Алахәылацәа реиҳараҩык ишазгәарҭаз ала, зегьы реиҳа дара иргәаԥхеит ажәытә аԥсуа хәмарра «ахылԥахас» алахәхареи ахыци ахәымпали рыла ахысреи.

«Сара зегьы реиҳа ахыци ахәымпали рыла ахысра сгәаԥхеит. Сара уажәаԥхьа ахыци ахәымпали ала сымхысӡацызт. Уи сара занааҭс ашьҭыхра сҭахуп ҳәа сҳәаӡом, аха уеизгьы даара аинтерес зҵоу аԥышәа соуит ҳәа исыԥхьаӡоит», - ҳәа лгәаанагара лҳәеит Ҟәланырхәантәи афестиваль алахәыла Ариана Смыр.

«Сара сзы зегьы реиҳа аинтерес зҵаз амастер-класс арԥшьшьара ауп. Ҳара уажәада арԥшьшьара ҳнапы алаҳамкыцызт, аха уи даара иаҳгәаԥхеит, ҳазлагаз аусумҭақәа ҳрылгартә еиԥш аамҭа нацҵаны иҳамазар ҳҭахын, избан акәзар маҷ-маҷ акахьы ҳкылсуа ҳалагеит», - ҳәа еиҭарҳәеит «Асҩцәа» ркоманда аҟынтәи аӡӷабцәа.

Афестиваль амҩаԥгара азы аидеиа Очамчыра, Ҭҟәарчал, Гал, Гәдоуҭа, Гагра араионқәа раԥшьгаратә гәыԥқәа рҿы ицәырҵит. Уи  Европатәи Аидгылареи Еиду Амилаҭқәа Реиҿкаара иатәу ақыҭатә ҵакырақәа рыҿиаразы апрограммеи жәларбжьаратәи аиҿкаара «Амлакра аҿагыларзы аиҿкаареи» еицынарыгӡо апрограмма ацхыраарала имҩаԥысит.

Афестиваль ахықәкы хада – аиҳабыратәи аклассқәа рҵаҩцәа итрадициатәу Аԥсны иқәынхо ажәларқәа рнапҟазара, иара убас акультуреи аҵасқәеи ақьабзқәеи еиҳа еиӷьны рырдарра, иара убас еиуеиԥшым араионқәа рҟынтәи ахәыҷқәа реибадырреи араионбжьаратәи аимадара рыбжьҵареи.

Зынӡа Афестиваль иаҭааит 250-ҩык рҟынӡа  ауаа.