Аҟәа. Ԥхынҷкәынмза 9, 2024 шықәса. Аԥсныпресс. Аенергетикатә кризис иахылҿиааз аулафахәы ашәара, абылтәы ала аиқәыршәара, уҳәа азҵаарақәа ирылацәажәеит Аҳәынҭқарра Ахада инапынҵақәа назыгӡо Бадра Гәынба ихантәаҩрала имҩаԥысыз аусуратә еилатәара аҿы. Атәыла аԥыза-министр ихаҭыԥуаҩ, афинансқәа рминистр инапынҵақәа назыгӡо Владимир Делба актәи аетап ала аԥаратә хархәагақәа амчратә структурақәа русзуҩцәа ауалафахәы рызшәара ахь идәықәҵан, аҩбатәи аетап ала амиграциатә Маҵзура, Иҷыдоу аҭагылазаашьақәа рзы Аминистрра, Ашәахтәқәеи аизгатәқәеи рзы Аминистрра, Аҳәынҭқарратә ҳазалхратә Еилакы русзуҩцәа руалафахәы ашәара ахь адәықәҵара азԥхьагәаҭоуп ҳәа иазгәеиҭеит.
Аҵыхәтәантәи аетап аҿы аулафахәы рызшәахоит асоциалтә усхкы аҿы аус зуа аусузуҩцәа. «Аулафахәы ашәара аганахьала ишьақәгылаз аҭагылазаашьа шыуадаҩыц иаанхоит, аха ахылаԥшра аҵаҟа иҟоуп. Уажәы апроблема аӡбара иҟоу аресурсқәа рыла имҩаԥысуеит, ҳара аҳәынҭқарра аԥхықәрақәа рынагӡара аганахьала аусура иацаҳҵоит», — ҳәа инаҵшьны иазгәеиҭеит иара.
Аҵара аминистр инапынҵақәа назыгӡо Инал Габлиа атәыла аенергетикатә усхкы аҿы ишьақәгылаз иуадаҩу аҭагылазаашьа инамаданы, ԥхынҷкәынмза 11 инаркны 17 аҟынӡа аҵара апроцесс аанкылара азы аӡбамҭа рыдыркылеит ҳәа адырра ҟаиҵеит. Ас еиԥш аӡбамҭа ашколқәеи ахәыҷбаҳчақәеи рҿы ауадақәа рырԥхара аганахьала ицәырҵуа ауадаҩрақәа ирыдҳәалоуп. «Ҳара иназыцҵоу аканикулиартә аамҭа агара азы аԥшьгара ҟаҳҵоит, ҳарҵаҩцәеи ҳашколқәеи ҳколлеџьқәеи рдиректорцәеи ҳхәыҷбаҳчақәа реиҳабацәеи ирыдаагалоит аҵара апроцесс рнапаҵаҟа иргарц, ахәыҷқәа рыҩны рҽазыҟарҵаларц азы аусура аиҿкаара рыдаагалоит», - ҳәа иҳәеит Инал Габлиа.
Атәыла агәабзиарахьчара аминистр инапынҵақәа назыгӡо Едуард Быҭәба ахәышәтәырҭа дуқәа рҿы ишьақәыргылоу агенераторқәа иҭышәынтәаланы аус руеит, аха урҭ рылшарақәагьы ԥкуп ҳәа адырра ҟаиҵеит. Уи иажәақәа рыла, уажәазы абылтәы азымхара шыҟамгьы, усгьы ахәышәтәырҭақәа ареанимациатә ҟәшақәа русура азы мҽхакы ҭбаала абылтәы адгалара ахәҭаны иҟоуп ҳәа иазгәеиҭеит. Уи аиҳарак Ареспубликатә хәышәтәырҭа, ахшараиуратә ҟәша, агемодиализ аҟәша, ахирургиа аҟәша ауп изҵазкуа. Едуард Быҭәба иажәақәа рыла адизель-генераторқәа ахьыҟам, мамзаргьы зымчхара маҷу агенераторқәа ахьышьақәыргылоу ахәышәтәырҭақәагьы ыҟоуп ҳәагьы иациҵеит. «Аҭыԥантәи Ахадара абзоурала, 2-тәи ақалақьтә хәышәтәырҭеи Аҟәатәи аинфекциатә хәышәтәырҭеи адизель-генераторқәа роуит. Убасҵәҟьа аиԥш-зеиԥшу аиқәыршәагақәа шьақәыргылоуп иара убас апсихиатриатә хәышәтәырҭеи аонкологиатә диспансери рҿы», - ҳәа иазгәеиҭеит иара.
Бадра Гәынба афинансқәа рминистр инапынҵақәа назыгӡо амедицинатә маҵзурақәа рганахьала иҟоу ауалқәа ршәара алыршареи амедицинатә усбарҭақәа еиԥҟьарада абылтәы ала реиқәыршәара алыршареи рзы анапынҵа ииҭеит. Бадра Гәынба иажәақәа рыла, ареспубликатә медицинатә усбарҭақәа абылтәы ала реиқәыршәара азы уахыки ҽнаки рзы иаҭаххоит 5 тоннак инарзынаԥшуа абылтәы.
Атәыла аԥыза-министр инапынҵақәа назыгӡо Валери Бганба иахьазы Егрытәи Аӡфымцатә Станциа аҿы иҟоу аҭагылазаашьа азы адырра ҟаиҵеит. Уи Џьвартәи аӡеизакырҭа аҿы аӡы аҩаӡара акыр илаҟәны ишыҟац иаанхоит, уи ӷәӷәала агәҭынчымра узцәырнамгар залшаӡом ҳәа инаҵшьны иазгәеиҭеит. «Аҵыхәтәантәи адыррақәа рыла, аӡеизакырҭа иҭало аӡы амҽхак секундк ахь 35 кубометр рҟынӡа ауп иахьынаӡо. Уажәы аӡеизакырҭаҿы иҟоу аӡы аҩаӡара 409,8 метрак рҟынӡа инаӡоит, уи даара илаҟу аҩаӡараны иԥхьаӡоуп. Иҳаҩсыз уахыки ҽнаки рыла ҳара 2,5 миллион киловатт-сааҭ мацара ауп иҳауз, усҟан ҳара ианаҳҭаху 7,5 миллион киловатт-сааҭ. Уи иаанаго ҳара ҳхы иаҳархәоит 5 миллион киловатт-сааҭ рҟынӡа Урыстәылантәи иаауа афымцамч. Аха ҳара иаауа афымцамч ахәԥса ҳзымшәо ҳалагар, усҟан атәыла 2,5-3 миллион киловатт-сааҭ мацара ауп иаиуло, убри инамаданы ҳара афымцамч ахархәаразы инацҵаны аԥкрақәа алаҳгалар акәхоит», — ҳәа адырра ҟаиҵеит Валери Бганба.
Аҳәынҭқарра Ахада инапынҵақәа назыгӡо Бадра Гәынба иажәақәа рыла, иҟоу ауадаҩрақәа раан аусбарҭақәеи ахылаԥшырҭақәеи зегьы ҳәоуеиқәшәарала русура акырӡа аанагоит. «Фымцалашарала аиқәыршәара, абылтәи ахьшьтәи адгалара, аулафахәы ашәара, уҳәа реиԥш иҟоу азҵаара хадақәа оперативла аӡбара ахәҭоуп. Ҳара аҭагылазаашьа ахылаԥшра аҳҭалоит, аҭагылазаашьа аҭышәынтәалара иазырхоу аусура ааиԥмырҟьаӡакәа имҩаԥыслоит», — ҳәа аусуратә еилатәара ахыркәшамҭаз инаҵшьны иазгәеиҭеит иара.
