Аҟәа. Цәыббрамза 13, 2023 шықәса. Аԥсныпресс. Аџьынџьтәылатәи еибашьра аҿы Аиааира агара Амш 30-шықәса ахыҵра азгәаҭара аламҭалазы Аҟәа ақалақь аҿы аиҭашьақәыргыларатә усурақәа мҩаԥысуеит, ҳәа адырра ҟанаҵоит аҳҭнықалақь Ахадара аофициалтә саит.  

Аҟәа ақалақь Ахадара амуниципалтә усбарҭа «Ақалақьргыларапроект» адиректор Асҭамыр Ԥиԥиа ишеиҭаиҳәаз ала, уажәы анышәынҭрахаҳәқәеи амемориали рҿы иану аҩырақәа рырҿыцра иазку аусурақәа мҩаԥысуеит.  

Аҟәа. Цәыббрамза 13, 2023 шықәса. Аԥсныпресс. Аԥсны Жәлр Реизара-Апарламент аҿы Апарламент Аиҳабы Лаша Ашәбеи Урыстәылатәи Афедерациа Аҳәнҭқарратә Дума адепутат, амилаҭқәа русқәа рзы Аҳәынҭқарратә Дума Акомиетет алахәыла Анастасиа Удальцовеи реиԥылара мҩаԥысит.

Аиԥалара иара убас рхы аладырхәит адепутат Инар Гыцбеи Апарламент Аппарат анапхгаҩы Вадим Бжьаниеи.

Аҟәа. Цәыббрамза 13, 2023 шықәса. Аԥсныпресс. Агәабзиарахьчара аминистр Едуард Быҭәба  Амилаҭтә кьыбачымазаратә Центр аҳақьым хада Нарҭ Гамгьиа анҭыҵтәи аусуратә иԥылара мҩаԥигеит. Иарбоу амедицинатә усбарҭа аҳақьым хада ацентр аҿы иахьазы 6 нызқьи 172-ҩык  ашәҟәы иҭагалоуп  ҳәа аминистр адырра ииҭеит.

«Сынтәа адиспансертә хәышәтәразы ашәҟәы иҭаргалаз ачымазцәа рзеиԥш хыԥхьаӡара 598-ҩык рҟынӡа инаӡоит, иҳаҩсыз ашықәс азы уи  393-ҩык рҟынӡа инаӡон. Урҭ рахьынтә зкьыбачымазара шьақәырӷәӷәоу – 381-ҩык апациентцәа роуп, иҳаҩсыз ашықәс азы урҭ рхыԥхьаӡара 390-ҩык рҟынӡа инаӡон. Иазгәаҭатәуп, урҭ рахьынтә 217-ҩык ҳара акьыбачымазара аламҭалазтәи аҭагылазаашьа зманы ашәҟәы иҭаҳгалаз, иара убри ала зыԥсы аиқәырхара алыршахаз роуп. Иҳаҩсыз ашықәс азы ус еиԥш иҟоу апациентцәа рхыԥхьаӡара 103-ҩык рҟынӡа инаӡон, уи аилыркаара-дырратә усура иҿыцу аҩаӡараҿы ишцәырҵыз, насгьы ачымазцәа ирыҭахо амедицинатә цхыраара ахаҭабзиара аиӷьтәра шалыршахаз атәы аҳәоит», - ҳәа иҳәеит Нарҭ Гамгьиа.  

Аҟәа. Цәыббрамза 13, 2023 шықәса. Аԥсныпресс. Аԥсны аикидо Афедерациеи Урыстәыла аикидо Амилаҭтә хеилаки аусеицуразы Аиқәшаҳаҭра рнапы аҵарҩит, ҳәа адырра ҟанаҵоит Аԥсны аҿари аспорти русқәа рзы аҳәынҭқарратә Еилакы.

Аиқәшаҳаҭра, аԥышәеимдареи аинформациатә еимадареи рзы аконсультациақәеи аиԥыларақәеи рымҩаԥгарала аҩганктәи аусеицура арӷәӷәареи аҿиареи рзы иарбоу аиҿкаарақәа аикидо аусхкы аҿы аусеицура азԥхьагәанаҭоит.

Аҟәа. Цәыббрамза 13, 2023 шықәса. Аԥсныпресс. Атуризм Аминистрра аусзуҩцәа 2021шықәса инаркны атәыла аҩныҵҟатәи аусқәа Рминистрра, Аекономикатә цәгьоурақәа рҿагылара Аҟәша, Аԥсны аҳәынҭинспекциа, Аԥсны аекскурсиамҩаԥгаҩцәа Рассоциациа алархәны изакәанымкәа аекскурсиақәа мҩаԥызго раарԥшразы анҭыҵтәи ареидтә гәаҭаратә усмҩаԥгатәқәа мҩаԥыргоит.

Аԥсны 500 инарзынаԥшуа алицензиа змоу аекскурсиамҩаԥгаҩцәа ыҟоуп. Урҭ атуризм Аминистрраҿы аҽазыҟаҵаратә курсқәа мҩаԥыргоит, аамҭа-аамҭала рзанааҭдырра аҩаӡара ашьҭыхразы акурсқәа ирхысуеит. Аха иҟоуп изакәанымкәа аус зуогьы. Урҭ аофициалтә усура иаԥырхагоуп, Аԥсны аҭоурых еицаркуеит.

Ареидтә усмҩаԥгатәқәа ареспубликатә трасса  иахьаҵанакуа зехьынџьара есымчыбжь имҩаԥыргоит.

Цәыббрамза 13 азы Гагра араион аҿы ареидтә усмҩаԥгатә мҩаԥысит.  Ареидтә усмҩаԥгатәқәа ирылҵшәаны азинеилагаҩцәа аарԥшӡамызт.

Атуризм аминистр ихаҭыԥуаҩ Асҭамыр Барцыц ари хра злоу лҵшәоуп ҳәа иазгәеиҭеит.

Аҟәа. Цәыббрамза 13, 2023. Аԥсныпресс. Цәыббрамза 11, 2023 шықәса рзы Гагра араионтә ӡбарҭа  1998 шықәсазы ииз Аԥсны атәылауаҩ Леон Емзар-иԥа Зарандиа, анаҩс аҭира хықәкыс иҟаҵаны, ҷыдала зыкапан ҳараку, 48,853 грамм рҟынӡа инаӡо анаркотикатә маҭәашьар «метадон» изакәанымкәа аахәареи аҵәахреи аиагареи, иара убас гәыԥҩык ауаа заанаҵтәи рцәыҵеицәажәарала  зыкапан  0,869 грамм рҟынӡа инаӡо анаркотикатә маҭәашьар «метадон» аҭиреи, иара убас атәылауаҩԥҳәыс  Д. Гаиазова ӷәӷәала азарал лыҭарала маӡала атәым мазара аӷьычра азы ахара идҵара азы ашьаус иахәаԥшит.

Аҟәа. Цәыббрамза 13, 2023 шықәса. Аԥсныпресс. 20 нызықь мааҭ рҟынӡа инаӡо зныктәи аԥаратә цхыраагӡатәқәа  рызшәахоит 4 категориак ирыҵанакуа Аџьынџьтәылатәи еибашьра аҿы иҭахаз  рҭаацәа.  

Аԥсны Атәанчаҩратә Фонд ахантәаҩы Денис Гәылариа Аԥсныпресс акорреспондент диҿцәажәо, Аԥсны жәлар Рџьынџьтәылатәи еибашьра аҿы иҭахаз рҭаацәа, даҽакала иуҳәозар, атәанчахәқәа зауа ҳазҭоу аамҭазы цәыббрамза 30 аламҭалазы зныктәи  аԥаратә цхыраагӡақәа рызшәахоит ҳәа адырра ҟаиҵеит.  Ашәатәқәа рыҟаҵара 1992-1993шш. Аԥсны жәлар Рџьынџьтәылатәи еибашьра аҿы Аиааира агара Амш  30-шықәса ахыҵра иамадоуп.

Аҟәа. Цәыббрамза 13, 2023 шықәса. Аԥсныпресс. Аԥсны Ахәаахәҭра-Ааглыхратә Палата анапхгаҩы Ҭамила Мерцхәлаа Аԥсны ҩымштәи усуратә визитла иаҭааз Ставропольтәи атәылаҿацә аҟынтәи имаҷууи ибжьаратәууи аусдкылара асубиектқәа рхаҭарнакцәа дырԥылеит. Абизнес-миссиа икоммерциатә аиҿкаара «Ставропольтәи атәылаҿацә аҟны аусдкылара адгылара аҭара Афонди» Нхыҵ Кавказтәи абизнес Апалатеи иҟарҵаз адгыларала имҩаԥысуеит.

«Ас еиԥш амиссиақәа Урыстәылатәи Афедерациа арегионқеи Аԥсни ирыбжьоу аимабзиаратәи аусуратәи аизыҟазаашьақәа ирылҵшәаны иҟоуп. Ҳара излауа ала ирацәаны аусдкылаҩцәеи аинвесторцәеи ҳреспублика ахь раара ҳазҿлымҳауп», - ҳәа асацәа дырԥыло инаҵшьны иазгәалҭеит Ҭамила Мерцхәлаа.

Лара, аҵыхәтәантәи ашықәсқәа рзы ареспублика акыр аҽеиҭанакит, араҟа аусура ҟалоит иагьахәҭоуп ҳәа иазгәалҭеит.

«Ҳара ҳреспублика ахь аҭыжьреи амаҵзуреи ркультура ҿыц аазго, анаплак ҿыцқәа аазыртуа ауаа иҭабуп ҳәа раҳҳәоит, избан акәзар уи зегьы ҳекономика аҿиаразы акыр ихымԥадатәиуп. Ҳҳәынҭқарра аполитика ахәаахәҭра-економикатә еизыҟазаашьақәа рыҿиареи аганқәа зегьы ирзыфеидоу еиуеиԥшым арегионқәа аус рыцура аҳәаақәа рырҭбаара, аусдкылара азы иманшәалоу аҭагылазаашьақәа раԥҵара иазырхоуп», - ҳәа инаҵшьны иазгәалҭеит Ҭамила Мерхәлаа.

Лара аусуратә мшқәа ҩба ирылагӡаны хра злоу алҵшәақәа раарԥшра шалыршахо, аусдкылаҩцәа зегьы аԥснытәи рколлегацәа феида рзаланы аус рыцура аформа аԥшаара шрылшо азы агәыӷра аалырԥшит.

Аҟәа. Цәыббрамза 12, 2023 шықәса. Аԥсныпресс. Цәыббрамза 12, 2023 шықәсазы Аԥсны Иреиҳаӡоу аӡбарҭа аҿы Аҟәатәи ақалақьтә Еизара ахантәаҩы Дмитри Осиа Аҟәатәи аӡбарҭа рашәарамза 29, 2023 шықәсазы иаднакылаз аӡбамҭа азы иалеиҵаз акассациатә зашшра ала административтә усқәеи административтә зинеилагарақәеи рзы Акассациатә коллегиа аилатәара  мҩаԥысит.   Абри атәы аанацҳауеит Аԥсны Иреиҳаӡоу аӡбарҭа апресс-маҵзура.

Аус ахәаԥшра алҵшәақәа рыла, Тарба О.Р. (ахантәаҩы), аӡбаҩцәа Адлеиба Е.А., Цушба М.С. (Цушба М.С иҷыдоу агәаанагарала) зеилазаараҿы иҟаз Акассациатә коллегиа, актәи аинстанциа аӡбамҭа ԥсахрада иааннажьит.  Иарбоу аӡбамҭа инақәыршәаны, Аҟәа ақалақь Ахадара азыҳәамҭа иақәшаҳаҭхеит, иара убри ала Аҟәатәи ақалақьтә Еизара Аҟәа ақалақь аплан Хада ашьақәырӷәӷәара ҟалаанӡа уи иарбоу аҵакырақәа ирҭагӡаны шьаҭанкылатәи аргыларақәа рзы азин аҭара зырҵабыргуа аршаҳаҭгақәа рыҭара аанкыларазы абҵарамза 12, 2009 рзы иаднакылаз аӡбамҭа  № 126 (369) азинмчы аԥыхразы аӡбамҭа аднакылеит.

Аҟәа. Цәыббрамза 12, 2023 шықәса. Аԥсныпресс.  Аекономика Аминистрра аҿы  Аԥсны абылтәы аџьармыкьаҿы ишьақәгылаз аҭагылазаашьа иахцәажәеит.  

Аекономика Аминистрра аҿы Аԥсни Урыстәылеи абылтәы џьармыкьақәа рҿы иҟоу аҭагылазаашьеи уи аҽыԥсахрақәеи ирыцклаԥшуеит. Уаанӡа ишазгәаҭаз ала, Аԥсны анефтаалыҵқәа рыхәԥса ашьҭыҵра ишиашоу ала Урыстәылатәи Афедерациаҿы имҩаԥысуа апроцессқәа ирыдҳәалуоуп.

«Урыстәыла адунеи аҿы иреиҳаӡоу анефть ҭзыжьуа атәылақәа ишреиуагьы, аҵыхәтәантәи аамҭазы уаҟагьы аџьармыкьа аҿы абылтәы азымхара азҵаара цәырҵит. Аиҳарак ари азҵаара уадаҩны иҟоуп атәыла аладатәи арегионқәа рҿы. Абылтәы азымхара шьақәыргылахеит Астрахантәи, Самаратәи, Саратовтәи, Риазантәи, Ростовтәи, Новосибирктәии Волгоградтәи аобластқәа рҿы, Калмыкиа, Хабаровсктәи атәылаҿацәи Ҟрыми иҟоу абылтәыҭаҭәарҭатә станциақәа жәпакы рҿы абылтәы амарка АИ-95, АИ-92 ахәԥса 10-15 мааҭ ацлеит. Тула ақалақь аҿы ишьақәыргылан абылтәыҭаҭәарҭақәа рҿы абылтәы аиуристтә хаҿқәа мацара ишрызҭарҭәоз,  92 –тәи абылтәы акәзар, уи аталлонқәа рыла ишҭарҭәо шьақәыргылахеит», – ҳәа иаҳәоит аҳәамҭа аҿы..