Аҟәа. Ԥхынҷкәынмза 9, 2024 шықәса. Аԥсныпресс. Атәыла аԥыза-министр инапынҵақәа назыгӡо Валери Бганба аиԥылара мҩаԥигеит. Аиԥылара аҿы иалацәажәеит аиқәԥареи атлетика хьанҭеи рзы ԥыхьатәи ашкол ахыбра акәша-мыкәша ишьақәгылаз аҭагылазаашьа.
Аилацәажәара рхы аладырхәит аҵара аминистр инапынҵақәа назыгӡо Инал Габлиа, аҿари аспорти русқәа рзы Аҳәынҭқарратә Еилакы ахантәаҩы инапынҵақәа назыгӡо Ҭарашь Ҳагба, аҭоурых-культуратә ҭынха ахьчаразы Аҳәынҭқарратә Усбарҭа аиҳабы Гарик Сангәлиа, аспорттә еилазаара ахаҭарнакцәа.
Аҟәа ақалақь, Аршба имҩала игылоу, зыбжа бгахьоу ахыбра иҳаҩсыз аԥсшьарамшқәа раан, ауаажәларратә протестқәа шыҟазгьы, уи зымпыҵаку ила шьаҭанкыла ихыбгалан.
Аспорттә еилазаара ахаҭарнакцәа ахыбра ақәгара аганахьала ӷәӷәала агәынамӡара аадырԥшит, урҭ атәыла аԥыза-министр инапынҵақәа назыгӡо иарбоу ахыбра шьҭахьҟа аҵара Аминистрра ахь архынҳәреи, иара убас аиҭашьақәыргылара ахьамам инамаданы аус зымуа егьырҭ аспорттә обиектқәа рышәҟәҭагалара алыршареи рзы аҳәара ҟарҵеит.
Валери Бганба ахыбра азинтә статус инҭырҳәцааны ишахәаԥшхо, иахьа иахымгакәа ԥыхьатәи аспорттә обиектқәа зегьы знапаҵаҟа иҟоу агәаҭара азы акомиссиа аԥҵаразы ақәҵарагьы шҭыжьхо азы еизаз агәра диргеит.
