Аҟәа. Ажьырныҳәамза 29, 2024 шықәса. Аԥсныпресс. Иҷыдоу аҭагылазаашьақәа рзы Аминистрра Аԥсны аинформациатә ҵакыра аҿы еиԥш уи анҭыҵгьы ицәырҵуа иалагаз, ажьырныҳәамза 21 ауха Амилаҭтә сахьатә галереиа афонд аҟынтәи асахьақәа ахьышьҭаз Аԥсны асахьаҭыхыҩцәа Реидгыла Ацәыргақәҵатә зал Хада аҿы иҟалаз абылра амзысқәеи ахҟьаԥҟьақәеи рганахьала ацәажәарақәа ахҳәаа ҟанаҵеит.
Акультура аусзуҩцәа џьоукы абылра еиҳа ирласны ирцәазар ауан, уи арцәараан абылрацәыхьчаратә шәах ахархәара аиузҭгьы ҳәа ргәаанагарақәа рҳәеит.
Аԥсны Иҷыдоу аҭагылазаашьақәа рзы Аминистрра апресс-маҵзура ауаажәларреи иарбоу азҵаара иазинтересу ауаа зегьи иднардыруеит иџьбароу ахимиатә маҭәашьарны иҟоу абылрацәыхьчаратә шәах абылтәи ахьшьтәи рымцакра аанкылараан, мамзаргьы амҩа-транспорттә машәыр хҭысқәа раан иааихаз амашьынақәа амца рымкырц азы мацара рхы иадырхәо ауп. Абылрацәыхьчаратә шәах асахьатә галереиа аҿы ахархәарала асахьақәа зегьы реиҭашьақәыргылара алымшо рыхасҭатәра ахь икылнагон. Убасҵәҟьа ирыԥхьаӡоит урыстәылатәи ареставраторцәагьы.
Ахәҭакахьала, академик И.Е. Грабарь ихьӡ зху Урыстәылазегьтәи асахьаҭыхра ҭҵаарадырра-реставрациатә Центр анаука-методиатә усуразы аҟәша аиҳабы Елена Проханова ажурналистцәа дрыҿцәажәо Аԥсны асахьатә галереиеи Ацәыргақәҵатә зал Хадеи рҿы амца арцәараан аӡы мацара ахархәара ахьаиуз хра злоу факторуп ҳәа иазгәалҭеит. Уи лажәақәа рыла, амца ахимиатә хархәагақәа рыла идырцәозҭгьы, усҟан абылра иацәыхьчаз асахьақәа ааха ӷәӷәа роур алшон.
Ацәыргақәҵатә зал Хада аҿы абылрацәыхьчаратә шәарҭадара азҵаара акәзар, аофициалтә усеилыргара анхыркәшахалак ашьҭахь, Иҷыдоу аҭагылазаашьақәа рзы Аминистрра ауаажәларра ирбартә-ираҳартә еиԥш абылрацәыхьчаратә шәарҭадара аиқәыршәара аганахьала аҭакԥхықәра зду ахаҿқәа ирыҭаз адокументқәеи абжьгарақәеи азԥхьанҵақәеи цәырнагоит.
