*** Ааԥхьара атекст нагӡаны иаҳәоит:
«Ҳаҭыр зқәу сыуаажәлар! Аполитикатә кризис аҭышәныртәалареи атәылауаа рыбжьара аҭынчра аиқәырхареи аиашареи азакәанреи реиҭашьақәыргылареи рзы имҩаԥгоу ауснагӡатәқәа рзы адырра шәысҭоит.
«Аԥсны Жәлар Реизара – Апарламент ҳара иқәҳаргылаз азакәан иаҵанакуа ҳадҵақәа рыдыркылеит, насгьы абҵарамзатәи аиқәшаҳаҭраҿы ишҳәоу еиԥш, алхратә кампаниа нҵәаанӡа акадртә ӡбарақәа рыдкыларазы аморатории шьақәнарӷәӷәеит.
Аԥсны Ахада иалхрақәа, уи азы азакәан инақәыршәаны, хәажәкырамза 1 азы имҩаԥысуеит, атәылауаа зегьы иаарԥшхо ргәазыҳәара рыдыркылароуп, уи зеиԥшрахозаалакгьы!
Сара соппоненти уи идгылаҩцәеи рахь схы нарханы аҳәара ҟасҵоит аҭынчра аадырԥшырц, амилаҭтә цәымӷра зырҿио аҳәамҭақәа ҟарымҵаларц, иара убас аиҿагылара зхылҿиаар алшо ажәақәеи аусқәеи рҽырцәырыхьчарц.
Даҽазныкгьы исҳәоит: амилаҭтә ҟазшьа змоу аиҿагыларақәа рылахәмарра ҟалаӡом!
Ахра Аҩӡбеи егьырҭ «Пиатнашка» иалоу аҷкәынцәеи Аԥсны ишатәылауаау, насгьы Рыԥсадгьыл аҿы аҟазаара азин шрымоу азгәасҭоит. Урҭ рганахьала амақарратә ҟазшьа змоу ацәажәарақәа ииашам. Урҭ рганахьала ииашам ажәакқәа рҳәара ҟалашьа амам.
«Алхратә кампаниа иалахәу аганқәа зегьы Аԥсны Аҳәынҭқарра Ахада иалхрақәа аҩбатәи ртур алҵшәақәа рҟны иаарԥшхо ауааԥсыра ргәазыҳәара рыдыркылароуп, уи зеиԥшрахозаалакгьы.
Ҳауаажәлар зегьы ртәылауаҩратә позициа аарԥшразы иҭабуп ҳәа расҳәоит! Ҳара жәларык ҳауп, ҳаидгыланы ауп ауадаҩрақәа зегьы риааира, атәыла иҭышәынтәалоу аҿиарахь анагара анҳалшо», — ҳәа иажәа хиркәшеит Бадра Гәынба.
