АЖӘАБЖЬҚӘА

15.Мшаҧы.2024

Аԥсны апрокуратура аусбарҭақәа русзуҩцәа рзанааҭтә ныҳәа азгәарҭоит.

Аҟәа. Мшаԥымза 15, 2024 шықәса. Аԥсныпресс.  Аԥсны аминистрцәа Реилазаара аконференц-зал аҿы имҩаԥысит Ареспублика Аԥсны апрокуратура Хада аԥҵара 30-шықәса ахыҵра иазкыз аныҳәатә усмҩаԥгатә.

Апрокуратура аусбарҭақәа русзуҩцәа иыдныҳәаларц арахь иааит Аҳәынҭқарра Ахада Аслан Бжьаниа, Аҳәынҭқарра Ахада Иусбарҭа Аиҳабы Абесалом Кәарҷиа,   аминистррақәеи ахылаԥшырҭақәеи рнапхгаҩцәеи урҭ рхаҭыԥуаҩцәеи, ақалақьтәии араионтәи аӡбарҭақәа рхантәаҩцәа, адукатә еилазаара ахаҭарнакцәа, Аҟәа ақалақьи ареспублика араионқәеи рхадацәа,  Урыстәылатәи Афедерациа аекстрадициа аусбарҭа анапхгаҩы Сергеи Григоренко, Аахаҵ Уаԥстәыла апрокурор Хада Григори Собаев, Аахыҵ Уаԥстәыла апрокурор Хада ихаҭыԥуаҩцәа Тигран Кабулови Алан Плиеви, уҳәа убас аӡәырҩы.

Аныҳәатә церемониа алагаанӡа еизаз зегьы 1992–1993 шш. Аԥсны жәлар Рџьынџьтәылатәи еибашьраан иҭахази аибашьра ашьҭахь зыԥсҭазаара иалҵызи апрокуратура аусзуҩцәа минуҭктәи аҿымҭрала иргәаладыршәеит.

Аҳәынҭқарра Ахада Аслан Бжьаниа апрокуратура аусбарҭақәа русзуҩцәа дрыдныҳәалеит.

«Аԥсны Аҳәынҭқарра апрокуратура Хада 30 шықәса ахыҵра амш гәык-ԥсык ала ишәыдысныҳәалоит аколлектив зегьы. Аԥсны атәылауааи хаҭала сара сыхьӡалеи иҭабуп  ҳәа шәасҳәоит  апрокуратура аусзуцәа, ҳҳәынҭқаара арӷәӷәараҟны  иахәҭоу шәлагаламҭазы. Аԥсны Аҳәынҭқарра апрокуратура Хада азакәанра ԥыжәара аҭара  ҳәаақәнаҵоит, ҳтәылауааи, ҳуаажәларреи, ҳҳәынҭқаарра зегь ааидкыланы рзинқәеи ринтересқәеи ахьчоит», – ҳәа иазгәеиҭеит Аҳәынҭқарра Ахада.

Аҳәынҭқарра Ахада ҷыдала итабуп ҳәа реиҳәеит акыршықәса Аԥсадгьыл амаҵ азызуаз апрокуратура аветеранцәа.

«Агәра згоит шәара шәколлектив аԥхьаҟагьы акрызҵазкуа аус ишацнаҵо. Ҳалшарақәа еилаҵаны ҳара иҳалшоит иахьа ҳҿаԥхьа иқәгылоу аӡҵаарақәа зегьы рыӡбара, иашала еибарку еизҳазыӷьо ауаажәларра ашьақәыргылара», ҳәа иазгәаҭоуп Аҳәынҭқарра Ахада иҟаиҵаз адныҳәаларатә цҳамҭа аҿы.  

Аԥсны Жәлар Реизара Апарламент Аиҳабы Лаша Ашәба иҟаиҵаз адынҳәалара даԥхьеит Апаламент Аппарат анапхгаҩы Вадим Бжьания. 

«Апрокуратура аусбарҭақәа аԥсуа ҳәынҭқарра арӷәӷәараҟны ароль ду нарыгӡоит, ирыӡбоит ҳтәылауаа рзинқәеи, рхақәиҭрақәеи, ринтересқәеи, ауаажәларреи ареспубликеи рыԥсҭазаара аганқәа зегьы рҿы азакәанқәа ԥыжәара рыҭареи ирыдҳәалоу имариам ауснагӡатәқәа.

Апрокуратура аусбарҭақәа русураҟны иҟоуп иаарту иуадаҩу аусқәа маҷымкәа. Апрокуратура аветеранцәа рԥышәеи рыпрофессионализми қәҿиарала рхы иадырхәоит уи аусзуҩцәа иахьатәи абиԥарақәа русураҟны. Ҳара ахә ҳаракны иаҳшьоит шәара шәколлектив ҳтәыла ашәарҭадара алыршареи, азинрҿиаратә усуреи, жәларбжьаратәи аусеицура аҿиареи рыҟны алагаламҭа.   

Аԥсны Аҳәынҭқарра апрокуратура ихадароу ароль нанагӡоит ацәгьоура иаҿагыланы ақәԥараҟны ареспублика азинхьчаратәи ахылаԥшратәи усбарҭақәа русеицураҟны. Ҳтәылауаа рганахьала аҳәынҭқарра азинхьчаратә система зегьы аусура аҳаҭыри агәрагареи алыршахоит шәара еилахәаахәҭрада, ламысцқьала имҩаԥыжәго аусура иабзоураны», - ҳәа иазгәаҭоуп адныҳәалара аҿы.

Лаша Ашәба апрокуратура аусбарҭақәа русзуҩцәа ирзеиӷьаишьеит агәабзиара, ахирра, Аԥсны Аҳәынҭқарра амаҵ аураҟны аихьӡарақәа.  

Аҳәынҭқарратә хьчара Амаҵзура аиҳабы Дмитри Дбар иҟаиҵаз адныҳәалара аҿы иазгәеиҭеит:

«Иуадаҩыз аибашьрашьҭахьтәи ашықәсқәа рзы иаԥҵаз апрокуратура аусбарҭақәа абар шьҭа 30 шықәса ҵуеит Ареспублика Аԥсны азакәанреи азинеиҿкаареи рыхьчараҿы игылоуижьҭеи.  Шәара ацәгьоурақәа рҿагылара, атәылауаа рзинқәеи рхақәиҭреи рыхьчара иазку акырӡа зҵазкуа ауснагӡатәқәа нашәыгӡоит. Уи апрокуратура азинтә шьаҭа змоу аҳәынҭқарра ашьақәгылара аҿы ихадоу елемент аҳасабала ишьақәнарӷәӷәоит.

Хашҭшьа амам нанҳәамза 14, 1992 шықәса арыцхә. Ари амш аҽны Аԥсны жәлар рыԥсҭазаара аҽеиҩнашеит, усҟан аиҵбы иҟынтәи аиҳабы иҟынӡа зегьы Рыԥсадгьыл аххьчаразы иҩагылеит.  Раԥхьа аӷа иҿагылаз дреиуоуп ԥсрашьҭахь Аԥсны Афырхаҵа ҳәа ахьӡ зыхҵоу, азеиԥш хылаԥшра аҟәша апрокурор Ҷыҭанаа Адгәыр Николаи-иԥа.

Аԥсны ахақәиҭреи ахьыԥшымреи зхы ақәызҵаз рфырхаҵареи ргәымшәареи  наунагӡа аҭаурых аҿы иаанхоит», – ҳәа иҳәеит Дмитри Дбар.

Дмитри Дбар ҷыдала иҭабуп ҳәа реиҳәеит апрокуратура аусбарҭақәа рветеранцәа.  

«Шәара хәызмаӡам шәусура даара ҳаҭыр-пату ҳзақәуп. Шәыпрофессионализми шәԥышәеи, шдыррақәеи еиҵагыло аҿар рзы иҿыԥшыганы иҟалароуп», - ҳәа иҳәеит иара.

Дмитри Дбар апрокуратура аусбарҭақәа русзуҩцәа агәабзиара, аихьӡарақәа, аҭынч ԥсҭазаара, ахирра рзеиӷьаишьеит.

Аусбарҭа хаҭалатәи аилазаара иара убас рзанааҭтә ныҳәа рыдырныҳәалеит Аладатәи Уаԥстәыла Ареспублика Апрокурор Хада Григори Собаев.

«Ҩажәижәаба шықәса рыҩныҵҟа Ареспублика Аԥсны апрокуратура аҳәынҭқарратә мчра ашьақәгылараҿы ицхыраагӡа дуны иҟоуп.

Ари аныҳәамш аҽны ҳара ҳрыдныҳәалоит Ареспублика Аԥсны апрокурортә корпус аусзуҩцәа зегьы. Урҭ рзанааҭдырра иузаҟәымҭхо иадҳәалоуп атәылауаа рзинқәеи рзакәантә интерессқәеи рыхьчара, ацәгьоурақәа рыԥхьырҟәҟәаареи рҿагылареи. Шәара ҭакԥхықәрала, занааҭдыррала шәхыдҵақәа нашәыгӡоит.

Ишәыдысныҳәалоит ари аныҳәамш. Ишәзеиӷьасшьоит агәабзиара, агәамч, аизҳазыӷьара, шәнапы злаку аусура аҿы аманшәалара», - ҳәа иҳәеит иара.

Урыстәыла апрокурор хада Игор Краснов ихьӡала иколлегацәа дрыдныҳәалеит Урыстәылатәи Афедерациа аекстрадициа аусбарҭа аиҳабы ихаҭыԥуаҩ Сергеи Григоренко. Уи иҟаиҵаз адныҳәалара аҿы, ахәҭакахьала иазгәеиҭеит:

«Иазысыԥхьаӡоит ҩ-ганктәи аусеицура ԥхьаҟагьы ацҵара, аизырҳара хымԥадоуп ҳәа, ҳаиашьаратә жәларқәа реизҳазыӷьаразы азеиԥш ҭоурых традициақәа ырҭбаалатәуп ҳәа».  

Аԥсны апрокуратура аусбарҭақәа русзуҩцәа иара убас ирыдныҳәалеит Аԥсны Аконституциатә ӡбарҭа ахантәаҩы Диана Ԥлиа, атәыла аҩныҵҟатәи аусқәа рминистр Роберт Киут, адукатцәа Реилазаара ахантәаҩы Константин Чагәаа, Аԥсны ауаҩы изинқәа рыхьчаразы Аҷыдалкаатә зинмчы змоу Анас Кьышьмариа, уҳәа убас аӡәырҩы.

Аԥсны апрокуратура Хада аԥҵара 30-шықәса ахыҵра инамаданы, иҿырԥшыганы амаҵуратә уалԥшьа анагӡареи аихьӡарақәа раарԥшреи рзы, апрокурор Хада Идҵа инақәыршәаны, «Аԥсны апрокуратура аусбарҭақәа ҳаҭыр зқәу аусзуҩ» ҳәа   агәышԥытә дырга ранашьахеит Лиана Ҭарба, Ольга Ершова. Агәышԥытә дырга «Аԥсны апрокуратура аусбарҭақәа рҿы набыцра амамкәа аусура азы» ранашьахеит Саид Дгебиа, Инар Амҷба, Альдона Чалигаа, Инар Ҭаркьыл.

Апрокуратура аусзуҩцәа изаамҭанытәиу акласстә чынқәа ранашьахеит.

«Аԥсны апрокуратура Хада 30 шықәса ахыҵра» амедал ԥсрашьҭахь иранаршьеит Адгәыр Ҷыҭанаа, Анри Џьергениа,  Рауф Ҟоруа.

Азакәанреи азинеиҿкаареи рырӷәӷәара аус аҿы алагала дууи Аԥсны апрокуратура аусбарҭақәа хра злоу аус рыцуреи рзы амедал «Аусеицуразы» ранашьахеит Урыстәылатәи Афедерациа апрокуратура Хада аҩбатәи аҟәша аиҳабы Сергеи Григоренкои  Аахыҵ Уаԥстәыла апрокурор Хада Григори Сабаеви.

Амедал «Ареспублика Аԥсны апрокуратура Хада 30 шықәса ахыҵра» ранашьахеит  Аахыҵ Уаԥстәыла апрокурор Хада ихаҭыԥуаҩцәа Тигран Кабулови Алан Ԥлиеви.

Аԥсны атәылахьчара аминистр Давид Бжьаниа атәылахьчара аминистр Владимир Ануа ихьӡала адныҳәаларатә шәҟәы даԥхьеит.

Аԥсны Аҳәынҭқарра апрокуратура Хада аԥҵара 30-шықәса ахыҵра инамаданы «Аԥсны аҭынчра адгылара аҭара азы» Аԥсны атәылахьчара амедал  ианашьахеит Адгәыр  Агрба.

«1992-1993 шш. Аԥсны жәлар Рџьынџьтәылатәи еибашьра аҿы Аиааира агара Амш 30-шықәса ахыҵра» амедал ранашьахеит Едуард Шамба,  Адамыр Чедиа, Адгәыр  Коӷониа.

Иара убас аныҳәатә еилатәара аҿы Аԥсны атранспорттә прокуратура астажиор-усеилыргаҩы Сабина Џьыкырба апрокурор иҭоуба шьҭалҵеит.

Аныҳәатә еилатәара аофициалтә хәҭа анхыркәшаха ашьҭахь, еизаз идырбан Аԥсны апрокуратура Хада аԥҵара 30-шықәса ахыҵра иазкны иҭыхыз адокументалтә фильм.

 

 

 

 

 


Read 234 times - Ашәахьа, 15 Мшаҧы 2024 19:04
Image
Image
Image
Image
Информационное Агентство "АПСНЫПРЕСС" (РГУ "АПСНЫМЕДИА") © 2024
Все права на любые материалы, опубликованные на сайте, защищены в соответствии с абхазским и международным законодательством об авторском праве и смежных правах. Использование любых аудио-, фото- и видеоматериалов, размещенных на сайте, допускается только с разрешения правообладателя и ссылкой на www.apsnypress.info.