Аҟәа. Цәыббрамза 10, 2024 шықәса. Аԥсныпресс. Сергеи Шамба  ҳтәылақәа рыбжьара адипломатиатә еизыҟазаашьақәа шьақәгылеижьҭеи 15-шықәса ахьҵыз инамаданы Боливариантәи Ареспублика Венесуела Адәныҟатәи аусқәа рминистр Иван Хиль иахь адныҳәаларатә шәҟәы наишьҭит.

Анотаҟны иаҳәоит:

«Аԥсны ажәлар рзы иахьатәи амш акраҵанакуеит. 2009 шықәса цәыббра 10 азы Аԥсны аҩыза ду, Венесуела ажәлар раԥхьагылаҩ, акоманданте Уго Рафаель Чавес Фриас зхадараҿы дыҟоу, ахьыԥшымрахь амҩа иацу аԥышәарақәеи ауадаҩрақәеи бзианы издыруа Венесуела ауааԥсыра иазхарҵеит Аԥсны ажәлар ахақәиҭреи ахалаҟазаареи рзин шрымоу.

Аҟәа. Цәыббрамза 10, 2024 шықәса. Аԥсныпресс.  Гәдоуҭа араион, Лыхны ақыҭан, 40 инарзынаԥшуа аҭаацәара ахьынхо  Аџьамҽыӷра аҳаблаҿы, Аҳәынҭқарра Ахада иҟаиҵаз адҵа   инақәыршәаны афымцатә цәаҳәақәа реиҭарҿыцра иалагеит ҳәа иаанацҳауеит Аԥсны ахада ипресс-маҵзура.

Акыр шықәа раахыс ари аҳабла ауааԥсыра афымцамч илаҟу амчхара иадҳәаланы ауадаҩрақәа рыман.

Лыхны ақыҭа ахада ихаҭыԥуаҩ Ахра Бганба ишазгәеиҭаз ала, «Афымцамч аганахьала даара ауадаҩрақәа рацәан, аҳабла ауааԥсыра уи азымхара ӷәӷәала ирныԥшуан». Аиҳарак ауадаҩрақәа зыхҟьоз иамаз ақәыӷәӷәара ззымычҳауаз атрансформатор акәын.

«Афымцацәаҳәақәеи атехникеи акыр иқәсхьан, Ареспубликатә Унитартә Наплакы «Амшынеиқәафымцамч» афымцацәаҳәа зегы шьаҭанкыла аԥсахразы аӡбамҭа аднакылеит, – ҳәа адырра ҟаиҵеит Гәдоуҭатәи афымцацәаҳәақәа реихшарҭа аиҳабы Ахра Гагәылиа.  –  Аҭыԥ арелиеф  ауадаҩрақәа ацуп, аха, аспециалистцәа русуреи аҭыԥантәи ауааԥсыра иаадыԥшуа аилкаареи ачҳареи ирыбзоураны иарбоу апроект қәҿиарала анагӡара мҩаԥысуеит».

Аҟәа. Цәыббрамза 10, 2024 шықәса. Аԥсныпресс. Аԥсны аҿари аспорти русқәа рзы Аҳәынҭқарратә Еилакы ахантәаҩы Ҭарашь Ҳагба цәыббрамза 10 рзы Баиконур ақалақь ахада  Константин Бусыгин диԥылеит.

Аиԥылара рхы аладырхәит иара убас Баиконур ақалақь ахада ихаҭыԥуаҩ Николаи Адасеви Аԥсны аҿари аспорти русқәа рзы Аҳәынҭқарратә Еилакы аҿартә ҟәша аиҳабы Идрис Кара-Осман-оглыи.

Николаи Адасев Адунеизегьтәи аҿар Рфестиваль аҿы баиконуртәи аделегациа напхгара аиҭон. Баиконурап Адунеизегьтәи аҿар Рфестиваль аҿы аԥснытәи аделегациа ахылаԥшреи адгылареи  рырҭон.

Аҟәа. Цәыббрамза 10, 2024 шықәса. Аԥсныпресс. Цәыббрамза 10 рзы иира Амш азгәеиҭоит аԥсуа шьапылампыл алегенда, Асовет Еидгыла аспорт азҟаза, жәларбжьаратәи акласс аспорт азҟаза, Асовет Еидгыла ачемпион, Асовет Еидгыла Ахраҿа занашьоу, Асовет Еидгыла, Ихьыԥшым Аҳәынҭқаррақәа Реиҩызара, Украина, Урыстәыла еизгоу амилаҭтә командақәа ԥшьба рыхәмарыҩ иаҳасабала Гиннес ирекордқәа рышәҟәы иалалаз Ахрик Цәеиба.

Ахрик Цәеиба  диит цәыббрамза 10, 1966 шықәса рзы Гәдоуҭа ақалақь аҿы. Ашьапылампыл ахәмарра далагеит 11 шықәса анихыҵуаз. 17 шықәса анихыҵуаз иара усҟан Асовет Еидгыла ачемпионат аҩбатәи алига аҿы иқәгылоз аҟәатәи «Динамо» аҿы ахәмарра азы ааԥхьара ирҭеит.

«Аҟәатәи акоманда азы саныхәмаруаз ауп сара Қарҭтәи аселекционерцәа рылаԥш саныҵашәаз. Аха урҭ ираԥысит Хабаровск аҟынтәи азыҟаҵаҩцәа. Хабаровсктәи аратә спорттә Клуб (СКА) усҟан актәи алига аҿы иқәгылон. Саргьы еиҳау аҩаӡараҿы схы ԥысшәарц сҭахын. Насгьы аррахь ааԥхьара аамҭагьы ааигәахон. Сара аҟәатәи «Динамо» аҿгьы арра аҟынтәи сацәырыхьчар ауан. Аха Хабаровстәи ашапылампылтә Клуб исыдыргалаз сара еиҳа сыхшыҩ азцеит. Иарбоу аклуб ахәмарҩцәа усҟан иазыҟаиҵон еицырдыруаз азыҟаҵаҩ Леонид Назаренко. Аиашазы, сара Хабаровск шықәсыбжак роуп сахьыхәмаруаз. Сара ҩаԥхьа сыргәаларшәеит Қарҭ. Хара имгакәа сара «Динамо» ашҟа амҩа сықәлеит… Исгәалашәоит раԥхьаӡа акәны қарҭаа разыҟаҵара ашҟа раԥхьатәи сытренер Владимир Шамба сышнеигаз. Уи, иазәаҭатәуп, ирацәаны еицырдыруа ааӡамҭацәа имоуп: Гогричиани, Ҳагба, Гәыбаз. 1988 шықәсазы ҳара зегьы акоманда «Динамо» ихадоу аилазаара аҿы ҳахәмаруан.  Владимир Асҭамыр-иԥа даараӡа ҳақәҿиарақәа дреигәырӷьон…», - ҳәа игәалаиршәоит Ахрик Цәеиба.

Аҟәа. Цәыббрамза 10, 2024 шықәса. Аԥсныпресс. Ганрацәалатәи амашьынақәа роушьҭра-гәаҭаратә Ҭыԥ «Адлер» аҿы урыстәылатәи аҳазалхыҩцәа иааныркылеит Аԥсныҟа иаауаз автомашьына  CHEVROLET CAPTIVA.  Аҳазалхратә гәаҭара ахысра аламҭалазы амашьынарныҟәцаҩ апассаџьыртә ҳазалхратә декларациа хаимырҭәааӡеит, иагьалаимҵаӡеит.

Аинспектор аҳазалхратә шәҟәҭагалара зҭаху атаурақәа рзы иҟаиҵаз азҵаара аҭакс ахаҵа ус еиԥш иҟоу имаӡам ҳәа иҳәеит. Ахаҵа ианиазҵаауаз игәарҭеит агәҭынчымра шааирԥшуаз, убри азы уи дзықәтәаз амашьына амобилтә аинспекциа-гәаҭаратә комплекс ахархәарала агәаҭарахь идәықәырҵеит.  Асканерҵыхра ашьҭахь еилкаахеит атранспорттә хархәага аԥсахгатә барбал аҿы ишәшьырку азона шыҟоу, уи иаанагоз изакәанымкәа атауар аиагаразы аҽазышәара афакт ҟалар алшоит ҳәа ауп. Абри азы адырра ҟанаҵоит Шәача ақалақь аҿы Краснодартәи атәылаҿацә апресс-маҵзура.

«Амашьына аидараҭыԥ аҿы иҭаз аԥсахгатә барбал аҩныҵҟа иҭаҵәахын насваи ҳәа изышьҭоу аҭаҭынтә еиларшьышьы зҭаз ааилаҳәарақәа, – ҳәа адырра ҟаиҵеит Краснодартәи атәылаҿацә аҳазалхра иатәу Ганрацәалатәи амашьынақәа роушьҭра-гәаҭаратә Ҭыԥ «Адлер» аиҳабы Алеқсеи Быков. – Абарбал аҩныҵҟа иҭыргеит 20 кьыла инарзынаԥшуа хыхь зыӡбахә ҳәаз амаҭәашар».

Аҟәа. Цәыббрамза 10, 2024 шықәса. Аԥсныпресс. Аҟәа ақалақь, аԥкьаҭмпылтә клуб «Аҟәа» акортқәа рҿы Москва ақалақь Амш азгәаҭара инамаданы аԥкьаҭмпыл азы ахәыҷтәы турнир аатит.

Аицлабрақәа рхы аладырхәуеит ақәратә категориақәа ҩба ирыҵанакуа ахәыҷқәа. «Москва Аҩны» адиректор Алеқсандр Бигәаа Аԥсныпресс акоррепондент диҿцәажәо атурнир атәы еиҭеиҳәеит.

«Ари шьҭа ахԥатәи атурнир ауп ҳара ҳкоманда аиҿкаарала имҩаԥысуа. Аԥхьанатә уи Ахәыҷқәа рыхьчара Жәларбжьаратәи Амш азгәаҭара аҳәаақәа ирҭагӡаны имҩаԥысуан, аха сынтәа уи Москва ақалақь Амш азгәаҭара иазхоит.

Иалахәуп 45-ҩык ахәыҷқәа қәрала еихшаны. Атурнир мҩаԥысуеит ақәратә категориақәа ҩба ирыҵанакуа ахәыҷқәа рыбжьара: 8 – 10 шықәса зхыҵуеи 10 – 13 шықәса зхыҵуеи рыбжьара.  Аҷкәынцәеи аӡӷабцәеи хазы-хазы еицлабуеит. иара убас еилоу аеихацалаку аицлабрақәагьы мҩаԥгахоит», - ҳәа иҳәеит Алеқсандр Бигәаа.

Абар шьҭа ҩы-шықәса инеиԥынкыланы атурнир аӡбаҩ хаданы дыҟоуп  – аԥышәа ду змоу, Ашлем Дууи Аолимпиадеи рҿы уахь иналаҵаны, урыстәылатәии жәларбжьаратәии атурнир дуқәа рҿы ас зухьоу аспециалист.

«Атурнир хымш имҩаԥыслоит. Аиааирагаҩцәеи аԥхьахәгаҩцәеи аҳамҭақәа – ахраҿақәеи амедалқәеи ранашьахоит», – ҳәа иеиҭеиҳәеит Алеқсандр Бигәаа.

Аҟәа. Цәыббрамза 10, 2024 шықәса. Аԥсныпресс. Цәыббрамза 10 Венесуела Аԥсны Аҳәынҭқарра ахьыԥшымра азханаҵеижьҭеи 15 шықәса ҵит. Венесуела – ахԥатәи тәылахеит ҳхьыԥшымра азхазҵаз, Урыстәылеи Никарагуеи раамышьҭахь. Анаҩс Аԥсны ахьыԥшымра азхарҵеит Вануату, Науру, Тувалу, Шьамтәыла.

Цәыббрамза 10, 2009 шықәса рзы Боливариантәи Ареспублика Венесуела Аԥсни Аахыҵ Уаԥстәылеи рхьыԥшымра азханаҵеит. Уи ҟалеит  Венесуела Ахада Уго Чавес Москва иҟазаараан.

Аҟәа. Цәыббрамза 10, 2024 шықәса. Адәныҟатәи аусқәа рминистр Сергеи Шамба Вальдрак Џьентск Уитакер Ареспублика Никарагуа Адәныҟатәи аусқәа рминистрс иалхра идиныҳәалеит.

Аҟәа. Цәыббрамза 6, 2024 шықәса. Аԥсныпресс.  Шьамтәыла иҟоу Аԥсны Ацҳаражәҳәарҭа аԥсуа-адыга диаспора аҟынтәи ашколхәыҷқәа рзы агәыҳалалратә усмҩаԥгатә мҩаԥнагеит. Кудсиа араион аҿы аҵарашықәс ҿыц алагамҭазы, алагарҭатәи аҽазыҟаҵаратәи аклассқәа рҿы итәоу 150-ҩык ахәыҷқәа ашколтә маҭәахәқәа рыҭан. Аԥсны ацҳаражәҳәаҩ Муҳаммад Али ахәыҷқәа рҵараҿы ақәҿиарақәеи аихьӡарақәеи рзеиӷьеишьеит.

Аҟәа. Цәыббрамза 6, 2024 шықәса. Аԥсныпресс. Атуризм Аԥсны акыр зҵазкуа аекономика аусхкқәа иреиуоуп, уи атәыла аекономика амодернизациа аҿы ихадоу ароль нанагӡоит.

Аԥсны атуризм аконкурентлшара змоу аԥыжәарақәак амоуп, урҭ рхыԥхьаӡараҿы иҟоуп иманшәалоу аԥсабаратә ҭагылазаашьақәа, — убас игәаанагара иҳәеит Аԥсны атуризм аминистр Ҭеимураз Хьишба. Уи игәаанагара ркьыԥхьит акьыԥхьтә ҭыжьымҭа «Абхазия 24» адаҟа аҿы. Аминистр иажәақәа рыла, атуристтә усхкы аҿы аусура адырреизактә рбагақәагьы уи аҿиара хра злоу адинамика шыҟоу шьақәнарӷәӷәоит. Иазгәаҭатәуп, аԥснытәи аексперттә еилазаара атуризм амилаҭтә економика алакомотив аҳасабала ишахәаԥшуа, уи залыршахазгьы Ареспублиа Аԥсны анапхгарала мҽхакы ҭбаала имҩаԥгаз амодернизациа ауп. Уажәшьҭа иарбоу аусхкы аҿаԥхьа ахыдҵа ҿыц ықәгылоуп — уи аинтернационализациа. Уи аиҳарак актуалра аиуеит Аԥсны атуроператорцәа жәпаҩык рзы Кипр, Ҭырқәтәыла, иара убас аиԥш-зеиԥшу ахырхарҭақәа рзы аеффективра злоу альтернативаны иахьыҟало ауп.

«Аԥсны аиашазы атуристтә лыԥшаахны иҟоуп. Аха иарбоу аусхкы инагӡаны арҿиара азы (аҵыхәтәантәи ашықәсқәаа рзы иҟаҵаз акыр ишырацәазгьы) арегион атуристтә лшарақәа рзы адыррақәа еиҳа инарҭбааны Ҭырқәтәылантәи арепатриантцәа рыдагьы егьырҭ,  Ааигәа Мрагылара, Азиа, Европа атәылақәагьы ирызкны аҳәаанырцтәи аудиториа рыларҵәара хымԥадатәиуп», — ҳәа инаҵшьны иазгәеиҭеит аминистр.

Аус злоу атуристцәа радыԥхьалара агеографиа мацара акәӡам, Аԥсны атуризм арҿиара аинтенсификациа азы аиҳарк аеффективра злоу, адинамикатә ҟазшьа змоу, алҵшәа бзиа аазырԥшуа аинструментари аԥшаара аҭахуп.  Хымԥада иаԥҵатәуп абас еиԥш иҟоу , аамҭа кьаҿ иалагӡаны аиашазы иарбоу аусхкы азы акыр аамҭа ишьақәгыланы иҟазаауа аеффект аазырԥшуа аҭагылазаашьақәа аԥҵатәуп.  Иарбоу аинструментари иазԥхьагәанаҭозароуп истандартым азнеишьақәеи аресурсқәеи.