Аҟәа. Жәабранмза 6,  2023 шықәса. Аԥсныпресс. Ҭырқәтәыла иҟалаз адгьылҵысра иахҟьаны аԥсуа диаспора ахаҭарнак лыԥсҭазаара далҵит.  Уи Хапат лыжәлоуп, уажәазы  уи ауп иаадыруа, ҳәа  Аԥсныпресс ахь адырра ҟаиҵеит арепатриациа азы аҳәынҭқарратә Еилакы аинформациа-аналитикатә ҟәша аиҳабы Алмасхан Ӷәынџьиа.   

Аҟәа. Жәабранмза 4, 2023 шықәса. Аԥсныпресс.  Аԥснытәи аспортсменцәа Краснодартәи атәылаҿацә аҿы имҩаԥысуаз таитәи абокс азы аицлабрақәа рҿы ахьтәы медалқәа хԥа ранашьахеит.

Краснодартәи атәылаҿацә астаница Крыловскаиа аҿы араион ахада Ихраҿа агаразы имҩаԥысыз таитәи абокс азы аицлабрақәа рҿы аԥснытәи аспортсменцәа ахьтәы медалқәа хԥа ранашьахеит.

Аҟәа. Жәабранмза 4, 2023 шықәса. Аԥсныпресс. Аԥснытәи атхеквондистцәа Амуниципалтә Еиҿкаара Кургантәи араион аԥхьахәгара аҿы 19 медал ранашьахеит.

Атурнир рхы аладырхәит Краснодартәи атәылаҿацә, Адыгеиа, Ҟабарда-Балкариа, Аԥсны  рҟынтәи 300-ҩык инаеиҳаны аспортсменцәа.

Аԥсны Аҳәынҭқарра ахьӡала иқәгылон 12-ҩык аспортсменцәа, урҭ спарринги  стоп-балл апрограммақәа рыла актәи 10 ҭыԥк, аҩбатәи 6 ҭыԥк, ахԥатәи 3 ҭыԥк ааныркылеит.

Актәи аҭыԥқәа ааныркылеит: Сергеи Барцыц (ҩ-медалк), Дамир Ванаба, Арсен Челикиан, Даниел Манукиан, Роланд Абрамиан, Макар Мумџьиан, Камила Папазиани Ашоҭ Терзиани. 

Аҟәа. Жәабранмза 4, 2023 шықәса. Аԥсныпресс. Аԥсны ашәахтәқәеи аизгақәеи рзы Аминистрра аппарат Хада аҿы Ахылаԥшырҭа 2022 шықәса рзы инанагӡаз аусра аихшьаалақәа рзы инарҭбаау аилатәара мҩаԥысит.  Аилатәара ихы алаирхәит аԥыза-министр ихаҭыԥуаҩ, афинансқәа рминистр Владимир Делба.  Инагӡаз аусура азы ажәахәқәа ҟаҵо иқәгылеит Аппарат Хада Аусбарҭақәа рнапхгаҩцәеи Аминистрра атерриториалтә инспекциақәа  рнапхгаҩцәеи. 01.01.2022 шықәсазы ашәахтәқәҵара змоу аекономика асубиектқәа рхыԥхьаӡара 17 213 рҟынӡа инаӡеит, урҭ рхыԥхьаӡараҿы иҟоуп 4531 аиуристтә хаҿқәа,  иара убас 12682 хазхаҭалатәи аусдкылаҩцәа. Убри аан 01.01.2023 шықәса азы  урҭ рхыԥхьаӡара – 19187 рҟынӡа инаӡеит,  аиуристтә хаҿқәа – 5060, 14127 – ҩык хазхаҭалатәи аусдкылаҩцәа, ареестр иалгоу уахь иналамҵакәа.  Убас ала, аҳасабырбатә аамҭахәҭа азы аекономика асубиектқәа рхыԥхьаӡара 1974 рҟынӡа иазҳаит, урҭ рахьынтә 529 аиуристтә хаҿқәа, иара убас  1445-ҩык хазхаҭалатәи аусдкылаҩцәа. Ашәахтәқәеи аизгақәеи рзы Аминистрра 2022 шықәсазы аусура аихшьаалақәа  ареспублика аҿы иҟоу ашәахтә шәатәқәа зегьы рыла хра злоу алҵшәақәа аанарԥшит.  2022 шықәсазы аҳәынҭқарратә биуџьет иалагалахаз ихымԥадатәиу ашәатәқәеи ашәатәқәеи рзеиԥш еицҵалыҵ 4 285,2 млн. мааҭ рҟынӡа инаӡеит. Убри аан 2022 шықәсазы аплан ала  ишьақәырӷәӷәан – 3 526,3 млн. мааҭ. (анагӡара 122%, иааизакны инацҵаны анагӡара – 759,0 млн. мааҭ рҟынӡа инаӡеит), аизҳара адинамика – 126 % рҟынӡа инаӡеит. Иарбоу алагалақәа реицҵалыҵ 2021 шықәсатәи арбагақәа 886,4 млн. мааҭ рыла еиҳауп,  2020 шықәсатәи арбагақәа  1 778,3 млн. мааҭ рыла еиҳауп.   2022 шықәса иалагӡаны арбагақәа   ԥхынҷкәынмза 31, 2022 азы 517,2 млн.мааҭ рыла еиҳахеит. Аԥхьанатә 2022 шықәсазы ашәахтә шәатәқәа рзы аплан 3 009,1 млн. мааҭ рҟынӡа инаӡон.  Ашықәс анҵәамҭазы 2022 шықәсазы аплан 3 526,3 млн. мааҭ рҟынӡа инаӡон, аха  иарбоу аизҳара шыҟазгьы, аплан инацҵаны инагӡан. «Аԥсны ашәахтәқәеи аизгақәеи рзы Аминистрра аҭакзыԥхықә хаҿқәа ражәахәқәа рҟынтәи ишеилкаахаз ала, зыҩаӡара ҳараку алҵшәақәа раарԥшра алыршахеит.  Ҳара  ашықәсқәа инеиԥынкыланы абиуџьет ахь ашәахтә лагалақәа реизҳара шыҟоу аабаратәы иҟоуп. Жәаҳәарада, Аминистрра аусура хра злоу алҵшәақәа раарԥшра еиҳахоит. Уи инамаданы, ашәахтәқәеи аизгақәеи рзы Аминистрра аҟны имҩаԥысуа ашәахтәқәҵаратә закәанԥҵара аиӷьтәра азы ауснагӡатәқәа шхымԥадатәиу умбар залшом» – ҳәа инаҵшьны иазгәеиҭеит Владимир Делба.

Аҟәа. Жәабранмза 3, 2023 шықәса. Аԥсныпресс. Аинвалидцәа Рфонд аҿы еиҳа иуадаҩу, апроблема зцу аныхтә статианы иҟоуп – ахәшәтә маҭәашьарқәа раахәара.  Иарбоу ахәҭаҷ заҵәык ала ауп Афонд ауал злашьақәгылаз.  Уаҳа ауал ҳәа Афонд акгьы ақәӡам. Абри азы адырра ҟанаҵоит 1992 – 1993 гг. Аԥсны жәлар Рџьынџьтәылатәи еибашьра аинвалидцәа Рфонд аофициалтә саит.  https://gfi-ra.org.

Аус аҿы иҟоу убри ауп, аинвалидцәа арецептқәа рзылызҩаауа аполиклиникақәа, лассы-лассы ҵаҵӷәыда зхымԥадатәра алаборатортә ҭҵаарақәа рыла ишьақәырӷәӷәам апрепаратқәа рхыԥхьаӡра инамыцхәны иацырҵоит. Рецептқәак рҿы иарбахоит 20-30 ахәшәқәа рыхьӡқәа.  Иаагохар, 2022 шықәсазы ахәшәқәа раахәаразы Афонд ахарџь  71 млн. мааҭ рҟынӡа инаӡеит. Убри аан 500-ҩык инареиҳаны аинвалидцәа аҽыхәышәтәразы   Аԥсны анҭыҵҟа рышьҭра иақәхарџьхеит 45 млн. мааҭ.

Иҳаҩсыз ашықәс азы Афонд агәабзиарахьчара Аминистрра алархәны Ҭҟәарчал инаркны Гагранӡа аус зуа аполиклиникақәа зегьы рҿы агәаҭарақәа мҩаԥнагеит. Зехьынџьара аилагарақәа аарԥшхеит. Бжеиҳан арецептқәа анализқәа рыда, аҳақьымцәа рабжьгарақәа рыда, апациент дзызхьаауа азы иажәа ала, лаԥшылатәи агәаҭара мацара ашьҭахь арецептқәа ылырҩаауан. Иара убас аполиклиникақәа зегьы рҿы аҳасабырбара иадҳәаланы ауадаҩрақәа ыҟоуп. Амбулатортә хсаалагақәа ишахәҭоу ала ихадырҭәааӡом. Агәаҭарақәа реихшьаалақәа рыла, аилагарақәа рырҽеира азы адҵақәеи анапынҵақәеи ҟаҵан. Иара убас, шықәсык ахь ҩынтә аполиклиника аҿы ашәҟәы иҭагалоу аинвалидцәа зегьы адиспансеризациа иахылароуп, аха уи мҩаԥыргаӡом.

Аҟәа. Жәабранмза 3, 2023 шықәса. Аԥсныпресс. Ироуз аоперативтә информациа ала Аҳәынҭқарратә ҳазылхратә Еилакы аконтрбати аҳазылхратә цәгьоурақәеи рыԥхьырҟәҟәаара азы аҟәша аусзуҩцәеи аҳазылхратә усбарҭа   «Гал» аконтрбати аҳазылхратә цәгьоурақәеи рыԥхьырҟәҟәаара азы аҟәша аусзуҩцәеи, ажьырныҳәамза 31, 2023 шықәсазы Гал араион Хьацҳа ақыҭан уаҩ дызхым аҩны аҿы агәаҭара анымҩаԥыргоз ирыԥшааит 36900 цыра рҟынӡа инаӡоз акцизтә дыргақәа змамыз аҭаҭын аалыҵ.

Аҟәа. Жәабранмза 3, 2023 шықәса. Аԥсныпресс. Ақыҭанхамҩа Аминистрра аҿы имҩаԥысит «2023 шықәсазы ақыҭанхамҩа аҿиара» анапхгаратә хықәкытә программа анагӡара азы аконкурстә Комиссиа алахәылацәа аԥхьатәи реилатәара.   Уи мҩаԥигон атәыла аԥыза-министр актәи ихаҭыԥуаҩ, ақыҭанхамҩа аминистр Баслан Џьопуа.

Аилатәара алахәылацәа аԥсшәа раҳәо, Беслан Џьопуа иҳәеит: «Агәыӷра сымоуп ареспубликатә биуџьеҭ аҟынтәи иазоужьыз 100 миллион мааҭ хра злоу алҵшәақәа шаанарԥшуа. Иҳаҩсыз ҩы-шықәса алҵшәақәа ишаҳнарбаз ала, иааизкны апрограмма аихшьаала бзиақәа аиуит.  Иҳаҩсыз ашықәсқәа рзы иҟаз агхақәа ҳара жәаҳәарада ҳасаб азаауроуп, иҳарҽеироуп, инацҵаны аус рыдааулароуп. Ҳара оперативла аус аауроуп, аҭыԥқәа ҳарҭаароуп, иахәҭоу ацхыраара аҭаразы иҟоу аҭагылазаашьа ҳаблала иаабароуп. Уи иаанагаӡом ҳара проектқәак мап рцәаҳкыроуп ҳәа, аха ҳхықәкы хаданы иҟоу апрограмма алахәхара зҭаху ауаа хра злоу аԥшьгарақәеи  ацхыраареи рыҭара ауп. Сара сгәаанагарала, ҳусура аиҿкаара шҳалшо  ишаиашоу иадҳәалоуп иарбоу апрограмма азы иазоужьхо аԥаратә хархәагақәа рацҵара зыҟало изыҟамло», –  ҳәа иҳәеит иара.

Аминистрра аграномиа аҟәша аграном хада Ҭеваз Ачба иҳаҩсыз ҩы-шықәса ирылагӡаны инагӡаз апроектқәа дрылацәажәеит.

Убас, 2021 шықәса рзы ахықәкытә программа анагӡара алагара инаркны ақәыршаҳаҭра роуит  91 проект. Урҭ рхарџьынҵа азеиԥш еицҵалыҵ   77 млн. 48 нызықь мааҭ рҟынӡа инаӡон,  2022  шықәсазы - 152 проект, урҭ рхарџьынҵа азеиԥш еицҵалыҵ - 76 млн. 611 нызықь мааҭ рҟынӡа инаӡеит.  Ихадоу ахырхарҭақәа — ари аҵиааӡара, арахәааӡара, имаҷу амеханизациа, ақыҭанхамҩа аалыҵ аус адулара.

«Ари еиҳа зҭаххара ҳараку ахырхарҭақәа роуп», –  ҳәа иҳәеит Ҭеваз Ачба. 

Аминистрцәа Реилазаара Ақәҵарала аԥыза-министр актәи ихаҭыԥуаҩ, ақыҭанхамҩа аминистр Беслан Џьопуа ихантәаҩрала иаԥҵоу «2023 шықәсазы ақыҭанхамҩа аҿиара азы» Апрограмма анагӡаразы аконкурстә Комиссиа есымша аус зуа аилазаара шьақәырӷәӷәахеит.

Аҟәа. Жәабранмза 3, 2023 шықәса. Аԥсныпресс.  Жәабранмза 2 рзы ироуз аоперативтә информациа рхы иархәаны аҳазылхратә ԥыԥшырҭа «Ԥсоу» аконтрбати аҳазылхратә цәгьоурақәеи рыԥхьырҟәҟәаара азы аҟәша аусзуҩцәа аҳазылхратә хылаԥшра азона «Аимпорт» ахырхаҭа аҿы Аԥсны атәылауаҩ Башников Л.Г. зыԥсҟы икыз автомашьына агәаҭара мҩаԥыргеит.   Агәаҭараан амашьына асалон аҿы апассаџьыр итәарҭа ашьҭахьтәи аган аҿы ирыԥшааит акриптовалиута арҳара иазку аппаратқәа ҩба.

Аҟәа. Жәабранмза 3, 2023 шықәса. Аԥсныпресс.  2023 шықәса,   ажьырныҳәамза азы ареспубликатә биуџьеҭ иалагалахаз ашәахтә шәатәқәа реицҵалыҵ 247,2 млн. мааҭ рҟынӡа инаӡеит. Убри аан аплан ала ишьақәырӷәӷәаӷәан 185,8 млн. мааҭ., - ҳәа адырра ҟанаҵоит ашәахтәқәеи аизгақәеи рзы Аминистрра аофициалтә саит. Азԥхьагәаҭатә рбагақәа рынагӡара 133% рҟынӡа инаӡеит. Фактла иалагалахаз ашәатәқәеи планла иазԥхьагәаҭаз ашәатәқәеи реицҵалыҵтә еиԥшымзаара – 61,4 млн. мааҭ рҟынӡа инаӡоит. 2022 шықәсазы аиԥш зеиԥшу аамҭахәҭа иаҿырԥшны уахәаԥшуазар, алагалара адинамика 135% рҟынӡа инаӡеит, уи аицҵалыҵ ааизакны – 63,8 млн. мааҭ рҟынӡа инаӡоит.

2023 шықәса ажьырныҳәамза иалагӡаны ашәахтә шәатәқәа ралагалара араионқәа рыла абас иҟоуп:

Аҟәа ақалақь ала – 102,3 млн. мааҭ  рыла ишьақәыргылоу аплан ала иалагалахеит 128,3 млн. мааҭ, мамзаргьы даҽакала иуҳәозар –125% рҟынӡа инаӡоит.

Аҟәа. Жәабранмза 3, 2023 шықәса. Аԥсныпресс. Жәабранмза 3 рзы атәыла аҩныҵҟатәи аусқәа рминистр Вальтер Быҭәба аҳәынҭқарратә автоинспекциа аусбарҭа аколлектив дыдирдырит анапхгаҩы инапынҵақәа рынагӡаҩыс иҟаҵоу Родик Базба.  

«Шәара зегьы ибзианы дыжәдыруеит Родик Виктор-иԥа, уи 20-шықәса инареиҳаны аҩныҵҟатәи аусқәа Рминистрра асистема аҿы аус иухьеит.  Шәара зегьы шәҟынтәи сара сазыԥшуп ламысцқьала, ҳәоуеиқәшәарала аусура.  Иазгәасҭарц сҭахуп, Баҭал Агрба аҩныҵҟатәи аусқәа Рминистрра асистема аҿы даанхоит сара сыцхырааҩ иаҳасабала, уи ҳаԥхьаҟагьы шәусура аҿы ацхыраара шәиҭалоит», - ҳәа инаҵшьны иазгәеиҭеит аминистр Вальтер Быҭәба.