Аҟәа. Жәабранмза 2, 2024 шықәса. Аԥсныпресс. Ахәыҷы изинқәа рыхьчара знапы ианҵоу Мактина Џьынџьалԥҳа лыдҵа инақәыршәаны аԥшьаша, жәабранмза 1, 2024 шықәсазы Ахәыҷы изинқәа рыхьчара знапы ианҵоу Иаппарат аҿы Ауаажәларратә Хеилак аԥҵоуп.
Ҿыц иаԥҵоу аструктура аконсультациатә цхыраара мҩаԥнагалоит, аинициативақәа адгылара рынаҭалоит, иара убас ахәыҷқәа рзинқәа рыхьчара иазку азҵаарақәа ирыдҳәалоу еиуеиԥшым аспектқәа рыла ажәалагалақәа ҟанаҵалоит.
Ауаажәларратә Хеилак ахантәаҩыс дҟаҵоуп Москватәи аԥсуа дисапора Анапхгараҭара алахәыла Инна Барчан.
Жәабранмза 1 азы имҩаԥысит Ахеилак актәи аилатәара. Уаҟа хадара злоу аусура ахырхарҭақәеи аусура аплани ирылацәажәеит.
Ауаажәларратә Хеилак аилазаара иалалеит Аԥсны аҵара аминистр актәи ихаҭыԥуаҩ Ада Кәарҷелиа, Агуманитартә проектқәа Рцентр анагӡаратә директор Арда Инал-Иԥа, Агуманитартә проектқәа Рцентр аексперт-зиндырҩы Саид Гезердаа, Агәыҳалалратә уаажәларратә Еиҿкаара «Кьараз» аицыԥҵаҩы Кама Кәыҵниа, ахәыҷтәы фонд «Росток» анапхгаҩы Анна Подолианко, Аимунатә потологиеи атерапиеи рзы Анаука-ҭҵааратә Институт авирусологиеи аиммунологиеи рлабораториа аиҳабы Алиса Матуа, «Аԥсны аҵарадырра аҿы аинновациақәа рзы» Ацентр ацыԥҵаҩы Ронеза Пациа.
