Аҟәа. Лаҵарамза 7, 2024 шықәса. Аԥсныпресс. Аҳазалхратә ҭыԥ «Аҳаирбаӷәаза Шәача»  аҿы Аԥсны аҳәынҭқарратә ҳазалхратә Еилакы аусзуҩцәа апассаџьырцәеи урҭ реидареи ргәаҭара амҩаԥгара азы аԥышәатә дыррақәа раиура азы рԥышәахысра мҩаԥысит. Абри азы адырра ҟанаҵоит Шәача ақалақь аҿы иҟоу Краснодартәи аҳазалхырҭа апресс-маҵзура.

Иарбоу аусмҩаԥгатә аиҿкааразы аԥсуа ган иҟанаҵаз ажәалагала ҳазҭоу ашықәс нанҳәамзазы имҩаԥысраны иҟоу аԥышәатә ԥыррақәа, иара убас  2025 шықәсазы иазԥхьагәаҭоу Аҟәатәи аҳаирбаӷәаза аартра иадҳәалоуп. Аԥснытәи аделегациа аилазаараҿы иҟан Аҳазалхратә шәҟәҭагалареи аҳазалхратә гәаҭареи рзы Аусбарҭа Хада аҳазалхратә ҭыԥ «Аҟәа» аиҳабы Ҭемыр Амҷба,  иара убас Аусбарҭа аҟәшақәа рнапхгаҩцәеи аспециалистцәеи.

Аԥышәахысра амҩаԥгараан Аԥсны Аҳәынҭқарратә ҳазалхратә Еилакы амаҵурауааи аҳазалхратә ҭыԥ «Аҳаирбаӷәаза Шәача» аусзуҩцәеи аҳазалхратә гәаҭара амҩаԥгареи аҳаиртә транспорт ала еиҭаҵуа апассаџьырцәа, аидарақәа, анапылеидара рганахьала аҳазалхратә операциақәа рымҩаԥгареи  ирыдҳәалоу азҵаарақәа жәпакы ирылацәажәеит.  Аԥсуа ган аҳазалхратә ҭыԥ аусура атехнологиатә схема гәарҭеит, ҷыдала ахшыҩзышьҭра арҭеит аиҳарак ақәыӷәӷәара аныҟәоу аԥхынтәи аамҭахәҭазы аҳазалхратә гәаҭара иамоу аҷыдарақәа, иара убас апрограмматә хархәагақәа рфункционалтә лшарақәа.  

Аҟәа. Лаҵарамза 7, 2024 шықәса. Аԥсныпресс. Аҳәынҭқарра Ахада Аслан Бжьаниа Инал Арӡынба Аԥсны адәныҟатәи аусқәа рминистр имаҵзураҟынтәи ихы ақәиҭтәра азы Аусԥҟа инапы аҵаиҩит. Абри атәы аанацҳауеит атәыла ахада ипресс-маҵзура.

Аҟәа. Лаҵарамза 3, 2024 шықәса. Аԥсныпресс. Аҳәынҭқарра Ахада Мирра Хотелашвили-Инал-иԥа лыԥсҭазаара алҵра инамаданы адышшылара ҟаиҵеит.

Адышшыларатә цҳамҭаҟны, ҷыдала, иҳәоуп:

«Гәалсра дула сшәыдышшылоит иналукааша аҭоурыхҭҵааҩ, археологиа, Аԥсны акультура зҽаԥсазтәыз аусзуҩы, «Ахьӡ-Аԥша» аорден III аҩаӡара занашьоу Мирра Хотелашвили-Инал-иԥа лыԥсҭазаара алҵра инамадны.

Мирра Константин-иԥҳа лыԥсҭазаара зегьы аҭҵаарадырра иазкын. Ахә ашьара уадаҩуп аԥсуа жәлар рҭоурых-культуратә ҭынха,  ҳтәыла археологиеи аетнографиеи рыҭҵаареи реиқәырхареи рыҟны ллагаламҭа. 

Аҟәа. Мшаԥныҳәа 5, 2024 шықәса. Аԥсныпресс. Аԥсны Аҳәынҭқарра Ахада Аслан Бжьаниа Аԥсны жәлар Мшаԥныҳәа рыдиныҳәалеит.

Акыр иаԥсоу ҳауаажәлар!

Гәык-ԥсык ала ишәыдысныҳәалоит аԥсҭазаара ҿыц, ҩныҵҟала аиҭеира иазҳәоу Мшаԥы лаша аныҳәа ду!

Ари аныҳәа аԥсуа жәлар ҳзы жәытәнатә аахыс ныҳәа дуун, аныҳәақәа зегьы иреиҳан. Абри аҽны даҽа аамҭанык еиԥшымкәа зегьы ауаҩра, аилибакаара, аҳаҭыреиқәҵара реиԥш иҟоу аҵас бзиақәа ирымоу аҵакы ҳазхәыцуеит, урҭ рықәныҟәаразы агәаԥхара ҳауеит. Амшаԥ ныҳәа иацны ҩнаҭацыԥхьаӡа инеиааит агәыӷра лаша, анасыԥ. Ԥхаррала, бзиабарала иҭәызааит шәыгәқәа,

Аҟәа. Лаҵарамза 7, 2024 шықәса. Аԥсныпресс.    1941-1945 шш. Аџьынџьтәылатәи еибашьра Дуӡӡа аҿы Аиааира агара Амш 79-шықәса ахыҵра азгәаҭара аламҭалазы Очамчыра араион Кәтол ақыҭан,  1944 шықәсазы абарҭ аҭыԥқәа рҿы иҭахаз аԥырҩы, алеитенант Николаи Григори-иԥа Гаид еиҭашьақәыргылаз ибаҟеи  1992-1993 шш. Аԥсны жәлар Рџьынџьтәылатәи еибашьраан хатәгәаԥхарала Аԥсны еибашьуаз, иҭахаз Гальченко Иури Николаи-иԥа ибаҟеи раартра иазкны аныҳәатә усмҩаԥгатә мҩаԥысит, ҳәа адырра ҟанаҵоит Аԥсуа телехәаԥшра.

«Ҳара иахьа ҳаҭырла иаҳгәалаҳаршәоит усҟантәи аибашьраҟынтә изыхнымҳәыз. Иаҳгәалаҳаршәоит ҳветеранцәеи атыл аҿы аџьабаа ду збози аибашьра ахәыҷқәеи. Асовет Еидгыла усҟантәи аибашьра хлымӡаах аҿы аиааира агара алшеит, уи зыбзоурахаз ажәларқәа реидгылареи реиҩызареи ауп», – ҳәа агәалашәаратә митинг аҿы дықәгыло иҳәеит Очамчыра араион ахада Беслан Бигәаа.

«Николаи Гаида ифотосахьа сара абар шьҭа  45  шықәса раахыс иҵәахны исымоуп. Уи сара исылҭеит Николаи Григори-иԥа иаҳәшьа гәакьа Зоиа Григори-иԥҳа.   Ааигәанӡа уи иаҳәшьцәа есышықәса арахь иаалон. Иахьа-уажәраанӡа аимадара ҳабжьоуп Николаи Григори-иԥа иаҳәшьаԥҳаи сареи. Ҳара ахаангьы иаҳхашҭраны ҳаҟаӡам Зыԥсадгьыл ахьчара зхы ақәызҵаз Асовет Ар афицар, аԥырҩы Николаи Гаида еиԥш иҟаз арԥарцәа афырхацәа», –  ҳәа иҳәеит Кәтол ақыҭан инхо Вахтанг Кәарацхьелиа.

Аҟәа.  Лаҵарамза 2, 2024. Аԥсныпресс.  Атәыла аҩныҵҟатәи аусқәа Рминистрра аекономикатә шәарҭадареи акоррупциа аҿагылареи рыҟәша аусзуҩцәеи Аҳәынҭстандарт ахаҭарнакцәеи еицхырааны имҩаԥыргаз аоперативтә усмҩаԥгатә иабзоураны Гәдоуҭа араион Хыԥсҭа ақыҭан абнара иахьаҵанакуа ирыԥшааит акриптовалиута арҳара иазку амаининг-ферма.  Ззеиԥш мчхара 55 кВт/с. рҟынӡа инаӡоз 22 цыра аппарат Аԥсны аамҭала инхо Урыстәыла атәлауаҩ  Борисенко Владислав Павел-иԥа ишитәу еилкаахеит.  Аиқәыршәагақәа зегьы аконфискациа мҩаԥгоуп, Аҳәынҭстандарт ашьҭаҵарҭа ахь инагоуп.

Аҟәа. Мшаԥымза 30, 2024 шықәса. Аԥсныпресс. Афымцатә транспорт ала аныҟәара ахәԥса 10 -мааҭк рҟынӡа ихаргалеит.

Уи азы аӡбамҭа рыдыркылеит Аҟәатәи ақалақьтә Еизара адепутатцәа аҩаша, мшаԥымза 30 рзы.

Аҟәатәи ақалақьтә Еизара ахь атариф ашьҭыхразы аҳәара ҟаиҵеит Аҟәа ақалақь ахада Беслан Ешба нанҳәамза 25, 2023 шықәсазы Аизара ахь иааишьҭыз ашәҟәы ала.  Уаҟа, аҵыхәтәаны иарбоу атранспорт ала аныҟәаразы атариф аҽаԥсахит жьҭаарамза  22, 2013 шықәсазы ҳәа иазгәаҭан.  Усҟан уи х-мааҭк рҟынтәи хә-мааҭк рҟынӡа ишьҭырхит.

Аҟәа. Мшаԥымза 30, 2024 шықәса. Аԥсныпресс.  Аҟәа ақалақь, Пушкин имҩала игылоу, Амилаҭтә сахьатә галереиа иазоужьу ахыбра аҿы имҩаԥысит мшаԥымза 24 инаркны 29-нӡа имҩаԥысуаз Жәларбжьаратәи арт-пленер «Феникс» иалахәыз  русумҭақәа аихшьаалатә цәыргақәҵа.    Ацәыргақәҵа аҿы иқәыргылан 60 инарзынаԥшуа Аԥснытәи аҳәынҭқарратә Университет астудентцәеи арҵаҩцәеи, иара убас арт-пленер асасцәеи – Урыстәылеи Белорусиеи рҟынтәи асахьаҭыхыҩцәа русумҭақәа.   

ААУ аҟазарақәа рфакультет адекан Ныгәзар Логәуа иажәақәа рыла, ацәыргақәҵа  ажьырныҳәамза 21, 2024 шықәса рзы Аԥсны асахьаҭыхыҩцәа Реидгыла ахыбраҿы иҟалаз амцакра аҿы зфондқәа алаблыз Амилаҭтә сахьатә галереи адгылара аҭара иазкны еиҿкаахеит.

«Ари абылра ашьҭахь раԥхьатәи цәыргақәҵоуп. Ҳара ҳахь иааит Урыстәылеи Белорусиеи рҟынтәи аделегациақәа. Урҭ иҳахьыз арыцҳара иақәҿырҭит, ирылшо ала адгылара ҳарҭоит.  Ҳара гәахәарыла иҳадаҳкылоит Урыстәылеи Белорусиеи рҟынтәи ҳколлегацәеи ҳареи ҳаимадара ессааира ахьҽарҭбаауа», – ҳәа иҳәеит иара.

Жәларбжьаратәи арт-пленер алахәылацәа доусы ҩба-ҩба русумҭақәа Аԥснытәи аҳәынҭқарратә Университет аҟазарақәа рфакультет аҿы иаанхоит. Анаҩс ареспублика акультура Аминистрра аҩаӡараҿы акомиссиа аԥҵара азԥхьагәаҭоуп. Уи иалнахуеит ҳаԥхьаҟа Амилаҭтә сахьатә галереиа аҿы иқәыргылахо иреиӷьу аусумҭақәа.  

«Убас ала, ҳара маҷ-маҷ аиҭарҿиара амҩа ҳанылоит. Ҳара иҭабуп ҳәа раҳҳәоит адгылара ҳазҭаз зегьы», - ҳәа иҳәеит Ныгәзар Логәуа.

Ацәыргақәаҵа ахь иааиз аҳҭнықалақь ахада Беслан Ешба асасцәа рахь ихы рханы, ас еиԥш иҟоу ацәыргақәҵақәа ауаа еизааигәанатәуеит, еибанардыруеит, реиҩызара арӷәӷәоит, насгьы ҳҟазара еиҳа иҳараку аҩӡара аҟынӡа инанагоит ҳәа инаҵшьны иазгәеиҭеит.

Аҟәа. Мшаԥымза 30, 2024 шықәса. Аԥсныпресс. Гәдоуҭа араион аҩныҵҟатәи аусқәа Русбарҭа ашьаусԥшааратә ҟәша аусзуҩцәа Бамбора ақыҭан иҟалаз ацәгьоура аадыртит. Иаанкылоуп Лыхны инхо ҩыџьа ахацәа – 1978 шықәса рзы ииз Лакоба Вадим Алик-иԥа, 2004 шықәса рзы ииз Хьециа Ҭемыр Алхас-иԥа, ҳәа адырра ҟанаҵоит Аԥсны аҩнуҵҟатәи аусқәа Рминистрра апресс-маҵзура.

Аҟәа. Мшаԥымза 30, 2024 шықәса. Аԥсныпресс. Нестор Цужба аԥкьаҭмпыл азы урыстәылазегьтәи аицлабрақәа «Ааԥынтәи Ахраҿа» («Весенний Кубок») рҿы 13 шықәса зхыҵуа,  I А акатегориа иаҵанакуа рыбжьара, еилоу аихацалакытә аҩаӡара аҿы аџьазтә аԥхьахә игеит, ҳәа адырра ҟанаҵоит Аԥсны аҿари аспорти русқәа рзы Аҳәынҭқарратә Еилакы.