Амилаҭбжьаратә ҳәоуеиқәымшәара амца аҵаҵара ауаажәларратә шьақәгылара еиланагоит, уи акзаареи аҭышәынтәалареи шьақәнарҟьоит, ҳәа Ауаажәларратә Палата алахәылацәа ҳреспублика атәылауаа ахарамхәыцра аҟынтәи ргәырҽанырҵоит.
«Милаҭрацәала еилоу Аԥсны жәлар зегьы аӡәк еиԥш еидгыланы аҭынч ԥсҭазаара ахьыҟоу, доусы изинқәа ахьыхьчахо аҳәынҭқарра аргыларазы ирылшо зегьы ҟарҵароуп.
Ареспублика Аԥсны – ҳара зегьы ҳаҩноуп, пату еиқәаҳҵалароуп, аӡәк еиԥш ҳаидгыланы Ҳаԥсадгьыл аҿиареи аизҳазыӷьареи ҳацхраалароуп. Амилаҭтә ҟазшьа ала изеиԥшразаалак ақәыӷәӷәара, ақәмақарра ақәыӡбара – уи ҳреспублика иқәынхо дарбанызаалак атәылауаҩ изы аморалтә уалԥшьа адагьы, уи ажәларқәа зегьы ҭынч реицынхареи ацәымӷреи амцхаҵарақәеи аҭыԥ ахьамам ауаажәларратә еилазаара ашьақәыргылара азы ихымԥадатәиу ҭагылазаашьоуп. Шәааи иаҳхамышҭыԥ, ҳара ҳамч – ҳакзаара аҿы ишыҟоу!» –ҳәа иаҳәоит ашәҟәы атекст аҿы.
