Аҟәа. Абҵарамза 22, 2024 шықәса. Аԥсныпресс. Аԥсны апрокурор Хада актәи ихаҭыԥуаҩ Дамир Кәыҵниа Жәлар Реизара-Апарламент адепутат Кан Кәарҷиа Аконтрольтә Палата аҟынтәи инашьҭыз аҳәынҭқарратә мазара аимҵәара иазку 20 инарзынаԥшуа аусқәа рзы аилыргарақәа мҩаԥысӡом ҳәа иҟаиҵаз аҳәамҭа ҵаҵӷәы амаӡам ҳәа иазгәеиҭеит. Дамир Кәыҵниа, ари аинформациа мцыркуп ҳәа иҳәеит: «апрокуратура аусбарҭақәа рахь инашьҭхо арзаҳалқәа зегьы иахәҭоу азхьаԥшра роуеит, акагьы хшыҩзышьҭрада иаанхаӡом».
Иара ишазгәеиҭаз ала, Аконтролтә Палата апрокуратура ахь ишиашоу аусқәа дәықәнаҵаӡом. Уи агәаҭарақәа рышьҭахь агәаҭаратә усмҩаԥгатәқәа рзы актқәеи аҳасабырбақәеи раҳасабала аинформациа аанашьҭуеит. Дамир Кәыҵниа Каха Пертаиа напхгара зиҭо Аконтрольтә Палата Апрокуратура Хада ахь 10 материалк роуп идәықәнаҵаз ҳәа иазгәеиҭеит.
Аха ҩ-уск рҿы мацара ауп аудиторцәа аҳәынҭқарратә мазара аимҵәара аҟазшьақәа ахьаадырԥшыз. Апрокурор Хада, иара иажәақәа рыла, Аконтрольтә Палата анапхгаҩи иареи еимадоуп, русеицурагьы хра злоу алҵшәақәа аанарԥшуеит:
«Ҳара апрокуратура аусбарҭақәа рҿы аилыргара иахысуа аматериалқәа ирыдҳәаланы аиԥыларақәа еиҿаҳкаауеит, имҩаԥаагоит. Иарбоу аусқәа рӷьырак ала Аконтрольтә Палата аиҳаби апрокуротуреи аилибакаара рыбжьоуп. Уимоу, иазгәасҭарц сҭахуп даҽакгьы. Апрокурор Хада ҳхылаԥшырҭақәа рыбжьара аиқәшаҳаҭра абжьаҵара аганахьа аусура ахацыркра аԥшьигеит, иарбоу апроект аиқәыршаҳаҭразы иахәҭоу апроцедурақәа зегьы ирхысит. Уажәазы уи анапаҵыҩра иазырхиоуп, хықәкы хадасгьы иамоу ҳусеицура аҩаӡара ашьҭыхра ауп», - ҳәа иазгәеиҭеит Дамир Кәыҵниа.
Иажәа иацҵо, Дамир Кәыҵниа иара убас Аконтрольтә Палата аспециалистцәа ззанааҭдырра аҩаӡара ҳараку уаауп, урҭ мҽхакы ҭбаала аусура нарыгӡахьеит, афинанстә еилагарақәа рацәаны раарԥшра рылшеит ҳәа инаҵшьны иазгәеиҭеит. Дамир Кәыҵниа иажәақәа рыла, аиҳарак аимак-аиҿак цәырызго зҵаарақәаны иҟоуп абиуџьеттә ԥаратә хархәагақәа иарбоу ахықәкы азы акәымкәа даҽаџьара азоужьра иадҳәалоу афактқәа раарԥшра.
«Ҳара ҳазхиоуп Аконтрольтә Палата анапхгаҩи аудиторцәеи алархәны ҳусеицура аҳәаақәа ирҭагӡаны ицәырҵуа азҵаарақәа зегьы рылацәажәара, иара убас иҳадаҳкыло аӡбамҭақәа зегьы рзы аҭак аҟаҵарагьы ҳазхиоуп», - ҳәа инаҵшьны иазгәеиҭеит иара.
Дамир Кәыҵниа иҟаиҵаз адыррақәа рыла, уажәы материалқәак рыла аусеилыргатә Усбарҭеи азакәанԥҵара анагӡара ахылаԥшра азы Аусбарҭеи рҿы аусеилыргара мҩаԥысуеит. Апрокуратура Хадеи амчратә структурақәеи реидҳәалазаара аганахьала иҟоу аҳәамҭақәа ҵаҵӷәыркӡам.
«Ацифрақәа – узахымԥо усны иҟоуп, урҭ ацәгьоурақәа рхыԥхьаӡара акыр ишеиҵахаз шьақәдырӷәӷәоит, ҷыдала ихьанҭоу ацәгьоурақәагьы уахь иналаҵаны. Ахылаԥшырҭақәа рыбжьара аимадара аҟазаара ахылаԥшратә функциақәа рымҩаԥгара акала иаԥырхаганы иҟаӡам. Уи арҵабыргуеит аҩныҵҟатәи аусқәа Рминистрреи аҳәынҭқарратә шәарҭадара Амаҵзуреи русзуҩцәа адисциплинартә хьырхәра рақәыршәаразы апрокурор Хада хыԥхьаӡара рацәала иқәиргылахьоу адҵақәа, агәҽанызаарақәеи азԥхьанҵақәеи», - ҳәа иҳәеит иара.
