Абҵарамза 22 рзы иҟоу адыррақәа рыла Аԥсны аҳазалхратә шәарақәа раҳасабала 3,6 млн мааҭ ахыԥхьаӡалоуп.

Хьециа иажәақәа рыла, аҳәаа иахыгоу амандарина быжь-нызқь тоннак еиҳауп, ари ҵыԥхтәи арбагақәа раасҭа ҩ-нызқь тонна рыла еиҳауп.

Ашәахтәқәеи аизгақәеи рзы аминистр инапынҵақәа назыгӡо Михаил Габелиа иҟаиҵаз адырррақәа рыла, абҵарамза 20 рзы ашәахтә шәатәқәа раҳасабала  атәыла абиуџьет иалагалахеит 5 млрд. 600 млн. мааҭ рҟынӡа инаӡо аԥаратә хархәагақәа, убри аан планла иазԥхьагәаҭан - 4 млрд. 986 млн. мааҭ.  

«Абҵарамза 20-мыш рыла абиуџьет иҭалеит 324 миллион мааҭ», - ҳәа иажәа иацҵо иазгәеиҭеит Михаил Габелиа.

Аԥсны агәабзиарахьчара аминистр инапынҵақәа назыгӡо Едуард Быҭәба урыстәылатәи ахәышәтәырҭақәа рахь зышьҭра азԥхьагәаҭаз апациентцәа зегьы Урыстәыла ахәышәтәра иахысуеит ҳәа иазгәеиҭеит.

Уи иажәақәа рыла, аԥсуа ган аҟынтәи ауал ахьыҟаз инамаданы уадаҩрақәаук ахьцәырҵқәаз ыҟоуп, аха урҭ аӡбара алыршахеит.

Аԥсны асоциалтә еиқәыршәара аминистр Руслан Аџьба абҵарамзазы атәанчахәқәеи аԥаратә цхыраагӡатәқәеи ршәара аганахьала аиҵахара ҟамлаӡеит ҳәа адырра ҟаиҵеит.

«Абҵарамзазы атәанчахәқәа ршәаразы ареспублика Атәанчаҩратә Фонд аҟынтәи афинансыркра аицҵалыҵ 136,3 миллион мааҭ рҟынӡа инаӡеит. Аԥаратә цхыраагӡатәқәа Ареспубликатә биуџьет аҟынтәи рфинансыркара аицҵалыҵ — 17,8 миллион мааҭ рҟынӡ?а инаӡоит», - ҳәа иҳәеит сказал Руслан Аџьба.

Аҩныҵҟатәи аусқәа рминистр инапынҵақәа назыгӡо Роберт Киут аҩныҵҟатәи аусқәа Рминистрра аусбарҭақәа русура аганахьала аҭагылазаашьа ҭышәынтәалоуп ҳәа адырра ҟаиҵеит.

«Аҩныҵҟатәи аусқәа Рминистрра иазԥхьагәаҭоу аплан инақәыршәаны абжьааԥнытәи арежим ала аус ауеит. Акызаҵәык уадаҩраны иҟоу абылтәы ахәԥса аганахьала иҟоу ауал ауп. Уи азы аагаҩцәа рҟынтәи ашәҟәы ҳауит. Егьирахь зегьы ҭышәынтәалоуп», - ҳәа иҳәеит Роберт Киут.

Арепатриациа азы Аҳәынҭқарратә Еилакы ахантәаҩы инапынҵақәа назыгӡо Вадим Ҳаразиа аҩныҵҟатәи аусқәа Рминистрра ахада арепатриант Али Кәыџба иқәмақарра иадҳәаланы иҟалаз аинцидент аилыргара шԥамҩаԥысуеи ҳәа дизҵааит.  Аҩныҵҟатәи аусқәа рминистр инапынҵақәа назыгӡо Роберт Киут иарбоу аинцидент аилыргаразы, Али Кәыџба иқәмақаруаз ауаа рышьақәыргылареи раанкылареи рзы иахәҭоу аоператив-ԥшааратә усмҩаԥгатәқәа зегьы мҩаԥыргоит ҳәа аҭак ҟаиҵеит.

«Аҭагылазаашьа азхьаԥшрада иаанымхаӡеит, ҳара иҳалшо зегьы ҟаҳҵоит иарбоу аҭагылазаашьа ирласны аӡбара азы»,- ҳәа иҳәеит иара.