Аҟәа. Ԥхынҷкәынмза 11, 2023 шықәса. Аԥсныпресс. Ԥхынҷкәынмза  8 – 9 рзы Гәылрыԥшь араион Агәыӡера  аҳабла аҿы «Гьаргь Аиааирагаҩы Ихраҿа» агаразы таитәи абокс азы Аԥсны аԥхьахәгареи ачемпионати мҩаԥысуан, ҳәа адырра ҟанаҵоит аҿари аспорти русқәа рзы Аҳәынҭқарратә Еилакы.  

Аицлабрақәа рхы аладырхәит Аҟәа, Гәдоуҭа, Очамчыра, Гал ақалақьқәа рҟынтәи 120-ҩык инареиҳаны аспортсменцәа.

Актәи азеиԥшкомандатә ҭыԥ ааныркылеит Аҟәатәи аспортсменцәа, аҩбатәи аҭыԥ – Гәдоуҭатәи акоманда, ахԥатәи – Гал ақалақь аспортсменцәа.

Аԥсны еизгоу акоманда азыҟаҵаҩ хада, Аԥсны таитәи аспорт Афедерациа апрезидент Ҭеимураз Гергедаа иажәақәа рыла, арҭ аицлабрақәа Аԥсны еизгоу акоманда ашьақәыргылара азы алԥшааратә ҟазшьа аманы имҩаԥган. 

Аҟәа. Ԥхынҷкәынмза 11, 2023 шықәса. Аԥсныпресс.  Аԥыԥшырҭа «Ԥсоу» аконтрабанда аҿагылареи аҳазалхратә зинеилагарақәеи рыҟәша аусзуҩцәа «Импорт» ахырхарҭала амашьыналасқәа рҳазалхратә гәаҭара аҭыԥ аҿы, ԥхынҷкәынмза  9 рзы иааныркылеит, анаҩс игәарҭеит автомашьына. Уи аԥсҟы икын Аԥсны атәылауаҩ. Амашьына аҩныҵҟа ирыԥшааит акриптовалиута арҳаразы амаругақәа ԥшьба, ҳәа адырра ҟанаҵоит Аҳәынҭқарратә ҳазалхратә Еилакы аофициалтә саит.

Аҟәа. Ԥхынҷкәынмза 11, 2023 шықәса. Аԥсныпресс. 3000 пачка инареиҳаны асигареҭ Аԥснынтәи Урыстәылаҟа изакәанымкәа ԥшь-машьынак рыла алагалара рҽазыршәеит, ҳәа адырра ҟанаҵоит Аладатәи аҳазалхратә Усбарҭа апресс-маҵзура.

Ашықәсҿыцтәи аныҳәақәа раламҭалазы изакәанымкәа аҭаҭын аалыҵ Аԥснынтәи Урыстәылаҟа аиагара иадҳәалоу азинеилагарақәа рхыԥхьаӡара иазҳаит.  Аҳазалхратәи аҳәаахьчаратәи агәаҭарақәа рымҩаԥгараан Адлер иҟоу Краснодартәи аҳазалхра иатәу Ганрацәалатәи Автомашьынатә Аушьҭра-гәаҭаратә Пункт аусзуҩцәа изакәанымкәа аҭаҭын аалыҵқәа, автотранспорт иҭаҵәахны уахь иналаҵаны, рыиагара иадҳәалоу афактқәа раарԥшреи  рыԥхьырҟәҟәаареи иаҿуп.  Убас, автомашьына CHERY Амобилтә инспекциа-гәаҭаратә Комплекс ахархәарала агәаҭараан, ҷыдала еиқәыршәаз ашьҭахьтәи абампер аҩакаа аҿы ирыԥшааит аҭаҭын аалыҵқәа. Асигареҭқәа амашьына аҩныҵҟатәи аҵҟьа иҭаҵәахын. Имаӡоу аҭыԥқәа рҟынтәи ицәырган «BUSINESS ROYALS» захьӡу 673 сигареҭҭра (13460 цыра). Егьи амашьына ВАЗ 2106 агәаҭараан аҭаҭын аалыҵ уаанӡа абылтәыҭаҭәарҭа ахьыҟаз ирыԥшааит  «INSTARK», «Slim Blue» захьӡу даҽа 300 сигареҭҭра (6000 цыра).  Иара убас автомашьына  CHEVROLET NIVA аҿы ашьҭахьтәи апассаџьыртә тәарҭа аҵаҟеи, иара убас ҷыдала еиқәыршәаз алиук аҟынтәи ицәырыргеит  иҵәахыз «BUSINESS ROYALS» захьӡу 1150 сигареҭҭра (23000 цыра).  Даҽа машьынак PEUGEOT PARTNER аҟынтәи  амашьына асалон арԥхага асистема ақәгарала иҟаҵаз априбортә панель иҭаҵәахны зыиагара рҽазыршәоз аҭаҭын аалыҵ ҭыргеит.  Иарбоу амаӡа ҭыԥ ақәгарала аҳазалхыҩцәа ирыԥшааит 1052 сигареҭҭра (21040 цыра) рҟынӡа инаӡо «BUSINESS ROYALS» захьӡу асигареҭқәа.

Аҟәа. Ԥхынҷкәынмза 12, 2023 шықәса. Аԥсныпресс. Аҵарадырра Аминистрра 100-шықәса ахыҵра иазку аныҳәатә усмҩаԥгатә мҩаԥысит Аԥснытәи аҳәынҭқарратә драматә театр аҿы.

Аҵара аминистр Инал Габлиа иқәгылараҿы иахьа Ареспублика Аԥсны азы акыр зҵазкуа мшуп ҳәа иазгәеиҭеит.

«Иахьа ҳара иазгәаҳҭоит Аԥсны аҵарадырра Аминистрра 100-шықәса ахыҵра. Ари имаҷым аамҭахәҭа зҵазкуа аҭоурых азы Аминистрра шьаҿа-шьаҿала, лҵшәа бзала, атәыла аҿы аҵарадыра аҿиареи аларҵәареи рзы ахыдҵа анагӡара иаҿын. 100-шықәса рыҩныҵҟа, акыр ауадаҩрақәа шыҟазгьы, уи атәыла ауааԥсыра зегьы рҵарадырра азы хра злоу алагала ҟанаҵон. Уи дарбанызаалак ауаҩы ипотенциал аарԥшра, ауаажәларра рыҩныҵҟа ихатә ҭыԥ аԥшаареи ижәлар рхаҭарнак иашаны дҟаларц азы иара аҭакԥхықәра адагьы амиссиа ауп инанагӡоз», – ҳәа иҳәеит аминистр.

Иара иазгәеиҭеит, аҵыхәтәантәи 100 шықәса рыҩныҵҟа адунеи акыр аҽшаԥсахыз, аҵара Аминистррагьы аамҭа ишьақәнагылоз аҭагылазаашьақәа аҽарнааланы аус шауаз.  Шықәсы рацәа инеиԥынкыланы иҿыцу аҵарадырратә программақәа аус рыдулахон, иԥхьагылоу атехнологиақәа аларгалон, арҵаҩратә методика аиӷьтәра иазку ауснагӡатәқәа мҩаԥысуан.

«Ҳара ари аус дуӡӡа знапы алаку зегьы иҭабуп ҳәа раҳҳәарц ҳҭахуп, аԥхьаӡа иргыланы ҳарҵаҩцәа, еиҵагыло аҿар реиҵааӡараҿы аихьӡарақәа раарԥшраҿы адгылара ҳазҭоз зегьы. Агәра ганы ҳаҟоуп ҳминистрра аринахысгьы аҿиара амҩа ишаныло, аҵарадырра акәзар, Аԥсны аҿиареи апрогресси уасхырс ишамазаауа», – ҳәа иҳәеит аҵара аминистр.

Аҳәынҭқарра Ахада Ихаҭыԥуаҩ Бадра Гәынба Аҳәынҭқарра Ахада Аслан Бжьаниа ихьӡала адныҳәалара даԥхьеит.

«Асовет мчра анышьақәгыла ашьҭахь раԥхьатәи ашықәсқәа рзы иаԥҵан Аԥсны Жәлар аҵарадырратә комиссариат. Уи напхгаҩыс даман ашәҟәыҩҩы, ауаажәларратә усзуҩ Самсон Ҷанба. Аԥсны Жәлар Ркомиссариат аҟны аџьабаа ду рбеит Дырмит Гәлиа, Симон Басариа, Кондрат Ӡиӡариа уҳәа аӡәырҩы. Дара ирыбзоураны Аԥсны иҭыжьын раԥхьатәи арҵагашәҟәқәа, уи ареспублика аҿы аҵарадырра аҿиара акыр иацхрааит», – ҳәа иазгәаҭоуп адныҳәалара атекст аҿы.

Аҳәынҭқарра Ахада иҳаҩсыз ашәшықәса азы Аминистрра аҵарадырра асистема аҿиара, атәылауаа рдыррақәеи рылшарақәеи рыҩаӡара ашьҭыхра аҿы ихадоу ароль нанагӡон ҳәа иазгәеиҭеит.  

«Шәара шәаԥхьа иҟаз реиԥш, ааԥсарак ҟамҵакәа ажәлар зыҩаӡара ҳараку адыррақәа рызнагареи апрограммақәеи аҵаратә усбарҭақәеи рмодернизациеи рзы аус жәуеит, арҵаҩратә еилазаара ацхыраареи адгылареи ашәҭоит», – ҳәа иазгәаҭоуп адныҳәаларатә цҳамҭа атекст аҿы.

Аслан Бжьаниа арҵаҩцәа зегьы агәабзиареи ачҳареи  аманшәалареи рзеиӷьеишьеит.

Аҟәа. Ԥхынҷкәынмза 12, 2023 шықәса. Аԥсныпресс. Иахьа Аԥсны аминистррақәеи ахылаԥшырҭақәеи жәпакы аиубилеитә рыцхә – аԥҵара ҟалеижьҭеи  30 шықәса аҵра азгәарҭоит.  

30 шықәса раԥхьа, ԥхынҷкәынмза 12, 1993 шықәсазы, Ареспублика Аԥсны Иреиҳаӡоу Асовет ахантәаҩы Владислав Григори-иԥа Арӡынба «Ареспублика Аԥсны аҳәынҭқарратә напхгараҭара аусбарҭақәа рыструктура азы» азакәан инапы аҵаиҩит.

Ари азакәан ала ишьақәыргылан аибашьрашьҭахьтәи ареспублика анапхгараҭаратә аҳәынҭқарратә усбарҭақәа рыструктура. Уи иалалеит 18 министеррақәеи 16 егьырҭ аҳәынҭқарратә напхгараҭара аусбарҭақәеи.  

Ареспублика Аԥсны Аминистррақәа:

1. Атәылахьчара Аминистрра.
2. Аҩныҵҟатәи аусқәа Рминистрра.
3. Адәныҟатәи аусқәа Рминистрра.
4. Акультура Аминистрра.
5. Аҵарадырра Аминистрра.
6. Афинансқәа Рминистрра.
7. Аргылареи архитектуреи Рминистрра.
8. Ақыҭанхамҩеи афатәи-жәтәи Рминистрра.
9. Аекономика Аминистрра.

• Ахәаахәҭра Аминистрра.
• Ааглыхра Аминистрра.
• Аекологиа Аминистрра.
• Аиустициа Аминистрра.
• Агәабзиарахьчара Аминистрра.
• Атранспорти аимадареи Рминистрра.
• Аџьеи асоциалтә хьчареи Рминистрра.
• Аинформациеи акьыԥхьи Рминистрра.
• Аенергетика Аминистрра.

Аҟәа. Ԥхынҷкәынмза 12, 2023 шықәса. Аԥсныпресс. Аԥсны аҵара Аминстрра ашколнӡатәи аҵарадырра азы раԥхьаӡа акәны «Анбан» шәҟәы ҭнажьит. Ари ашәҟәы иара убас иацуп аусуратә тетрадқәа.  Аминистрра 100-шықәса ахыҵра иазкны имҩаԥгаз аныҳәатә усмҩаԥгатә аҿы дықәгыло абри азы адырра ҟаиҵеит аҵара аминистр Инал Габлиа.

Аамҭа кьаҿ иалагӡаны «Анбан» шәҟәы ҿыц Аԥснытәи ашколқәа рҿы ицәырҵуеит.

Иара убас Инал Габлиа ааигәатәи аихьӡарақәа ртәы еиҭеиҳәеит:

Ԥхынҷкәынмза 10, 2023 шықәса рзы Урыстәылазегьтәи ахәыҷтәы центр «Смена» ахь амҩа иқәлеит зхыԥхьаӡара 25-ҩык рҟынӡа инаӡо, 8-11-тәи аклассқәа рҿы аҵара зҵо ашкол-интернатқәа рҵаҩцәа рыла еилоу актәи агәыԥ.

Абҵарамза 16 рзы Б.Шьынқәба ихьӡ зху абжьаратәи ашкол  №1  аҵаҩцәа рыла еилоу акоманда амҩаҿы аныҟәаразы аинспектор ҿарацәа Жәларбжьаратәи Реизгара аҿы аиааира ргеит. Иара убас хара имгакәа Аԥснынтәи ахәыҷқәа азҩыдатәратә Центр  «Артек» ахь идәықәҵахоит.

Аҟәа. Ԥхынҷкәынмза 12, 2023 шықәса. Аԥсныпресс.  Ԥхынҷкәынмза 10, 2023 шықәса рзы амассатә инфорациа ахархәагақәа рҿы азинхьчаратә усбарҭақәа русзуҩцәа Тҟәарчал араион Ҵарча ақыҭан инхоз Витали Иван-иԥа Қарбаиа даанкыланы дахьырыԥҟаз иахҟьаны иԥсҭазаара далҵит ҳәа аинформациа цәырҵит.

Иҟоу адыррақәа рыла, Аԥсны ауаҩы изинқәа рыхьчара знапы иану Анас Кьышьмариа апрокурор Хада, аҩныҵҟатәи аусқәа рминистр, Гал араион апрокурор, Гал араион аҩныҵҟатәи аусқәа Русбарҭа аиҳабы рахь аамҭа кьаҿ иалагӡаны абри аинформациа ала агәаҭарақәа рымҩаԥгареи, насгьы урҭ рылҵшәақәа рзы адырра ауаҩы изинқәа рыхьчара знапы иану Иаппарат ахь анашьҭреи ралыршаразы ашәҟәы налышьҭит.

Аҟәа. Ԥхынҷкәынмза 12, 2023 шықәса. Аԥсныпресс. Иахьа Ареспублика Аԥсны аекономика Аминистрра аԥҵеижьҭеи 30 шықәса ҵит.

Ԥхынҷкәынмза 12, 1993 шықәса рзы Ареспублика Аԥсны Иреиҳаӡоу Асовет ахантәаҩы  Владислав Арӡынба «Ареспублика Аԥсны аҳәынҭқарратә напхгараҭара аусбарҭақәа рыструктура азы» азакәан инапы аҵаиҩит.  Ари азакәан инақәыршәаны иаԥыхыз Аҳәынҭқарратә плантә комитет ахаҭыԥан иаԥҵахеит атәыла аекономика Аминистрра.

Еиуеиԥшым ашықәсқәа рзы ари Аминистрра ахадараҿы иҟан Даур Барганџьиа, Константин Ҭыжәба, Константин Озган, Беслан Кәыбраа, Адгәыр Лышәба, Руслан Арӡынба, Давид Ирадиан, Николаи Ачба, Адгәыр Арӡынба. Дара зегьы ҳҳәынҭқарра аекономика аҿиареи уи аҭышәынтәалара алыршареи рлагала аларҵеит. Уажәы аекономика Аминистрра дахагылоуп Кристина Озган.

Аҟәа. Ԥхынҷкәынмза 12, 2023 шықәса. Аԥсныпресс.  Аԥсны Аҳәынҭқарра Ахада  Аслан Бжьаниа Владимир Путин Урыстәылатәи Афедерациа Аконституциа амш идиныҳәалеит. Абри атәы аанацҳауеит Аҳәынҭқарра Ахада ипресс-маҵзура.

Адныҳәаларатә цҳамҭа атекст аҿы, ахәҭакахьала иҳәоуп:

«Ҳаҭыр зқәу Владимир Владимир-иԥа!

Азин сыщәҭозар, ҳаҭырқәҵарыла сшышәзыҟоу азгәаҭо,  ишәыдысныҳәалрц сҭахуп аҳәынҭқарратә ныҳәа ду - Урыстәылатәи Афедерациа Аконституциа Амш.

1993 шықәса ԥхынҷкәынмза 12 Урыстәыла аҭоурых ҿыц аҟны аҳәынҭқарра аԥсҭазаараҿы аамҭа ҿыц ашьақәгылара иазҳәоу иҷыдоу аҭыԥ ааннакылоит.

Урыстәылатәи Афедерациа Аконституциа атәыла қәҿиарала аҿиара уасхырс иазышьҭоуп, ацәаҩашәатә хырхарҭа хадақәаны изгәылоу, ауаҩы изинқәеи ихақәиҭреи акырӡа зҵазкуа ак акәны иазгәазҭаз.

2020 шықәса рзы Адокумент Хада аԥсахрақәа ралагалара

Аҟәа. Ԥхынҷкәынмза 12, 2023 шықәса. Аԥсныпресс. Ашықәс Ҿыц аламҭалазы С.Ҷанба ихьӡ зху Аԥснытәи аҳәынҭқарратә драматә театр, Аԥсны аҳәынҭқарра ақәыԥшцәа ртеатр, Ф.Искандер ихьӡ зху Аурыс драматә театр аԥсышәалеи урыс бызшәалеи ахәыҷтәы спектакльқәа дырхиеит.    

Аԥсуа адраматә театр аҿы ԥхынҷкәынмза  25 рзы А.Н. Островски ипиеса ала иқәыргылоу аспектакль «Асҭыԥҳа»  аԥхьарбара мҩаԥысуеит.   Апиеса аԥсуа бызшәахьы еиҭалгеит апоетесса Нелли Ҭарԥҳа. Ашықәсҿыцтәи ақәгылара арежиссиор-ақәыргылаҩ –  Аԥсны Зҽаԥсазтәыз артистка Мадина Аргәын.

Ԥхынҷкәынмза 25 инаркны ԥхынҷкәынмза 30-нӡа аспектакль Аҟәа ақалақь аҿы имҩаԥыслоит, ажьырныҳәамза  2 - 3 рзы – Гагра ақалақь акультура Аҩны аҿы.

Аҳәынҭқарратә ақәыԥшцәа ртеатр ахәыҷқәа ирызнархьиеит аԥсуа бызшәала иқәыргылоу аспектакль  «Ашықәсҿыцтәи ахҭыс». Арежиссиор-ақәаргылаҩ – Ахра Кәарҷиа. Аспектакль аԥхьарбара мҩаԥгахоит ԥхынӷкәынмза 20 рзы С.Ҷанба ихьӡ зху Аԥсуа драматә театр асцена аҿы.