Аинертә материалқәа рышьҭаҵарҭақәеи ацементбетонтә зауади рыргылара азы абаза аиқәыршәара мҩаԥысуеит. Аргыларатә маҭәахәқәа ихадоу аагаҩцәа алкаауп.
Аҳаирбаӷәаза аҵакыраҿы аҵлақәеи ачықьқәеи ррыцқьара мҩаԥысуеит.
Ҳаԥхьаҟа ахархәара змауа ажәытә хыбрақәа рықәгаразы аусурақәа цоит.
Аҳаирбаӷәаз арҽеира-аиҭашьақәыргыларатә усурақәа рылацәажәара иалахәын атәыла аԥыза-министр актәи ихаҭыԥуаҩ, аенергетикеи атранспорти рминистр Џьансыхә Нанба, Иҷыдоу аҭагылазаашьақәа рзы аминистр Лев Кәыҵниа, Аҳәынҭқарра ашәарҭадаратә маҵзура ахантәаҩы Ҭемыр Ахьиба, В.Г.Арӡынба ихьӡ зху Жәларбжьаратәи аҳаирбаӷәаза «Аҟәа» адиректор хада Наиль Батраев.
Аргылара ахархәарахь ирыҭахоит 2024 шықәса ԥхынҷкәынмзазы. В.Г. Арӡынба ихьӡ зху Жәларбжьаратәи аҳаирбаӷәаза «Аҟәа» ареконструкциа аҳаирбаӷәаза «Аҟәа» аусура аиҭахацыркреи анаҩстәи ахархәареи рзы аинвестициатә проект аҳәаақәа ирҭагӡаны имҩаԥысуеит. Уи иазԥхьагәаҭоу апассаџьырцәа рхыԥхьаӡара аизҳара азы ихымԥадатәиу аушьҭратә лшара аиқәыршәара иазырхоуп, иара убас жәларбжьаратәи атранспорт-логистикатә система аҿы атәыла алшарақәа акыр иарҭбаауеит, иара убри ала аекономика аҿиара хра злоу анырра анаҭоит.
