«Ас еиԥш аусеицуреи ареспублика иахьаҵанакуа ателемидицина аҿиареи ирыбзоураны, ҳара ҳҳақьымцәа Урыстәылатәи Афедерациа инагоу амедицинатә усбарҭақәа рҟынтәи рколлегацәа рганхьала хра злоу аконсультациақәа роулартә еиԥш аҭагылазаашьа аԥҵахоит», – ҳәа инаҵшьны иазгәеиҭеит Едуард Быҭәба.
Жәабранмза алагамҭазы Москва ақалақь аҿы имҩаԥысит агәабзиарахьчара аминистр Михаил Мурашкои Аԥсны аполитикатә усзуҩ Бадра Гәынбеи реиԥылара. Араҟа ирылацәажәеит ареспублика агәабзиарахьчара асистема аҿиара азы ԥхьаҟатәи апланқәа. Иара убас уи аԥхьа имҩаԥысит Михаил Мурашкои Едуард Быҭәбеи русуратә еиԥылара. Араҟа урыстәылатәи аспециалистцәа алархәны Аԥсны ателемедицинатә консультациақәа рымҩаԥгара азҵаара шьҭыхын. Инарҭбаау аформат ала ателемедицинатә консультациақәа аҳәынҭқаарақәа рыбжьара аусецура ихадоу ахырхарҭақәа иреиуахоит.
