Инесса Камлиа, шьҭарнахыс ахәыҷқәа ирыҭахо амедицинатә цхыраара аеффективра акыр еиҳахоит ҳәа инаҵшьны иазгәалҭеит.

Агәабзиарахьчара аминистр иажәақәа рыла, иаагоу аиқәыршәага ҿыцқәа ааизакны рыхәԥса 9 млн. 500 нызықь мааҭ рҟынӡа инаӡоит, алабораториа ҿыц аиҭашьақәыргылареи иахәҭоу амаругақәа рыла аиқәыршәареи уахь иналамҵакәа.  

«Ҳара иаадыруан ахәыҷтәы хәышәтәырҭа атехникатә еиқәыршәара аганахьала арҿыцра аҭахны ишыҟоу, аиҳарак алабораториа. Иҳаҩсыз ашықәс азы абиохимиатәи агематологиатәи анализаторқәа аахәан, иара убас егьырҭ ихымԥадатәиу аиқәыршәагақәагьы. Уи иақәхарџьын   5 млн. мааҭ инареиҳаны.  Сынтәа урҭ зыҩнагыло ауада аиҭашьақәыргылара хыркәшахеит. Ахәышәтәырҭа аусура иҿыцу аҩаӡара ахь ацәырҵит», - ҳәа иҳәеит Едуард Быҭәба.

Алабораториа аусура ианалагалак ашьҭахь, аҭҵаарақәа рымҩаԥгара иақәырӡхо аамҭагьы еиҳа имаҷхоит, аҭҵаарақәа рымҩаԥгаразы алшарақәагьы ирыцлоит.

«Знык ала 40 инарзынаԥшуа анализқәа рымҩаԥгара ҟалоит, хә-минуҭк рыла аҭакқәагьы роулоит. Уаанӡа аҭаацәа  сааҭла анализқәа рылҵшәақәа ирзыԥшыр акәын», - ҳәа иҳәеит Ареслубликатә ахәыҷтәы хәышәтәырҭа алабораториатә диагностика аҟәша аиҳабы Иван Бурбуниди.

Едуард Быҭәба иара убас ахәышәтәырҭа анапхгара – апалатақәа рырҽеира, ахәышәтәырҭа аихагылақәак рҿы аиҭашьақәыргыларатә усурақәа рымҩаԥгара, иара убас ахәышәтәырҭа аҟәшақәк ҳаамҭазтәи амаругала инацҵаны реиқәыршәара, уҳәа иахьазы иҟоу апроблемақәа рганахьала дрыҿцәажәеит.