Аҳасабырба даназыӡырҩ ашьҭахь, аҩныҵҟатәи аусқәа рминистр 2022 шықәса иаҿырԥшны иӷәӷәоу ацәгьоурақәа раартра адинамика митәык идуӡам ҳәа иазгәеиҭеит. Иара араион аҿы изакәанымкәа анаркотикатә маҭәашьарқәа реикәышара аҿагылара аганахьала аусура арӷәӷәаразы анапынҵа ҟаиҵеит.
Роберт Киут азинхьчаҩцәа Гәдоуҭа араион аҿы изакәанымкәа акриптовалиута арҳара аҿагылара аганахьала аусура иахәҭоу аҩаӡараҿы иҟаӡам ҳәа иазгәеиҭеит.
Аусуратә еилатәара иалахәыз аҩныҵҟатәи аусқәа рминистр актәи ихаҭыԥуаҩ Руслан Ажьиба, араион аҿы акриминогентә ҭагылазаашьа ииашаны анализ аҭара ҳасаб азуны иҿыцу ацәгьоурақәа рыҟаҵара апрофилактикеи аԥхьырҟәҟәаареи рганахьала аусура арӷәӷәара ахымԥадатәра ҷыдала ахшыҩзышьҭра аиҭеит. Аминистр ихаҭыԥуаҩ, амилициа аполковник Беслан Ҷкадуа араион Автоҳәынҭинспекциа Аусбарҭа аусура ԥсыҽуп ҳәа иазгәеиҭеит.
«Шықәсык ала 25-ҩык рҭахара, 2022 шықәсазы иҟаз арбагақәа раасҭа еиҳауп. Уи аҩыза алмыршазар ауп. 2022, 2023 шш. рзы Автоҳәынҭинспекциа Аусбарҭа ахатәы еилазаара ахыԥхьаӡара инықәырԥшны уахәаԥшуазар еиԥшын. Араҟа аҩныҵҟатәи аусқәа Русбарҭа зегьы анапхгареи Автоҳәынҭинспекциа ахатәы еилазаареи рганахьала инагӡам аусура шыҟоу умбар залшом. Доусу шәнапы злаку әусура ишахәҭоу ала инашәыгӡала! Ауаа ирыдҵоу аусура анагӡара ахьзалмыршамхо, уаҟа хымԥада акадртә ӡбамҭақәа ахархәара роуеит», – ҳәа инаҵшьны иҳәеит Беслан Ҷкадуа.
