Аилатәара зхы алазырхәыз аҩныҵҟатәи аусқәа рминистр Роберт Киут, анаркотикатә маҭәашьарқәа реикәыршара аҿагылара аганахьала имҩаԥгоу аусура ԥсыҽуп ҳәа иазгәеиҭеит. Аминистр  араион аҩныҵҟатәи аусқәа Рыҟәша аусура арбагақәа реиӷьтәра азы аҩныҵҟатәи аусқәа Рминистрра анаркотикқәа реикәыршара ахылаԥшразы Аусбарҭа рыҽрымаданы аусмҩаԥгатәқәа рыплан аиқәыршәаразы  адҵа ҟаиҵеит.

Аҳасабырбатә аамҭахәҭа азы араион аҩныҵҟатәи аусқәа Рыҟәша ашьаусԥшааратә ҟәша аусзуҩцәа 323 апрофилактикатә усмҩаԥгатәқәа мҩаԥыргеит. 2023 шықәсазы араион аҿы ашәҟәы иҭагалан 23 амҩа-транспорттә машәыртә хҭысқәа.  2022 шықәсазы ашәҟәы иҭагалан 20 амҩа-транспорттә машәыртә хҭысқәа. 2023 шықәсазы иҟалаз амҩа-транспорттә машыртә хҭысқәа рҿы иҭахеит 3 -ҩык, (2022 шықәсазы –аӡәы).

43-ҩык еиуеиԥшым ахәрақәа роуит (2022 шықәсазы. – 39-ҩык). Амҩа-транспорттә машәыртә хҭысқәа реиҳарак ареспубликатә трасса «Ԥсоу-Егры» иахьаҵанакуа Аҩада Ешыра аҿы иҟалоит.

Аҩныҵҟатәи аусқәа рминистр иара убас иарбоу ахырхарҭа ала аусура арӷәӷәара азы адҵа ҟаиҵеит.

2023 шықәсазы иаарԥшхеит  иҿыцу амаининг-фермақәа 10. Урҭ зегьы афымцацәаҳәақәа рҟынтәи иаҿыхын. Ирымхуп акриптовалиута арҳара иазку 196 аппарат.

Роберт Киут иарбоу ахырхарҭа ала аусура арӷәӷәара азы адҵа ҟаиҵеит. Уи убри аан, иарбоу ахырхарҭала аусура аиҿкаара атәыла аенергетикатә шәаҭадара ишиашоу иадҳәалоуп ҳәа иазгәеиҭеит.  

Аусуратә еилатәара иара убас рхы аладырхәит аҩныҵҟатәи аусқәа рминистр актәи ихаҭыԥуаҩ Руслан Ажьиба, араион Ахада Алхас Ҷыҭанаа, араион апрокуратуреи аҳәынҭқарратә шәарҭадара Амаҵзура аҟәшеи рхаҭарнакцәа.