1992-1993 шш. Аԥсны жәлар Рџьынџьтәылатәи еибашьра аналага, Игорь Ахба иаԥиҵеит, напхгарагьы аиҭо далагеит Аԥсны ганрацәала ацхыраара аҭаразы аоперативтә Штаб.
1992 шықәса инаркны рашәарамза 2004 шықәсанӡа, иара убас ԥхынҷкәынмза 2004 шықәса инаркны 2008 шықәсанӡа Игорь Ахба Урыстәыла иҟоу Ареспублика Аԥсны аҷыдалкаатә зинмчы змоу Ахаҭарнак имаҵураҭыԥ ааникылон.
Ԥхынгәымза-ԥхынҷкәынмза 2004 шықәса рзы Аԥсны адәныҟатәи аусқәа рминистрс аус иуан.
Абҵарамза 14, 2008 шықәсазы Урыстәылатәи Афедерациаҿы иҟоу Аԥсны Аҷыдалкаатә зинмчы змоу Ацҳаражәҳәаҩыс дҟаҵан. Ажьырныҳәамза 16, 2009 шықәсазы Кремльтәи Ахан Ду Алеқсандриатә зал аҿы иара Урыстәылатәи Афедерациа Ахада Дмитри Медведев агәрагагатә шәҟәқәа ииҭеит.
Игорь Ахба 13шықәса – абҵарамза 14, 2008 шықәса инаркны ԥхынҷкәынмза 16, 2021 шықәсанӡа Москва иҟоу Аԥсны Ацҳаражәҳәарҭа напхгара аиҭон.
Игорь Ахба – аордент «Ахьӡ-Аԥша» II, III аҩаӡарақәа ианашьоуп.
Иара убас иара «Жәларбжьаратәи аусеицура аҿиара аҿы алагала азы» Урыстәыла адәныҟатәи аусқәа Рминистрра агәышԥытә дырга» ианашьоуп.
