Аҟәа. Мшаԥымза 14, 2024 шықәса. Аԥсныпресс. Аԥсни Аахыҵ Уаԥстәылеи Кавказнҭыҵ аҭынчреи аҭышәынтәалареи рышьақәыргыларазы Женеватәи аиҿцәажәарақәа даҽа тәылак ахь риагара иадгылоит ҳәа аҳәамҭа ҟаиҵеит Жәларбжьаратәи Женеватәи Аиҿцәажәарақәа рҿы аԥснытәи аделегациа напхгара азҭо Аԥсны адәныҟатәи аусқәа рминистр ихаҭыԥуаҩ Иракли Ҭыжәба.
Москва ари азҵаара еиҭашьҭнахит уажәаԥхьа, мшаԥымза 4 – 5 рзы имҩаԥысыз адискуссиақәа 60-тәи араунд аҿы. Уи мзызс иаиуит Швеицариа Урыстәыла аганахьалагьы убрахь иналаҵаны, иарбоу аиҿцәажәарақәа ирылаху егьырҭ аганқәагьы рганахьала анеитралтә позициа аанкылара иахьаҟәыҵыз. Швеицариа аганахь агәынамӡара аадырԥшуеит Аԥсынгьы, Аахыҵ Уаԥстәылагьы. Уи зыдҳәалоу авизатә политика ахьдыруадаҩыз ауп, ҳәа адырра ҟанаҵоит Аԥсны адәныҟатәи аусқәа Рминистрра Амедиацентр.
Аиҿцәажәарақәа ҽаџьара риагаразы макьана акгьы рмыӡбаӡацт, уи азы урҭ ирылахәу зегьы рақәшаҳаҭра аҭахуп. Авариантқәа раҳасабала, Аԥсни, Урыстәылеи, Аахыҵ Уаԥстәылеи урҭ Беларусиаҟа, ма Сербиаҟа риагаразы ажәалагалақәа ҟарҵоит. Иракли Ҭыжәба иара убасгьы иазгәеиҭеит Қырҭтәыла ари азҵаара аӡбахә макьана ишаламцәажәац, аха уи мап ацәнакуазар акәхап ҳәа иҳәеит иара.
