Аҟәа. Рашәарамза 22, 2023 шықәса. Аԥсныпресс. Рашәарамза 22 рзы, Аҟәа ақалақь аҿы иалагеит аӡиудо азы “Аиааира Ахраҿа” агаразы XV жәларбжьаратәи аицлабрақәа.

1992-1993 шш. Аԥсны жәлар Рџьынџьтәылатәи еибашьра аҿы Аиааира агара Амш 30-шықәса ахыҵра  иазку атурнир аартра иазкыз аныҳәатә церемониа рхы аладырхәит аҿари аспорти русқәа рзы Аҳәынҭқарратә Еилакы ахантәаҩы Ҭарашь Ҳагба, аҿари аспорти русқәа рзы  Аусбарҭа  аиҳабы Ельза Ҳагба, Аԥсны аӡиудо Афедерациа апрезидент  Михаил Чалмаз.

Аԥсны аҿари аспорти русқәа рзы Аҳәынҭқарратә Еилакы иҟанаҵо адыррақәа рыла, атурнир рхы аладырхәуеит  Аԥсны, Белорус, Урыстәыла (Ареспубликақәа Адыгеиа, Башкортосҭан, Ингушетиа, Саха-Иакутиа;  Камчаттәи, Краснодартәи, Пермтәи, Ставропольтәи атәылаҿацәқәа, Архангельтәи, Ростовтәи, Самаратәи, Челиабинсктәи аобластқәа) рҟынтәи 15 командак реилазаараҿы иҟоу 330-ҩык аспортсменцәа. Аицлабрақәа 2007-2009, 2010-2011, 2012-2013, 2014-2015 шш. рзы ииз арԥарцәеи аҭыԥҳацәеи рыбжьара имҩаԥысуеит.

Аҟәа. Рашәарамза 22, 2023 шықәса. Аԥсныпресс. Рашәарамза 23 рзы акруизтә ӷба «Князь Владимир» Аҟәаҟа аԥышәа-гәаҭаратә реис   мҩаԥгахоит.  Алаинер Аҟәатәи амшынтә баӷәазанӡа асааҭ – 08:00 инарзынаԥшуа инаӡароуп.

2023 «Князь Владимир» – амаршрут Шәача – Новороссиск – Иалта – Севастополь – Шәача ала акруизқәа мҩаԥнагалоит.

Аҟәа. Рашәарамза 21, 2023 шықәса. Аԥсныпресс. Урыстәылатәи Афедерациа Аҳәынҭқарратә Дума аҿы Аԥсны Жәлар Реизара-Апарламент Аиҳабы Лаша Ашәбеи Аҳәынҭқарратә Дума ахантәаҩы ихаҭыԥуаҩ Пиотр Толстои Ихьыԥшым Аҳәынҭқаррақәа Реиҩызара аусқәеи евразиатәи аинтеграциеи аидгьылуаа рымадареи рзы Аҳәынҭқарратә Дума Аилак ахантәаҩы актәи ихаҭыԥуаҩ Казбек Таисаеви реиԥылара мҩаԥысит. Аиԥылара иара убас лхы алалырхәит Урыстәылатәи Афедерациа иҟоу Аԥсны Аҳәынҭқарра ацҳаражәҳәаҩ-абжьгаҩ Мадина Аҩӡба.

Аԥсны Аҳәынҭқарра Жәлар Реизара-Апарламент аофициалтә саит иҟанаҵо адыррақәа рыла, аиԥылара аҿы апарламентбжьаратә усеицура иадҳәалоу актуалра злоу азҵаарақәа рзы ргәаанагарақәа еибырҳәеит.

Ахәҭакахьала, аԥсуа ган Урыстәылатәи Афедерациеи Аԥсны Аҳәынҭқарреи ирыбжьоу аҳәынҭқарратә ҳәаа ахысра апроцедура армариара атема иазааҭгылеит. Убри инамаданы аԥсны-урыстәылатәи аҳәынҭқарратә ҳәаа ахысра ирыдҳәалоу азҵаарақәа рыӡбараҿы аусеицура азы 2022 шықәсазы иаԥҵаз аԥсны-урыстәылатәи апарламентбжьаратәи аусуратә гәыԥ аусура аинтенсификациа иаҵоу аҵакы ахадара алкаан, иара убас иарбоу ахырхарҭала аусеицура активла ахалархәра ишазхиоу  азгәаҭан.

Аҟәа. Рашәарамза 21, 2023 шықәса.  Аԥсныпресс.  Ажьырныҳәамза 1 инаркны рашәарамза 20, 2023 шықәсанӡа Г. Смыр ихьӡ зху Афонҿыцтәи аҳаԥы иаҭааит 71, 871-ҩык, иалагалаз афинанстә лагалақәа 50 млн. 309  нызқьи 700 мааҭи рҟынӡа инаӡоит.  

2022 шықәса аиԥш-зеиԥшу аамҭахәҭазы аҳаԥы иаҭааз рхыԥхьаӡара  76 534 – ҩык рҟынӡа инаӡоит, иалагалаз афинанстә лагалақәа реицҵалыҵ 46  млн. 863 нызқьи 700 мааҭи рҟынӡа инаӡеит.

Риҵатәи ареликттә милаҭтә парк ажьырныҳәамза 1 инаркны рашәарамза 20 аҟынӡа иаҭааз рхыԥхьаӡара  119 009-ҩык рҟынӡа инаӡоит, иалагалаз афинанстә лагалақәа рзеиԥш еицҵалыҵ  79 млн. 317 нызқьи 800 мааҭи рҟынӡа инаӡоит.

2022 шықәса аиԥш-зеиԥшу аамҭахәҭа азы Риҵатәи ареликтә милаҭтә парк иаҭааз рхыԥхьаӡара 148 666-ҩык рҟынӡа инаӡон,  иалагалаз афинанстә лагалақәа рзеиԥш еицҵалыҵ 81 млн. 889 нызқьи 200 мааҭи рҟынӡа инаӡоит. ***

Аҟәа. Рашәарамза 21, 2023 шықәса. Аԥсныпресс. Аԥсны аҳҭнықалақь аплиажқәа реиҳарак аӡҭалара аамҭахәҭа иазхиоуп, ҳәа адырра ҟанаҵоит Иҷыдоу аҭагылазаашьақәа рзы Аминистрра апресс-маҵзура. 

Иҷыдоу аҭагылазаашьақәа рзы Аминистрра Шәагаала имаҷу аӷбақәа рзы Аинспекциа аԥшаҳәа иаԥну асасааирҭақәа, аԥсшьарҭаҩнқәа, Аҟәа ақалақь аӡымҽхак иахьаҵанакуа қьырала иаанкылоу аплиажқәа рыҟны аинспекциатә гәаҭарақәа мҩаԥнагеит.

Аҟәа. Рашәарамза 21, 2023 шықәса. Аԥсныпресс.  Аӡиас  Жоикәара  иху ацҳа аиҭашьақәыргылара мызкы иалагӡаны ихыркәшахоит.

Гагра араион ахада ихаҭыԥуаҩ Адамыр Ҵышба ажурналистцәа дрыҿцәажәо ари ацҳа аиҭашьақәыргыларазы ақалақь абиуџьет аҟынтәи  иазоужьхеит 10,5 млн. млн. мааҭ ҳәа адырра ҟаиҵеит.  

«Ацҳа аура 150 метра рҟынӡа инаӡоит. Уажәы ашьапыламҩатә зонақәа ҿыц хаҳәцәыла ачаԥара иазку аусурақәа мҩаԥысуеит. Урҭ рымҽхак 1000 квадраттә метр рҟынӡа инаӡоит. Иара убас  имҩаԥгахоит ацҳа амаакыгақәеи арлашага шьаҟақәеи рыԥсахра», – ҳәа иҳәеит Адамыр Ҵышба.

Аҟәа. Рашәарамза 21, 2023 шықәса. Аԥсныпресс.  Иахьа аԥсуа-қырҭуа еиҿагылара азона аҿы аҭынчра ашьақәыргылара азы Ихьыԥшым Аҳәынҭқаррақәа Реиҩызара  Аколлективтә мчрақәа Аԥсныҟа ралагалара ҟалеижьҭеит  29 -шықәса ҵуеит.

Аҳәынҭқарра Ахада Ихаҭыԥуаҩ Бадра Гәынба, ашәарҭадара Ахеилак Амаӡаныҟәгаҩ Сергеи Шамба, Аԥсны иҟоу Урыстәыла Ацҳаражәҳәарҭеи Аԥсны иҟоу Урыстәыла аус ацура Ахаҭанакреи русзуҩцәа,  атәылахьчара Аминистрра, Аԥсны иҟоу урыстәылатәи аидгьылуаа реиҿкаарақәа Акоординациатә Хеилак ахаҭарнакцәа, Аԥснытәи Аиашахаҵаратә Уахәама ахада Виссарион Аԥлиаа  1994 - 2008 шш. рзы Аԥсны абжьаҟазаратә миссиа назыгӡоз Урыстәылатәи Афедерациа Арбџьармчқәа аруаа рбаҟа амҵан ашәҭ  шьыҵәрақәа шьҭарҵеит.

Абжьаҟазаратә (аҭынчраԥҵаратә) архәҭақәа рыруаа рбаҟа аадыртит аҟәатәи аԥшаҳәа аҟны арегионбжьаратә уаажәларратә еиҿкаара «Иҭыԥырку аибашьрақәеи бџьаршьҭыхлатәи аиҿагыларақәеи рветеранцәа Рхеилак «Аҭынчраԥҵаҩы»» аԥшьгарала ԥхынҷкәынмза 8, 2017 шықәсазы.  Абаҟа автор – аскульптор, Урыстәыла жәлар рсахьаҭыхҩы Владимир Суровцев.

Аҟәа. Рашәарамза 21, 2023 шықәса. Аԥсныпресс. Аминистрцәа Реилазаара аҿы «Изакәанымкәа ирҳаз ахашәалахәқәа  азакәантә ԥшра рыҭаны ралгареи атерроризм афинансыркреи  раԥырҟәҟәаара азы» азакәанԥҵареи «Авалиутатә хылаԥшреи авалиутатә усеиҿкаареи рзы» азакәанԥҵареи аус рыдуларазы иаԥҵоу аусуратә гәыԥ аилатәара мҩаԥысит.

Аусуратә гәыԥ напхгара аиҭоит аминистрцәа Реилазаара Аппарат анапхгаҩы  Давид Сангәылиа.

Аҟәа. Рашәарамза 21, 2023 шықәса. Аԥсныпресс. Гагра араион Ахадара 840 метра инарзынаԥшуа амшаҳәеи ашьаҟамҩатә цаҳәақәеи реиҭашьақәыргылара иазку аусурақәа мҩаԥнагеит. Ажурналистцәа дрыҿцәажәо абри азы адырра ҟаиҵеит Гагра араион ахада ихаҭыԥуаҩ Адамыр  Ҵышба.

«Араион Ахадара амчқәа рыла 840 метра инарзынаԥшуа аԥшаҳәеи ашьаҟамҩатә цаҳәақәеи еиҭашьақәдыргылеит. Ашьаҟамҩақәа ҿыцны хаҳәцәыла ичаԥан, аҵаргәатә ҭӡы рӷәӷәан. Хара имгакәа арлашагатә фонарқәа аҿыцқәа рыла иԥсаххоит», - ҳәа еиҭеиҳәеит Адамыр Ҵышба.

Иара убас, араион Ахадара Гагра ақалақь иахьаҵанакуа ашьапыламҩақәа реиҭашьақәыргылара мҩаԥысуеит. 2400 метра рҟынӡа инаӡо Гагрыԥшь  аӡиас аҟынтәи  Жоикәара аӡиас аҟынӡа инагоу ашьаҟамҩа ҿыц хаҳәцәыла ичаԥоуп.  

«Иԥсаххеит 4 нызықь квадраттә метра рҟынӡа ахаҳәцәы ԥсахын, иҿыцу ацәхыԥқәа шьақәыргылан», - ҳәа иҳәеит Адамыр Ҵышба.  

Аԥшаҳәа ацәаҳәа аиҭашьақәыргылареи ахаҳәцәы аԥсахреи ирықәхарџьхеит 70 млн. мааҭ инарзынаԥшуа. Аԥаратә хархәагақәа зегьы араион абиуџьет аҟынтәи иазоужьхеит.  

Аҟәа. Рашәарамза 20, 2023 шықәса. Аԥсныпресс. Милана Бжьаниа Урыстәылатәи аҭоурыхтә еилазаара  раԥхьатәи аҳәаанырцәтәи Ахаҭарнакра ахантәаҩыс дшьақәырӷәӷәахеит.

Рашәарамза 20 рзы Москва ақалақь, Урыстәылатәи анаукақәа ракадемиа иатәу ауаажәларратә наукақәа рзы анаукатә информациа Аинститут аҿы Урыстәылатәи аҭоурыхтә еилазаара азеиԥш еизара мҩаԥысит.  

Урыстәылатәи аҭоурыхтә еилазаара ахантәаҩы Сергеи Нарышкин Азеиԥш еизара амшхәаԥштә ахь ицәыригеит арегионалтә ҟәшақәеи ахаҭарнакрақәеи раԥҵара азҵаара.