Аҟәа. Ажьырныҳәамза 23, 2023 шықәса. Аԥсныпресс. Аԥсны аҩныҵҟатәи аусқәа Рминистрра аҳәынҭқарратә автоинспекциа Аусбарҭа ахатәы   Telegram-канал «АԤСНЫ АҲӘЫНҬҚАРРАТӘ АВТОИНСПЕКЦИА» аусура иалагеит. Уи ахылаԥшырҭа аусура иазкхоит.  Араҟа имҩаԥгахалоит амҩаҿы аныҟәара аԥҟарақәа рганахьала актуалра злоу,  хра злоу аинформациа зцу  аилыркаагатә блок, атестқәа, уҳәа, ҳәа адырра ҟаиҵеит Аԥсны автоинспециа Аусбарҭа анапхгаҩы Баҭал Агрба.

Аҟәа. Ажьырныҳәамза 24, 2023 шықәса. Аԥсныпресс.  2022 шықәса аихшьаалақәа рыла аҳәынҭқарратә биуџьет анагӡара  12 млрд 736 млн. мааҭ рҟынӡа инаӡеит. Уи ишьақәырӷәӷәаз арбагақәа раасҭа 1 млрд 273 млн. мааҭ рыла еиҳахеит. Ареспубликатә биуџьет азы азакәан ишьақәнаргыло аԥхьанаттәи апараметрқәа рганахьала, ахашәалахәытә хәҭа аизҳара 1 млрд 983 млн. мааҭ рҟынӡа инаӡоит, - ҳәа 2022 шықәсазы аусура аихшьаалақәа ирызкны Аҳәынҭқарра Ахада Иусбарҭа аҿы имҩаԥысыз аилатәара аҿы дықәгылауа  адырра ҟаиҵеит аԥыза-министр Алеқсандр Анқәаб.  

Аҳәынҭқарратә биуџьет ахатәы хашәалахәқәа 8 млрд 30 млн мааҭ рҟынӡа инаӡоит, уи 1 млрд 275 млн мааҭ рыла иалкааз арбагақәа раасҭа еиҳауп.  

Атәыла анапхгара ахада аҳәынҭқарратә биуџьет ахашәалахәқәа рыструктура ҷыдала дазааҭгылеит.

«2022 шықәсазы ашәахтә лагалақәа 6 млрд 309 млн мааҭ рҟынӡа инаӡон, уи азеиԥш рбагақәа рҟынтәи 45,9% рҟынӡа инаӡоит; ишәахтәым ахашәалахәқәа 1 млрд 600 млн мааҭ рҟынӡа инаӡоит, хәыда-ԥсадатәи алагалақәа - 5 млрд 827 млн. мааҭ. Ишәахтәым ахашәалахәқәа рыла алагалақәа рзеиԥш еицҵалыҵ ихадоу ахәҭа абас ала ишьақәгылон: адәныҟаекономикатә усура аҟынтәи ахашәалахәқәа  - 1 млрд 26 млн мааҭ, административтә шәатәқәеи аизгақәеи - 150 млн мааҭ, ахараԥсақәа, асанкциақәа, азарал ахарҭәаарақәа - 153 млн. мааҭ», – ҳәа инаҵшьны иазгәеиҭеит атәыла аԥыза-министр.

Аҟәа. Ажьырныҳәамза 24, 2023 шықәса. Аԥсныпресс.  Аҳәынҭқарра Ахада Аслан Бжьаниа Тарас Ҳагба Аԥсны аҿари аспорти русқәа рзы аҳәынҭқарратә Еилакы ахантәаҩыс иҟаҵара азы Аусԥҟа инапы аҵаиҩит.

Аҟәа. Ажьырныҳәамза 24, 2023 шықәса. Аԥсныпресс.  Ашәахтәқәеи аизгақәеи Рминистрра 2022 шықәсазы аҳасабырбатә аамҭахәҭа иалагӡаны имҩаԥнагаз аусура аихшьаалақәа азԥхьагәаҭатә рбагақәа ирықәшәоит ҳәа иԥхьаӡоуп. Абри атәы аанацҳауеит Аԥсны ашәахтәқәеи аизгақәеи Рминистрра апресс-маҵзура.

2022 шықәсазы инагӡаз аусура аихшьаалақәа рыла, ашәахтәқәеи ихымԥадатәиу ашәатәқәеи раҳасабала  аҳәынҭқарратә биуџьет иалагалаз аԥаратә хархәагақәа рзеиԥш еицҵалыҵ – 4 285,2 млн. мааҭ рҟынӡа инаӡеит. Убри аан 2022 шықәсазы ишьақәырӷәӷәаз аплан ала  иазԥхьагәаҭан – 3 526,3 млн. мааҭ. ( анагӡара 122% рҟынӡа инаӡоит, иааизакны иацҵан анагӡара – 759,0 млн. мааҭ рҟынӡа инаӡоит.), аизҳара адинамика – 126 %.

Аҟәа. Ажьырныҳәамза 24, 2023 шықәса. Аԥсныпресс. Гәдоуҭа ақалақь ахаҿра арҽеира иазку аусурақәа мҩаԥысуеит, ҳәа Феисбук аҿы иамоу адаҟьа аҟны адырра ҟанаҵоит араион Ахадара.

Апаркқәа иахьаҵанакуа имаҷымкәа аусурақәа нагӡоуп: афонтан шьықәыргылоуп, иҿыцу ашьаҟамҩақәа ҟаҵоуп.

1992 – 1993 шш. Аԥсны жәлар рџьынџьтәылатәи еибашьра аҿы иҭахаз рбаҟа акәша-мыкәша ишьҭаз ахаҳәцәы аҿыц ала иԥсахуп.   

Афырхацәа р-Проспект аҿгьы – Ӡиӡариа имҩа аихысырҭа инаркны Марганиа имҩанӡа, уаанӡа ишьҭаз ахаҳәцәы аҿыц ала иԥсахуп.

Аҟәа. Ажьырныҳәамза 24, 2023 шықәса. Аԥсныпресс. Аԥсны Аҳәынҭқарра Ахада Аслан Бжьаниа анагӡаратә мчхара аусбарҭа хадақәа рнапхгаҩцәа алархәны 2022 шықәса аихшьалақәа ирызку аилацәажәара мҩаԥигеит. 

Аҳәынҭқарра Ахада аԥыза-министр Алеқсандр Анқәаб абиуџьет анагӡара иазкны иҟаиҵаз аҳасабырба дазыӡырҩит. Аԥыза-министр ихаҭыԥуаҩ, аекономика аминистр Кристина Озган, атәылахьчара аминистр Владимир Ануа, аҩныҵҟатәи аусқәа рминистр Вальтер Быҭәба, атуризм аминистр Ҭемраз Хышба, аԥыза-министр актәи ихаҭыԥуаҩ, ақыҭанхамҩа аминистр Беслан Џьопуа, аҵара аминистр Инал Габлиа, акультура аминистр Даур Ақаҩба, адәныҟатәи аусқәа рминистр Инал Арӡынба, аҷыдалкаатәи азинмчы змоуи аминистр Лев  Кәыҵниа, аиустициа аминистр Анри Барцыц, асоциалтә еиқәыршәареи адемографиатә политикеи рминистр Руслан Аџьба иара убас аҳасабырба ҟарҵеит имҩаԥгоу аусуразы.

Аилацәажәараан иазыӡырҩит ашәахтәқәеи аизгатәқәеи рышьҭыҵреи, аҳәынҭқарра ахатәы хашәалақәа реизҳареи, абиуџьеттә политика аиҵатәреи ирызкыз аҳасабырбақәа.

Иара убас иахцәажәеит излымшои ахшарацәа змоуи аҭаацәарақәа аҳәынҭқарратә программа «Анхарҭа» аҳәаақәа ирҭагӡаны нхарҭала реиқәыршәара атема, абылтәы ахәԥсақәа реиҵахара, асоциалтә программақәа рынагӡареи атәылауаа хықәкыла ацхыраара рыҭареи уҳәа, егьырҭ азҵаарақәа.

Иазааҭгыланы иалацәажәеит иаарласны зыӡбара аҭаху атемақәа – ҷыдала, афымцамчтә усхк аҟны иҟоу аҭагылазаашьа, азинеилагарақәеи амҩақәа рыҟны амашәыри ирҿагыланы ақәԥара, зыда ԥсыхәа ыҟам ауснагӡатәқәа агәабзиарахьчараҟны, атәылаҟны аинвестициа адԥхьалара аизырҳара ирызку.

Афымцамч аҟны иҟоу аҭагылазаашьа далацәажәо, Ахада аԥыза-министр ихаҭыԥуаҩ, аекономика аминистр Кристина Озган иҟалҵаз аҳасабырба дахцәажәеит. Ҷыдала, уи аилацәажәараҟны иҟаз аминистрцәеи араионқәа рхадацәеи иргәалаиршәеит изакәанымкәа акриптовалиута арҳара аҿагыларазы акомиссиақәа шаԥҵаз, ари акриптоферма дуқәа русура аанкылара шалнаршаз.

«Уажәы аппаратқәа рацәаӡаны ауааԥсыра рыҩнқәа рыҟны иқәгылоуп - 5 - 10 цырала. Аҩны 2,5 кВт/с афымцамч зго 5 аппаратк ықәгылазар, уи 365-нтә ишьҭыхзар, шықәсык аҩныҵҟа ирго афымцамч иартәоит 109000 кВт/с. Иахьатәи атариф 1, 3 маат ала 1 кВт/с азы ари иалҵуеит 142 000 мааҭ. Ас еиԥш аппаратқәа иҳамоу адырраҭарала, Аԥсны 50 000 цыра ыҟоуп. Аппаратқәа ззықәгылоу ауаа атәыла иацәырӷьычуеит миллиардки бжаки мааҭ.  Абас иҟоуп аҭагылазаашьа. Урҭ ззықәгылоу рацәажәара иаԥсаӡам, иаҳҳәо раҳаӡом. Агәраргарала акгьы алҵӡом, мчыла аӡбара аметод ҳхы иаҳархәароуп» - иаҵшьны иҳәеит Аслан Бжьаниа.

Аҳәынҭқарра Ахада иҳәеит ауаажәларратә леишәа ашьақәыргылара акырӡа зҵазкуа зҵаараны ишыҟоу. Амҩақәа рыҟны азинтә еилагарақәеи автомашьынақәа рхыҧхьаӡареи амҩатә машәырқәеи реизҳареи инарымаданы аҭагылазаашьа шеицәахаз, иара убас Аҳәынҭқарратә автомомашьынатә инспекциа аиҳабы ҧхьатәара ишьҭра атәы зҳәаз Аҩныҵҟатәи аусқәа рминистр Вальтер Быҭәба иажәахә дазыӡырҩны, Ахада иазгәеиҭеит атәыла амҩадуқәа рыҟны аҧсыҭбарақәа реиҵатәразы аусра амҩаԥгара ҷыдала иамоу аҵак ду атәы.

Аҩныҵҟатәи аусқәа рминистрра аколлектив алшара амоуп, уи рхы иадырхәароуп. Уи атәы ҳалацәажәоит Ашәарҭадара Ахеилак анаҩстәи аилатәараҟны. Алҵшәа аныҟамла, аӡбамҭақәа ҳадаҳкылоит, акадртә зҵаарақәагьы убрахь иналаҵаны",- иҳәеит Аслан Бжьаниа.

Аҟәа. Ажьырныҳәамза 24, 2022 шықәса. Аԥсныпресс.  Аҳәынҭқарра Ахада Аслан Бжьаниа Гарик Сангәылиа Аԥсны аҭоурых-культуратә ҭынха ахьчара азы аҳәынҭқарратә усбарҭа анаԥхгаҩыс иҟаҵара азы Аусԥҟа инапы аҵаиҩит.

Аҟәа. Ажьырныҳәамза 18, 2023 шықәса. Аԥсныпресс. Имҩаԥысит Аԥсны Жәлар Реизара – Апарламент Аиҳабы Лаша Ашәбеи Аԥсны Аҳәынҭқарраҟны иҟоу Аҷыдалкаатәи Азинмчы змоуи Ацҳаражәҳәаҩ Михаил Шургалини реиԥылара.

Аиԥылара иалахәын Аиҳабы ихаҭыԥуаҩ Ашот Миносиан, азинтә зҵаарақәа рзы Аиҳабы иабжьгаҩ хада Денис Киут, Аԥсны Аҳәынҭқарраҟны иҟоу УА Ацҳаражәҳәарҭа абжьгаҩ-ацҳаражәҳәаҩ Максим Литвинов.

Аҟәа. Ажьырныҳәамза 18, 2023 шықәса. Аԥсныпресс. Аԥсны адәныҟатәи аусқәа рминистр Инал Арӡынба  Аԥсны иҟоу Приднестровтәи-Молдавтәи Ареспублика Аофициалтә Хаҭарнакра ахада Гарри Кәпалба  Ахаҭарнакра аԥҵара  16- шықәса ахыҵра идиныҳәалеит.

Адныҳәалараҿы, ахәҭакахьала иазгәаҭоуп: 

«Шәара ҳаҭыр дула сшышәзыҟо ҩаԥхьа ишьақәырӷәӷәо гәык-ԥсыкала ишәыдысныҳәалоит Аԥсны иҟоу Приднестровтәи-Молдавтәи Ареспублика Аофициалтә Хаҭарнакра аартра 16-шықәса ахыҵра.

Уи аартра аҳәынҭқаррабжьаратәи аԥсуа-приднестровтәи аизыҟазаашьақәа рҭоурых аҿы  акыр зҵазкуа хҭысны иҟалеит.

Аҟәа. Ажьырныҳәамза 18, 2023 шықәса. Аԥсныпресс.  Ажьырныҳәамза 19 рзы имҩаԥысраны иҟоу аминистрцәа Реилазаара аилатәара амшхәаԥштә иалагалоуп асоциалтә ҵакы змоу азҵаарақәа 9.  

Анапхгара 2023 шықәсазы  ахықәкытә напхгаратә программақәа шьақәнарӷәӷәараны иҟоуп:

«Атылауаа Ареспублика Аԥсны иахьаҵанакуа еиԥш уи анҭыҵгьы рыхәышәтәра аиҿкаара».

«Аԥсны аҳәынҭқарратә медицинатә усбарҭақәа рзы ахәшәқәеи амедицинатә маҭәахәқәеи амаругақәеи  еизакны раахәара».

«Аҷаҷа чымазара змоу рзы Аԥсны ахарҭәааратә терапиа аҿиареи аиҿкаара аиӷьтәреи».

«1992–1993 шш. Аԥсны аџьынџьтәылатәи еибашьра аинвалидцәа рмедицинатә реабилитациа».

«Аԥсны ауааԥсыра атуберкулиоз чымазара рацәыхьчара иазку аусура аиӷьтәра».