Аҟәа. Жәабранмза 1, 2024 шықәса. Аԥсныпресс. Атәылахьчареи амилаҭтә шәарҭадареи рзы апарламенттә Еилакы аҿы «Аҳәынҭқарратә шәарҭадара аусбарҭақәа рзы» Аԥсны Аҳәынҭқарра Азакәан аиҭакрақәа ралагаларазы» азакәан апроект иахәаԥшит. Аусшәҟәы Аԥсны ашәарҭадара аусбарҭақәа рсистема аусура аиӷьтәра иазырхоуп.
Иарбоу азакәан апроект иазԥхьагәанаҭоит:
- Аԥсны аҳәынҭқарратә шәарҭадара Амаҵзура Иҷыдоу азкызаара змоу Ацентр аҳәынҭқарратә шәарҭадара аусбарҭақәа рсистема алагалареи уи азинтә шьаҭа ашьақәыргылареи;
- Аԥсны аҳәынҭқарратә шәарҭадара Амаҵзура аҳәаахьчаратә отриад «Аԥсны аҳәынҭқарратә шәарҭадара Амаҵзура Аҳәаахьчаратә Усбарҭа» ҳәа ахьӡ аԥсахра.
Аилацәажәара ашьҭахь апарламенттә Еилакы аҿы иарбоу азакәан апроект иааиуа Апарламент асессиа аилатәара актәи аԥхьарала адкыларазы абжьгара аҟаҵаразы аӡбамҭа рыдыркылеит.
Атәылахьчареи амилаҭтә шәарҭадареи рзы апарламенттә Еилакы ахантәаҩы Ҭемыр Шергелиа имҩаԥигоз аилатәара ахь ааԥхьара рыҭан Аԥсны аҳәынҭқарратә шәарҭадара Амаҵзура ахантәаҩы ихаҭыԥуаҩ – Аҳәаахьчаратә отриад аиҳабы Русҭам Латипови Аԥсны аҳәынҭқарратә шәарҭадара Амаҵзура азиндырратә ҟәша аиуристконсул еиҳабы Мадина Аршба.
