Аҟәа. Жәабранмза 18, 2025 шықәса. Аԥсныпресс. Жәлар Реизара-Апарламент адепутатцәа «Аҳәынҭқарра Ахада инапынгҵақәа назыгӡо, Аҳәынҭқарра Ахадарахь акандидатцәа, иара убас Аԥсны атәылауаа зегьы рахь ааԥхьара аҟаҵара азы» ақәҵара рыдыркылеит.
Ааԥхьара атекс иаҳәоит:
«Ареспублика Аԥсны Жәлар Реизара-Апарламент, имҩаԥысуа алхратә процесс азинтә шьаҭақәа реиқәырхара ахымԥадатәра шьақәырӷәӷәо, Аҳәынҭқарра Ахадарахь акандидатцәеи урҭ рыштабқәеи рахь аҭынчра ахьчара, азакәанқәа рықәныҟәара, иара убасгьы дарбанзаалак атәылауаҩ имилаҭра, идинхаҵара, идеологиа, егьырҭ игәаанагарақәа ирмыхәаԥшкәа ргәазыҳәара хақәиҭрала аарԥшра апринципқәа рықәныҟәаразы аҭагылазаашьа аԥырҵарц, иара убас абҵарамза 19, 2024 шықәсазтәи аиқәшаҳаҭрақәа ирықәныҟәаларц азы ааԥхьара ҟаҳҵоит.
Убасҵәҟьа, ауаажәларратә ҭагылазаашьа аибарххара аҟынӡа анамгара азы Аҳәынҭқарра Ахада инапынҵақәа назыгӡо Валери Бганба иахь ааԥхьара ҟаҳҵоит хыхь иарбоу акомпромисстә еиқәшаҳаҭра инақәыршәаны, иалху Ахада имаҵура нап аиркаанӡа иарбанзаалак акадртә ӡбамҭак идимкыларц.
Ареспублика Аԥсны атәылауаа зегьы рахь аҳәара ҟаҳҵоит иаанхаз алхратә аамҭахәҭа азы ачҳареи аҽынкылареи аадырԥшырц».
Ааԥхьара атекст ахәаԥшра иалагаанӡа Апарламент Аиҳабы Лаша Ашәба иҳәеит:
«Шәара ижәдыруеит, иацы акадртә еиҭакрақәа – Аҳәынҭқарратә шәарҭадара Амаҵзура ахантәаҩы ҿыц инапынҵақәа назыгӡо иаҭареи аԥыза-министр ихаҭыԥуаҩ инапынҵақәа назыгӡо иаҭареи ирыдҳәаланы иҟалаз ахҭысқәа ртәы. Еиуеиԥшым аполитикатә мчрақәа, алхратә штабқәа, Аҳәынҭқарра Ахада инапынҵақәа назыгӡо рыҿцәажәарақәа мҩаԥысит.
Зегьы иаадыруеит абҵарамза 19 рзы атәылахьчара Аминистрра аплошьадкаҿы Апарламент аԥшьгарала анапхгареи аоппозициеи рыбжьара ишиашоу аиҿцәажәарақәа шеиҿкааз. Уаҟа аиқәшаҳаҭрақәак бжьаҵан. Уи иабзоураны атәыла аҩныҵҟа аҭагылазаашьа аҭышәантәалара алыршахеит. Иахьа сара сгәаанагарала, Апарламент аҿаԥхьа, ахыдҵа аҳасабала ҩаԥхьа аиԥш-зеиԥшу афункциа ықәгылоуп. Алхрақәа рҟынӡа иаанхеит ҩымчыбжь инеиҵаны. Сара сгәаанагарала, ҳара иҭышәынтәалоу аҭагылазаашьаҿы Аҳәынҭқарра Ахада иалхрақәа аҩбатәи атур аҟынӡа ҳнаӡароуп. Ари даараӡа акыр ананагоит Аԥсны жәлар зегьы рзы адагьы, ҳара ҳастратегиатә партниор Урыстәылатәи Афедерациа азыҳәангьы, иааизакны атәыла аҿы аҭынчреи аҭышәынтәалареи рышьақәыргылара азы.
Убри инамаданы, Жәлар Реизара-Апарламент Аҳәынҭқарра Ахада инапынгҵақәа назыгӡо, Аҳәынҭқарра Ахадарахь акандидатцәа, иара убас Аԥсны атәылауаа зегьы рахь ааԥхьара аҟаҵаразы аԥшьгара адгалара мҩаԥнагоит».
Иарбоу ааԥхьара азы рыбжьы арҭеит 28-ҩык рҟынтәи 27-ҩык аилатәараҿы иҟаз адепутатцәа, аӡәы абжьыҭара ихы алаимырхәӡеит.
