Аҟәа. Цәыббрамза 8, 2023 шықәса. Аԥсныпресс. Аԥкьаҭмпыласҩы Нестор Цужба аԥкьаҭмпылтә турнир «Спартак Ахраҿа» аҿы 13 шықәса зхымҵыц ақәратә категориа иаҵанакуа рыбжьара аиааира игеит. 

Атурнир мҩаԥысуан Москва ақалақь, цәыббрамза 4 инаркны 8-нӡа, ҳәа адырра ҟанаҵоит аҿари аспорти русқәа рзы аҳәынҭқарратә Еилакы.  

Аҟәа. Цәыббрамза 8, 2023 шықәса. Аԥсныпресс. Урыстәылеи Китаи аиашьаратә қалақьқәеи ақалақь-партниорцәеи рҟынтәи акомандақәа рыбжьара  аиҩызаратә шахматтә онлаин-турнир цәыббрамза  7 рзы Аҟәа ақалақь аҿы имҩаԥысит.

Атурнир рхы аладырхәит Урыстәыла, Белоруссиа, Ермантәыла, Китаи рҟынтәи 20 еизгоу акомандақәа, иара убас Аҟәа ақалақь акомандеи.

Атурнир мҩаԥысит Аԥсны аҿари аспорти русқәа рзы аҳәынҭқарратә Еилаки Аԥсны ашахматқәа Рфедерациеи иҟарҵаз адгылара иабзоураны.

Аҟәатәи акоманда ахьӡала иқәгылеит ашахматистцәа: Тристан Кәарацхьелиа, Сарида Лакәатаа, Богдан Турков, Аскар Аџьынџьал, Сариа Лакоба, Адамыр Кокосқьыр.

Акоманда азыҟаиҵон Аԥсны ашахматқәа Рфедерациа Ахантәаҩы ихаҭыԥуаҩ Зыхәба Ҭемыр.

Аҟәа. Цәыббрамза 8, 2023 шықәса. Аԥсныпресс. Аԥсны иҟоу Аладатәи арратә Округ аруаа ихыҭҳәаау аӷа ирразыҟаҵаратә лагерь ықәырхит, ҳәа адырра ҟанаҵоит Аладатәи арратә Округ апресс-маҵзура.

Аруаа аԥырҩыда иԥыруа аԥрыгақәа БТР-82А, иара убас акәылӡтранспортиорқәа  рхархәарала «аӷа» итәарҭа иахьаҵанакуа ареидтә усмҩаԥгатәқәа мҩаԥыргеит. Аԥшаара-ԥшыхәратә гәыԥқәа ихыжәжәароу ахыбрақәа рыбжьара ицыҵаҵәахны иҟаз арра-зыҟаҵаратә лагерь рыԥшааит, анаҩс ихыҭҳәаау аҿагылаҩ иобиектқәа рахь ажәылара мҩаԥыргеит.

Аҟәа. Цәыббрамза 8, 2023 шықәса. Аԥсныпресс. Адунеизегьтәи аԥсуа-база жәлар Рконгресс Амедицинатә Центр  «Альбамед» ацырхырааны амедицина-социалтә конференциа мҩаԥнагеит, ҳәа адырра ҟанаҵоит Адунеизегьтәи аԥсуа-база жәлар Рконгресс аофициалтә саит.

Аконференциа алахәылацәеи асасцәеи апсихикатәи ацәажәаратәи ҿиара аҿы еиҵахоу ахәыҷқәа рреабилитациатә потенциал иалацәажәеит.

Адунеизегьтәи аԥсуа-база жәлар Рконгресс аҭаацәаратә клуб апсихикатәи ацәажәаратәи ҿиара аҿы еиҵахоу ахәыҷқәа рреабилитациатә потенциали урҭ рсоциалтә адаптациеи рҵарадырреи иадҳәалоу азҵаарақәа рыла аиԥылара мҩаԥнагеит.

Аконференциа аҳақьымцәа-адефектологцәа, алогопедцәа, арҵаҩцәа, асоциалтә структурақәа рхаҭарнакцәеи аҭаацәеи еиднакылеит.

Аҟәа. Цәыббрамза 8, 2023 шықәса. Аԥсныпресс. 1992-1993 шш. Аԥсны жәлар Рџьынџьтәылатәи еибашьра аҿы Аиааира агара Амш  30-шықәса ахыҵра иазкыз апоезиатә хәылԥазы мҩаԥысит В.Г.Арӡынба ихьӡ зхы Арратә Ахьӡ-Аԥша амузеи аҿы.

Аусмҩаԥгатә аиҿкааҩ -  Аԥсны ашәҟәыҩцәа Реидгыла.

Ажәалагала аҿы Аԥсны ашәҟәыҩцәа Реидгыла ахантәаҩы Вахтанг Абҳазоу еизаз зегьы аамҭа ԥшааны аусмҩаԥгатә ахь иахьааз азы иҭабуп ҳәа реиҳаәеит, аԥсуа литература аԥҵара раԥхьатәи амшқәа инадыркны ашәҟәыҩцәа есымша ажәлар рыгәҭа игылан ҳәа иазгәеиҭеит.   

Уи еизаз иргәалаиршәеит аибашьра алагара аҭоурых, иарбоу аамҭахәҭазы арҿиаратә интеллигенциа инанагӡоз ароль атәы азгәеиҭеит.

«Атәыла анапхгара алахәылацәа реиԥш ҳинтеллигенциа ахаҭарнакцәагьы ргәаанагара акьыԥхь аҿы ицәырҵуан. Иҟан аибашьра хыркәшатәуп ҳәа зҳәозгьы, аха иҟан иара убас абџьар шьҭыхны аибашьра иалагылаз. Аԥсны жәлар Рџьынџьтәылатәи еибашьра аҿы ҳара иреиӷьу ҳҵеицәа рыԥсҭазаарақәа ахҭынҵаны аиааира ҳгеит», - ҳәа иҳәеит Вахтанг Абҳазоу.

Уи иазгәеиҭеит аибашьра ашьҭахьтәи аамҭазы аинтеллигенциа азы акыр ауадаҩрақәа шыҟаз. Вахтанг Абҳазоу еизаз иргәалаиршәеит атәыла акультуратә усбарҭақәа жәпакы шыблыз, хыԥхьаӡара рацәала ишықәгаз еицырдыруа аполитика-уаажәларратә усзуҩцәа, ашәҟәыҩҩцәа, апоетцәа рбаҟақәа. Иара убасҵәҟьа иазгәеиҭеит хабарда ишыбжьаӡыз ашәҟәыҩҩ Таиф Аџьба, аибашьра рыԥсҭазаара шақәдырӡыз апоетесса  Саида Делба, ашәҟәыҩҩцәа Шьалуа Инал-иԥа, Борис Гәыргәылиа, Алеқсеи Аргәун, Витали Амаршьан рԥацәа. Иҭахеит Адгәыр Инал-иԥа, Абзагә Гәыргәылиа, Баҭал Аргәын, Беслан Амаршьан, уҳәа реиԥш иҟаз аҟыбаҩ злаз аҿар рацәаны.

Аҟәа. Цәыббрамза 8, 2023 шықәса. Аԥсныпресс. Цәыббрамза 7 рзы Аԥсны аҿари аспорти русқәа рзы аҳәынҭқарратә Еилакы аҿы жәларбжьаратәи аҿартә форум  «Евразия Global» зхы алазырхәыз аҿартә делегациа рԥылара мҩаԥысит, ҳәа адырра ҟанаҵоит аҳәынҭқарратә Еилакы апресс-маҵзура.

Афорум аҿы ҳреспублика ахаҭарнакра нарыгӡон 17-ҩык аҿар, аделегациа напхгара аиҭон аҳәынҭқарратә Еилакы аҿартә ҟәша аспециалист хада Ахра Бебиа.  

Аҿар рыдыркылеит Аилак ахантәаҩы ихаҭыԥуаҩ Роман Ҵкәуеи аҿартә ҟәша анапхгаҩы Идрис Кара-Осман-оглы. Дара аҿар жәларбжьаратәи афорум аҿы иахәҭоу аҩаӡара аҿы Аԥсны ахаҭарнакра ахьынарыгӡаз азы иҭабуп ҳәа рарҳәеит.

Ахәҭакахьала, аделегатцәа афорум ирызцәырнагаз ацәаныррақәа ирылацәажә

Аҟәа. Цәыббрамза 8, 2023 шықәса. Аԥсныпресс. Харитон Агрба цәыббрамза 8 рзы Челиабинс ақалақь аҿы,  RCC Boxing Promotions аҟынтәи абокс ахәылԥаз аҳәаақәа ирҭагӡаны, иара изы ижәаҩатәу апрофессионалтә еиндаҭлара мҩаԥигоит, ҳәа адырра ҟанаҵоит аҿари аспорти русқәа рзы аҳәынҭқарратә Еилакы.

Иара диацлабуеит 31-шықәса зхыҵуа Панаматәи абоксиор Алеқсандр Диуран.

Аҟәа. Нанҳәамза 30, 2023 шықәса. Аԥсныпресс. Амҳаџьыраа Рыԥшаҳәа, Аԥснытәи адраматә театр аҿаԥхьа, 1992-1993 шш. Аԥсны жәлар Рџьынџьтәылатәи еибашьра аҿы хабарда ибжьаӡыз ргәалашәара иазку акциа мҩаԥысит.  

Акциа иалахәыз традициала ишаԥу еиԥш ажәа «Помним» (Иаҳгәалашәоит) ҳәа аформа аҭаны иргыланы ацәашьқәа адыркит. Атеатр аҿаԥхьа ишьақәыргылаз аекран ду аҿы еизаз идырбан  хабарда ибжьаӡыз рыԥшаара иазкны имҩаԥысуа аусура азы авидеохроника.

Аԥсны иҟоу Жәларбжьаратәи Аџьар Ҟаԥшь Амиссиа ахада ицхырааҩ Борис Казанба  акциа атәы еиҭеиҳәеит. Уи иара убас Жәларбжьаратәи Аџьар Ҟаԥшь Амиссиа  2010 шықәса раахыс ареспублика Аԥсны анапхгареи еиуеиԥшым ауаажәларратә еиҿаарақәеи хабарда ибжьаӡыз рхабар аилкааразы мҽхакы ҭбаала аусеицура   шрыбжьоу азгәеиҭеит.

Аҟәа. Нанҳәамза 28, 2023 шықәса. Аԥсныпресс. Харитон Агрба Москава азааигара иҟоу Серпухов ақалақь аҿы имҩаԥысыз абокс ахәылԥаз «IBA ачемпионцәа рыҵх» аҿы аӡбаҩцәа еицҿакны ирыдыркылаз аӡбамҭа инақәыршәаны, Африкатәи Ареспублика аспортсмен Ксолисани Ндонгени дииааит. Абри азы адырра ҟанаҵоит Аԥсны аҿари аспорти русқәа рзы аҳәынҭқарратә Еилакы.  

Аҟәа. Нанҳәамза 28, 2023 шықәса. Аԥсныпресс.  2010 шықәса рзы ииз Аҟәатәи «Динамо» ашьапылампыласыҩцәа есышықәса имҩаԥгахо атурнир «Краснодар аԥхынтәи Ахраҿа-2023» аҿы аиааира ргеит. Атурнир нанҳәамза 23 – 28 рзы Краснодар ақалақь аҿы имҩаԥысит.

Атурнир афинал аҿы «Динамо» аспортсменцәа Ростовтәи акоманда «Спарта» акоманда асчиот 2:1 ала ириааит, ҳәа адырра ҟанаҵоит Аԥсны аҿари аспорти русқәа рзы аҳәынҭқарратә Еилакы.