Аҟәа. Абҵарамза 6, 2023 шықәса. Аԥсныпресс /Алексеи Шамба/. Аԥсны абџьарҟаҵаҩцәа Реидгыла Аҩбатәи есышықәсатәи ацәыргақәҵа Аԥсны асахьаҭыхыҩцәа Реидгыла рцәыргақәҵатә Зал Хада аҿы иаатит ашәахьа, абҵараза 6 рзы.   

Ацәыргақәҵатә Зал Хада адиректор Ельвира Арсалиа адныҳәаларатә ажәахә аҟны  асахьаҭыхыҩцәа абџьарҟаҵаҩцәа-аҟазацәа рырҿиаратә занааҭтә Еидгылара «Х-НАПЫ» хәажәкырамза  24, 2021 шықәсазы иаԥҵан ҳәа иазгәалҭеит.

Аидгыла ахықәы хаданы иҟоуп – Аԥсны ажьиратәи абџьарҟаҵаратәи аус иреиӷьу атрадициақәа рпопулиаризациа», – ҳәа инаҵшьны иазгәалҭеит лара.

Ельвира Арсалиа иарбоу ахықәкы анагӡара азы иҟоу асахьаркыратә ҟазара атрадициақәеи традициала ишьақәгылахьоу аметтал аус адулашьеи, иара убас Аԥсны ажьиратәи абџьарҟаҵаратәи аус азҟазацәа русумҭақәа акультура-сахьатә коллекциатә фонд аԥҵареи рыла ишалыршахо азы агәра ганы дыҟоуп.  

Аекспозициа аҿы ицәыргоуп шәагаала еиуеиԥшым аԥсуа ҳәызбақәа, абырзалқәа, ахаҵақәа, ахҿақәа, аигәышәқәа. Аусумҭақәа равторцәа – Дмитри Ӡиуба, Џьгәаҭ Зарандиа, Алеқсандр Белыи, Адгәыр Какоба, Станислав Какоба, Гәырам Ҷкадуа, Ҭемыр Ӡиӡариа, Пиотр Лысенко.

Аҟәа. Абҵарамза 6, 2023 шықәса. Аԥсныпресс.  Атәыла аԥыза-министр Алеқсандр Анқәаб Аԥсуа телехәаԥшра анапхгареи аколлективи  ателехәаԥшра аԥҵара ҟалеижьҭеи 45-шықәса аҵра рыдиныҳәалеит.

«Ҳаҭыр зқәу аҩызцәа, ишәыдысныҳәалоит шәиубилеи – Аԥсуа телехәаԥшра аԥҵара ҟалеижьҭеи 45-шықәса аҵра!

Ари, аиашазы ҳаԥсадгьыл ԥхьаҟатәи аԥеиԥш иадҳәалаз ахҭыс амилаҭтә-хақәиҭратә қәԥара иалҵшәахеит, уи ахықәкы хадақәа –аԥсуа етнос аиқәырхара, ажәлар шьаҭанкылатәи аинтересқәа рыхьчареи  Аԥснытәи аҳәынҭқарра ашьақәгылареи акыр иацхрааит.  

Амилаҭтә телехәаԥшра аусзуҩцәа рабиԥарақәа, идеиак ала еидгыланы занааҭдыррала, рхы иамеигӡо руалԥшьа нарыгӡон асовет аамҭа азы еиԥш иуадаҩыз аџьынџьтәылатәи аибашьра аамҭазгьы. Шәареи шәколлегацәеи аинформациатә фронти аибашьра адәы аҿгьы еиԥшны фырхаҵарыла шәеибашьуан.

Рыцҳарас иҟалаз, аибашьра еибашьроуп – уи хымԥада аԥсытәбара ацуп. Еиҵагыло аҿар ԥхьаҟатәи рԥеиԥш лаша азы зхы иамеигӡаз Аԥсадгьыл ахьчаҩцәа рхыԥхьаӡараҿы имаҷым шәколлегацәагьы. Урҭ ргәалашәара наунагӡа ҳгәаҵаҿы иаанхоит.

Аҟәа. Абҵарамза 6, 2023 шықәса. Аԥсныпресс. Апрограмма 10S «Ампыл ҟаԥшь» ала аԥкьаҭмпыл азы атурнир мҩаԥысит абҵарамза  5 рзы Аҟәа ақалақь аҿы.

Аицлабрақәа рхы аладырхәит ақәратә категориақәа ҩба – 7 шықәса зхыҵхьои урҭ ириҵбууи 5 шықәса зхыҵуеи урҭ иреиҵбууи ирыҵанакуаз аспортсменцәа.

Ақәратә категориа «7 шықәса зхыҵхьои урҭ ириҵбууи» иаҵанакуа рыбжьара аиааира лгеит  Адель Папба, аҩбатәи аҭыԥ аанылкылеит Мила Матуа, ахԥатәи аҭыԥ  –  Закан Марколиа.

Аиҵбацәа рыбжьара актәи аҭыԥ анылкылеит Мира Матуа, аҩбатәи аҭыԥ аанылкылеит Киара Папба, ахԥатәи аҭыԥ Владимир Бениа.

«5 шықәса зхыҵуеи урҭ иреиҵбууи рзы атурнир ҳреспублика аҿы раԥхьаӡа акәны имҩаԥысуан», -ҳәа иазгәалҭеит аицлабрақәа рыӡбаҩ хада Елизабет Акәыциа.

Атурнир Аҟәа ақалақь аԥкьаҭмпыл Афедерациа ала еиҿкаахеит. 

Аҟәа. Абҵарамза 6, 2023 шықәса. Аԥсныпресс. Ахада Иусԥҟала Шьынқәба М.Шь. «Аԥсны Аҳәынҭқарра зҽаԥсазтәыз ақыҭанхамҩа аусзуҩы» ҳәа ахьӡ лыхҵоуп.

Аусԥҟаҟны, ҷыдала, иҳәоуп:

«Ақыҭанхамҩа аусхк аҿы аҭҵаарадырра-практикатә усураҟны лылшамҭақәа рзы, шықәсырацәалатәи лыҵшәабзиала аусуразы «Аԥсны Аҳәынҭқарра зҽаԥсазтәыз ақыҭанхамҩа аусзуҩы» ҳәа аҳаҭыртә хьӡы лыхҵазааит Шьынқәба Маиа Шәарах-иԥҳа, абиологиатә ҭҵаарадыррақәа ркандидат, Аԥснытәи аҳәынҭқарратә университет агрономиа акафедра адоцент, аҵиаақәа ркарантин азы Аԥсны Аҳәынҭқарратә инспекциа алабораториа аиҳабы».

Аусԥҟа иаҵаҩуп 2023 шықәса абҵарамза 2 рзы.

Аҟәа. Абҵарамза 6, 2023 шықәса. Аԥсныпресс. Аԥсны Аҳәынҭқарра Ахада Аслан Бжьаниа Иусԥҟала Бжьаниа В.О. «Аԥсны Аҳәынҭқарра зҽаԥсазтәыз аргылаҩ» ҳәа аҳаҭыртә хьӡы ихҵоуп.

Аусԥҟаҟны, ҷыдала, иҳәоуп:

«Аргылара аусхк аҟны шықәсырацәалатәи аусуразы «Аԥсны Аҳәынҭқарра зҽаԥсазтәыз аргылаҩ» ҳәа аҳаҭыртә хьӡы ихҵазааит Бжьаниа Валери Оҭари –иԥа».

Аусԥҟа иаҵаҩуп 2023 шықәса абҵарамза 2 рзы.

Аҟәа. Абҵарамза 6, 2023 шықәса. Аԥсныпресс. Аԥсны Аҳәынҭқарра Ахада Аслан Бжьаниа Аԥснытәи аҳәынҭқарратә телерадиоеилахәыра аԥҵара амш азы адныҳәалара ҟаиҵеит.

«Ҳаҭыр зқәу Ирина Шьоҭа-иԥҳа, ҳатыр зқәу Аԥснытәи аҳәынҭқарратә телехәаԥшра аколлектив!

Гәык-ԥсык ала ишәыдысныҳәалоит Аԥсны аҭоурых аҟны акрызҵазкуа арыцхә – Аԥснытәи аҳәынҭқарратә телерадиоеилахәыра аԥҵара амш.

1978 шықәса абҵарамза 6 рзы Аԥсуа телехәаԥшра раԥхьаӡакәны аефир ахь ицәырҵит. Ари амилаҭтә ҵысра ашьҭыҵреи аҿиареи рус акырӡа иацхрааит, уи иалҵшәаны ишьақәгылеит иахьатәи аԥсуа ҳәынҭқарра. Ари амш иугәаланаршәоит ҳажәлар знысыз ахақәиҭреи ахатәҳәаақәҵареи рышҟа инагаз амҩа хьанҭа.

1992 -1993 шш. Аԥсны Аџьынџьтәылатә еибашьраан Аԥснытәи ателехәаԥшра аусзуҩцәа апрофессионализми агәымшәареи аарԥшуа русура мҩаԥыргон. Урҭ рфырхаҵареи иаадырԥшуаз аибашьратә хҭысқәа реишьҭагылашьеи ирыбзоураны еизгоуп хәы змаӡам аибашьра архиви адокументациеи, адунеитә уаажәларра ақырҭуа агрессор ихаҿра шыҟаҵәҟьаз аилкааразы алшарагьы рнаҭеит. Хашҭра рықәым Аԥсадгьыл ахьчара зхы ақәызҵаз аԥсуа телехәаԥшра аусзуҩцәа.

45 шықәса инарзынаԥшуа Аԥсуа телехәаԥшра қәҿиарала анапы иану анагӡара иаҿуп. Шәара шәыпрограммақәеи шәрепортажқәеи аԥсуа уаажәларра рыԥсҭазаара иузаҟәымҭхо иадҳәалоуп. Шәара ауаажәларра ирышәҭо аинформациа инаваргыланы ишәылшоит ҳмилаҭтә хаҿра аиқәырхарагьы, ари, хымԥада, жәлар ртелехәаԥшраны аҟаҵара агьалнаршоит уҳәар ҟалоит.

Аҟәа. Абҵарамза 6, 2023 шықәса. Аԥсныпресс. Аԥсны ажурналистцәа Реидгыла Аԥснытәи аҳәынҭқарратә Телееилахәыра аколлектив Аԥсуа телехәаԥшра аԥҵара Амш инамаданы ирыдныҳәалоит.

«1978 шықәса, абҵарамза 6 рзы Аԥсуа телехәаԥшра раԥхьатәи адырраҭара аефир ахь иҭыҵит. Ари амш Аԥсуа телехәаԥшра аусзуҩцәа рзы еиԥш зықьҩыла ҳтәыла ателехәаԥшцәа рзы акыр иззыԥшыз мшны иҟалеит.

Ателехәаԥшра аԥҵара аԥсуа жәлар рзинқәа рзы рықәԥара иалҵшәахеит, амилаҭтә ҵысра ашьҭыҵреи аҿиареи рус акырӡа иацхрааит.

Ҷыдала иазгәаҭатәуп 1992 -1993 шш. Аԥсны Аџьынџьтәылатә еибашьраан Аԥснытәи ателехәаԥшра аусзуҩцәа русура. Урҭ апрофессионализми агәымшәареи аарԥшуа иӷәӷәоу ақырҭуа пропаганда иаҿагылеит.  Аԥсуа журналистцәа риаша ақырҭуа пропагандистцәа имцырку рхыҭҳәаақәа ириааит.

Хашҭра рықәым Аԥсадгьыл ахьчара зхы ақәызҵаз ҳколлегацәа, аԥсуа телехәаԥшра аусзуҩцәа. Урҭ рыхьӡқәа ззанааҭ гәык-ԥсыкала азнеиреи афырхаҵареи ахамеигӡареи  рҿырԥшы аҳасабала аԥсуа журналистика аҭоурых ианылеит.

Аҟәа. Абҵарамза 3, 2023 шықәса. Аԥсыпресс. Урыстәылатәи Афедерациа Жәлар ракзаара амш аламҭалазы Аԥсны Жәлар Реизара - Апарламент Аиҳабы Ашәба Лаша адныҳәаларақәа ишьҭит УА Афедералтә Еизара апалатақәа рхантәаҩцәеи Аԥсны Аҳәынҭқарраҟны иҟоу Ацҳаражәҳәаҩи рыхьӡала.

УА Афедералтә Еизара Афедерациа Ахеилак Ахантәаҩы Валентина Матвиенко ихы лықәкны Аԥсны Жәлар Реизара - Апарламент Аиҳабы Ашәба Лаша, ҷыдала, иҳәеит:

«Ҳаҭыр зқәу Валентина Иван-иԥҳа! Аԥсны Жәлар Реизара - Апарламент ахьӡала Шәаргьы шәколлегацәа - УА Афедералтә Еизара Афедерациа Ахеилак алахәцәагьы ишәыдысныҳәалоит аҳәынҭқарратә ныҳәа ду -   Жәлар ракзаара амш!

Урыстәыла ажәларқәа ракзаара урыстәылатәи аҳәынҭқарра ашьақәгылара аҭоурых иадҳәалоуп. Урыстәыла ажәларқәа рлахьынҵа иара иалахьынҵаны иҟалеит. Иахьа урыстәылатәи ажәлар рҿаԥхьа иқәгылоуп ҳаамҭазтәи ашәарҭара дуқәа.

Аҟәа. Абҵарамза 6, 2023 шықәса. Аԥсныпресс. Лаша Ашәба Аԥснытәи ателехәаԥшра Адиректор хада И. Шь. Агрбеи аколлективи Аԥснытәи аҳәынҭқарратә телерадиоеилахәыра 45 шықәса ахыҵра рыдиныҳәалеит.

Адныҳәалараҿы ахәҭакахьала иазгәаҭоуп:

Ҳаҭыр зқәу Ирина Шьоҭа-иԥҳа!

Ҳаҭыр зқәу Аԥснытәи аҳәынҭқарратә телерадиоеилахәыра аусзуҩцәа!

Аԥсны Жәлар Реизара – Апарламент ахьӡала ишәыдысныҳәалоит Аԥснытәи ателехәаԥшра 45 шықәса ахыҵра!

1978 шықәса абҵарамза 6 рзы Аԥснытәи ателехәаԥшра раԥхьаӡакәны аҳәынҭқарратә бызшәала аефир ахь ацәырҵра аԥсуа жәлар рзы ҭоурыхтә хҭысны иҟалеит.

Ҳтелехәаԥшра ашьақәгылара уадаҩны имҩаԥсыуан, аха шәара шәколлектив ари аԥышәара қәҿиарала иахысит.

Аԥснытәи ателехәаԥшра аԥызҵаз иазгәарҭаз ахықәкқәа рықәныҟәарала шәара ҳҳәынҭқарра уасхырс иазышьҭалаз астратегиамҩа шәанылеит аҳәынҭқарреи ажәлар зегьи рпозициа аарԥшуа. Иахьа иҭабуп ҳәа раҳҳәоит амилаҭтә телехәаԥшра аԥҵара ахыҵхырҭаҟны игылаз, ААТЕ аветеранцәа зегьы. 

Аҟәа. Абҵарамза 6, 2023 шықәса. Аԥсныпрессс.  Аԥснытәи ателехәаԥшара иахыҵит 45-шықәса. Аԥсуа телехәаԥшра егьырҭ ателехәаԥшратә каналқәа шцәырҵхьоугьы, иахьа уажәраанӡа азеиԥшмилаҭтә телехәаԥшраны иҟоуп, ҳтәыла ахи-аҵыхәеи зегьынџьара инаӡоит.

Ашьыжь аԥсуа телехәаԥшра аефир аҿы ицәырҵуеит асааҭ 08:00 рзы. Ҽынлатәи адырраҭарақәа рзеиԥш ҭагӡара 14 сааҭ рҟынӡа инаӡоит. Аԥснытәи аҳәынҭқарратә Телерадиоеилахәыра аҿы аус зуа рхыԥхьаӡара 160 - ҩык рҟынӡа инаӡот.  

Иахьа акьыԥхьтәи аелектронтәи амассатә информациа ахархәагақәа, иара убас аинтернет ресурсқәеи хыԥхьаӡара рацәала ианыҟоу аамҭазы, Ааԥнытәи ателехәаԥшра ареспублика аҿы зегьы реиҳа идуу ахәаԥшцәа раудиториа амоуп. Ажәабжь ҿыцқәа рдырраҭара «Амшеикәшара» акыр шықәса раԥхьа еиԥш уажәгьы аполитикатә, аекономикатә, асоциалтә, акультуратә информациа ахыҵхырҭа хаданы иҟоуп ареспублика  ауааԥсыра рзы. Амш иалагӡаны аефир ахь ицәырҵуеит аԥсышәалеи урыс бызшәалеи ԥшь-блок рҟынӡа ажәабжь ҿыцқәа.

Ҳазҭоу аамҭазы Аԥснытәи аҳәынҭқарратә Телерадиоеилахәыра аструктура иалоуп ауаажәларра-политиатә, аинформациатә программақәа, атематикатә редакциа, ашьыжьтәи адырраҭара «Шьыжьбзиа Аԥсынтәыла» аредакциа, Аԥсны арадиои атехникатә маҵзуреи.

Атематикатә редакциа аҿы иҟоуп  25 автортә ателехәаԥшратә проектқәа. Апрограммақәа зегьы ахатәы хықәкытә аудиториа, ахронометраж, аефир ахь ацәырҵра апериодра  амоуп.

Еиуеиԥшым ашықәсқәа рзы  Аԥснытәи аҳәынҭқарратә Телерадиоеилахәыра напхгара арҭон Миџьид Хәарҵкьиа, Шамиль Ԥлиа, Владимир Занҭариа, Гәырам Амкәаб, Руслан Ҳашыг, Алхас Ҷолокуа, Емма Хоџьаа, Леонид Еныкь, Ҭали Џьопуа, Роланд Бганба, Оҭар Лакрба. Ԥхынгәымза 1, 2020 шықәса инаркны Ареспубликатә ҳәынҭқарратә убарҭа «Аԥснытәи аҳәынҭқарратә Телерадиоеилахәыра» анапхгаҩы хадас дыҟоуп Ирина Агрба.  

Иахьа, асааҭ 17:00 рзы, Аҟәа ақалақь аҿы Аҳәынҭқарратә Телерадиоеилахәыра иазкны имҩаԥысуеит аныҳәатә еизареи аконцерти.

Аинформациатә Агентра «Аԥсныпресс» аколлектив рколлегацәа Аԥснытәи ателехәаԥшра аиубилеи –  45-шықәса ахыҵра рыдырныҳәалоит!

Аԥснытәи ателехәаԥшра аԥҵара аҭоурых аҟынтәи

Аԥсуа телехәаԥшра аԥҵара аҭоурых ахы акуеит 1977-1978 шықәса рзы Аԥсны имҩаԥысуаз ахҭысқәа рхаан. Усҟан атәылаҟны имҩаԥысуан аполитикатә хҭысқәа. Еицырдыруаз аԥсуа уаажәларратә усзуҩцәа гәыԥҩык атәыла анапхгарахь ашәҟәы рҩит Қырҭтәыла анапхгара имҩаԥырго аԥсуа жәлар ақырҭуа етнокультура алаӡҩара хықәкыс измаз аполитика ишаҿагыло атәы арбаны. Қырҭтәыла Ацентр Комитет Акоммунисттә партиа адҵала апартиа аобком Апленум ашәҟәаҿы иарбаз афактқәа ирықәшаҳаҭымхеит, авторцәа ракәзар, ирықәыӡбеит. Автономтә Республика ашьагәыҭ уааԥсыра апленум аӡбамҭа ажәлар рзинқәа ирыӷрагылеит, амилаҭтә хақәиҭра азықәԥареи ахьыԥшымреи рымҩа ԥнакит ҳәа азырыԥхьаӡеит. Аԥсны аҭыԥ ылырхуа иалагеит амитингқәеи адемонстрациақәеи. Усҟантәи ашықәсқәа рзы иҟаз аполитикатә ԥышәа инақәыршәаны, аиҳабыра иџьбараз ауаажәларратә цәырҵрақәа рыбжьы ақәмыргакәа, амилаҭқәа рыбжьара иҟаз аиҿагыларақәа аиҿкааратәи аекономикатәи зҵаарақәа рхы иархәаны рҭышәныртәалара рҽазыршәон.

Атәылаҿы аҭыԥ змаз массала ақәгыларақәа еиҵахо иалагеит Асовет Еидгыла Акоммунисттә Партиа Ацентркомитет (ЦК КПСС), Асоветтә Социалтә Республикақәа Реидгыла Аминистрцәа Реилазаара, ВЦСПС "Аԥснытәи АССР акультуреи аекономикеи аԥхьаҟатәи рыҿиара иазку ауснагӡатәқәа рзы" Ақәҵара анрыдыркыла анаҩс, ара ателехәаԥшразгьы иаҳәон абас:

«Ателехәаԥшреи арадиои рзы Асоветтә Социалтә Республикақәа Реидгыла Аминистрцәа Реилазаара аҳәынҭқарратә комитет, Аимадаразы ахархәагақәа рзы Ааглыхра аминистрреи, Асоветтә Социалтә Республикақәа Реидгыла Аимадара аминистрреи ирыдҵоуп Аԥснытәи АССР аҟны ателехәаԥшратә дырраҭарақәа реиҿкаара алыршара, уи азы: хымз ирылагӡаны иазалхзарц еиҭаҵуа ателехәаԥшратә станциа, иара убас иахәҭоу амыругақәеи аппаратуреи ателехәаԥшратә дырраҭарақәа рымҩаԥгаразы аамҭатә схема инақәыршәаны, 1978 шықәса рзы астационартә телехәаԥшратә станциазы ирыҭазааит амыругақәеи аппаратуреи» ҳәа.

Абри Ақәҵара ала ихацыркын Аԥсуа телехәаԥшра аҭоурых, абас иагханы аусурагьы иалагеит ахәаԥшыҩцәа рхатәы бызшәала рацәажәара.

Аԥсуа телехәаԥшра раԥхьатәи адырраҭара аефир ахь иҭыҵит 1978 шықәса, абҵарамза 6 рзы. Асааҭ 19:00 рзы ателехәаԥшра аекран аҟны ицәырҵит ареспублика аҳҭнықалақь асахьа. "Убри аҽны Аҟәа, Лыхны, Ешыра, Кәтол, Тҟәарчал, Бзыԥ, Гагра, Пицунда, Аԥсны ахы-аҵыхәа зегьынџьара аекран аҟынтә раԥхьаӡакәны еицырдыруа жәлар рашәақәа рылаҩит, анаҩс урҭ адырраҭарақәа ирдырганы иҟалеит, убасҟан ателехәаԥшцәа аԥсышәалагьы ирацәажәеит абарҭ ажәақәа рыла: «Хәлыбзиақәа, акыр иаԥсоу Аԥсуа телехәаԥшцәа!». Уи ауха сааҭбжак ицоз апрограмма хыркәшан аконцерт ала, иалахәын ареспублика ашәаҳәарратә коллективқәа.

Аԥсуа телехәаԥшра аиреи ашьақәгылареи рыҟны еиуеиԥшым аамҭақәа алукаар ҟалоит.

Раԥхьатәи аамҭа - аиҿкааратә. 1978 шықәса рашәармза инаркны 1978 шықәса, абҵарамза 6 нӡа - аицлабратә ҟазшьала арҿиаратәи анџьныр-техникатә еилазаареи алхразы аҽазыҟаҵара, уи мҩаԥысит 1978 шықәса ԥхынгәымза 7 рзы, иара убас раԥхьатәи адырраҭара аус адулара. Убри аамҭазы имҩаԥысуан ателехәаԥшреи, арадиои, акьыԥхьи русура еиқәыршәаны аиҿкаара, Амассатә информациатә хархәагақәа рсистема ашьақәыргылара, ателехәаԥшрагьы уи иалаҵаны.