Инстаграмм аҿы Риҵатәи ареликттә милаҭтә парк адаҟьа аҿы иҟоу адыррақәа рыла, апарк аспециалистцәа уажәада Аџьарра ашьха ари ахәҭа аҟынӡа имнаӡацызт.

«Арахь ҳнаӡаанӡа амҩан ҳара иаҳԥылеит даара аинтерес зҵоу арелиеф анаҟоутә формақәа.  Ҳазлаауаз арха ахәҭак аҭаҳаратә ҭҳәааны иҟан. Амҩан ҳара хәыџьара иаҳԥылеит имӡыҭуа асеиқәыжьқәа. Еиуеиԥшым аҳаракыра аҩаӡарақәа ҳархысуа ҳара игәаҳҭеит ашьхамаҟа хыхьтәи ацәаҳәеи ҵаҟатәи аҳәааи ирыбжьанакыз адәҳәышқәа рҿы, араҟа лассы-лассы зҽеиҭазкуа аклимат иадҳәаланы изызҳауа  ашьхацәҳәыратә ҵиаақәа хкы-хкыла.

Уаҳа шамахамзар џьара иуԥымло аҵиаақәеи аендемикатә ҵиаақәеи рыхкқәа рыбжьара ҳара ҳалаԥш иҵашәеит ашьханаҳа (лилия Кессельринга), траунштеинер сферически, кокушник комарниковыи, дрок сванетски, ахырҷа ашәҭду (чистец крупноцветковыи), ашьхаҳаршьыл, ашьхаӡыркәи (колокольчик Альбова), истод кавказски, ацагәа ҳаскьын, аҩырса (борщевик Фрейна).

Ашьхарахь ахалара, албаара, ашоура, иара убас ашьхарнаша ҩежь ҳәа изышьҭоу аҵиаа аԥшаара ахьҳақәымҿиазгьы, уеизгьы ҳара ҳгәы каҳмыжьӡеит», – ҳәа еиҭалҳәеит Инга Ҭаниа, Риҵатәи ареликттә милаҭтә Парк анаукеи аекологиатә рккареи рыҟәша аиҳабы.

Ашьхарнаша ҩежь ҳәа изышьҭоу аҵиаа– (шақәсырацәа изызҳауа аҳаскьынтә ҵиаақәа рыхкы, аӡышәҭ аҭаацәара иаҵанакуеит – аред. АП азгәаҭара)  аԥшаара абар шьҭа жәашықәса ирҭагӡаны имҩаԥысуеит.