Аҟәа. Цәыббрамза 18, 2023 шықәса. Аԥсныпресс.  Аԥсны Аҳәынҭқарра ашәарҭадара Ахеилак Амаӡаныҟәгаҩ Сергеи Шамба аоппозициа ахаҭарнакцәа атәыла адәныҟатәи аусқәа рминистр Инал Арӡынбеи Аҳәынҭқарра Ахада Иусбарҭа анапхгаҩы Абессалом Кәарҷиеи иаарту адиалог ахь ааԥхьара рыҭара дахцәажәеит.

Сергеи Шамба игәалаиршәеит ааигәа аоппозициатә политикатә мчрақәа рыла Аԥснытәи аҳәынҭқарратә Телерадиоеилахәыра аефир аҿы атәыла анапхгара аҟынтәи ҩыџьа ахаҭарнакцәеи аоппозициа аҟынтәи ҩыџьа ахаҭарнакцәеи алархәны адискуссиа амҩаԥгаразы аԥшьгара шыҟаҵаз.

«Усҟан Инал Арӡынбеи сареи ателехәаԥшраҿы ҳнеит, аха убри аан адискуссиа амҩаԥгаразы аԥшьгара ҟазҵаз ауаа рхаҭақәа мнеиӡеит. Ҳара ҳҩыџьагьы аицәажәара мҩаԥаагар акәхеит, аха уеизгьы хра злоу ацәажәара шьақәгылеит ҳәа  агәаанагара сымоуп.

Аҟәа. Цәыббрамза 18, 2023 шықәса. Аԥсныпресс. Цәыббрамза 17 рзы Бриансктәи аобласт агубернатор Алеқсандр Богомаз аофициалтә дкылара мҩаԥигеит. Аусмҩаԥгатә рхы аладырхәит  Брианск ақалақь Амш азгәаҭареи Брианшьина афашистцәа рҟынтәи ахақәиҭтәра ҟалеижьҭеи  80-шықәса аҵреи  иазку аныҳәатә усмҩаԥгатәқәа рылахәхаразы иааз ҳаҭыр зқәу асасцәеи аиашьаратә қалақьқәа рделегациақәеи, ҳәа адырра ҟанаҵоит Аҟәа ақалақь Ахадара аофициалтә саит.

«Инықәҳа ицоит аамҭа, ашықәсқәа, абиԥарақа ҿыцқәа еиҵагылоит, аха ари амш, цәыббрамза 17, 1943 шықәса афырхаҵареи агәымшәареи рсимвол аҳасабала  наунагӡа ҳгәаҵаҿы иаанхоит.  Бриансктәи афронт архәҭақәа ҳтәыла аҭоурых адаӷьақәа ирнылаз, бриансктәи адгьыл ахақәиҭтәразы ажәыларатә операциа зеиӷьаҟам ала имҩаԥыргеит. Аԥсадгьыл бриансктәи адгьыл ахақәиҭтәразы хацәнымырха еибашьуаз ҳџьынџьуа рфырхаҵара ахә ҳаракны иашьеит», – ҳәа иазгәеиҭеит Алеқсандр Богомаз.

Брианск инеит аиашьаратә қалақьқәа: Гомели Мински (Ареспублика Беларус), Аҟәа (Аԥсны), Брианки (Лугансктәи Жәлартә Республика), Курск, Липецк, Ориол, Пензы, иара убас АПКР «Брянск» ахаҭарнакцәа.

Аҟәа. Цәыббрамза 18,  2023 шықәса. Аԥсныпресс.  Цәыббрамза 15 – 17, 2023 шықәсазы Гәдоуҭа ақалақь аҿы 1992-1993 шш. Аԥсны жәлар Рџьынџьтәылатәи еибашьра аҿы иҭахаз ргәалашәара иазкны зхы иақәиҭу аиқәԥаразы XXV Жәларбжьаратәи атурнир мҩаԥысуан, ҳәа адырра ҟанаҵоит аҿари аспорти русқәа рзы Аҳәынҭқарратә Еилакы апресс-маҵзура.

Атурнир рхы аладырхәит Аԥсны, Аахыҵ Уаԥстәыла, Нхыҵ Уаԥстәыла, Адыгеиа, Ареспублика Арцах ақалақьқәеи араионқәеи Шәача ақалақьи рҟынтәи 160-ҩык рҟынӡа  аспортсменцәа.

Аҟәа. Цәыббрамза 18, 2023 шықәса. Аԥсныпресс. Аҟәатәи ақалақьтә ӡбарҭа цәыббрамза 15 рзы Азербаиџьан атәылауаҩ, 1981 шықәса рзы ииз Гусеинов Џьеихун  Вилаиат- оглы иганахьала ашьаустә усеилыргара ахәаԥшра хнаркәшан ахарадҵатә зыӡба аднакылеит.  Абри атәы аанацҳауеит Аԥсны Аҳәынҭқарра апрокуратура Хада аофициалтә саит.

Џьеихун Гусеинов Аԥсны Ашьаустә Закәанеидкыла ахәҭаҷ 224, ахәҭа 3, апункт «в» иазԥхьагәанаҭо ацәгьоураҿы дыгәҩаран.

Араҟа излацажәо ҷыдала зыкапан дуу (13,915 грамм рҟынӡа инаӡо) анаркотикатә маҭәашьар «метадон»,  анаҩс аҭира гәҭакыс иҟаҵаны, аахәареи аҵәахреи аиагареи ирыдҳәаланы 2023 шықәса ажьырныҳәамзазы Аҟәа ақалақь аҿы иҟалаз ацәгьоура ауп.

Аҟәа. Цәыббрамза 18, 2023 шықәса. Аԥсныпресс. Аԥсны адәныҟатәи аусқәа Рминистрра Ареспублика Никарагуа ахьыԥшымра Амш инамаданы адныҳәалара ҟанаҵеит.

Адныҳәалараҿы, ахәҭакахьала иазгәаҭоуп:

«Ари амш Никарагуа аҭоурых аҿы акыр зҵазкуа мшны иҟоуп. Уи Никарагуа ажәлар ихьыԥшым аҳәынҭқарра аргылара ашьҭазаара символра ауеит.  Аԥсны жәлар ахьыԥшымра аиура амҩаҿы шаҟа ԥышәареи шаҟа мыҟәмабареи цәырҵуа атәы зеиӷьаҟам ала ирдыруеит, ари Амшныҳәа азы шәгәырӷьара гәык-ԥсыкала ишәыциҩыршоит.  Ҳҳәынҭқаррақәа ирыбжьалаз аиашьаратәи аиҩызаратәи аимабзиаратәи аизыҟазаашьақәа даара ҳаҭыр ҳзақәуп.

Аҟәа. Цәыббрамза 18, 2023 шықәса. Аԥсныпресс. Аԥсны иҟоу урыстәылатәи арратә база аимадаҩцәа ашьхараҿы аҽазыҟаҵарақәа рымҩаԥгараан анапхгараҭаратә ҭыԥқәа реимадара аиҿкаара рылшеит, ҳәа адырра ҟанаҵоит Аладатәи Арратә Округ апресс-маҵзура.

Аԥсны, ашьхара иҟоу ахысарҭатә дәы Ҵабал аҿы аимадаҩцәа иаартуи иаркуи аканалқәа рхархәарала анапхгараҭаратә ҭыԥқәеи аидҵара аҟәшақәа рабонентцәеи рыбжьара ихьчоу аимадара еиҿыркааит.

Аҟәа. Цәыббрамза 18, 2023 шықәса. Аԥнсыпресс. Аԥсны аҩныҵҟатәи аусқәа Рминистрра ашьаусԥшааратә Усбарҭа аусзуҩцәа ашьжьымҭан, цәыббрамза 18 рзы Каман ақыҭа азааигәара дааныркылеит уаанӡа Аамҭалатәи аусеилыргаанӡатәи аԥхьакырҭа аҟынтәи дахьыбналаз азы зыԥшаара иаҿыз, Аҟәа араион Иашҭхәа ақыҭан инхо Гурген Киракосиан. 

Уаанӡа иҟаз адыррақәа рыла, нанҳәамза 13 рзы 1988 шықәсазы ииз Киракосиан Гурген Арменак-иԥа Аԥсны Ашьауӷатә Закәанеидкыла ахәҭаҷ 99 ахәҭа 1 (Ауаҩшьра), иара убас ахәҭаҷ 217 ахәҭа 1 (иҭҟьо амцабџьар изакәанымкәа аҵәахреи аныҟәгареи) инарықәыршәаны  ахара идҵан. Уи ахьырхәра аҳасабала ирӷәӷәоу арежим змоу акалониа аҿы  15 шықәса ҭакрала ахгара иқәҵан.  

Аҟәа. Цыббрамза 18, 2023 шықәса. Аԥсныпресс. Цәыббрамза 22 – 23 рзы, Аҟәа ақалақь, «Москва Аҩны» аҿы аурыс бызшәа арҵаҩцәа рзы «Аурыс бызшәа алагарҭатә школ аҿы: иҿыцу аҵаратә лшарақәа» атема ала алектори мҩаԥгахоит.  

Аусмҩаԥгатә аурыс бызшәала арҵареи аурыс бызшәа аҵареи ацхырара аҭара иазку акультура-ҵарадырратә комплекс аҳәаақа ирҭагӡаны имҩаԥысуеит.

Аусмҩаԥгатә иалахәхоит ҩынҩажәижәаба-ҩык инареиҳаны Аҟатәи ашколқәеи Аԥсны егьырҭ ашколқәеи алагарҭатә классқәа рҿы аурыс бызшәа рызҭо арҵаҩцәа.

Алекториа апрограмма иазԥхьагәанаҭоит аҵаратә литература ахҳәаа аҟаҵара, амастер-классқәа, иара убас аинтерактивтә лекциақәеи апрактикумқәеи рымҩаԥгара.

Аҟәа. Цәыббрамза 12, 2023 шықәса. Аԥсныпресс /Алеқсеи Шамба/. Амультимедиатә апресс-центр  Sputnik Аԥсны аҿы москватәи абаҳча «Ермитаж» аҿы цәыббрамза 24 рзы имҩаԥгахо аԥсуа культура  4-тәи Афестиваль «Аԥсны» аартра иазкны авидеоцҳа «Москва-Аҟәа мҩаԥысит.

«Мокватәи аԥсуа Диаспора» анапхгараҭара ахантәаҩы Беслан Агрба, МАД анагӡаратә директор Даур Барганџьиеи аԥсуа культура Афестиваль «Аԥсны» амҩаԥгаҩ Давид Цужбеи истильрку аԥсуа иашҭа-гәара аҿы афестиваль асасцәа аԥсуа жәлар рыбзазара атрибутқәа рбара, амузыкатә инструментқәа рыла ахәмарра, иара убас амилаҭтә деликатесқәа ргьама абареи рылшоит ҳәа еиҭарҳәеит.

Беслан Агрба, афестиваль афестиваль иаҭаауа Москва инхо ауааԥсыреи аҳҭнықалақь асасцәеи Аԥсны аԥсшьараҭыԥ анаҩс ибеиоу акультуреи аҭоурыхи змоу ҳәынҭқаррак аҳасабала адырра азы ацхыраара рынаҭоит ҳәа иазгәеиҭеит.

Даур Барганџьиа афестиваль асасцәа ирзыԥшуп инарҭбаау апрограмма, иара убас узқәымгәыӷуа аҳамҭақәа рацәаны.  

«Афестиваль аҭааҩцәа рзы узқәымгәыӷуа аҳамҭақәа рацәаны ирхианы иҳамоуп.  Хықәкы хаданы иҳамоуп аиҳабацәа реиԥш аиҵбацәагьы рзы аинтерес аҵаны апрограмма аиҿкаара», - ҳәа иазгәеиҭеит иара.

Аҟәа. Цәыббрамза 15, 2023 шықәса. Аԥсныпресс. Аԥсны иҟоу Урыстәыла аус ацура Ахаҭарнакра анапхгаҩы Дмитри Федотов ареспублика аҿы инхо, Ленинградтәи аблокада иалахәыз рҟынтәи аӡәызаҵәык иаанханы иҟоу Нонна Мол-Оглы - амацәаз иҭакыз Ленинград ауааԥсыра рҟынтәи Афедеративтә Республика Германиа анапхгараҭара ахь иҟарҵаз ааԥхьара ахкьыԥхь лнапы иаиркит.

Цәыббрамза алагамҭазы Аџьынџьтәылатәи еибашьра Дуӡӡа аан амацәаз иҭакыз Ленинград ауааԥсыреи уи ахьчаҩцәеи аблокада зхызгаз зегьы рыхьӡала агуманитартә шәатәқәа рызшәара алыршаразы Афедеративтә Республика Германиа анапхгараҭара ахь ааԥхьара ҟарҵеит. Ари ааԥхьараҿы ахәҭакахьала, шәмилаҭк инареиҳаны рхаҭарнакцәа ахьынхоз ақалақь Ленинград аҿы, 1941-1944 шш. рзы миллионҩык инареиҳаны ауааԥсыра рыԥсҭазаара иалҵит ҳәа иазгәаҭоуп.  

Дмитри Федотов Нонна Мол-Оглы ааԥхьара атекст дылзаԥхьеит, убри аан милаҭла иауриуоу рзы мацара агуманитартә шәатәқәа рзоужьра азы аӡбамҭа шиашам азгәеиҭеит.  «Ҳара ҳзы ари азҵаара акыр аҵанакуеит. Аетникатә ҟазшьа ала ашәатәқәа аныҟарҵо, убри аан егьырҭ анырхашҭуа, ари зынӡа ииашаӡам жәаҳәарада», - ҳәа иҳәеит иара.

Ааԥхьара атекст аҿы, Афедеративтә Республика Германиа анапхгара иарбоу азҵаара ахшыҩзышьҭра аҭаны иахәаԥшырц азы уаанӡа акырынтә иҟаҵаз аҽазышәарақәа лыҵшәаданы иаанхон ҳәа иазгәаҭоуп.

«Аблокада иалахәыз зегьы ииашаны ашәатәқәа рызшәара амыцхәрас, Афедеративтә Республика Германиа анапхгара 2019 шықәсазы Санкт-Петербург ақалақь аҿы «Аибашьра аветеранцәа рыхәшәтәырҭа» амодернизациа аҳасабала уалбашақә инагӡаз «агуманитартә уснагӡатә» амҩаԥгарала рҭаԥхықәра анагӡара хдырқәшеит. Аха иара уигьы ус аҵыхәтәанӡа изынагӡамхеит. Афедеративтә Республика Германиа анапхгара ахь ҳхы рханы – ашықәсқәа цацыԥхьаӡа зхыԥхьаӡара иаҳа-иаҳа иагхо Ленинградтәи аблокада иалахәыз, аӡәгьы далымхыкәа зегьы агуманитартә шәатәқәа рызшәара азы  аамҭа мгакәа ииашоу аӡбамҭа рыдыркыларц ааԥхьара ҟаҳҵоит», - ҳәа иаҳәоит ааԥхьара атекст аҿы.