Зураб Џьапуа Кавказ ажәларқәа рфырхаҵаратә нарҭтәи аепос ахыҵхырҭақәа дрыхәаԥшуеит, аепос ажәабжьҳәаратә форма ҭиҵаауеит. Иара ахшыҩзышьҭра ду аиҭоит нарҭаа ирыхҳәаау аԥсуа епос аҭҵаара иадҳәалоу азҵаарақәа: атектқәа рыҩра аҭоурых, рҭыжьра, атекстқәа рыҭҵаара, ашәақәа, аиҭаҳәаҩцәа, аперсонажцәа ихадоу рҷыдарақәа, иара убас аԥҵамҭақәа рсиужет ашьақәгылашьеи апоетикеи. Автор инаукатә хшыҩҵак ашәҟәы аҟынтәи атекстқәа рҿырԥшыла ишьақәирӷәӷәоит. Урҭ ирылубаауеит асиужет-тематикатә хырхарҭақәа, урҭ ирныԥшуеит нарҭаа ирыхҳәаау аԥсуа епос аперсонажцәа рыхцәажәара.
Ари ашәҟәы афольклористцәа рзы мацара акәымкәа, аепос иазҿлымҳау зегьы ирызкуп. Аԥхьа иргыланы, уи аԥсуа студентцәеи агуманитартә занааҭҵара знапы алаку аспиратцәеи рзы ихәарҭахоит. Зураб Џьапуа иарбоу аҭҵаарақәа рматериалқәа ҿыц аҭҵаарамҩа ианыло аҵарауаҩ ҿарацәа рзы хра злоу адыррақәа рхыҵхырҭаны, ицхыраагӡа дуны ишыҟало азы агәра ганы дыҟоуп.
Аҭыжьымҭа ркьыԥхьит атипографиа Academia аҿы Аԥсны аҭҵаарадыррақәа Ракадемиа, Д.И.Гәлиа ихьӡ зху агуманитартә ҭҵаарақәа Ринститут, ААУ аҟны иҟоу нарҭҭҵаареи адәытә фольклоритикеи Рцетр агриф ала. Атираж 500 еземплиар рҟынӡа инаӡоит.
