Аҟәа. Ажьырныҳәамза 31, 2023 шықәса. Аԥсныпресс.  Ажьырныҳәамза 30 рзы Ҭаҭарсҭан инаӡеит Аԥснытәи аделегациа. Уи напхгара алҭоит аԥыза-министр ихаҭыԥуаҩ, аекономика аминистр Кристина Озган. Аделегациа алахәылацәа ирԥылеит Казантәи Жәларбжьаратәи аҳаирбаӷәаза аҟны.

Аԥсны аекономика Аминистрра апресс-маҵзура иҟанаҵо адыррақәа рыла, иахьа, ажьырныҳәамза 31 рзы, Аԥсны аделегациа ахаҭарнакцәа Ҭаҭарсҭан аекономика Аминистрра аҟны аиԥыларақәа мҩаԥыргеит, иара убас аинвестициатә ҿиара азы Агентра иаҭааит. Араҟа урҭ иӡыргаз аинвестициатә проектқәа гәарҭеит. Аиԥылара рхы аладырхәит Ареспублика Ҭаҭарсҭан аекономика аминистр Мидхаҭ Хаџьиахметови аинвестициатә ҿиара азы Агентра адиректор хада  Иаков Геллери.

Аҟәа. Ажьырныҳәамза 25, 2023 шықәса. Аԥсныпресс. Аԥыза-министр Алеқсандр Анқәаб анхарҭаҭыԥ ала аиқәыршәаразы адҵа ықәыргыло Аҟәа ақалақь аҿы амитинг еиҿызкааз аԥшьгаратә гәыԥ ахаҭарнакцәа даҽазныкгьы дырԥылеит, ҳәа адырра ҟанаҵоит аминистрцәа Реилазаара апресс-маҵзура. 

Аиԥылара рхы аладырхәит Жәлар Реизара-Апарламент Аиҳабы ихаҭыԥуаҩ Асҭамыр Аршба, адепутатцәа  Рашида Аиба, Асҭамыр Герхьелиа, Инар Гыцбеи  Беслан Ҳалуашьи, асоциалтә еиқәыршәареи адемографиатә политикеи рзы Аминистрра ахаҭарнак Ромео Черқьезиа, Аҟәа ақалақь ахада ихаҭыԥуаҩ Асҭамыр Ашәба.

Алеқсандр Анқәаб анхарҭатә проблема аӡбаразы иҟоу алшарақәа дрыхцәажәеит, убри аан аҳәынҭқарратә программа «Анхарҭа 2023 – 2025 шш» ала аӡбамҭақәа  ирзыԥшуп 1 –тәи агәыԥ иаҵанакуа аинвалидцәа, ианыхәыҷу аахыс аинвалидра змоу, ахәыҷы-инвалидцәа змоу ахәыҷқәа, аби-ани змам аиаҭымцәа, Аԥсны жәлар рџьынџьтәылатәи еибашьра аҿы иҭахаз рҭаацәа, х-ҩык, ма еиҳаны ахәыҷқәа змоу аҭаацәа, уҳәа акатегориақәа ирыҵанакуа 413-ҩык азыҳәаҩцәа.  

Аҟәа. Ажьырныҳәамза 26, 2023 шықәса. Аԥсныпресс. Ажьырныҳәамза 25 рзы аԥыза-министр актәи ихаҭыԥуаҩ Беслан Џьопуа аҿари аспорти рзы аҳәынҭқарратә Еилакы аколлектив дыдирдырит анапхгаҩы ҿыц Тарас Ҳагба.  

Ажьырныҳәамза 23, 2023 шықәазы Аҳәынҭқарра Ахада Аслан Бжьаниа Тарас Ҳагба Аԥсны аҿари аспорти рзы аҳәынҭқарратә Еилакы ахантәаҩыс иҟаҵара азы Аусԥҟа инапы аҵаиҩит.  

Аусмҩаԥгатә ихы алаирхәит аспорт азы Аҳәынҭқарра Ахада иабжьгаҩ Ахра Ашәба.

Аҟәа. Ажьырныҳәамза 25, 2023 шықәса. Аԥсныпресс. Гагра араион аҩныҵҟатәи аусқәа Русбарҭа аусеилыргаратә ҟәша азакәантә ӡбамҭа адкылара азы Ҭҟәарчал араион аҿы инхо, 1998 шықәсазы ииз Басариа Ника Гела-иԥа иганахьала ахарадҵа зцу аус аӡбарҭа ахь идәықәнаҵеит.  Басариа Ника  Аԥсны Ашьаус Закәанеидкыла ахәҭаҷ  184 ахәҭа 2 инақәыршәаны ацәгьоура аҿы ахара идҵоуп (Иԥаршеиу зыхә дуу ақьаадқәа, мамзаргьы аԥарақәа рҭыжьреи рхархәареи).

Аҟәа. Ажьырныҳәамза 26, 2023 шықәса. Аԥсныпресс.   2022 шықәсазы Ҭҟәарчал араион абиуџьет анагӡара 105 % рҟынӡа инаӡеит.  Абиуџьет аҟынтәи 80 % рҟынӡа ауалафахәи асоциалтә шәатәқәа ршәареи рахь идәықәҵахеит.  Абри атәы иҳәеит Абри азы Аҳәынҭқарра Ахада Аслан Бжьаниа Иусбарҭа аҿы ажьырныҳәамза 26 рзы, аԥшьаша анагӡаратә мчратә усбарҭақәа рнапхгаҩцәа алархәны имҩаԥысыз аилатәара аҿы 2022 шықәсазы инагӡаз аусура азы аҳасабырба ҟаҵо иҳәеит Ҭҟәарчал араион ахада ихаҭыԥуаҩ Владислав Аршба.

Зынӡа араион аҿы аус зуа ауааԥсыра рхыԥхьаӡара 9 783-ҩык рҟынӡа инаӡоит. 1393-ҩык аекономика еиуеиԥшым аусхкқәа рҿы аус руеит, 850-ҩык – абиуџьеттә усхкы аҿы.

Ҭҟәарчал араион асоциалтә еиқәыршәара аҟәша аҿы ажьырныҳәамза 1, 2023 шықәсазы иҟаз адыррақәа рыла, ашәҟәы иҭагалоуп 4 402-ҩык, урҭ рахьынтә 2 753 -ҩык  ақәра ала.

Аҟәа. Ажьырныҳәамза 26, 2023 шықәса. Аԥсныпресс. Ашықәстә  план ала 133 млн мааҭ рыла ишьақәырӷәӷәоу  Очамчыра араион абиуџьет ахашәалахәытә хәҭа 172 млн 614 нызықь мааҭ рыла инагӡоуп, уи  131% рҟынӡа инаӡоит.  Аныхтә хәҭа нагӡоуп 97% рыла. Абри азы Аҳәынҭқарра Ахада Аслан Бжьаниа Иусбарҭа аҿы ажьырныҳәамза 26 рзы, аԥшьаша анагӡаратә мчратә усбарҭақәа рнапхгаҩцәа алархәны имҩаԥысыз аилатәара аҿы 2022 шықәсазы инагӡаз аусура азы аҳасабырба ҟаҵо иҳәеит Ҭҟәарчал араион ахада Беслан Бигәаа.

Араион ауааԥсыра рхыԥхьаӡара –  25 908 – ҩык рҟынӡа инаӡоит.  Урҭ рахьынтә 5 244-ҩык – ақалақьтә уааԥсыроуп - 20 644-ҩык – ақыҭауаа роуп.

Економикала активра злоу ауааԥсыра, даҽакала иуҳәозар аус зуа ауааԥсыра рхыԥхьаӡара - 2 412-ҩык.  Араион аҿы ауалафахәы абжьаратә ҩаӡара  – 13 543 мааҭ рҟынӡа инаӡоит.

Очамчыра араион аҿы 8 634-ҩык атәанчаҩцәа ыҟоуп.  

3 065-ҩык аԥсуа тәанчахәи урыстәылатәи атәанчахәи роуеит, 5 569-ҩык – аԥсуа тәанчахәы мацара уп ироуа.  

Аҵыхәтәантәи ҩы-шықәса рыла 10 категориак ирыҵанакуа атәанчаҩцәа рзы аԥсуа тәанчахәы иацҵахеит; ацҵа 3 млн 731 нызықь мааҭ рҟынӡа инаӡеит 2021 шықәса рзы.

2022 шықәса рзы – 4 млн 225 нызықь мааҭ рҟынӡа инаӡеит.

2021 шықәсазы аусура иалагеит асанатор-курорттә обиект «Золотое руно».

Аҟәа. Ажьырныҳәамза 25, 2023 шықәса. Аԥсныпресс. Аманда Касланӡиа/. Аотельқәа русура азы анорма-зинтә шәҟәынҵақәа рыдкылара атуристтә усхкы, иааизакны аекономика аҿиара азы акырӡа аҵанакуеит, - ҳәа аҩаша,   ажьырныҳәамза 24 рзы Аҳәынҭқарра Ахада Аслан Бжьаниа Иусбарҭа аҿы анагӡаратә мчра аусбарҭақәа рнапхгаҩцәа алархәны имҩаԥысыз аилатәара аҿы 2022 шықәсазы атәыла Анапхгара инанагӡаз аусура азы аҳасабырба ҟаҵо абри атәы далацәажәеит  аԥыза-министр Алеқсандр Анқәаб.

«Жәларбжьаратәи аԥышәа, Урыстәылатәи Афедерациа аԥышәа ишаҳнарбо ала, хаҭалатәи ахархәара азы апартаментқәа раахәара, мамзаргьы рыргылара азы алшара хра злоу аекономикатә еффект аиуеит, атуристтә усхкы аҿиара иацхраауеит. Иарбоу абизнес аҿиара ихадоу ахырхарҭақәа иреиуоуп ахархәара змам аҵакырақәа рхархәара, иара убас уи иашьашәалоу аенергетикатә, анџьныртә, анхаратә, атранспорттә, уҳәа аинфраструктура аԥҵара, мамзаргьы арҿиара, аинвестор ихарџь алагьы уахь иналаҵаны». 

Аҟәа. Ажьырныҳәамза 25, 2023 шықәса. Аԥсныпресс. Аԥыза-министр Алеқсандр Анқәаби иҷыдоу аҭагылазаашьақәа рзы аминистр Лев Кәыҵниеи Ахылаԥшырҭа аҟәшеиҵақәа аматериал-техникатә еиқәыршәара азҵаарақәа ирылацәажәеит. Аиԥылара аҿы ҳазҭалаз ашықәс азы Аминистрра ихадоу ауснагӡатәқәа ирзааҭгылеит.

Аҟәа. Ажьырныҳәа 26,  2023 шықәса. Аԥсныпресс.  Жәабранмза 7, асааҭ 12:00 рзы Чанба ихьӡ зху Аԥснытәи аҳәынҭқарратә драматә театр аконцерттә зал аҟны имҩаԥысраны иҟоуп абас-гитарарҳәаҩы Антон Давидианци авокалистка Лаура Водианицкаиеи рмастер-класс, ҳәа адырра ҟанаҵоит акультура Аминистрра апресс-маҵзура.

Амастер-класс аҽалархәра азы азыҳәамҭа аашьҭызар ҟалоит абри аелектронттә ԥошьҭа ала: Hierdie e-posadres word van Spambotte beskerm. Jy moet JavaScript ontsper om dit te lees..

Аҟәа. Ажьырныҳәамза 24, 2022 шықәса. Аԥсныпресс.  Аԥсны Аҳәынҭқарра Ахада Аслан Бжьаниа Гәында Кәыҵниа аҳәынҭқарратә бызшәатә политика азы аҳәынҭқарратә усбарҭа анапхгаҩыс лыҟаҵара азы Аусԥҟа инапы аҵаиҩит.