«Аминистрцәа Реилазаареи аҳәынҭқарратә мазара анапхгараҭареи априватизациа азуреи рзы Аҳәынҭқарратә Еилаки рҟынтәи иахәҭаз ақәыршаҳаҭрақәа зегьы анҳау ашьҭахь, ҳара аобиект ҿыц – амедицинатә центри ирԥхоу амшынӡы зҭоу аӡҭарчи аргылара хацҳаркит», – ҳәа адырра ҟаиҵеит иара.

Ацентр иԥхьагылоу амедицинатә еиқәыршәагақәа рыла еибыҭахоит, МРТ - ҳәа изышьҭоу аппаратгьы, акомпиутерттә тамограф General Electric уахь иналаҵаны. Ари иуникалу амаругақәа ишиашоу Франциантәи иаагоуп. Урыстәыла иарбоу аппаратқәа Краснодар мацара ауп иахьыҟоу. Иарбоу амедицинатә аппаратқәа рыбзоурала уаанӡа Аԥсны зыҟаҵара залмыршахоз амедицинатә ҭҵаарақәа рыҟаҵара алнаршоит.  Ареспублика ауааԥсыра шьҭарнахыс иарбоу амедицинатә ҭҵаарақәа рыҟаҵаразы Шәачаҟа, Краснодарҟа, мамзаргьы Москваҟа имцакуа араҟа иҟарҵар рылшоит», – ҳәа инаҵшьны иазгәеиҭеит Анатоли Аҩӡба.

Ацентр аамҭак ала иаднакылар алшоит 250-ҩык рҟынӡа ауаа. Апациентцәа акардиолог, апедиатр, аофтальмолог, астоматолог, агинеколог, иара убас ахирург рхы ддырбар рылшоит.

Ҷыдала ахшыҩзышьҭра аҭоуп аҭыԥантәи ауааԥсыра усурала реиқәыршәара азҵаара – иаԥҵахоит 80 рҟынтәи 100 рҟынӡа аусуратә ҭыԥқәа, атехникатә персоналгьы уахь иналаҵаны.  

«Ҳара иҳалшо зегьы ҟаҳҵоит ҳцентр арегион аҿы иреиӷьу центрны иҟаларц азы. Уи аусура азы хыԥхьаӡара рацәала аспециалистцәа аҭаххоит, иҟалар алшоит зегьы Аԥсны аҩныҵҟа иаҳзымԥшааргьы. Убри аҟнытә ҳара ҳалагахьеит Урыстәыла аҳақьымцәа рыԥшаара. Аха уеизгьы, аперсонал аӷьырак урыстәылатәи аҵараиурҭақәа рҿы аҵара зҵаз, уаҟа аус зуаз ҳтәылауаа рыла ишьақәгылоит», – ҳәа иажәа иацҵо иазгәеиҭеит Анатоли Аҩӡба.

Ас еиԥш идуу апроект анагӡара алыршахеит аинвесторцәа рыцхыраара иабзоураны. Аобиект аргылара Аинвестициатә Программа аҳәаақәа ирҭагӡаны афинансыркра мҩаԥнагоит аилазаара  «Росатом».

«Ҳара аргылара ҳаҿуп, дара адгылара ҳарҭоит. Аобиектқәа зегьы Аԥсны иаанхоит – урҭ џьаргьы аӡәгьы игаӡом. Ари хра злоу лшароуп ҳинфраструктура аҿиаразы, Аԥсны атәылауаа рзы аусуратә ҭыԥқәа раԥҵара азы», – ҳәа инаҵшьны иазгәеиҭеит апанситонат адиректор хада Анатоли Аҩӡба.

Амедицинатә центр аԥҵара амаҵзурақәа рыҩаӡара ашьҭыхра адагьы арегион атуристтә потенциал арӷәӷәоит. Уи, жәаҳәарада, Аԥсны аекономикатә ҿиара иацхраауеит.

Аобиект аргылара анардадкылаҩыс иҟлоуп аилазаара «КДК Development», аҿаҵаҩыс – апансионат «Литфонд». Аргылара ахьымҩаԥысуа аучасток аиҳабы Иракли Абакелиа иҟаиҵаз адыррақәа рыла, ахәышәтәратә корпус аӡырԥхатә процедурақәа рзы акабинет ала еиқәыршәахоит. Ацентр аҿы иара убас иаадыртуеит МРТ, КТ, иара убас  арентгендиагностика акабинетқәа.

«Ацентр маншәалахоит згәабзиара алшарақәа ԥку ауаа рызгьы, араҟа ауааԥсыра амедицинатә маҵзурақәа зегьы рҟынӡа рынаӡара алыршахоит», – ҳәа инаҵшьны иазгәеиҭеит иара.

Атәыла анапхгара Аԥсны иманшәалоу аинвестициатә климат ашьақәыргылара аганахьала активла аусура мҩаԥнагоит.  Ас еиԥш иҟоу апроектқәа аинвесторцәа рыгәрагара арӷәӷәоит, аекономикатә ҿиара азы иҿыцу алшарақәа цәырнагоит, ауааԥсыра рыԥсҭазаашьа аиӷьтәра иазырхоуп. Апансионат «Литфонд» абазала азҩыдахаратә комплекс аргылара – аҳәынҭқарреи абизнеси русеицура хра злоу аганқәа аанарԥшуеит. Уи иалҵшәахоит арегионалтә инфраструктура акыр аиӷьхара.