Аҟәа. Абҵарамза 22, 2024 шықәса. Аԥсныпресс. Гагра араион Бзыԥҭа аҳаблаҿы инхо аишьцәа Ардаши Бориси Дудукчианаа ахылаԥшратә хықәкытә программа «Ақыҭанхамҩа аҿиара» аҳәаақәа ирҭагӡаны амандаринақәа раарыхра апроект анагӡара иаҿуп. Аҵиаақәа реиҭаҳатәқәеи егьырҭ ихымԥадатәиу аматериалқәеи анроу ашьҭахь, дара рбаҳчара арҭбаареи рҳабла ақыҭанхамҩа аҿиара рлагала алагалареи рыӡбеит.
«Гагра араион Ахадараҿы ақыҭанхамҩа аҿиара адгылара иазырхоу апрограмма аҟазаара атәы анеилаҳкаа ашьҭахь, ҳара иаразнак апроект алахәхаразы аӡбамҭа ҳадаҳкылеит. Ҳара уи аамҭазы ҳаҩны азааигәара мыцхц идуумыз ашәырбаҳча ҳаман, уи арҭбаара азы агәазыҳәара ҳазцәырҵит. Ҳара ҳқыҭа, ҳтәыла азы, иара ҳхаҭақәа ҳзы хра злоу џьара акы аҟаҵара ҳҭахуп», - ҳәа иҳәеит Борис Дудукчиан.
2,5 гектар рҟынӡа инаӡо адгьылҵакыра аҿы аишьцәа еиҭарҳаит 1200 шьапы «Сентябрьский» ҳәа изышьҭоу, заа иҟало амандарина ахкы. Урҭ рахьынтә 1000 шьапык ибзианы ршьапы ркит, иаанхаз 100 шьапык иҟалар зылшо ацәыӡ ахарҭәаара иазкуп.
«1000 ҵлашьапы ршьапы ркыр, уи даараӡа ибзиоу лҵшәахоит», - ҳәа иҳәеит Борис Дудукчиан.
Амандарина ашьапқәа еиҭаҳан 2023 шықәсазы. Раԥхьатәи ашәыр аҿалара иазыԥшуп ҩба-хԥа шықәса рышьҭахь.
«Актәи ашықәс азы аҵлақәа уи аҟара ахылаԥшра рҭахӡам, аҵакыра ажәырҭра аҟынтәи арыцқьара ада, зегьы ирыцку – аҵиаа ҿыцқәа рԥырхагамхара ауп», - ҳәа иазгәеиҭеит Борис.
Аҵиаақәа реиҭаҳатәқәа рыдагьы Аԥсны ақыҭанхамҩа Аминистрра Ардаши Бориси иара убас аҭахкааразы амаҭәахәгьы рзоунажьит, уи апроект анагӡара акыр иацхрааит.
«Ҳара ас еиԥш адгылара ахьҳауз даара гәахәарыла иҳадаҳкылеит, ҷыдала иҭабуп ҳәа иаҳҳәар ҳҭахуп Гагра араион ахада Иури Ҳагәышь иҟаиҵаз адгылара азы», - ҳәа инаҵшьны иазгәарҭеит аишьцәа Ардаши Бориси Дудукчианаа.
