Аҟәа. Абҵарамза 23, 2023 шықәса. Аԥсныпресс.  Аԥсны-урыстәылатәи аҳәаа аҿы иааныркылеит 19 тонна инареиҳаны  закәаншьаҭада Аԥсныҟа зыиагара рҽазыршәоз атауар, ҳәа адырра ҟанаҵоит Урыстәылатәи Афедеациа Афедералтә ҳазылхратә Маҵзура Аладатәи аҳазылхратә Усбарҭа апресс-маҵзура.

Аҳазылхратә гәаҭараан Краснодартәи аҳазылхырҭа иатәу Ганрацәалатәи автомашьынатә Аушьҭра-гәаҭаратә Ԥыԥшырҭа «Адлер» аҿы иаанкылан Урыстәылантәи Аԥсныҟа иаауаз аидарамҩангагатә машьына «MAN”.  Аидара мҩанызгоз аҳазылхратә усбарҭа ахь инеигеит амашьынеи уи иҭаз аидари ирыцыз адокументқәа. Урҭ иарбаз ала, амашьына иақәыз  180 ааҵәа аџьықәреи акәын.

Аха иарбоу аидарамҩангага амобилтә аинспекциа-гәаҭаратә Комплекс (МИДК) ахархәарала аҳазылхратә гәаҭараан иаарԥшхеит 650 ааҵәа аполимертә хаҳәҷҷа. Уи аидара иацыз аусшәҟәқәа рҿы иарбаӡамызт. Ари аидара азеиԥш капан  19 тонн  иреиҳахеит.

Аҟәа. Абҵарамза 23, 2023 шықәса. Аԥсныпресс.  Абҵарамза 25 рзы, Жәларбжьаратәи амчмырхара аҿагылара Амш аҽны аусура иалагоит есышықәса еиҿкаахо «Аҳәсеи аҳәсахәыҷқәеи рганахьала амч ахархәара аҿагылара иазку 16-мыш ирҭагӡоу жәларбжьаратәи акампаниа».

Аԥсны аҳәса Рассоциациа ауаажәларра рыҩныҵҟа амчмырхара аҿагылареи иарбоу апроблема разхьарԥшреи иазку аусмҩаԥгатәқәа рымҩаԥгара азԥхьагәаҭаны иамоуп.  

Сынтәа акампаниа амҩаԥгара аҳәаақәа рҭагӡаны, Аԥсны аҳәса Рассоциациа абарҭ аусмҩаԥгатәқәа еиҿнакаауеит:

Аҟәа. Абҵаамза 23, 2023 шықәса. Аԥсныпресс. Аслан Бжьаниа Венесуела Ахада Николас Мадуро  Иира Амш идиныҳәалеит.

Адныҳәалараҿы иҳәоуп:

«Шәаҳаракыра! Шәира Амш инамаданы Аԥсны жәлар зегьы ахьӡалеи хаҭала сара сыхьӡалеи ишәыдышәкыл гәык-ԥсыкала иҟаҵоу адныҳәалара.

Шәара шәыԥсҭазаара зегьы шәыжәлар ринтересқәа ирызкуп, гәык-ԥсыкала шәыԥсадгьыл амаҵ азыжәуеит, Венесуела ахаҭа акәзар – аиашара, асоциалтә прогресс, ауаҩытәыҩса изинқәа рыхьчара рзы иҿырԥшыганы иҟоуп.

Аҟәа. Абҵарамза 23, 2023 шықәса. Аԥсныпресс. Риҵатәи ареликттә милаҭтә парк аҿы ҳаамҭазтәи ацифратә автоматтә камерақәа (афотоцәҟьақәа) рхархәарала афауна аҭҵаарақәа мҩаԥысуеит. Ашьамстә ԥстәқәа рыҭҵаара 2019 шықәсазы апарк  аекологиатә ҵарадырреи анаукеи рыҟәша аусзуҩцәа Арсҭаа А.В., Арухаа Д.Иа. рнапхгарала ихацыркын.

Ацифратә автоматтә камерақәа рыцхыраарала, 2019 шықәса инаркны  2022 шықәсанӡа Риҵатәи ареликтә милаҭтә Парк афауна амониторинг амҩаԥгарала араҟа рыҟазаара шьақәыргылан жә-хкык рҟынӡа   ашьамстә ԥстәқәа. Афотоцәҟьақәа аԥсабараҿы аԥсаатәқәа рыҟазаара ацклаԥшра азы зегьы реиҳа аеффективра злоу, ҳаамҭа иақәшәо ахархәагақәа роуп, урҭ  аамҭак ала еиуеиԥшым аҭыԥқәа рҿы иааиԥмырҟьаӡакәа амониторинг амҩаԥгара алнаршоит. Афотоцәҟьақәа Риҵатәи ареликтә милаҭтә Парк аҿы аԥстәқәеи аԥсаатәқәеи еиуеиԥшым ашықәс аамҭақәа (асезонқәа) раан реизакреи рыиасреи аҭыԥқәа рҿы ишьақәыргылоуп. Алшықәсанык имҩаԥгаз аҭҵаарақәа раан афотоцәҟьақәа ркадрқәа ирнылеит ашьамстә ԥстәқәа, кавказтәи амшәқәеи амшә цәышәшәы ҳәа изышьҭоугьы, абгахәыҷқәа, абынҳәақәа, абнацәқәа, кавказтәи абӷаџьмақәа, аԥслаҳәқәеи  ақәасабқәеи, европатәи ашьабысҭақәа, аашьышьқәа, ацыгәқәа,  аашьарақәа, уҳәа.

Убас, афотоцәҟьақәа ркадрқәа ирнылаз жә-хкык аԥстәқәа рҟынтәи хәба шамахамзар џьара иуԥымло рахь иаҵанакуеит.

Аҟәа. Абҵарамза 23, 2023 шықәса. Аԥсныпресс. Ареспубликатә ахәыҷтәы-қәыԥштә спорттә школ аҿы иалагеит аҳәса ркомандақәа рыбжьара амҵәышәымпыл азы Жәларбжьаратәи атурнир “Аиҩызара Ахраҿа”.

Атурнир зынӡа иалахәуп хә-командак: «РШВСМ», «Гагра», «Аҟәа», «Крылья Абхазии», «Краснодар», ҳәа адырра ҟанаҵоит Аԥсны аҿари аспорти русқәа рзы аҳәынҭқарратә Еилакы  Аофициалтә саит.

Абҵарамза 23 рзы имҩаԥысит атурнир аартра иадҳәалоу ацеремониа. Атурнир алахәылацәеи асасцәеи бзиала шәаабеит ҳәа раҳәо иқәгылеит Аԥсны аҿари аспорти русқәа рзы аҳәынҭқарратә Еилакы ахантәаҩы  Ҭарашь Ҳагба, Аҟәа ақалақь Ахадара аҿари аспорти русқәа рзы Аусбарҭа анапхгаҩы Ельза Ҳагба, атурнир аӡбаҩ Хада Николаи Гушьини Краснодартәи акоманда азыҟаҵаҩ Мариа Гурковеи.

Аҟәа. Абҵарамза 23, 2023 шықәса. Аԥсныпресс.  Гагра араион Гиачрыԥшь аҳаблаҿы инхо, 1995 шықәсазы ииз Лакәыиа Герман Мераб-иԥа иганахьала ашьаусеилыргара хацыркуп. Уи изакәанымкәа ихысуа абџьар аахәареи аҵәахреи амҩангареи рзы дыгәҩароуп, ҳәа адырра ҟанаҵоит атәыла аҩныҵҟатәи аусқәа Рминистрра апресс-маҵзура.

Азинхьчаратә усбарҭақәа русзуҩцәа Лакәыиа Герман Мераб-иԥа имашьына  Mercedes аҩныҵҟа ирыԥшааит ихысратәы аус еиҭазыдулоу «Макаров» итапанча. Амилициа аусзуҩцәа абџьар изтәыз имырхит.  

Аҟәа. Абҵарамза 23, 2023 шықәса. Аԥсныпресс. RCC Boxing Promotions адиректор Хада Герман Титов «Матч ТВ» ахаҭарнакцәа дрыҿцәажәо, Харитон Агрба ҳазҭоу ашықәс нҵәаанӡа актәи абжьарабжатә акапантә категориа иаҵанакуа рыбжьара WBA апретендент истатус иоур алшоит ҳәа инаҵшьны иазгәеиҭеит.  Абри азы адырра ҟанаҵоит Аԥсны аҿари аспорти русқәа рзы аҳәынҭқарратә Еилакы аофициалтә саит.

2019 шықәсазы имҩаԥысуаз Европатәи ахәмаррақәа рҿы араӡнытә аԥхьахә згаз Харитона Агрба иактив аҿы иҟоуп 12 иааира апрофессионалтә ринг аҿы. Уи актәи абжьарабжатә акапантә категориа иаҵанакуа рыбжьара WBA ареитинг аҿы ажәабатәи аҭыԥ ааникылот. Иарбоу адивизион аҿы америкатәи аспортсмен  Роландо Ромеро «ԥсшьара иҟоу WBA ачемпион» истатус имоуп. Харитон Агрба аҵыхәтәантәи иеиндаҭларақәа хԥа  RCC Boxing Promotions аҿы имҩаԥигеит.

Аҟәа. Абҵарамза 23, 2023 шықәса. Аԥсныпресс. Аԥсны Иҷыдоу аҭагылазаашьақәа рзы Аминистрра акоманда Беларусиа имҩаԥысраны иҟоу  абылрацәыхьчара-хархәаратә спорт азы атурнир рхы аладырхәуеит.

Аиқәырхаҩ Имш иазку атурнир мҩаԥысраны иҟоуп ажьырныҳәамза, 2024 шықәсазы Бобруиск ақалақь аҿы, ҳәа адырра ҟанаҵоит Аԥсны Иҷыдоу аҭагылазаашьақәа рзы Аминистрра апресс-маҵзура.  

«Атурнир ааигәатәии инаскьагоуи аҳәаанырцә атәылақәа рҟынтәи алахәылацәа еидныкылоит. Уи аспорт аҿиара, аԥсеиқәырхаратә маҵзурақәа рыбжьара аусеицуреи аилибакаареи рырӷәӷәара иацхраауеит», –  ҳәа иаҳәоит Аԥсны Иҷыдоу аҭагылазаашьақәа рминистр Лев Кәыҵниа иахь  Бобруисктәи ақалақьтә Исполком ахантәаҩы Игорь Кисель иҟынтәи иаашьҭыз аофициалтә шәҟәы аҿы.

Аҟәа. Абҵарамза 23, 2023 шықәса. Аԥсныпресс. Еицырдыруа асоветтәии урыстәылатәии аҵарауаҩ-азиндырҩы, Урыстәылатәи Афедерациа Аконституциатә Ӡбарҭа ԥыхьатәи аӡбаҩ Зҽаԥсазтәыз азиндырҩы Анатоли Леонид-иԥа Кононов иԥшәмаԥҳәыс - Лиудмила Кабанова лыԥшәма ихатәы библиотека Аԥсны аҳәынҭқарратә Университет Д.И.Гәлиа ихьӡ зху Анаукатә библиотека ҳамҭас иалҭеит, ҳәа адырра ҟанаҵоит ААУ аинформациеи амедиакоммуникациақәеи рыҟәша.

Акырӡа ирацәоу, 69 коробка ирҭоу, еиуеиԥшым ахьӡқәа змоу, ҳамҭас иаашьҭыз ашәҟәқәа рхыԥхьаӡараҿы иҟоуп акырӡа зҵазкуа аиуриспруденциа, азин, асоциологиа, апсихологиа, адинхаҵарадырра, аҟазарадырра, иара убас аусшәҟқәеи адискқәеи.  

Ас еиԥш абзиара аҟаҵара Кононоваа рҭаацәара ҷыдала Аԥсны разыҟазаара ауп, иара убас лара Лиудмила Кабанова лхаҭа акыр шықәса раахыс аԥсуа жәлари лареи ирыбжьоу аимадареи роуп изыдҳәалахаз.

«Анатоли Леонид-иԥа, жәаҳәарада иԥсы ҭазҭгьы, акыр игәы иаахәарын ихатәы библиотека аҟынтәи ашәҟәқәа Аԥсны еиҵагыло аҿар ирыхәо иахьыҟалаз», - ҳәа иазгәалҭеит аҵарауаҩ иԥшәмаԥҳәыс Лиудмила Кабанова.

Аҟәа. Абҵарамза 23, 2023 шықәса. Аԥсныпресс. Риҵатәи ареликтә милаҭтә парк аҿы, амшцәгьа иахҟьаны, 36-тәи акилометр аҟны иҵыҩрыз аҵлақәа амҩа ианыҳалеит. 

Риҵатәи ареликтә-милаҭтә парк аусзуҩцәа амҩақәа ррыцқьара иаҿуп, ҳәа иаанацҳауеит апарк Telegram аҿы адаҟьа.

Апарк анапхгараҭара автомашьынақәа рыла аӡиаҟынӡа ихало Аԥсны атәылауааи асасцәеи аӡынтәи аразинахь ииасырц абжьгара ҟанаҵоит, иара убас  Ауадҳара асы еимагыланы аура ишаҿу азы ргәырҽанырҵоит.

Абҵара 24 инаркны аӡынтәи аамҭахәҭа азы Ауадҳараҟа амҩа аркхоит.