Аҟәа. Рашәарамза 10, 2023 шықәса. Аԥсныпресс. Аԥсны адәныҟатәи аусқәа Рминистрра аусзуҩцәа лаҵарамза  29 инаркны рашәарамза 9 аҟынӡа Урыстәылатәи Афедерациа адәныҟатәи аусқәа Рминистрра Адипломатиатә Академиа жәларбжьаратәи аизыҟазаашьақәа русхкы аҿы азанааҭдырратә аиҭазыҟаҵара Аусбарҭа аҟны азанааҭдырра аҩаӡара ашьҭыхра акурсқәа ирхысуан.

Акурсқәа рымҩаԥгара аҳәаақәа ирҭагӡаны, Аԥсны адәныҟатәи аусқәа Рминистрра аусзуҩцәа Урыстәыла адәныҟатәи аусқәа Рминистрра аҟны иҟоу Ихьыԥшым аҳәынҭқаррақәа Реиҩызара  атәылақәа Аԥшьбатәи Рдепартамент Аԥсни Аахыҵ Уаԥстәылеи рыҟәша аиҳабы Рубен Малаиан иԥылеит. Аиԥылараҿы Аԥсны-урыстәылатәи аусеицура иадҳәалоу азҵаарақәа рзы ргәаанагарақәа еибырҳәеит.

Аҟәа. Рашәарамза 12, 2023 шықәса. Аԥсныпресс. Аԥсны аҿари аспорти русқәа рзы Аҳәынҭқарратә Еилакы ақыҭараҿы инхо аҿар рыбжьара Ареспубликатә конкурс «Ҳалшара» алахәхаразы азыҳәамҭақәа рыкылара аҽҳәара иацнаҵоит.  

Аконкурс амҩаԥгара хықәкыс иамоуп амилаҭтә усдкылара знапы алаку ақыҭа аҿар раарԥшреи адгылара рыҭареи, иара убас аҿар рыбжьара аџьабзиабареи апатриотизми ридеиақәа рылаҵәара ацхраара.   

Аҟәа. Рашәарамза 12, 2023 шықәса. Аԥсныпресс. Аԥсны аԥыза-министр Алеқсандр Анқәаб Урыстәылатәи Афедерациа Анапхгара ахантәаҩы Михаил Мишустин Урыстәыла Амш инамаданы дидныҳәалеит.

Адныҳәаларатә текст иаҳәоит:

«Ҳаҭыр зқәу Михаил Владимир-иԥа, Урыстәыла азеиԥшмилаҭтә ҳәынҭқарратә ныҳәа – Урыстәыла Амш инамаданы гәык-ԥсыкала иҟаҵоу адныҳәала шәыдышәкыл! Ари аныҳәа милаҭрацәала еилоу Урыстәылатәи аҳәынҭқарра адуреи ашәышықәсақәа иргәылганы иаагоу уи аҭоурых абеиареи рсимволны иҟоуп. Уи Рыԥсадгьыли ибеиаӡоу адоуҳатә-культуратә ҭынхеи гык-ԥсыкала иазыҟоу биԥарала Урыстәыла атәылауаа еидызкыло ныҳәоуп.

Аҵыхәтәантәи аамҭазы аҭыԥ змоу ахҭысқәа, иааизакны жәларбжьаратәи аҭагылазаашьа ашәышықәсақәа раԥхьа еиԥш иахьагьы аитәылауаа ракзаара, Аԥсадгьыл асуверенитет ахьчара азхиара  шаҟа аҵак ду амоу зеиӷьаҟам ала иаҳнарбоит.

Аҟәа. Рашәарамза 12, 2023 шықәса. Аԥсныпресс. Рашәарамза 14 рзы  И. Е. Кортуа ихьӡ зху жәлар рҟазара Ареспубликатә Центр  аҿы имҩаԥысраны иҟоуп  X Жәларбжьаратәи автортә ашәа афестиваль  «Ашәа узысҳәоит Аԥсынтәыла!».

«Автортә ашәа Жәларбжьаратәи афестиваль «Ашәа узысҳәоит Аԥсынтәыла!» асахьаркыра-музыкатә ҟазара аҿиареи аҟыбаҩ злоу ауаа раарԥшреи ахаԥшьгаратә авторцәа-анагӡаҩцәа ҳаамҭазтәи зсахьаркыратә ҩаӡара ҳараку аԥҵамҭақәа раԥҵара азы агәазыҳәара рыҭареи иазкуп», - ҳәа иазгәаҭоуп афестиваль апресс-релиз аҟны.

Аҟәа. Рашәарамза 12, 2023 шықәса. Аԥсныпресс. Урыстәыла Амш – есышықәса, рашәарамза 12 рзы иазгәарҭо аныҳәа ҳаамҭазтәи урыстәылатәи аҳәынҭқарра аԥҵареи атәыла аизҳазыӷьареи символра азнауеит. Уи рашәарамза 12, 1992 шықәсазы Адекларациа адкылара инамаданы иаԥҵан. 

Аԥсны Аҳәынҭқарра Ахада Аслан Бжьаниа Урыстәылатәи Афедерациа Ахада Владимир Путин Урыстәыла Амш идиныҳәалеит.

«Ари аныҳәа милаҭрацәала еилоу ари атәыла дуӡӡа иқәынхо, уи ибеиоу акультуреи ашәышықәсақәа иргәылсны иаауа атрадициақәеи ҳаҭыр ақәызҵо, уи асоциалтәии аекономикатәи апотенциал арӷәӷәареи адунеитә арена аҿы аинтересқәа рыхьчареи злагала алазҵо урыстәылаа зегьы еиднакылоит. 

Хьӡи-ԥшеи згым Урыстәыла аҭоурых азгәдуреи апатриотизмреи рзы аҵаҵӷәы рацәа рнаҭоит уи иқәынхо дарбанзаалак.

Урыстәыла иалҵит адунеи зегьы аҿы еицырдыруаз ирацәаҩны зыхьӡ нагоу аҵарауаа, аҟазара аусзуҩцәа, аспортсменцәа, ашәҟәыҩҩцәа, апоетцәа, акосмос раԥхьа знапаҿы иаазгаз раԥхьатәи акосмонавтцәа, уҳәа», - иазгәаҭоуп адныҳәаларатә цҳамҭа аҿы.

Аҟәа. Рашәарамза 12, 2023 шықәса. Аԥсны Аҳәынҭқарра Ахада Аслан Бжьаниа Урыстәылатәи Афедерациа Ахада Владимир Путин Урыстәыла Амш идиныҳәалеит.

Адныҳәалараҟны, ҷыдала, иҳәоуп:

«Гәык-ԥсык ала ишәыдысныҳәалоит Урыстәыла Амш. Ари аныҳәа милаҭрацәала еилоу атәыла иқәынхо, уи акультура беиеи ашәышықәсақәа зхыҵуа атрадициақәеи ҳаҭыр ззақәу, уи асоциалтәи аекономикатәи лшара арӷәӷәараҟны злагаламҭа ыҟоу, адунеитә аренаҟны уи ахьчаразы игылоу урыстәылаа зегьы еиднакылоит. 

Аҟәа. Рашәарамза 12, 2023 шықәса. Аԥсныпресс. Атәыла аԥыза-министр Алеқсандр Анқәаб Аԥсны иҟоу Урыстәыла ацҳаражәҳәаҩ Михаил Шургалин аҳәынҭқарратә ныҳәа Урыстәыла Амшныҳәа инамаданы дидныҳәалеит.

«Ари амшныҳәа Урыстәыла атәылауаа рзы акыр асимволратә ҵакы змоу ныҳәа дууп. Уи Аԥсадгьыл аԥеиԥш азы аҭакԥхықәра зду абиԥарақәа иузеиҟәымшо реимадара зеиӷьаҟам ала иаанарԥшуеит.

Иахьа Урыстәылатәи Афедерациа анеонацизм алаҵәара адгылара ду азҭо аколлективтә Мраҭашәара иаҿагыланы ақәԥара иадҳәалоу  аҭоурых акыр иуадаҩу аетапқәа ирхысуеит. Ари аиҿагылара Украина имҩаԥысуа иҷыдоу арратә операциа аҳәаақәа ирхысуеит. Ҳаргьы агәра ганы ҳаҟоуп Урыстәыла ари аиҿагылараҿгьы ԥхьаҟа еиҵагыло абиԥарақәа реизҳазыӷьара ахьӡала ҩаԥхьа аиааира шаго», - ҳәа иазгәаҭоуп адныҳәаларатә цҳамҭа аҿы.

Алеқсандр Анқәаб, Аԥсны аҩ-ҳәынҭқарраки уи ажәларқәеи ирыбжьоу аидгыларатәии аиҩызаратәи аизыҟазаашьақәеи аусеицуреи даара ахә ҳаракны ишыршьо, урҭ рырӷәӷәара азы ирылшо зегьы аҟаҵара ишазхиоу азгәеиҭеит.  

Аҟәа. Рашәарамза 10, 2023 шықәса. Аԥсныпресс. Рашәарамза 9 рзы Аԥсны Анапхгара аҿы имҩаԥысыз атәыла Анапхгара ахаҭарнакцәеи Урыстәыла Анапхгара ахантәаҩы ихаҭыԥуаҩ Алеқсандр Новак напхгара зиҭо урыстәылатәи аделегациеи реиԥылара аҿы аҩганктәи аусеицура азҵаарақәа жәпакы ирылацәажәеит.

Аиԥылара иалахәыз аганқәа русеицуреи аусеицуа еиҳа аперспектива злоу ахырхарҭақәа ралкаареи иадҳәалоу азҵаарақәа ирылацәажәеит. Ахәҭакахьала, Аԥсны аенергосистема еиҳа ақәыӷәӷәара анамоу аамҭазы афымцамч ала аиқәыршәареи Урыстәылантәи Аԥсныҟа еиԥҟьарада анефть аалыҵқәа раагареи азҵаарақәа ирзааҭгылеит.  Аԥыза-министр Алеқсандр Анқәаб аԥсны-урыстәылатәи аусеицура ахәшьара ҳаракы аиҭеит, убри аан уи аԥсуа ган анаҩстәи аусеицура ишазхиоугьы азгәеиҭеит.  

Аиԥылара аҿы аҩ-тәылак рзакәанԥҵарақәа реишьашәалара апроцесс арцаакра шхымԥадатәиу ҷыдала иазгәаҭан. 

Аҟәа. Рашәарамза 10, 2023 шықәса. Аԥсныпресс.  Рашәарамза 10 рзы Аҟәа ақалақь, Аԥсны адәныҟатәи аусқәа Рминистрра амедиа-центр аҿы имҩаԥысит ашахматқәа рзы онлаин-матч.

Атурнир Аԥсны ашахматқәа Рфедерациеи аҿари аспорти русқәа рзы аҳәынҭқарратә Еилаки иҟарҵаз адгыларала имҩаԥысит.

Аԥсны ахьӡала атурнир рхы аладырхәит ашахматистцәа Руслан Ӡиаԥшьба, Альберт Карапетиан, Нестор Багаҭелиа, Ҭрисҭан Кәарацхьелиеи  Сарида Лакәаҭааԥҳаи. Акоманда азыҟаиҵон Аԥсны ашахматқәа Рфедерациа ахантәаҩы ихаҭыԥуаҩ Зыхәба Ҭемыр.

Аҟәа. Рашәарамза 10, 2023 шықәса. Аԥсныпресс.  Аҿари аспорти русқәа рзы аҳәынҭқарратә Еилакы аҿар Аԥсны раԥхьаӡа акәны имҩаԥысраны иҟоу «плоггинг» ҳәа изышьҭоу агәам-сам аизгара зцу аҩра рхы аладырхәырц азы ааԥхьара ҟанаҵоит.

Уи азы аусмҩаԥгатә иалахәхо 4 – 8-ҩык злоу аиҩызцәа, аколлегацәа, уҳәа рыла ишьақәгылоу акоманда еизгатәуп, анаҩс рашәарамза 10 аҟынӡа  алахәхаразы онлаин-зыҳәамҭа харҭәаатәуп.

Акомандақәа зегьы рҿы иалкаау аӡәы  анаҩс аусеиҭадулара зылшо ацрыҵқәа - апластик, ақьаад, асаркьа,  (уи аԥҽыхақәагьы уахь иналаҵаны), аихамаҭәақәа, уҳәа еизигалоит. Аусеиҭадулара зылшо зегьы аусдулара ахь идәықәҵахоит.