Аҟәа. Абҵарамза 23, 2023 шықәса. Аԥсныпресс. Гал ақалақь Акультура Аҩны аҟны абҵарамза анҵәамҭазы атеатралтә студиа аартра азԥхьагәаҭаны иҟоуп, ҳәа адырра ҟанаҵоит  ГалМедиа.

Актиортә ҟазара риҭалоит Урыстәылеи Аԥсни Зҽаԥсазтәыз артист, еицырдыруа арежиссиор Адгәыр Ақаҩба.

Ааԥхьара рымоуп актәи адкылара зхы алазырхәырц зҭаху зегьы, уи мҩаԥгахоит абҵарамза 29, асааҭ 12:00 рзы Акультура Аҩны аҿы. 

Аҟәа. Абҵарамза 23, 2023 шықәса. Аԥсныпресс. Изакәанымкәа акриптовалиута арҳара аарԥшреи аԥхьырҟәҟәаареи ирызку аоператив-ԥшааратә уснагӡатәқәа рымҩаԥгараан, Очамчыра араион аҩныҵҟатәи аусқәа Русбарҭа аусзуҩцәа, Аҳәынҭқарратә шәарҭадара Амаҵзуреи Аҳәынҭстандарти рыспециалистцәа рыцны Очамчыра араион Ԥақәашь ақыҭан ирыԥшааит    акриптовалита арҳара иазку 86 аппарат, ҳәа адырра ҟанаҵоит атәыла аҩныҵҟатәи аусқәа Рминистрра апресс-маҵзура.  Иарбоу аппаратқәа рыԥшәма – Ҷыҭанаа Хьымца Капитон-иԥа.

Аҟәа араион аҩныҵҟатәи аусқәа Русбарҭа аусзуҩцәа Аҟәа араион Афымцатә Станциеи Аҳәынҭстандарти русзуҩцәеи рыцхыраарала Баслаҭа ақыҭан ирыԥшааит иагьрымырхит 30 маининг-аппарат. Урҭ рыԥшәма – Каталанӡиа Альберт Тариел-иԥа иоуп.

Аҟәа ақалақь, Ешба имҩала игылоу аҩнеихагыла ауадақәа руак аҿы, аҳҭнықалақь аҩныҵҟатәи аусқәа Русбарҭа аусзуҩцәа ирыԥшааит  Кәыҵниа Оҭар Омар-иԥа итәыз акриптовалиута арҳара иазкыз аппаратқәа хәба. Аппаратқәа аԥшәма имырхит.

Аҟәа. Абҵарамза 23, 2023 шықәса. Аԥсныпресс. Агәабзиарахьчара аминистр ахылаԥшырҭа аобиектқәа аӡынра ишазыҟаҵоу атәы далацәажәеит Очамчыра, Ҭҟәарчал, Гал араионқа рҿы анҭыҵтәи аилатәарақәа рымҩаԥгара аҳәаақәа ирҭагӡаны еиҿкааз араионтә хәышәтәырҭақа рнапхгаҩцәа рԥылара аҿы, ҳәа адырра ҟанаҵоит агәабзиарахьчара Аминистрра апресс-маҵзура.

Араионтә хәышәтырҭа Хадақәа рнапхгаҩцәа аминистр аӡынра ишазыҟаҵоу азы адырра ирҭеит.

Араионтә хәышәтәырҭақәа рҳақьым Хадацәа иааиԥмырҟьаӡакәа афымцамч ала аиқәыршәара, иҟалар зылшо амшцәгьақәа рзы автопарк ахиара, ашьҭаҵарҭақәа рахь ахәшәқәеи аныхтә маҭәахәқәеи рыдгалара, уҳәа азҵаарақәа  ахылаԥшра арҭоит.

Аҟәа. Абҵарамза 23, 2023 шықәса. Аԥсныпресс. Аҟәа ақалақь Апрокуратура аҿы аҳәынҭқарратә ҿаҵақәеи аахәарақәеи рымҩаԥгараан акоррупциаҿагыларатә закәанԥҵара ақәныҟәара апрокурортә хылаԥшра аҭара иазку азҵаарақәа рзы асеминар мҩаԥысит, ҳәа адырра ҟанаҵоит Апрокуратура Хада аофициалтә саит.

Аԥсны Апрокуратура Хадеи Урыстәылатәи Афедерациа Апрокуратуреи рыбжьара  2023-2024шш. рзы аусеицура апрограмма анагӡара аҳәаақәа ирҭагӡаны,  Аҟәаҟа иааит Урыстәылатәи Афедерациа абиуџьеттә закәанԥҵара анагӡара ахылаԥшра аҭара азы аҟәша аиҳабы,  аекономика аусхкы аҿы азакәанԥҵара анагӡара ахылаԥшра аҭара азы аусбарҭа анапхгаҩы ихаҭыԥуаҩ Ефимова К.А., абиуџьеттә закәанԥҵара анагӡара ахылаԥшра аҭаразы аҟәша апрокурор еиҳабы Красицки А.А., аиҿкаара-аналитикатә ҟәша апрокурор еиҳабы Онуфриенко А.В., афедералтә закәанԥҵара анагӡара ахылаԥшра аҭара азы аҟәша апрокурор Горелова А.Д., аиҿкаара-зинтә убарҭа жәларбжьаратәи аусеицура аҟәша апрокурор Ефимова С.А. зеилазаараҿы иҟоу аделегациа.  

Абҵарамза 22 рзы аделегациа алахәылацәеи Аԥсны апрокурор Хада Адгәыр Агрбеи уи актәи ихаҭыԥуаҩ Дамир Кәыҵниеи реиԥылара мҩаԥысит.  Анаҩс Аҟәа ақалақь Апрокуратура ахыбраҿы аҳәынҭқарратә ҿаҵақәеи аахәарақәеи рымҩаԥгараан акоррупциаҿагыларатә закәанԥҵара ақәныҟәара апрокурортә хылаԥшра аҭара иазку азҵаарақәа рзы асеминар мҩаԥысит.

Асеминар аҿы ажәахәқәа ҟаҵо иқәгылеит Аԥсны акоррупциа аҿагылара азы азакәанԥҵара анагӡара ахылаԥшреи азини рзы Апрокуратура Хада аусбарҭа аиҳабы инапынҵақәа назыгӡо Агрба Е.М., Аԥсны Ареспублика азакәанԥҵара анагӡара ахылаԥшра аҭара азы Апрокуратура Хада аусбарҭа апрокурор Кобахьиа К.В., иара убас урҭ урыстәылатәи рколлегацәа.

Аҟәа.  Абҵарамза 22, 2023 шықәса. Аԥсныпресс. 2023 шықәсазы ацитрусттә шәырқәа рекспорт аизҳара 1,5 нызықь тонна рҟынӡа инаӡеит. Иахьазы ииагаз аалыҵ 4 671 тонна рҟынӡа инаӡоит, ҳәа Ауаажәларратә Палата аҿы 2023 – 2024 шш. ацитрустә сезон иазкны иҟаз аиԥылара аҿы дықәгыло  адырра ҟаиҵеит Аҳәынҭқарратә ҳазылхратә Еилакы ахантәаҩы Оҭар Хьециа.  

«Иҳаҩсыз ашықәс азы ацитрустә шәырқәа рекспорт 3112 тонна рҟынӡа инаӡон, уи аԥхьа –,3 409 тонна.  Сынтәа аекспорт аизҳара 1,5нызықь тонна рҟынӡа инаӡеит», – ҳәа иазгәеиҭеит Аҳәынҭқарратә ҳазылхратә Еилакы ахантәаҩы.

Уажәы ииаганы ирго заанаҵы иҟало амандарина асорт ауп, аиҳарак аура уажәоуп аизгара ианалаго, ҳәа иҳәеит иара.

«Сгәы иаанагоит, ақыҭанхаҩа Аминистрра ишьақәныргылаз аплан – 30 тонна  нагӡахап ҳәа. Ашәыр 95% рҟынӡа Аԥсны иалганы иргоит», - ҳәа иазгәеиҭеи Аҳәынҭқарратә ҳазылхратә Еилакы  ахантәаҩы.

Оҭар Хьециа иажәақәа рыла, есышықәса ацитрустә сезон аламҭалазы Аҳәынҭқарратә ҳазылхратә Еилакы Урыстәылатәи Афедерациа Афедералтә ҳазылхратә Маҵзура аҟынтәи рколлегацәа ирԥылоит.

«Аха уи аԥхьа ҳара ҳарԥылоит ацитрустә шәырқәа рыиагара знапы алаку адәныҟаекономикатә усура алахәылацәа, урҭ рыпроблемақәа ртәы ҳазыӡырҩуеит, рҭаххрақәеи ргәазыҳәарақәеи еилкааны ауп анаҩс ихадоу аилацәажәарахь ҳанцәырҵуа», – ҳәа еиҭеиҳәеит Оҭар Хьециа.

Аҟәа. Абҵарамза 22, 2023 шықәса. Аԥсныпресс. Шьамтәыла иҟоу Аԥсны ацҳаражәҳәаҩ Муҳаммад Алии Шьамтәылатәи Арабтәи Ареспублика иҟоу Урыстәылатәи Афедерациа ацҳаражәҳәаҩ Алеқсандр Ефимови реиԥылара мҩаԥысит абҵарамза  22 рзы, ҳәа адырра ҟанаҵоит Аԥсны адәныҟатәи аусқәа Рминистрра Амедицентр.

Аиԥылараҿы Шьамтәыла иҟоу Аԥсни Урыстәылеи рыцҳаражәҳәарҭақәа русеицура аперспективақәа ирылацәажәеит, иара убас ирзааҭгылеит аҩганк рзы аинтерес зҵоу егьырҭ азҵаарақәа жәпакы.

Муҳаммад Али аҩ-тәылак ирыбжьоу аизыҟазаашьақәа астратегиатә партниорреи аиҩызареи рышьаҭала хра злоу аҿиара рымоуп ҳәа инаҵшьны иазгәеиҭеит. Иара азҵаарақәа жәпакы рыла аусеицура дшазхиоу, насгьы аринахысгьы уи шацҵахо азы агәыӷра шимоу ааирԥшит.

Аҟәа. Абҵарамза 22, 2023 шықәса. Аԥсныпресс. Абҵарамза 22, 2023 шықәсазы  Аԥсны адәныҟатәи аусқәа рминистр ихаҭыԥуаҩ Иракли Ҭыжәба Аахыҵ Кавказ ашәарҭадареи аҭышәынтәалареи рзы Женеватәи аиҿцәажәарақәа рыцхантәаҩцәа рделегациа –Аахыҵ Кавказ  азы Еропатәи атәылақәа Реидгыла ахаҭарнак ҷыда Тоиво Клаари Еиду Амилаҭқәа Реиҿкаара ахаҭарнак   Џьихан Султаноглу, Жәларбжьаратәи Женеватәи Аилацәажәарақәа рҿы Европатәи атәылақәа Реидгыла Ашәарҭадаразы Ахеилак аҟынтәи ацхантәаҩы Виорел Мошану идикылеит, ҳәа иаанацҳауеит Аминистрра Амедиацентр.

Аиԥылараҿы ишьҭыхыз атема хадақәа ируакхеит Женеватәи аилацәажәарақәа  изаамҭанытәиу 59-тәи араунд амҩаԥгара азҵаара.

Аҟәа. Абҵарамза 22, 2023 шықәса. Аԥсныпресс. Зыкапан 32 грамм иреиҳаз «каннабис» ҳәа изышьҭоу  арҩышьыгатә ҵиаа хкы идырбалеит иагьимырхит Гәдоуҭа араион, Мгәыӡырхәа ақыҭан инхо, 1992 шықәсазы ииз Игорь Арӡынба, ҳәа адырра ҟанаҵоит атәыла аҩныҵҟатәи аусқәа Рминистрра апресс-маҵзура.

Гәдоуҭа араион аҩныҵҟатәи аусқәа русбарҭа ашьаусԥшааратә  ҟәша аусзуҩцәа аоператив-ԥшааратә уснагӡатәқәа рымҩаԥгараан анаркотикатә маҭәашьар зыҩны иҵәахны измаз Гәдоуҭа араион Мгәыӡырхәа ақыҭа анхаҩы Игорь Арӡынба дааныркылеит.

Игәҩароу иҩны имҩаԥгаз аԥшаарақәа раан ирбеит аҵиаа иалху амаҭәашьар. Анаҩс аекспертцәа, уи зыкапан 32 грамм рҟынӡа  инаӡо «каннабис» ҳәа изышьҭоу  арҩышьыгатә ҵиаа хкы ауп ҳәа ишьақәдыргылеит.

Аҟәа. Абҵарамза 22, 2023 шықәса. Аԥсныпресс. Ахәаша, абҵарамза  24, 11:00 рзы С.Ҷанба ихьӡ зху Аԥсуа драматә театр азал маҷ аҿы Аԥсны ажурналисттә еилазаара аҩныҵҟа  II аконкурс «Взгляд – 2023» аихшьаалақәа рыҟаҵареи аиааира згаз аҳамҭақәа ранашьареи иазку ацеремониа мҩаԥысуеит.  

Аконкурс 1992 – 1993 шш. Аԥсны жәлар Рџьынџьтәылатәи еибашьра аҿы Аиааира агара  30-шықәса ахыҵра аназгәаҭо ашықәс азы иахьымҩаԥысуа инамаданы, аконкурс аиҿкааҩцәа уи цәыббрамза 27, 1993 шықәсазы Аԥсны аҳҭнықалақь аҿы игылоу аминистрцәа Реилазаара ахыбра ахақәиҭтәраан ақырҭуа снаипер ихымца иагаз Аинформациатә Агентра ТАСС афотокорресспондент, Аԥсны Афырхаҵа Андреи Соловиев изкхарц азы аӡбамҭа рыдыркылеит.

Аконкурсантцәа аҳамҭақәа ранашьара ацеремониа ихы алаирхәраны дыҟоуп Аинформациатә агентра ТАСС адиректор Хада Андреи Кондрашов.

Аҟәа. Абҵарамза 22, 2023 шықәса. Аԥсныпресс.  Апартиақәеи ауаажәларратә еиҿкаарақәеи Реидгыла Жәлар Реизара-Апарламент ԥыхьатәи адепутат Алхас Џьынџьал аҳәынҭқарреи абизнеси рыбжьара амазаратә еизыҟазаашьақәа рганахьала ахылаԥшра арӷәӷәара азы ауаажәларратә комиссиа аԥҵара азы иаԥшьгара иадгылеит.

Ԥыхьатәи адепутат Алхас Џьынџьал Аԥсны аполитикатә партиақәеи ауаажәларратә Еиҿкаарақәеи Реидгылеи аполитиатә партиа «Амцахареи» рышҟа аҳәынҭқарреи абизнеси рыбжьара амазаратә еизыҟазаашьақәа рганахьала ахылаԥшра арӷәӷәара иацхрааша ауаажәларратә комиссиа аԥҵара азы ажәалагала ҟаиҵеит.

Иарбоу атема иаҵоу актуалтә ҵакы ҳасаб азуны, Аидгыла иалоу аполитикатә партиақәеи ауаажәларратә еиҿкаарақәеи рнапхгаҩцәа ари аидеиа иалацәажәеит, анаҩс уи аопозициатә политикатә партиақәеи аиҿкаарақәеи рнапхгаҩцәа рыҿцәажәара аиҿкаара аформала ари аԥшьгара адгылара аҭаразы аӡбамҭа рыдыркылеит.