Аҟәа. Ԥхынҷкәынмза 5,  2022 шықәса. Аԥсныпресс. Аԥсны асахьаҭыхыҩцәа Реидгыла ацәыргақәҵатә зал Хада аҟны жәабранмза 6 , асааҭ 13:00 рзы ацәыргақәҵа «Ашықәс азы иреиӷьу аусумҭа» ҳәа ацәыргақәҵа  аартра иазку аныҳәатә церемониа мҩаԥысуеит. Иара убри аҽныҵәҟьа аиааира згаз аҳамҭақәа ранашьара мҩаԥгахоит.

2001 шықәса раахыс есышықәса еиҿкаахо аконкурс амҩаԥгара аԥҟара инақәыршәаны, аҳәынҭқарратә комисиа есышықәса х-ҩык аиааира згаз алнакаауеит.

Аҟәа. Ԥхынҷкәынмза 4, 2022 шықәса. Аԥсныпресс. Иахьа, Аԥсны Аҳәынҭқарра Ахада Аслан Бжьаниа аԥсны-урыстәылатәи аҳәааҟны иофициалтәым визитла Аԥсны иаҭааз Ҭаҭарсҭан Ареспублика Ахада Рустам Минниханов диԥылеит.

Ҭаҭарсҭан Ареспублика Ахада Аԥсныҟа иааира аԥсны-урыстәылатәи аизыҟазаашьақәа рҳәаа иҭагӡаны аусеицура арҿиара иадҳәалоуп.

Аҟәа. Ԥхынҷкәынмза 4, 2022 шықәса. Аԥсныпресс. Аԥсны  Аҳәынҭқарра Ахада Аслан Бжьаниеи мышктәи иофициалтәым визитла ареспублика иаҭааз Ҭаҭарсҭан Ахада Русҭам Минниханови Гагреи Гәылрыԥшьи рраионқәа рыҟны аинвестициатә ҵакы змаз аобиектқәа гәарҭеит.

Русҭам Минниханов Аԥсныҟа иаара ахықәкы хаданы иамоуп аекономикеи атуризми рхырхарҭала аимадара арӷәӷәара.

«Иахьа дсасны даҳҭоуп ҳаиашьаратә Республика Ҭаҭарсҭан анапхгаҩы. Ҳара ҳаизыҟазаашьақәа акры рхыҵуеит. 1992-1993 шш. Аҧсны Аџьынџьтәылатә еибашьраан Ареспублика Ҭаҭарсҭан иаҳнаҭаз ацхыраара ахә ашьара уадаҩуп, усҟантәи аамҭазы  аҩ-ҳәынҭқаррак рхадацәа Владислав Арӡынбеи Минтимер Шаимиеви рыбжьара зхы акыз аиҩызаратә еизыҟазаашьа иахьа уажәраанӡа иацҵо ҳаауеит. Ҳара ҳаимадара ауаҩытәҩсатәи аекономикатәи ҵакыла рхарҭәаара ҳҽазаҳшәалоит,- иҳәеит Аҧсны Ахада Аслан Бжьаниа.

Рустам Минниханов  иазгәеиҭеит Аԥсынгьы Урыстәыла азгьы иуадаҩыз аамҭақәа рзы -  90-тәи ашықәсқәа раан аҩ-ҳәынҭқаррак рыжәларқәа акыр ишеизааигәаз. "Ҳара раҧхьатәи ҳхада Минтимер Шаимиеви Владислав Арӡынбеи алшарақәа рыҧшааит аицхырааразы. Хымԥада, ари аиҩызара еиқәханы иааиуеит. Ҳара даара иаҳҭахуп ара ҳаҟазарц, иаҳҭахуп ҳара ҳҳәынҭқарра ала аҧсуа бизнес Урыстәыла иҟазарц. Ҳара иахьа имаҷымкәа ҳныҟәеит, ҳрыхәачшит анхарҭатә ҭыԥқәа, ахыбрақәа. Иахьа  Аслан Гьаргь-иԥа иҟынтә исаҳаз агәҭакқәа даара ибзиоуп. Агәра згоит, иаарласны, саргьы ус исҭахуп, Аҧсны иҧшӡарҭоу ҭыҧхоит, избанзар Анцәа уи шәара анцәа ишәаҭәеишьахьеит. Иаҭаху, игәылыршәатәуп, ишахәҭоу аӡыргара аҭахуп", - иҳәеит Ҭаҭарсҭан Ахада.

Аҟәа. Ԥхынҷкәынмза 4, 2022 шықәса. Аԥсныпресс. Ԥхынҷкәынмза 4, 1992 шықәса рзы Аԥсны Иреиҳаӡоу Асовет Аԥсны Аҳәынҭқарра арратә ҳамҭақәа: «Леон» Иорден, «Аԥсны Афырхаҵа» ҳәа Амедали «Агәымшәаразы» Амедали раԥҵара шьақәнарӷәӷәеит.  

АԤСНЫ АФЫРХАҴА

«Аԥсны Афырхаҵа» — Аԥсны иреиҳӡоу аҩаӡара змоу алкааратә ҳамҭоуп.

Аԥсны Афырхаҵа ҳәа аҳаҭыртә хьӡы афырхаҵара иадҳәалоу, Аԥсны Аҳәынҭқарра азы хаҭалатәи, мамзаргьы аколлективтә лагалақәа  рзы иранашьахоит.

Аҳаҭыртә хьӡы Аԥсны атәылауаа реиԥш, Аԥсны атәылауаҩра змам ахаҿқәагьы иранашьахоит.

«Аԥсны Афырхаҵа» ҳәа Амедал ауаҩы игәаҿы, арымарахьала, Аԥсны  Аҳәынҭқарра аорденқәеи амедалқәеи рхыхь иаҭаны иныҟәигоит.  

Ари  аҳамҭа анашьаразы Актәи Аусԥҟа ԥхынҷкәынмза 30, 1993 шықәса рзы иҭижьит Аԥсны Аҳәынҭқарра Иреиҳаӡоу Асовет  ахантәаҩы Владислав Арӡынба.   Уи амш аҽны «Аԥсны Афырхаҵа» ҳәа ахьӡ рыхҵан 25-ҩык аибашьара иалахәыз, урҭ рахьынтә 15-ҩык ԥсрашьҭахь.

Леон  Иорден

Леон Иорден  Аԥсны Аҳәынҭқарра ахьчараан ҷыдала иаарԥшыз агәымшәара, ахацәнымырхареи  афырхаҵареи рзы иранашьахоит.

Аҟәа. Ԥхынҷкәынмза 3, 2022 шықәса. Аԥсныпресс. Афонд «Лидер» аусура аихшьаалақәа рыҟаҵара иазкыз аныҳәатә усмҩаԥгатә мҩаԥысит ԥхынҷкәынмза 2 рзы Москва ақалақь, Урыстәылатәи Афедерациа Ахада иусқәа Рнапхгараҭара иатәу асасааирҭа «Золотое Кольцо» аҿы.  

Афонд ахылаԥшратә Хеилак аӡбамҭала, аилазаара-аоператор «Риҵа-тур» адиректор Хада Елена Лолуеи атуристтә еилазаара «Аҟәа-Абаза» адиректор Хада Мариа Гыцбеи атуристтә усхкы рлагала азы «Урыстәыла аԥыза» ҳәа  апремиа ранашьахеит.

Аҳамҭақәа рыҭара иазкыз ацеремониа ихы алаирхәит Аԥсны атуризм аминистр Ҭеимураз Хишба. Уи арҭ аҳамҭақәа занашьаз иахәҭаны иранашьахеит ҳәа иазгәеиҭеит.  

Аҟәа. Ԥхынҷкәынмза 3, 2022 шықәса. Аԥсныпресс. Аԥсны агәабзиарахьчара аминистр Едуард Быҭәба ахәаша, ԥхынҷкәынмза  2 рзы ареспублика апедиатрцәа алархәны аусуратә еилатәара мҩаԥигеит.

Аилатәара рхы аладырхәит аминистр ихаҭыԥуаҩцәа Вахтанг Аҩардан, Саида Делба, ахәышәтәра-профилактикатә цхыраара азы Аусбарҭа анапхгаҩы Баҭал Кациа, атәыла апедиатр хада Ангелина Оҭырба, ахәышәтәра-профилактикатә цхыраара  азы Аусбарҭа  аспециалист хада Есма Гәыниа.

Аилатәара аҿы ареспублика араионқәа зегьы рҿы ахәыҷтәы ҳақьымцәа русура иалацәажәеит.  Аҳақьымцәа амедицинатә усбарҭақәа рҿы иҟоу аҭагылазаашьеи ицәырҵуа ауадаҩрақәеи ртәы рҳәеит.

Аспециалистцәа ргәаанагарала, апроблема хаданы иҟоуп ауааԥсыра алаҵа профилактика ахь ринтерес амаҷхара.

Едуард Быҭәба, аиҳарак ала амедицинатә усбарҭақәа рҿы аилыркаратә усура арӷәӷәара хымԥадатәиуп ҳәа иазгәеиҭеит.

«Аҳақьым ииашаны занаааҭдыррала ахәыҷы алаҵа изыҟаҵара ахымԥадатәра релыркаара илшуазароуп. Алаҵа ианаамҭоу аҟаҵара,  агәабзиара еиҷаҳарыла ацклаԥшра акультура ауаҩы даныхәыҷу инаркны илааӡалатәуп», - ҳәа иҳәеит иара.  

Аҟәа. Ԥхынҷкәынмза 3, 2022 шықәса. Аԥсныпресс. Ԥхынҷкәынмза 3 – зылшарақәа ԥку ауаа Жәларбжьаратәи Рымш ауп. Ари амш азы, шықсқәак ирылагӡаны Жәларбжьаратәи Аџьар Ҟаԥшь Акомитет еиуеиԥшым аспорттә усмҩаԥгатәқәа мҩаԥнагоит.

Еиуеиԥшым ашықәсқәа рзы Жәларбжьаратәи Аџьар Ҟаԥшь Акомитет  1992-1893шш. рзы иҟаз аибашьра еиԥш аибашьрашьҭахьтәи ашықәсқәеи ирыдҳәалоу арыцҳаратә хҭысқәа ирыхҟьаны еиуеиԥшым ахәрақәеи аграқәеи зауз, иара убри ала зылшарақәа ԥкхаз ауаа алархәны ашьапылампылтә мачқәа, аҽырыҩрақәа, анарди астолтә ԥкьаҭмпыли рзы ахәмаррақәа еиҿнакаахьеит.

«Иарбоу аусмҩаԥгатәқәа рхықәкы хаданы иҟоуп – зылшарақәа ԥку ауаа рыԥсҭазаараҿы ирԥыло ауадаҩрақәа ртәы, иара убас зылшара ԥку ауаа ҩныҵҟала ишыӷәӷәоу, абжьааԥнытәи аԥсҭазааразы иҳараку амотивациа шрымоу ауаажәларра ргәалашәара», - ҳәа иазгәаҭоуп Жәларбжьаратәи Аџьар Ҟаԥшь Амиссиа иаланарҵәаз апресс-релиз аҿы.  

Аҟәа. Ԥхынҷкәынмза 3, 2022. Апсныпресс. Ԥхынҷкәынмза  3 рзы Аԥсны иазгәарҭоит акыр зҵазкуа арыцхә – Идырым асолдаҭ Имш.

Ари аныҳәа зхаҭара ашьақәыргылара залмыршахаз аибашьцәа рфырхаҵарақәа ргәалашәара иазкуп. Адунеи зегьы аҿы хабарда ибжьаӡыз асолдатцәа рхыԥхьаӡараҿы зегьы реиҳа ирацәоуп ԥыхьатәи Асовет Еидгыла атәылақәа рҟынтәи асолдатцәа. Ари ахҭыс  есымша иҷыдоу аҵакы амазаауеит.

Иахьа Аԥсны иҟоу Урыстәыла аус ацура Ахаҭарнакреи В.Г.Арӡынба ихьӡ зху Арратә Ахьӡ-Аԥша азы Аҳәынҭқарратә музеи Аԥсны инхо аурысцәа реиҿкаарақәа Ркоординациатә Еидгылеи (КСОРС) русзуҩцәеи Аԥсны аҿар Рассоциациеи «Аԥеиԥш»  Аҟәа ақалақь, Диаскураа Рыԥшаҳәа аҿы игылоу Идырам Асолдаҭ ибаҟа амҵан, иара убас Ахьӡ-Аԥша апарк аҿы иҟоу Аԥсны жәлар Рџьынџьтәылатәи еибашьра аҿы иҭахаз афырхацәа Рмемориал амҵан ашәҭ шьыҵәрақәа шьҭарҵеит.

«Ҳара иахьа араҟа ҳаизеит зыԥсадгьыл зыхьчоз зегьы ргәалашәара азы. Ари амш зыхьӡ еилкаамкәа иаанхаз урыстәылатәии асоветтәии аибашьцәа ԥсра зқәум рырратә фырхаҵареи ргәымшәареи агәалашәара иазкуп», – ҳәа иҳәеит Аԥсны иҟоу Урыстәыла аус ацура азы Ахаҭаранакра анапхгаҩы Дмитри Федотов .

Аҟәа. Ԥхынҷкәынмза 2, 2022 шықәса. Аԥсныпресс. Аԥсны Аҳәынҭқарра Ахада Аслан Бжьаниа асоциалтә каҭақәа рыҟны афымцамчтә усхк аҟны аԥаратә хархәагақәа рӷьычра аҭыԥ амоуп ҳәа ицәырҵыз адокументқәа рҵыхәала уаанӡа иҟаиҵаз адҵа ахьынӡанагӡоу инамаданы, Амчратә еилазаарақәа рнапхгаҩцәа алархәны изаамҭанытәиу аилацәажәара мҩаԥигеит.

Аԥсны Аҳәынҭқарра Апрокурор хада Адгәыр Агрба атәыла Ахада  адырра ииҭеит имҩаԥгоу аусурақәа рзы. Иара иҟаиҵаз адыррала,  ҳазҭоу ашықәс абҵарамза 16  инаркны мҽхакы ҭбаала аусура мҩаԥгоуп, урыстәыла аганахь ала аиқәшаҳаҭра абжьаҵара иадҳәалаз аминистррақәеи аусбарҭақәеи рхаҭарнакцәа зегьы иразҵаан.  «Ҳазҭагылоу аамҭазы иахәҭоу ажәанҵақәа дәықәҵоуп, аекспертиза дәықәҵоуп изықәнагоу аусбарҭа ашҟа. Агәаҭарақәа рымҽхак аҭбаареи рымҩаԥгара иацу ауадаҩрақәеи ҳасаб рзуны ари аамҭа азхартә иҟам. Аамҭа аҭахуп, аха иалкааны аҿҳәара  шьақәыргылара алшаӡом», - ҳәа иҳәеит  Адгәыр Агрба.

Аҟәа. Ԥхынҷкәынмза 2, 2022 шықәса. Аԥсныпресс. Ԥхынҷкәынмза 6 рзы, Москва ақалақь аҿы имҩаԥысраны иҟоу Аԥсны Аҳәынҭқарреи Урыстәылатәи Афедерациеи рыбжьара асоциал-економикатә усеицура азы Анапхгарабжьаратәи акомиссиа изаамҭанытәиу аилатәара аламҭалаз, атәыла аԥыза-министр Алеқсандр Анқәаб Анапхгарабжьаратәи Акомиссиа аԥсуа ган алахәылацәа алархәны аусуратә еилатәара мҩаԥигеит.

Аилатәара аҿы аҩганктәи аилацәажәара ахь ицәыргахараны иҟоу аусшәҟәқәа рыпроектқәа шьақәыргылан.