Аҟәа. Ажьырныҳәаза 26, 2024 шықәса. Аԥсныпресс. Имҩаԥысит Аҳәынҭқарра Ахадеи аҵарауаа ҿарацәеи реиԥылара, ҳәа адырра ҟанаҵоит Аҳәынҭқарра Ахада ипресс-маҵзура.
Аԥсны Аҳәынҭқарра Ахада Аслан Бжьаниа Аԥсны Аҭҵаарадыррақәа Ракадемиа иаҵанакуа аинститутқәа хаҭарнакра рзызуа аҵарауаа ҿарацәа идикылеит.
Аиԥылара иалахәын иара убас Аҳәынҭқарра Ахада Иусбарҭа Анапхгаҩы Абесалом Кәарҷиа, Аԥсны Аҭҵаарадыррақәа Ракадемиа ахада Зураб Џьапуа.
Аҳәынҭқарра Ахада аҵарауаа ҿарацәа аԥсшәа раҳәо, Аԥсны аҳәынҭқарратәраҟны аҭҵаарадырра инанагӡо ароли иаанакыло аҭыԥи азгәеиҭеит.
«Аҳәынҭқарра – шәарҭа ыҟамкәа, ҳҵас бзиақәа рықәныҟәарала ҳаҿиара ахьымҩаԥысуа ҳаҩноуп. Ҳара уаҵәтәи амш шәарҭа амамкәа иааирц азы мчыс иҳамоу ҳдыруазароуп. Абри атәы рҳәалароуп аҭҵаарадырра аусзуҩцәа», - иҳәеит Аслан Бжьаниа.
Иара убас аҳәынҭқарра Ахада иаҵшьны иҳәеит аҭҵаарадырреи аекономикеи реимадара атәы. «Иҳамоу еилкаатәуп, ари аимадара ҭышәынтәалазарц азы иҟаҵатәу, аекономикаҟны иҟоу апроблемақәа рыӡбара иазкызарц азы. Аекономикатә суверенитет алыршара – зегь ирыцку уснагӡатәны иҟазароуп», - иазгәеиҭеит иара.
Анаҩс Аҳәынҭқарра Ахада ақыҭанхамҩа ҭҵаарадыррақәа ркандидат Дмитри Сабекиа ихы иқәкны ацитрустәқәа рзы астатистикатә рбагақәа дрызҵааит. Аҵарауаҩ иҳәеит совет аамҭа инаркны атәылаҟны ацитрустә культурақәа инарымаданы иҟоу аҭагылазаашьа атәы.
«Асовет Еидгыла хыбгалаанӡа Аԥсны 120 нызқь тонна ацитрустәқәа рааӡон, урҭ рахьтә 110 нызқь тонна амандарин иартәон, 10 – апаҭырқали алимони. Аибашьра ашьҭахьтәи ашықәсқәа рзы еизгаз ацитрустәқәа рымҽхак зегьы иреиҳан ҵыԥхцәа, усҟан – 55 нызқь тонна артәеит», - иҳәеит Сабекиа.
Ари аиԥылараҟны официалла ирылаҳәан Ахада иҟны иҟоу Аҵарауаа ҿарацәа рхеилак аԥҵаразы аԥшьгара. Иара убас ишьақәыргылан ахылаԥшратә хеилак, урҭ напхгара рзызуло, абжьгарақәа рызҭало.
Аҳәынҭқарра Ахада ас еиԥш аиҿкаара хымԥада ишаҭаху азгәеиҭеит Ахадеи аҵарауаа ҿарацәеи ишиашоу реимадара ашьақәыргыларазы.
