Аҟәа. Нанҳәамза 20, 2024 шықәса. Аԥсныпресс. Ихыркәшахеит Аԥсны Афырхацәа Арзамеҭ Ҭарбеи Салыбеи Арӡынбеи ргәалашәара иазкны имҩаԥгаз аԥкьаҭмпыл азы Иаарту ареспубликатә атурнир. Нанҳәамза 15 – 19 рзы Аԥсны Афырхаҵа Арзамеҭ Ҭарба ихьӡ зху Ареспубликатә ԥкьаҭмпылтә школ аҿы имҩаԥысуаз атурнир рхы аладырхәит ареспублика араионқәа, иара убас Москвеи Санкт-Петербург ақалақьқәеи рҟынтәи 70-ҩык аспортсменцәеи Швеицариантәи иааз спортсменки.
2014 шықәсазы иизи урҭ иреиҵбууи аспортсменцәа рыбжьара актәи аҭыԥқәа ааныркылеит Омар Коӷониеи Аниса Амҷбеи, аҩбатәи аҭыԥқәа ааныркылеит Сандро Ҵнариеи Амра Герхьелиеи, ахԥатәи аҭыԥқәа ааныркылеит Давид Феизбеи Софиа Чаабали.
2011 шықәсазы иизи урҭ иреиҵбууи аспортсменцәа рыбжьара актәи аҭыԥқәа ааныркылеит Нестор Цужбеии Софиа Ҭарбеи, аҩбатәи аҭыԥқәа ааныркылеит Сабри Нанбеи Алиа Ҵнариеи, аџьазтә аԥхьахәқәа ргеит Баграт Иванбеи Валериа Емексузиан.
Амикст аҿы аиааирақәа ргеит Сабри Нанбеи Софиа Ҭарбеи, аҩбатәи аҭыԥ аҿы игылоуп Нестор Цужбеи Валериа Емексузиани, ахԥатәи аҭыԥ аҿы - Володар Парамонови Алиа Ҵнариеи.
Салыбеи Арӡынба иҭаацәа рҟынтәи аиааирагаҩцәеи аԥхьахәгаҩцәеи аԥаратә ҳамҭақәа ранашьахеит.
Атурнир аӡбаҩ хада – аԥкьаҭмпыл азы Аԥсны аспорт азҟаза, Арзамеҭ Ҭарба ихьӡ зху Ареспубликатә аԥкьаҭмпылтә школ адиректор Елизабет Акәыциа.
Атурнир аиҿкааҩцәа – Аԥсны аҿари аспорти русқәа рзы Аҳәынҭқарратә Еилаки Аԥсны аԥкьаҭмпыл Афедерациеи.
