумҳәар залшом, макьаназы ҳара ҳҿы аспорт аҿиара аҩаӡара шәара шәҿы аасҭа ишеиҵоу, аха ҳара, уи азы алшара ҳаур, абокс, самбо, ӡиудо, мрагыларатә аиқәԥарақәа, уҳәа реиԥш иҟоу аспорт хкқәа рыла шәыцлабра иахьагьы ҳазыхиоуп. Ахәмарратә спорттә хкқәагьы рылагьы ҳаицлабыр алшоит», - ҳәа иҳәеит Рафаель Амԥар.
Аиԥылара ахыркәшамҭаз, Рафаель Амԥар иколлегацәа аспорттә усуразы аԥышәаеимадара азы Аԥсныҟа ааԥхьара риҭеит.
