Аҟәа. Лаҵарамза 6, 2023 шықәса. Аԥсныпресс. Аҩныҵҟатәи аусқәа рминистр Вальтер Баҭәба «2023-2025шш. амҩатә ԥҟарақәа реилагара автоматтә фиксациа асистема аҿиара» азы ахылаԥшратә хықәкытә Программа ишьақәнарӷәӷәаз апрограмматә усмҩаԥгатәқәа рынагӡара азы анапхгарабжьаратәи акомиссиа аилатәара мҩаԥигеит.

Амҩатә ԥҟарақәа реилагара автоматтә фиксациа асистема аҿиаразы 2023 шықәсазы иазоужьхоит 40 миллион мааҭ 2024 шықәсазы - 80 млн. мааҭ, 2025 шықәсазы - 30 млн. мааҭ.

Апрограмма амҩа-транспорттә шәарҭадара ашьҭыхреи уахи-ҽни иааиԥмырҟьаӡакәа ареспублика амҩақәа рҿы иҟоу аҭагылазаашьа амониторинг амҩаԥгареи хықәкы хадас иамоуп.  

Аҟәа ақалақь ахь Александратәи абаҳча аҿы Кремльтәи аҭӡы ааигәара иаку  Имыцәо  амца  ахәҭаҷ  ааргеит. Абх.    

Аҟәа. Лаҵарамза 6, 2023 шықәса. Аԥсныпресс.  Жәларбжьаратәи акциа «Агәалашәара амца» аҳәаақәа ирҭагӡаны Аҟәа ақалақь ахь Александратәи абаҳча аҿы Кремльтәи аҭӡы ааигәара иаку Имыцәо амца ахәҭаҷ ааргеит.

Аԥсны иҟоу урыстәылатәи 7-тәи арратә база аруаа Аԥсны атәылахьчара Аминистрра аҳаҭыртә карул иамадахоит Александратәи абаҳча аҿы Кремльтәи аҭӡы ааигәара иаку Имыцәо амца ахәҭаҷ зҭоу акәаҷаб.

Лаҵарамза 9 рзы ари акәаҷаб аҟынтәи Аҟәа ақалақь, Амҳаџьыраа Рыԥшаҳәа аҿы игылоу Идырым асолдаҭ ибаҟа амҵан Имыцәо амца аркхоит.

Аҟәа. Лаҵарамза 5, 2023 шықәса. Аԥсныпресс.   Жәлар Реизара-Апарламент Аиҳабы Лаша Ашәба адукаттә еилазаара ахаҭарнакцәа дырԥылеит.

Аиԥылара рхы аладырхәит адукатцәа Рпалата ахантәаҩы  Константин Чагәаа, адукат Ҭамаз Кецба, Урыстәылатәи Афедерациа адукатура ахаҭарнакцәа – Нхыҵ Кавказ ареспубликақәеи Башкортостани адукаттә палатақәа рхаҭарнакцәа, иара убас Аԥсны Жәлар Реизара-Апарламент Аппарат анапхгаҩы Вадим Бжьаниа.

Аиԥылара  Аԥсны Аҳәынҭқарра адукатура 100-шықәса ахыҵра азгәаҭара  иазку аусмҩаԥгатәқәа рымҩаԥгара апрограмма аҳәаақәа ирҭагӡаны имҩаԥысит.

Лаша Ашәба Аԥсны адукатцәа шәышықәсатәи риубилеи рыдиныҳәалеит. «Шәара шықәсы рацәа инеиԥынкыланы ҳтәылауаа рзакәантә интерессқәеи рзинқәеи рыхьчараҿы шәгылоуп. Ҳара – азакәанԥҵаҩцәа ҳзы, ари аусхкы даараӡа аҵак ду амоуп», - ҳәа иҳәеит иара.  

Аҟәа. Лаҵарамза 5, 2023 шықәса. Аԥсныпресс.  Аџьынџьтәылатәи еибашьра Дуӡӡа аҿы Аиааира агара Амшныҳәа иазкны аусмҩаԥгатәқәа рымҩаԥгара аҳәаақәа ирҭагӡаны, ахәаша, лаҵарамза 5 рзы, Аҟәа ақалақь, «Москва Аҩны» аҿы аҭоурыхтә викторина «Арҭ амшқәа рыхьӡ кашәара ақәым» мҩаԥысит.   

Авикторина Гагра, Гәдоуҭа, Аҟәа, Гәылрыԥшь, Ҭҟәарчал, Гал араионқәа, иара убас Аҟәа ақалақь  рҟынтәи  аа-командак рхы аладырхәит, ҳәа адырра ҟанаҵоит Москватәи Акультура-усуратә Центр «Москва Аҩны» апресс-маҵзура.

«Иахьа имҩаԥааго аҭоурыхтә викторина ахықәкы хаданы иҟоуп аҵаҩцәа рыбжьара Аџьынџьтәылатә еибашьра Дуӡӡа аҭоурых азы рдыррақәа реизырҳара адагьы аҭоурыхтә гәалашәара аиқәырхарагьы», – ҳәа илҳәеит Москва ақалақь аҳәынҭқарратә автономтә усбарҭа «Аҳәаанырцә иҟоу аџьынџьуаа агуманитартәи аусуратәи рымадара Ацентр –Москватәи аџьынџьуаҩ Иҩны» аҿга – «Аҟәа иҟоу Москава Аҩны» аусмҩаԥгатәқәа рымҩаԥгара асектор анапхгаҩы Мариа Соиа.

Аӡбаҩцәа реилазаара иалалеит: аҭоурыхтә ҭҵаарақәа рдоктор, Д.И.Гәлиа ихьӡ зху Аԥсуаҭҵааратә Институт аҭоурых аҟәша аиҳабы Аслан Аҩӡба (ажиури рхантәаҩы), аҭоурыхтә ҭҵаарақәа ркандидат, Д.И.Гәлиа ихьӡ зху Аԥсуаҭҵааратә Институт иԥхьагылоу анаукатә усзуҩ Сослан Салаҟаиа, Д.И.Гәлиа ихьӡ зху Аԥсуаҭҵааратә Институт аҭоурых аҟәша анаукатә усзуҩ Геннади Ҵулаиа.

Аусмҩаԥгатә мҩаԥигон В. Г. Арӡынба ихьӡ зху Аҳәынҭқарратә Арратә Ахьӡ-Аԥша амузеи адиректор ихаҭыԥуаҩ, Д.И.Гәлиа ихьӡ зху Аԥсуаҭҵааратә Институт аҭоурых аҟәша анаукатә усзуҩ Николаи Медвенски.

Аинтеллектуалтә еицлабрақәа раан ашколхәыҷқәа Аџьынџьтәылатәи еибашьра Дуӡӡа аҭоурых азы ирымоу адырра шаҟа иҭбаау ддырбеит.  Авикторина азҵаарақәа еихшан х-блок рыла – аибашьра зыхҟьаз, аибашьреи уи ахҟьаԥҟьақәеи.

Аҟәа. Лаҵарамза 5, 2023 шықәса. Аԥсныпресс. Аԥсны иҟоу Урыстәыла Ацҳаражәҳәарҭеи Аԥсны инхо аурыс џьынџьуаа реиҿкаарақәа Ркоординациатә еидгылареи рхаҭарнакцәа  Аҟәа инхо Аџьынџьтәылатәи еибашьра Дуӡӡа аветеранцәа Аиааира Амшныҳәа рыдырныҳәалоит. 

Лаҵарамза 4 рзы урҭ ирҭааит Ԥлиа Иван  Ҷыҷыкәа-иԥа, Шаров Григори Пиотр-иԥа, Шьониа Алеқсеи Иосиф-иԥеи Шульгина Валентина Ефимовнеи.

Урыстәылатәи Афедерациа Ацҳаражәҳәарҭа ахаҭарнакцәа аибашьра аветеранцәа Урыстәылатәи Афедерациа Ахада Владимир Путин ихьӡала адныҳәаларатә шәҟәы рырҭеит, дара рыбзоурала иахьа иҳамоу аҭынч ԥсҭазаара азы иҭабуп ҳәа рарҳәеит, агәабзиареи ашықәнҵыра дууи рзеиӷьаршьеит.

Аҟәа. Лаҵарамза 5, 2023 шықәса. Аԥсныпресс.  Лаҵарамзазы иазгәарҭо аныҳәа хадақәа иреиуоу Аџьынџьтәылатәи еибашьра Дуӡӡа аҿы аиааира агара Амшныҳәа азгәаҭара иазкны, лаҵарамза 9 рзы, Урыстәыла акультура Аминистрреи Аԥсны акультура Аминистрреи Аԥсны иҟоу Урыстәыла аус ацура Ахаҭарнакреи  Аҟәа ақалақь аҿы Аиааира Амшныҳәа иазкны аконцерт мҩаԥыргоит.

Ахәаԥшцәа рҿаԥхьа иқәгылоит Урыстәыла иреиӷьу артистцәа – «Романтик квартет», Москватәи аҳәынҭқарратә академиатә филармониа ансамбль «Романтик квартет», асолистцәа, Л. Зыкина лыхьӡ зху Аҳәынҭқарратә академиатә аурыс жәлар рансамбль «Россия» асолистцәа, аквинтет «Новый день», Москватәи асинодтә хор лыцны Урыстәыла жәлар рартистка Надежда Крыгина.  Аныҳәатә усмҩаԥгатә иҷыдоу сасны лхы алалырхәуеит ашәаҳәаҩ  Мана.

Аконцерт  алагоит асааҭ 19:00 рзы. Аҩналара хәыда-ԥсадоуп.

Аҟәа. Лаҵарамза 5, 2023 шықәса. Аԥсныпресс. Аԥсны аминистрцәа Реилазаара ақәҵара инақәыршәаны, лаҵарамза  8 (ашәахьа) иназыцҵоу ԥсшьарамшны ирылаҳәоуп.

Ас еиԥш аӡбамҭа 1941-1945 шш. Аџьынџьтәылатәи еибашьра Дуӡӡа аҿы Аиааира агара Амшныҳәа азгәаҭара иазу аусмҩаԥгатәқәа реиҿкаареи рымҩаԥгареи рҽазыҟаҵара азы аҭагылазаашьақәа раԥҵара хықәкыс иҟаҵаны ишьақәырӷәӷәан.  

Аҟәа. Лаҵарамза 5,  2023 шықәса. Аԥсныпресс.  Лаҵарамза 6 рзы Аҟәа ақалақь, Ареспубликатә стадион аҿы имҩаԥгахоит Аолимпиатә хәмаррақәа араӡнытә аԥхьахәгаҩ, ажәларбжьаратәи акласс аспорт азҟаза Саида Гәынба лгәалашәара иазкны атлетика лас атурнир мҩаԥысуеит.    

2007 шықәсазы иизи урҭ иреиҳабу  2008-2009шш. рзы иизи ареспублика ақалақьқәеи араионқәеи рҟынтәи арԥарцәеи аҭыԥҳацәеи аҵәы аршәреи 100, 400, 800 метра рҟынӡа адистанциақәа рыла аҩреи рҿы еиҳа зылшо  ралкааразы еицлабуеит, ҳәа иаанацҳауеит Аԥсны аҿари аспорти русқәа рзы аҳәынҭқарратә Еилакы.

Аӡбаҩ хада – атлетика лас азы Аԥсны зҽаԥсазтәыз азыҟаҵаҩ, абҩарҵәыреи аспорти зҽаԥсазтәыз аусзуҩ Лолита Назарс.

Аиҿкаара рхахьы иргеит – Аԥсны аҿари аспорти русқәа рзы аҳәынҭқарратә Еилаки Аԥсны атлетика лас Афедерациеи.  

Аҟәа. Лаҵарамза 5,  2023 шықәса. Аԥсныпресс.  Лаҵарамза 6 рзы  аҿар рыбжьара WBO адунеи ачемпион  Игорь Адлеибеи (14-0-2) Молдавиа абжьаратә ақапантә категориа иаҵанакуа рыбжьара актәи аҭыԥ аанызкыло аспортсмен Максим Черничуки (4-0) реиндаҭлара мҩаԥгахоит. Аа-раундк рыла иҟоу аиндаҭлара Екатеринбург ақалақь аҿы, RCC Boxing Promotions аҟынтәи абокс ахәылԥаз аҳәаақәа ирҭагӡаны имҩаԥгахоит.  

Лаҵарамза 5 рзы абоксиорцәа еиқәшәеит. Урҭ рыкапанра мҩаԥысит.

Аҟәа. Лаҵарамза 4, 2023 шықәса. Аԥсныпресс. Аԥснытәи аԥсабара зықәшәаз аекологиатә рыцҳарақәа  иреиуахеит ашыцмца ҳәа изышьҭоу аҵиаа аԥхасҭа азҭо ахәаҷа-маҷа хкы.

Митәык улаҿы имааиуа аԥарԥалыкь хәҷы Аӡынтәи Аолимпиада аҽазыҟаҵараан аҵиаа еиҭаҳатәқәа ирыланы Шәачаҟа иааргаз, шықәсқәак рыла колхидатәи ашыц даара ааха ӷәӷәа анаҭеит. Риҵаҟа инагоу амҩа иаваршәны ицо ашыц зқәыиааз ацәаҳәа заҵәык ауп иаанхаз.

Акыр ирацәаны ацәажәарақәа ыҟан агхақәа рыҟазаареи урҭ мзыс ирымоуи рганахьала: араҟа абиурократиатә аппарат аусура аҿы аласымреи зыҩаӡара лаҟәу атехникатә базеи, уҳәа Аԥсны адагьы егьырҭ аҭыԥқәа рҿы изызҳауаз аҵиаа хкы ақәӡаара зыхҟьаз амзысқәа.

Усҟан ашыцтә бнара ҳзымыхьчаргьы, ианамуӡах иара аҵиаа хкы аиқәырхара ҳалшарыма ҳәа азҵаара ықәгылеит.  Ари ахықәкы анагӡаразы 2020 шықәсазы Еиду Амилаҭқәа Реиҿкаара иатәу афатә-ажәтәи ақыҭанхамҩеи рзы Апрограмма ацхыраарала Аԥснытәи абнаҭҵааратә ԥышәатә станциа абаза ала  иаартын аҵиааӡарҭа. Уаҟа ашыц аиҭарҿиаразы еиуеиԥшым аԥышәақәа мҩаԥган.