Аҟәа. Ԥхынҷкәынмза 5, 2022 шықәса. Аԥсныпресс. Ԥхынҷкәынмза   11 рзы Екатеринбург ақалақь аҿы имҩаԥысраны иҟоуп абокс Ахәылԥаз ду  RCC Boxing Promotions, ҳәа адырра ҟанаҵоит Аԥсны аҿари аспорти русқәа рзы аҳәынҭқарратә Еилакы.

Атурнир ихадоу ахәҭа аҿы аа-раундк рыла ишьақәгылоу аиндаҭлара мҩаԥигоит аԥснытәи абоксиор Игорь Адлейба (13-0-2), уи диацлабуеит Максим Черничук (4-0).

Уажәы Игорь Адлеиба аиндаҭлара иҽазыҟаиҵоит, Екатеринбург ақалақь аҿы иҟоу аолимпиатә резерв ашкол аҿы аҵара-ҽазыҟаҵаратә еизгарақәа дырхысуеит.

Аҟәа. Ԥхынҷкәынмза 5, 2022 шықәса. Аԥсныпресс.  Аԥсны аԥыза-министр Алеқсандр Анқәаби Аԥсны Аҳәынҭқарреи Урыстәылатәи Афедерациеи рыбжьара асоциал-економикатә усеицура азы Анапхгарабжьаратәи Акомиссиа аԥсуа ган алахәылацәеи ԥхынҷкәынмза 6 рзы имҩаԥысраны иҟоу Анапхгарабжьаратәи Акомиссиа изаамҭанытәиу аилатәара рҽаладырхәырц азы Москваҟа инеит.  

Аҟәа. Ԥхынҷкәынмза 5, 2022 шықәса. Аԥсныпресс. Аманда Касланӡиа/. Аԥсны Атәанчаҩратә Фонд ԥхынҷкәынмза 2  аҟынӡа абҵарамзазы ашәатәқәа зауа акатегориақәа зегьы ирыҵанакуа атәанчахәқәеи аԥаратә цхыраагӡақәеи рызшәара алыршахеит.  Абри азы адырра Аԥсныпресс ахь иҟаиҵеит Атәанчаҩратә Фонд ахантәаҩы Денис Гәылариа.

Абҵарамзазы зегьы рыхкы атәанчахәқәа ршәара азы иазоужьын  103 млн. 919 нызықь мааҭ.

«Ҳара атәанчахәқәа ршәара аганахьала иҟаз аиҵахара маҷк ада арҽеира ҳалҳаршеит. Атәанчахәқәа уажәы ианаамҭоу рԥарақәа роуеит. Уажәазы ҳара иҳамоу атәанчаҩцәа рхыԥхьаӡара 49 260-ҩык рҟынӡа инаӡоит, уи иҳаҩсыз ашықәс иаҿырԥшны уахәаԥшуазар,   1059 – ҩык рыла еиҳауп. Урҭ рахьынтә 11 521-ҩык атәанчахәқәа рахь ацҵақәа зауа роуп, избан акәзар урҭ Урыстәылатәи Афедерациа атәанчахәы роуӡом», - ҳәа адырра ҟаиҵеит Денис Гәылариа.

Уи иажәақәа рыла, «абгаԥсатә лагалақәа рыла, 2021 шықәса иаҿырԥшны уахәаԥшуазар, афонд 156 млн. мааҭ рыла аԥхьагылара аманы иааиуеит».

2022 шықәса алагара инаркны ԥхынҷкәынмза 1 аҟынӡа атәанчахәқәа, аԥаратә цхыраагӡатәқәа, атәанчахәқәа рыцҵақәа ршәара азы иазоужьхеит 1 млрд 159 млн. 762,6  нызықь мааҭ. Уи, иҳаҩсыз ашықәс иаҿырԥшны уахәаԥшуазар, 129 млн. 789,9 нызықь мааҭ рыла еиҳауп. 2021 шықәса аиԥш-зеиԥшу аамҭахәҭа азы ашәан  1 029 972, 7 нызықь мааҭ.

Аҟәа. Ԥхынҷкәынмза  5, 2022 шықәса. Аԥсныпресс.  2022 шықәса 11  мзы  ирылагӡаны Аԥсны абиуџьеҭ ашәахтә шәатәқәа раҳасабала иалагалахеит планла ишьақәыргылаз 3  млрд 51,4 млн. мааҭ рҟынтәи 3 млрд 935 млн. мааҭ, ҳәа иаанацҳауеит ашәахтәқәеи аизгақәеи рзы Аминистрра.

Анагӡара 129% рҟынӡа инаӡоит. Азԥхьагәаҭатә рбагақәеи фактла иҟаҵоу ашәахтә лагалақәа реицҵалыҵтә еиԥшымзаара 883,6 млн. мааҭ рҟынӡа инаӡоит.  

2021 шықәсазы аиԥш зеиԥшу аамҭахәҭа азы алагалақәа иаҿырԥшны уахәаԥшуазар, уажәтәи алагаларақәа рдинамика 127% рҟынӡа инаӡоит, уи аицҵалыҵ 840,7 млн. мааҭ рҟынӡа инаӡоит.

2022 шықәса 11 мзы рыла араионқәа рҟынтәи иҟаҵаз ашәахтә шәатәқәа наӡеит:

Ақ. Аҟәа – планла ишьақәыргылаз 1 537,0 млн. мааҭ. рыла иалагалахеит  1 884,5 млн. мааҭ, мамзаргьы даҽакала иуҳәозар –123%; 

Гагра араион – планла ишьақәыргылаз 795,0 млн. мааҭ. рыла иалагалахеит  1 091,6 млн. мааҭ, мамзаргьы даҽакала иуҳәозар – 137%;

Аҟәа. Ԥхынҷкәынмза 5, 2022 шықәса. Аԥсныпресс.  Иахьа Аҳәынҭқарра Ахада урыстәылатәи арегионқәа рыҟны инхо ахәыҷқәа рзы агәыҳалалратә еидара адәықәҵара инамаданы аиԥылара мҩаԥигеит.

Аԥсны Донецктәии Лугансктәии Жәлар рреспубликақәа, иара убас Херсонсктәии Запорожсктәии аобластқәа рыҟны инхо ауааԥсыра рзы агәыҳалалратә цхыраара ашьҭразы азыҟаҵарақәа цоит.

Аҳәынҭқарра Ахада аиԥылара мҩаԥигеит абизнес уаажәларра ахаҭарнакцәа ааԥхьаны, Урыстәыла арегион ҿыцқәа рыҟны инхо ахәыҷқәа рзы агәыҳалалратә еидара аиҿкаара азҵаара алацәажәаразы.

Аҳәынҭқарра Ахада агәыҳалалратә цхыраара аҟаҵараҟны Аԥсны анаплакҩцәа адиԥхьалеит агәацԥыҳәарала рхы аладырхәырц.

Аҳәынҭқарра Ахада иазгәеиҭеит Аԥсны атәылауаа аӡәырҩы ашықәсҿыцазтәи агәыҳалалратә акциа аҽалархәразы агәаҳәара шрымоу, Донецктәии Лугансктәии Жәлар рреспубликақәеи, Херсонсктәии Запорожсктәии аобластқәеи рхәыҷқәа ацхыраара рыҭаразы. Урҭ ирыӡбеит рбаҳчақәа рҟынтә амандарин ҿыхны Ашықәс Ҿыц азы аҳамҭа рзырышьҭырц.

Аҟәа. Ԥхынҷкәынмза 5, 2022 шықәса. Аԥсныпресс. Аԥсны аҳәынҭқарратә шәарҭадара Амаҵзура Аԥсны иахьаҵанакуа атеррористтә шәарҭадара аҟалара алшоит ҳәа иҟалаз аинформациа агәаҭара иазкны аоператив-ԥшааратә усмҩаԥгатәқәа мҩаԥнагоит.

Аԥсны аҳәынҭқарратә шәарҭадара Амаҵзура атәылауаа рахь апровакациа аҽамҭареи аҭынчреи агәҽанызаареи раарԥшреи рзы ааԥхьара ҟанаҵоит.

Аҟәа. Ԥхынҷкәынмза 5, 2022 шықәса. Аԥсныпресс. Ԥхынҷкәынмза 3 рзы Аахыҵ Уаԥстәыла имҩаԥысуан аҩбатәи Урыстәыла-уаԥстәылатәи аҿартә форум. Уи ахы аланархәуеит Аԥснытәи аделегациа, ҳәа адырра ҟанаҵоит аҿари аспорти рзы Аҳәынҭқарратә Еилакы.

Афорум актәи амш «Амилаҭбжьаратәи аҿартә диалог. Амилаҭтә ҿартә аԥшьгарақәа» атема ала астол гьежь ала иалагеит. Аԥсны аганахьала «Аԥсны Аҳәынҭқарра амилаҭтә ҿартә инициативақәа» атема ала ажәахә ҟаҵо дықәгылеит аԥсуа делегациа анапхгаҩы, абжьаратәи ашкол № 6 актәи акатегориа арҵаҩы, Аҟәатәи алицеи-интернат аҩбатәи акатегориа арҵаҩы Алиас Акаба.  

Ажәахәқәа рыхцәажәара ашьҭахь Аахыҵ Уаԥстәылатәи Ареспублика аҿари аспорти рзы аҳәынҭқарратә Еилакы ахантәаҩы ихаҭыԥуаҩ Валентина Гатикоева агрантқәа раиуреи афорумқәа рылахәхареи раҳасабала аҿартә иницитивақәа рҵакы ахадара азгәаҭо, ҳаԥхьаҟа асоциал-актуалратә хырхарҭа змоу апроектқәа назыгӡо аҿар рхыԥхьаӡара ишацло азы агәыӷра шлымоу аалырԥшит.

Аҟәа. Ԥхынҷкәынмза 5, 2022 шықәса. Аԥсныпресс. Иҳаҩсыз ҩы-шықәса рыла Краснодартәи атәылаҿацә аужьҭра-гәаҭаратә пунктқәа рыла Урыстәылаҟа ииагахеит 3177 партиа импортла идәықәҵоу амандарина. Иарбоу ацитрустә шәырқәа 3-тәылак рҟынтәи иаагоуп:

Ҭырқәтәылантәи иааган  2717 партиа, уи акапан азеиԥш еицҵалыҵ 59,4 нызықь тонн рҟынӡа инаӡоит;

Аԥснынтәи иаагоуп 444 партиа, уи акапан азеиԥш еицҵалыҵ 4,3 нызықь тонн рҟынӡа инаӡоит;

Египет аҟынтәи иаагоуп 16 партиа, уи акапан азеиԥш еицҵалыҵ 0,4 нызықь тонн рҟынӡа инаӡоит.

Аҟәа. Ԥхынҷкәынмза 5, 2022 шықәса. Аԥсныпресс. Никарагуа имҩаԥысит аҭыԥантәи ажәларқәа рыфатә хкқәеи ақьырсиантә традициақәеи ирызку есышықәсатәи Жәларбжьаратәи афестиваль».

Афестиваль  рхы аладырхәит аконтинентқәа зегьы рҟынтәи  40 тәылы рхаҭарнакцәа. Иаҭааит  25 нызықь инареиҳаны ауаа.  

Никарагуа акультура аминистр Луис Моралес Алонсо иааԥхьарала ацәыргақәҵа аартра иадҳәалоу агәырӷьаратә церемониа рхы аладырхәит Аԥсны акультура аминистр Даур Ақаҩбеи Никарагуа иҟоу Аԥсны Аҳәынҭқарра Ацҳаражәҳәаҩ Инар Ладариеи.

Афестиваль аҿы ицәыргақәҵахеит иара убас аԥснытәи аарыхыҩцәеи аҭыжьыҩцәеи раалыҵ, аԥсуа милаҭтә костиумқәа, Аԥсны иазку амузыкеи авидеонҵамҭақәеи.

Аҟәа. Ԥхынҷкәынмза 5, 2022 шықәса. Аԥсныпресс. Ф. И. Искандер ихьӡ зху Аҳәынҭқарратә драматә театр аҿы 42-тәи атеатралтә сезон аҩбатәи аԥхьарбара азы аҽазыҟаҵарақәа мҩаԥысуеит.

Асезон ҿыц жьҭаарамза 29 рзы имҩаԥысыз амоноспектакль «В лучах» ала  иаатит. Ԥхынҷкәынмза 9 – 10 рзы Аурыс драматә театр ахәаԥшцәа ирыднагалоит Фазиль Искандер иҩымҭа ала иқәыргылоу аспектакль  «Софичка» аԥхьарбара.

«Софичка» - Чагем ақыҭа инхо аԥҳәызба лыԥсҭазаара аҭоурых зҳәо ажәабжь ауп. Ажәабжь зыхҳәаау лыԥсҭаазаара аҭоурых аарԥшуа Фазиль Искандер зеиӷьаҟам ала ихадоу ауаҩытәыҩсатә хәдуқәа дрыхцәажәоит:  ацәаҩашәа, аԥсҭазаара аҵаки ахықәки, абзиабара, гәык ала азыҟазаара, анажьара. «Софичка» - ари XX ашәышықәса азы ажәлар иуадаҩыз рыԥсҭазаара иазку аепикатә ԥҵамҭа ду ауп. 

Атеатр адиректор хада Иракли Хьынҭәба ишазгәеиҭаз ала, «аҩымҭа зыхҳәаау Софичка длыхцәажәо, Фазиль Искандер ҳара, иахьатәи аамҭазы инхо ҳәажәлар рдоуҳатәи рыԥсҭазааратәи хәдуқәа реизакырҭа Аҩны -Аԥсны ахьчареи аиқәырхареи ахымԥадатәра азы адырра ҳаиҭоит». 

«Ҳара ҳтеатр Фазиль Искандер ихьӡ ахыуп. Убри аҟнытә уи арепертуар аҟны жәаҳәарада  ҳџьынџьуаҩ ду ирҿиамҭақәа рыла иқәыргылоу  аспектакльқәа ыҟазар ахәҭоуп. Фазиль Искандер  ирҿиара излауа ала аӡыргара  аҭахуп, избан акәзар, уи адунеи иарбан ҭыԥзаалак аҿы инхо аԥхьаҩ аԥсуа жәлар агәы ҳәа изышьҭоу аҭаԥшра илнаршоит. Дахьынхозаалакгьы ауаҩы, Фазиль Искандер иҩымҭақәа данрыԥхьалак, аԥсуаа  заку жәлару, руникалра хыҵхырҭас иамоу, адунеизегьтәи акультуратә, ацивилизациатә процесс аҿы иааныркыло аҭыԥи инарыгӡо ароли ртәы шьахәла еиликаауеит», - ҳәа иҳәеит Иракли Хьынҭәба.