Аиԥылара аартуа, аҳәынҭқарра анапхгаҩы Аԥсны атәылауаа рыԥсҭазаара аҩаӡара ахаҭабзиара ишиашоу иадҳәалоу амчхара амахәҭақәа зегьы 2024 шықәсазтәи русураҟны ихадоу ахырхарҭақәа азгәеиҭеит. «Амчхара амахәҭақәа зегьы рыҟны аусура рӷәӷәатәуп.  Азыӡба адкылара анаҩс лассы аԥсҭазаара иаларҵәахароуп», - ҳәа азгәеиҭеит Ахада.

Аԥсны атәылахьчара арӷәӷәара уснагӡатә хаданы иҟоуп, ари аус аӡбаразы иаҭахуп иӷәӷәоу аекономика. Аслан Бжьаниа атәылахьчара аминистр инапы ианиҵеит иҟоу алшарақәа иахьынӡауа рхархәара, астратегиатә партниорс иҟоу  – Урыстәылаҟнытәгьы аиура уахь иналаҵаны. «Аҭагылазаашьа хылаԥшра бзиа амазароуп, аҭыԥқәа рыҟны», - иҳәеит  Аҳәынҭқарра Ахада.

Атәыла аекономика акырӡа арӷәӷәара зылшо иццакны иҿио ақыҭанхамҩа ауп – уи иҿыцу аҩаӡарахь ахалара. Ари алыршахоит Аԥсназы иҿыцу асубкультурақәа раарыхра хшыҩзышьҭра аҭарала. «Адгьыл аамҭақәа зегьы раан акраҳҿазҵоз акәын. Адәқәа аҳәыра рхыҵәаны иҟамлароуп», - иҳәеит Аслан Бжьаниа, ақыҭанхамҩа аминистр Беслан Џьопуа ихы иқәкны.

Аҳәынҭқарра Ахада ҷыдала иаҵшьны иҳәеит атранспорттә инфраструктура аҿиара иамоу аҵакы атәы. Ари аусху аҟны ихадароу хырхарҭаҟны иҟалароуп аҳаиртә баӷәаза «Аҟәа» аргылара. Иара убас аилацәажәара иалахәыз зегьы рышҟа ааԥхьара ҟаиҵеит ари апроект анагӡара «ганрацәала ацхыраара аҭараҟныы» атәыла аекономика аиӷьтәразы астратегиатә ҵакы зламоу ала.   

Атәылаҟны аусурҭадара апроблема шыҟац иаанхоит, хырԥашьа амҭакәа иӡбатәу акоуп. Аусурҭа ҭыԥқәа раԥҵара аҵакы абанӡеиҳау аекономикатә ҭагылазаашьа аиӷьтәра аасҭа.   «Усурҭада иҟоу ауаҩы ҳтәыла зҭахым лассы рнапаҟны иаагара рзымариахоит, дуашәшәыроуп, напхгара иҭара мариоуп», – иҳәеит аҳәынҭқарра Ахада.

Хархәара змоу афымцазы аизгатәқәа рыҩаӡара ашьҭыхра хадараны иҟалароуп афымцамч аусзуҩцәа рзы адагьы, араионқәеи ақалақьқәеи рхадацәа рызгьы, урҭгьы «хаҭалатәи аҭакԥхықәра рыдуп» ари азҵаара аӡбаразы. 

Аиԥылараҟны иара убас ишьҭыхын атуризм, аекономика, асоциалтә еиқәыршәара аусхк аҟны иҟоу апроблемақәа ирыдҳәалоу атемақәа. 

Аҵыхәтәаны, Аҳәынҭқарра Ахада даҽазныкгьы иазгәеиҭеит ауааԥсыра ринтересқәа рымаҵ азызуа аусбарҭақәеи аилазаарақәа зегьи еиқәшәаны лыҵшәабзиала русура иамоу аҵакы.