Аҟәа. Цәыббрамза 12, 2023 шықәса. Аԥсныпресс.  Ареспубликатә трасса Ԥсоу-Егры 102-тәи акилометр аҿы амҩатә машәыр ҟалеит.  

«Ааха лоуит автомашьына аԥсҟы зкыз аԥҳәыс. Уи ахәышәтәырҭахь днагоуп, лыԥсҭазааразы кшәарҭара ыҟам», - ҳәа Аԥсныпресс  ахь адырра ҟаиҵеит Аԥсны аҳәынҭқарратә автоинспекциа анапхгаҩы ихаҭыԥуаҩ Асҭамыр Ҭаниа.  

Аҟәа. Цәыббрамза 12, 2023 шықәса. Аԥсныпресс. Аҟәа ақалақь аҿы цәыббрамза  11, ашәахьазы ихыркәшахеит Ареспублика Аԥсны аԥкьатмпыл азы зҽаԥсазтәыз азыҟаҵаҩ, Аԥснытәи АССР зҽаԥазтәыз абҩарҵәыреи аспорти русзуҩ Рубен Дилениан игәалашәара иазку аԥкьаҭмпыл азы Ареспубликатә туринир, ҳәа адырра ҟанаҵоит аҿари аспорти русқәа рзы аҳәынҭқарратә Еилакы апресс-маҵзура.

Атурнир рхы аладырхәит ареспублика араионқәа рҟынтәи  77-ҩык рҟынӡа аспортсменцәа. Аицлабрақәа 9-10 шықәса зхыҵуа, 13 шықәса зхымҵыц, 17-шықәса зхымҵыц, иара убас зықәра наӡоу рыбжьара имҩаԥысуан.  

9-10 шықәса зхыҵуа аспортсменцәа рыбжьара актәи аҭыԥқәа аанкыркылеит Лионель Қриа, (ақ. Аҟәа) Софиа Ҭарба (ақ. Аҟәа), аҩбатәи аҭыԥқәа- Омар Коӷониа (ақ. Аҟәа), Амра Герхьелиа (ақ. Аҟәа), ахԥатәи аҭыԥқәа - Володар Парамонов (ақ. Аҟәа), Алиса Амҷба (ақ. Аҟәа).

Аҟәа. Цәыббрамза 11, 2023 шықәса. Аԥсныпресс. Цәыббрамза  3 инаркны 10-нӡа Аԥсны, ареспублика акультура Аминистрра адгыларала имҩаԥысуан «Аурыс культура Амшқәа».   Алитераторцәа, ажурналистцәа, асахьаҭыхыҩцәа зеилазаараҿы иҟоу Урыстәылантәи аделегациа напхгара алҭон  аҭоурыхҭҵааратә наукақәа рдоктор, академик, алитературадырҩы, ажурнал «Литературные знакомства» (ақ.Москва) аԥҵаҩы, аредактор хада Лола Звонарева.  Аурыс культура Амшқәа ацеиҿкааҩы иаҳасабала дцәырҵит ашәҟәыҩҩы, Евразиа ажәларқәа Рассамблеиа Алитературатә хеилак ацхантәаҩы, Фазиль Абдул-иԥа Искандер ихьӡ зху апремиа алауреат, аурыс ПЕН-центр алхәыла  Владимир Делба.

Иара иоуп иара убас цәыббрамза  7 рзы Аԥсны Амилаҭтә библиотека аҿы имҩаԥысыз ажурнал  «Литературные знакомства» изаамҭанытәиу аномер аӡыргара иазку ацеремониа аҿы амҩаԥгаҩыс иҟазгьы. Ари ажурнал аҿы имаҷымкәа аҭыԥ азалхуп ус иазуҳәар ҟалозар, ажурнал аҿы ашәҟәы «Аԥсуа литературатә тетрад». Ари арубрика ажурнал аҿы аартра шықәсқәак раԥхьа иаԥшьылгеит Лола Звонарева.

Ас еиԥш иҟоу аизгамҭақәа ирыбзоураны урыстәылазегьтәии аҳәаанырцәтәии аԥхьаҩ еиуеиԥшым атәылақәеи Урыстәылатәи Афедерациа арегионқәеи ареспубликақәеи рҟынтәи хыԥхьаӡара рацәала алитераторцәа рырҿиамҭақәа аамҭакала ибартә алшара изаԥҵахоит. Апрезентациа амҩаԥгаҩ Владимир Делба иара убас «Аԥсуа литературатә тетрад» аиқәыршәаҩыс дыҟан.

Аҟәа. Цәыббрамза 11, 2023 шықәса. Аԥсныпресс. Атәыла аԥыза-министр Алеқсандр Анқәаб ареспублика аҿы аус зуа, аҭаацәа рхылаԥшрада иаанхаз, иуадаҩу аԥсҭазааратә ҭагылазаашьа иҭагылоу ахәыҷқәеи ахбыџқәеи ацхыраареи адгылареи рызҭо ауаажәларратә агәыҳалалратә еиҿкаарақәа – Аԥсны Ахәыҷтәы фонд «Панорама», «Киараз» рхаҭарнакцәа дырԥылеит.

Аԥсны Ахәыҷтәы фонд анапхгаҩы Асида Ломиа инапхгаратәы аиҿкаарақәа зегьы еицҿакны зҭаацәа иахәҭам аԥсҭазаашьа змоу, мамзаргьы абахҭа иҭаку, мамзаргьы аҭаацәаратә зин зымху, иара убас зҭаацәа аԥсҭазаара иалҵхьоу ахәыҷқәеи ахбыџқәеи рҭагылазаашьа азы агәҭынчымра шаадырԥшуа азгәалҭеит.  

Аиԥылара иалахәыз ргәаанагарала, апроблемақәа аиҳарак ауаажәлррак еиҿкаарақәа, асоциалтә маҵзурақәеи аҵарадырра аусбарҭақәеи русеицура иахәҭоу аҩаӡӡараҿы иахьыҟам ауп изыхҟьо. Иара убас, ареспублика аҿы хыхь иарбоу акатегориақәа ирыҵанакуа ахәыҷқәа ахылаԥшра рызҭо иҷыдоу аҳәынҭқарратә усбарҭа ыҟаӡам.

Аҟәа. Цәыббрамза 11, 2023 шықәса. Аԥсныпресс. Адизельтә былтәы зҭаз абылтәымҩангага Аҟәа араион Аҩада Ешыра ақыҭан ареспубликатә атрасса аҿы иааҳәит.

Амцакра ҟамларц азы аҭыԥ ахь иаразанак идәықәҵахеит Аԥсны Иҷыдоу аҭагылазаашьақәа рзы Аминистрра абылрацәыхьчаратә гәыԥқәа ҩба. Абри азы адырра ҟарҵоит аԥсеиқәырхаратә Хылаԥшырҭа аҟны.

Аҟәа. Цәыббрамза 9, 2022 шықәса. Аԥсныпресс. Акультура-усуратә платформа «Гәыма» аҿы асабша, цәыббрамза 9 рзы аусура иалагеит есышықәсатәи ҭагалантәи ахәаахәҭратә цәыргақәҵа. Араҟа ицәыргақәҵоуп ақыҭанхамҩатә аалыҵ, анапкымҭатә усумҭақәа, иара убас аҩнытә ҭубар ахкқәак.

Акультура-усуратә платформа «Гәыма» акуратор Шьарида Ҭыжәба ҭагалантәи ахәаахәҭратә цәыргақәҵа аартра аламҭалазы иазгәалҭеит: 

«Абар шьҭа ҩы-шықәсоуп ҳара еиуеиԥшым ахәаахәҭратә цәыргақәҵа мҩаԥаагоижьҭеи. Ари аплатформа аусдкылаҩ қәыԥшцәа жәпакы рзы русура алагамҭаны иҟалеит. Иахьа иаатит раԥхьатәи ҭагалантәи ҳхәаахәҭратә цәыргақәҵа. Араҟа алахәылацәа ицәырыргоит рқыҭанхаҩатә аалыҵ адагьы амҿи аласи ирылху рнапкымҭатә усумҭақәагьы».  

Шьарида Ҭыжәба ас еиԥш иҟоу ахәаахәҭратә цәыргақәҵақәа мызкахьы хынтә еиҵамкәа еиҿкаалахоит ҳәа иазгәалҭеит.  Уи аусдкылаҩ ҿарацәа радыԥхьалареи рбизнес аҿиареи адгылара анаҭалоит» - ҳәа илҳәеит лара.

Аҟәа. Цәыббрамза 9, 2023 шықәса. Аԥсныпресс. Ареспубликатә Унитартә Наплакы «Аԥсны Аихамҩеи» Акционертә Еилазаара «Афедералтә пассаџьыртә еилазаареи» Зҭакԥхықәра ҳәаақәҵоу Аилазаара «Урыстәылатәи Аихамҩақәа Тури» ирыбжьрҵаз аиқәшаҳаҭра аҳәаақәа ирҭагӡаны, цәыббрамза 10 рзы Аԥсныҟа иаараны иҟоуп атуристтә дәыӷба «Риҵа», ҳәа адырра ҟанаҵоит Аԥснытәи Аихамҩа апресс-маҵзура.  

Атурисстә дәыӷба амаршрут: Шәача - Роза Хутор-Гагра-Аҟәа -Шәача – Аҳаирбаӷәаза Шәача Тур ала иныҟәалоит.

Иарбоу амаршрут ала атуристцәа Череповец аҟынтәи Шәачанӡа, нас Аԥсныҟа аныҟәарақәа мҩаԥыргоит. Убри аан рхы иадырхәоит ҩ-хкык атранспорт – аҳаирплани адәыӷбеи. Череповец аҟынтәи Шәачатәи аҳаирбаӷәазанӡа апассаџьырцәа аҳаирпланла инаӡоит,  анаҩс атуристтә дәыӷбала Роза Хутори Аԥсны акурортқәеи рахь рымҩа иацырҵоит.

Аҟәа. Цәыббрамза 8, 2023 шықәса. Аԥсныпресс. Урыстәыла аҳҭнықалақь амшира иазку аџьазтә музыка ахәылԥаз мҩаԥысит ахәаша ахәылбыҽха, Аҟәа ақалақь иҟоу Москва Аҩны ахыбра аҿы.  

Москва Амш цәыббрамза актәи, мамзаргьы аҩбатәи асабшазы иазгәарҭоит.  Сынтәа Москва ақалақь иахыҵуеит 876 шықәса.

Ахылԥаз асасцәа рзы иқәгылеит амузыкатә проект «Голос» алахәыла Дениса Хагбеи урыстәылатәи  аџьазтә шәаҳәаҩы, аоркестр «БИГ БЭНД Сочи» асолистка Иулиа Алеқсеевеи рџьазтә коллектив. Аконцерт рхы аладырхәит иара убас Альдона Ҵкәуа, Армен Хачатуриани Иури Охочински. 

Амузыкантцәа астиль соул, фанк, блюз ала  аџьазтә нагӡарала илегендару адунеитәии урыстәылатәи ахитқәа нарыгӡеит. Убасҵәҟьа инарыгӡеит акомпозитор Тихон Хренников  апоет Михаил Матусовски иажәақәа рыла ииҩыз  ашәа «Московские окна», иара убас агәыԥ «Браво» ашәа «Этот город» автортә аранжировкақәа рыла инарыгӡоит.

Аҟәа. Цәыббрамза 9, 2023 шықәса. Аԥсныпресс. Урыстәыла адәныҟатәи аусқәа рминистр Сергеи Лавров Аԥсны адәныҟатәи аусқәа рминистр Инал Арӡынба Урыстәылатәи Афедерациеи Ареспублика Аԥсни адипломатиатә еизыҟазаашьақәа рыбжьаҵара ҟалеижьҭеи 15-шықәса аҵра инамданы адныҳәаларатә шәҟәы изааишьҭит.

Адныҳәаларатә шәҟәы атекст, ахәҭакахьала  иаҳәоит:

«Москвеи Аҟәеи аиҩызареи астратегиатә партниорреи рҟазшьа змоу аусеицура зырҿио, аамҭа иаԥышәахьоу аиҩызара рыбжьоуп. Ҳара ҳаиднакылоит иаҳзеиԥшу акультура-цәаҩашәатә ориентирқәеи адунеихәаԥшратә шьақәгылареи, иаҳзеиԥшу аҭоурых адаҟьақәа рызгәдуреи».

Аҟәа. Цәыббрамза 9, 2023 шықәса. Аԥсныпресс. Аԥсны иҟоу Урыстәыла ацҳаражәҳәаҩ Михаил Шургалин Аԥсны адәныҟатәи аусқәа рминистр Инал Арӡынба Урыстәылатәи Афедерациеи Ареспублика Аԥсни адипломатиатә еизыҟазаашьақәа рыбжьаҵара ҟалеижьҭеи 15-шықәса аҵра инамданы дидныҳәалеит.

Адныҳәаларатә шәҟәы атекст, ахәҭакахьала  иаҳәоит:

«Арҭ ашықәсқәа рзы ҳтәылақәа рыбжьара аусеицура аидгылареи астратегиатә партниорреи рҟазшьа аархәеит. Урыстәылатәи Афедерациа аиашьаратә Республика Аԥсны амилаҭтә шәарҭадара ашьақәыргылара, асоциал-економикатә, акультура-гуманитартә хырхарҭала, иара убас жәларбжьаратәи апозициақәа рырӷәӷәареи арегионалтә ҭышәынтәалара ашьақыргылареи рзы ганрацәалатәи ацхыраара аҭара иацнаҵалоит».