Аҟәа. Ԥхынгәымза 17, 2023 шықәса. Аԥсныпресс /Алеқсеи Шамба/. Н. Лакоба ихьӡ зху  Аҟәатәи абжьаратәи ашкол №10 аҿы  IT-акласс аатит. Уи Аԥсны адәныҟатәи аусқәа рминистр, ари ашкол аужьҭымҭа Инал Арӡынба ицхыраара иабзоурахеит.

Акласс ауада аҿы шьаҭанкыла аиҭашьақәыргыларатә усурақәа мҩаԥган, иахәҭоу аиқәыршәагақәа рыла еибыҭан 20 аҵаратә ҭыԥқәа, зылшарамч ӷәӷәоу аноутбукқәа аахәан.

Аҟәа ақалақь Ахадара аҵара Аусбарҭа акомпиутертә техника азы аспециалист Левон Малхасиан иажәақәа рыла, ашколхәыҷқәа рзы акомпиутертә программаҟаҵара, адизаин, акомпиутертә графика аҵара азы иахәҭоу аҭагылазаашьақәа зегьы рзаԥҵоуп.  

Аҟәа. Ԥхынгәымза 18, 2023 шықәса. Аԥсныпресс. Очамчыра араион ахада Беслан Бигәаа араион актив алархәны Аҳәынҭқарра Ахада имҩаԥиго аусуратә еилатәара аҿы дықәгыло, 126 млн. 210 нызықь мааҭ рҟынӡа инаӡоз иазԥхьагәаҭаз абиуџьет ахашәалахәқәа  рҟынтәи анагӡара 42 млн. 677 нызықь мааҭ рҟынӡа инаӡеит ҳәа адырра ҟаиҵеит. (33,8%).

«Уи 83 млн. 523 нызықь мааҭ рыла иазԥхьагәаҭаз ахашәалахәқәа раасҭа еиҵоуп. Абиуџьет анагӡара алмыршара, араион аҿы аус зуа аԥсыӡусдуларатә наплакқәа фба рҿы  аҭыжьратә аӡа – аҳамшьиа  аҟамлара ишиашоу иадҳәалахеит», – ҳәа иҳәеит Беслан Бигәаа.

Аҟәа. Ԥхынгәамза 18, 2023 шықәса. Аԥсныпресс.  Аҳәынҭқарра Ахада Аслан Бжьаниа Очамчыра ақалақь ахь иусуратә ҭаара аҳәаақәа ирҭагӡаны, ақалақь аԥшаҳәа аиқәыршәзаара иазку аусурақәа рымҩаԥысшьа гәеиҭеит.

3 нызықь ԥшьыркцатә метр рҟынӡа инаӡо аԥшаҳәа ахәҭак аҿы ашьаҟамҩақәа ахаҳәцәы ала ирчаԥахьеит. Уи иақәхарџьхаз аԥаратә хархәагақәа рзеиԥш еицҵалыҵ 5 млн. 250 нызықь мааҭ рҟынӡа инаӡоит.  Уажәы ахаҳәцәы ашьҭаҵара мҩаԥысуеит Аконтитуциа ашҭа аҿы асасааирҭа «Амшынеиқәатә бырлаш» аганахьала.

Аҟәа. Ԥхынгәымза 18, 2023 шықәса. Аԥсныпресс. Аҳәынҭқарра Ахада Аслан Бжьаниа Аӡҩыбжьа ақыҭан Кәыдры аӡиас аӡышьҭрарҽеиратә усурақәа рымҩаԥысшьа гәеиҭеит.

Аусурақәа абар шьҭа хымз  ҵуеит имҩаԥысуеижьҭеи. Иарбоу аусурақәа ахьымҩаԥысуа аҵакыра аура 2 километрак рҟынӡа инаӡоит, аҭбаара акәзар -  200 метр.  Аусурақәа рынагӡара азы Аҳәынҭқарра Ахада ирезервтә Фонд аҟынтәи иазоужьхеит 60 млн. мааҭ инареиҳаны .

Аҟәа. Ԥхынгәымза 18, 2023 шықәса. Аԥсныпресс. Аҳәынҭқарра Ахада Аслан Бжьаниа Аҟәеи Очамчыреи еимаздо ареспубликатә мҩаду арлашара иазку аусурақәа рымҩаԥысшьа гәеиҭеит.

Шьаҭанкыла аргыларақәа рзы Аусбарҭа аиҳабы Ҭемыр Агрба аусурақәа рымҩаԥгара аҩбатәи аетап аҳәаақәа ирҭагӡаны, Гәылрыԥшь инаркны Аӡәҩыбжьа аҟынӡа 300 шьаҟа инарзынаԥшуа ишьақәыргылахеит ҳәа адырра ҟаиҵеит.  

Аҟәа. Ԥхынгәымза 18, 2023 шықәса. Аԥсныпресс. Аԥсны аԥыза-министр актәи ихаҭыԥуаҩ Беслан Џьопуеи аҳәаанырцәтәи аусқәа рминистр ихаҭыԥуаҩ Иракли Ҭыжәбеи  зхадараҿы иҟоу аԥснытәи аделегациа Никарагуа Сандиниттәи ареволиуциа атриумф аныҟала инаркны 44 - шықәса аҵра  азгәаҭара иазу аныҳәатә усмҩаԥгатәқәа рылаххаразы Никарагуаҟа ицеит, ҳәа иаанацҳауеит Аԥсны адәныҟатәи аусқәа Рминистрра Амедиацентр.

Аҟәа. Ԥхынгәымза 17, 2023 шықәса. Аԥсныпресс. Гал араион аҩнуҵҟатәи аусқәа русбарҭа аиҳабы, аполковник  Беслан Жьваниа араион ахадараҿы Аслан Бжьаниа имҩаԥигоз аилацәажәараҟны напхгара зиҭо аусбарҭа аҳасабырбатә аамҭахәҭа азы имҩаԥнагаз аоператив-маҵзуратә усура аихшьаалақәа рзы адырра ҟаиҵеит.

Убас, аҳасабырбатә аамҭахәҭа азы зынӡа ашәҟәы иҭагалахеит 25 цәгьоура, урҭ рахьынтә 20 цәгьоура аарԥшуп, уи апроцентла уахәаԥшуазар, 80% рҟынӡа инаӡоит.

2022 шықәса аиԥш-зеиԥшу аамҭахәҭа азы ашәҟәы иҭагалан 16 цәгьоура, урҭ рахьынтә иаартын - 13 (81,3%).

Аҳасабырбатә аамҭахәҭа азы ацәгьоура хьанҭақәа ааба азгәаҭан, урҭ рахьынтә хԥа аарԥшуп. 

2022 шықәса аиԥш-зеиԥшу аамҭахәҭа азы ихьанҭоу цәгьоурак ҟалеит, уи иахьа уажәраанӡа иаартӡамкәа иаанханы иҟоуп.

Уажәы Гал араион аҩныҵҟатәи аусқәа рыҟәша ашьаусԥшааратә хәҭа аҿы иҟоуп 98 ашьаусԥшааратә усқәа, аусеилыргаратә гәыԥ аҿы – 18 аусеилыргарақәа.  

Ауаажәларратә шәарҭадара амилициа амаҵзура ала 2023 шықәса актәи азыбжазы абас еиԥш  аусура мҩаԥган:

Аҟәа. Ԥхынгәмза 17, 2023 шықәса. Аԥсныпресс.  Нанҳәамза 5, 2023 шықәса рзы акультура Аминистрреи Гал араион Ахадареи рыцхыраарала Гал ақалақь аҿы араионтә рҿиаратә коллективқәа злаху аконцерти ақыҭанхамҩатә хәаахәҭратә цәыргақәҵеи мҩаԥгахоит.

Аԥсны атылауааи асасцәеи игәыҟаҵагоу амузыка азыӡарҩреи атәыла аҿы иҭрыжьуа афатә аалыҵқәа ргьама абареи рзы алшара рзаԥҵахоит.

Аҟәа. Ԥхынгәымза 17, 2023 шықәса. Аԥсныпресс. Аԥсны Аҳәынҭқарра Ахада Аслан Бжьаниа усуратә визитла Гал араион даҭааит. Аҳәынҭқарра Ахада Гал Ақалақьтә парк хадаҟны дыҟан.

Администрациа ахада ихаҭыԥуаҩ Нарсоу Џьопуа Аслан Бжьаниа адырра ииҭеит 2022 шықәсазы ихацыркыз аиҭашьақәыргыларатә усурақәа шымҩаԥысуазы.

«30 шықәса раахыс апарк аҟны иақәнагоу аусурақәа мҩаԥгамызт. Шьҭа иԥсахуп асоветтә аамҭазы аӡымҩангаразы ишьақәыргылаз ажәытәтәи ажрақәа, ахаҳәтә цәхыԥқәа, арлашагақәа», - иҳәеит Џьопуа, арҭ аусурақәа аҭыԥантәи абиуџьет аҟнытә 5 млн мааҭк шырзаужьыз азгәаҭаны. Имҩаԥгоу аусурақәа ирылаԥхьаӡоуп ашьаҟамҩатә хаҳәҟьаԥсқәа рышьҭаҵара, асқамқәеи агәам-самҭрақәеи рыргылара.

Аҟәа. Ԥхынгәымза 15, 2023 шықәса. Аԥсныпресс. Аскульптура «Амшынҳәа аԥсҿыхҩы» ақалақь Амш аламҭалазы Очамчыра аԥшаҳәа аҿы ишьақәыргылан.  Аусумҭа аформала азганк иԥшаахны иҟаҵоу амшынҳәа ацәаареи егьи азганк аҵла ҳарак  ашьапы иакәыршаны изку ауаҩы инапи угәаланаршәоит.                                                                                            

Ажәытә ҳәамҭақәеи алегендақәеи ишырҳәо ала, жәытәнатәаахыс, Ашумер-Аккадтәи аҳраҿы Амшынҳәа-Анцәахәратә лагамҭа аазырԥшуа ԥстәык аҳасабала иахәԥшуан. Ашумераа рынцәахә дуӡӡақәа хԥа рахьтә руакы – Еа ҳәа изышьҭоу, аԥсыӡ ҵыхәа аманы иаарԥшын. Уи аҟәыӷара Анцәахәы, адгьыл аҵаҿтәи аӡқәа рхылаԥшра назыгӡоз, анаҩс ауаҩы дызшаз Анцәахәы аҳасабала иаақәгылеит, хьыӡқәасгьы иаиуит: Енки, Хаиа, Дагон, Оанес.