Уи лажәақәа рыла, аусмҩаԥгатә аиҳарак Риҵатәи амилаҭтә реликтә парк аҿы имҩаԥысуеит.

Апоет Владимир Занҭариа, Риҵа иаԥхьахо ажәеинраалақәа зынӡа даҽакала улымҳаҿы иааиуеит, еиҳа игәыҟаҵагоу абжьы рхылоит ҳәа иазгәеиҭеит.

«Уаҟа иҷыдоу ажәҩантә акустика ыҟоуп, ҳара аԥсышәала еиԥш адыга бызшәалагьы ажәеинраалақәа ҳрыԥхьалоит. Адыга бызшәа ықәыҩлааит Аԥсныра. Ари ахҭыс шьахә Аԥсны имҩаԥысыртә еиԥш аҭагылазаашьа ҟаларц азы, убри аҟарагьы адыгаа ршьа ақәҭәахьеит абри адгьыл», - ҳәа иҳәеит Владимир Занҭриа.

Иара Зарина Канукова алитературатә фестиваль Аԥсны аиҿкааразы иҭабуп ҳәа леиҳәеит.

Аԥсуа-адыгатә фестиваль «Риҵатәи арифмақәа» рлауреат ҳәа адипломқәа ранашьахеит аԥсуа поет ҿарацәа Шьазина Бганбеи Абзагә Колбаеи.  

Афестиваль аартра иадҳәалоу ацеремониа аҿы иқәгылеит авокал-инструменталтә ансамбль  «Гәында». Ансамбль аԥсышәала, адыга бызшәала, иара убас урысшәала ашәақәа нанагӡеит.

Актәи афестиваль «Риҵатәи арифмақәа» Аԥсны имҩаԥысит  2018 шықәсазы, 2020 шықәсазы аковиддтә ԥкрақәа инарымаданы, ари аусмҩаԥгатә онлаин режим ала имҩаԥысит.