Аҟәа. Лаҵарамза 15, 2024 шықәса. Аԥсныпресс. Алаҵаразы аџьықәреи аахәаразы 4 млн. мааҭ азоужьуп. Абри азы Аԥсныпресс акорреспондент диҿцәажәо адырра ҟаиҵеит атәыла ақыҭанхамҩа аминистр Беслан Џьопуа.

«Аҳәынҭқарра Ахада Аслан Бжьания иҳаҩсыз ашықәс азы иҟалаз аарҩара иахҟьаны аҽаҩра ахьмаҷыз  инамаданы ақыҭақәа рҿы алаҵаратә кампаниа амҩаԥысшьа аилкааразы  анапынҵа ҳаиҭеит. Ақыҭақәа рхадацәа ҳанрыҿцәажәа зматериалтә ҭагылазаашьа уадаҩу аҭаацәа, иара ақыҭауаа иааизакны алаҵаразы аџьықәреи маҷны ишрымоу еилкаахеит. Атәыла Анапхгара Очамчыреи Гәдоуҭеи араионқәа рқыҭақәа рзы 20-20 тонн алаҵатә џьықәреи аахәаразы аԥарақәа рыԥшаара алнаршеит», – ҳәа иҳәеит Беслан Џьопуа.

Гәдоуҭа араион ахь  19 тонна ибзиоу алаҵатә  џьықәреи наргеит. Аџьықәреи ақыҭақәа рызшара иалагахьеит.

Аҟәа. Лаҵарамза 15, 2024 шықәса. Аԥсныпресс.  Традициала ишышьақәгылахьоу еиԥш, Жәларбжьаратәи амузеиқәа рымш лаҵарамза 18 рзы Аҟәа имҩаԥысуеит акциа «Аҵх амузеи аҟны». Сынтәа ари акциа иалахәхоит Аԥсны аҳәынҭқарратә музеи, Дырмит Гәлиа ихьӡ зху алитературатә-мемориалтә музеи, Аԥсны Раԥхьатәи Ахада Владислав Арӡынба ихьӡ зху Аибашьратә хьӡи-ԥшеи рмузеи.

«Аҵх амузеи аҟны» – жәларбжьаратәи акциоуп, уи ҵакыс иамоуп амузеитә експонатқәа уахынла рыхәаԥшразы алшара аҟаҵара. Ари ауха адунеи амузеиқәа жәпакы хәыда-ԥсада урҭаар улшоит, рышәқәа аадыртуеит амра шааҭашәалак еиԥш ашьыжь ашара ҟалаанӡа. Аԥсны ари акциа иалахәхо амузеиқәа ҵхагәҭанынӡа иаартхоит.

Аԥснытәи аҳәынҭқарратә музеи аатуеит асааҭ  11: 00 рзы.

 «Ҳара ҳмузеи аҿы «Сара гәахәарыла Сыԥсадгьыл ахь схынҳәуан» ҳәа хыс измоу ацәыргақәҵа мҩаԥгахоит. Араҟа ицәыргақәҵахоит асахьаҭыхыҩ-аграфик Алеқсандр Чачба-Шервашидӡе ихатәы маҭәақәа. Даҽа цәыргақәҵак Аџьынџьтәылатәи еибашьра Дуӡӡа аҿы Аиааира агара Амш иазкуп.  Амузеи иаҭаауа амузеи егьырҭ азалқәа рыҩнысреи егьырҭ, есымша аус зуа ацәыргақәҵақәа рыхәаԥшреи аинтерес рызцәынамгар залшаӡом», – ҳәа Аԥсныпресс акорреспондент диҿцәажәо иазгәеиҭеит амузеи адиректор Аркади Џьопуа. Иара иажәақәа рыла, амузеи аусзуҩцәа ауснагӡатә рҽазыҟарҵоит. Аҭааҩцәа ирбар рылшоит амузеи азалқәа рҿы шамаха иумбо аекспонатқәа.

Аҟәа. Рашәарамза 15, 2024 шықәса. Аԥсныпресс.  1929 шықәса Лаҵарамза 15, 1929 шықәса рзы диит аҳәынҭқарратә, аполитикатә усзуҩ, Қырҭтәыла акоммунисттә партиа Аԥснытәи аобласттә Еилакы актәи амаӡаныҟәгаҩ, Аԥснытәи АССР Иреиҳаӡоу асовет Апрезидиум амаӡаныҟәгаҩ, Аԥснытәи АССР Иреиҳаӡоу асовет Апрезидиум ахантәаҩы, 7, 8, 9-тәи Асоветтә Социалтә Республикақәа Реидгыла Иреиҳаӡоу Асовет адепутат Валериан Осман-иԥа Кобахьиа.

Валериан Осман-иԥа Кобахьиа диит лаҵарамза 15, 1929 шықәса рзы Гәдоуҭа араион Лыхны ақыҭан.  

1944 шықәсазы дҭалеит Аҟәатәи арҵаҩратә Институт,  1947 шықәсазы - Аҟәатәи арҵаҩратә институт аурыс бызшәеи алитературеи рфакультет. Уи даналга ашьҭахь усураҳәа ддәықәҵан Лыхнытәи абжьаратәи ашкол ахь.

1953 шықәсазы  акомҿартә усура дазырхан: Гәдоуҭа араионтә комҿареидгыла аҩбатәи амаӡаныҟәгаҩыс, нас актәи амаӡаныҟәгаҩыс дыҟан. 1955 шықәсазы далхын Аԥсны акомҿареидгыла аобком амаӡаныҟәгаҩыс, нас актәи амаӡаныҟәгаҩыс.

Аҟәа. Лаҵарамза 15, 2024 шықәса. Аԥсныпресс. Лаҵарамза 15 рзы еицырдыруаз ауаажәларра-политикатә усзуҩ Константин Озган иԥсы ҭазҭгьы 85 шықәса ихыҵуан. 

Константин Константин-иԥа Озган диит лаҵарамза 15, 1939 шықәса рзы Гәдоуҭа араион Лыхны ақыҭан.  

1967 шықәсазы Ақырҭуа субтропикатә нхамҩа Аинститут далгеит.

1967 - 1976 шш. Гәдоуҭатәи ачаифабрика аҿы асмена аиҳабыс, анџьныр хадас, анаҩс адиректорс аус иуан.

1976-1978 шш. – Гәдоуҭа араион анагӡаратә комитет ақыҭанхамҩа Аусбарҭа анапхгаҩыс аус иуан.

1978 - 1989 шш. – Гәдоуҭа апартиа араионтә комитет актәи амаӡаныҟәгаҩ, аамҭак ала (1978-1990 шш.) Аԥснытәи АССР Иреиҳаӡоу Асовет адепутатс дыҟан.  

1978-1987 шш. – Аԥснытәи АССР Иреиҳаӡоу Асовет Апрезидиум ахантәаҩы ихаҭыԥуаҩыс дыҟан.  

1981 шықәсазы ибзиаӡаны далгеит Асовет Еидгыла Акоммунисттә Партиа Ацентркомитет аҟны иҟаз Иреиҳаӡоу апартиатә школ.  

1987 - 1990 шш. – Аԥснытәи АССР Иреиҳаӡоу Асовет ахантәаҩыс дыҟан.

Аҟәа. Лаҵарамза 15, 2024 шықәса. Аԥсныпресс. Лаҵарамза 15 рзы Аҳәынҭқарра Ахада Аслан Бжьаниа Бабашьыра аҳирбаӷәаза адгьылҵакыраҟны иҟоу В.Г. Арӡынба ихьӡ зху Жәларбжьаратәи аҳаирбаӷәаза «Аҟәа» аиҭашьақәыргылареи аргылареи рызҵаарақәа рзы акоординациатә штаб анҭыҵтәи аилацәажәара мҩаԥигеит. Абри азы адырра ҟанаҵоит Аҳәынҭқарра Ахада ипресс-маҵзура.

Аҳаирбаӷәаза «Аҟәа» аусура аиҭахацыркреи уинахыстәи аусуреи рзы апроект анагӡара аҳәаақәа ирҭагӡаны аилацәажәара алахәцәа арҽеира-еиҭашьақәыргыларатә усмҩаԥгатәқәа рымҩаԥысшьа иалацәажәеит.

Иахьа аинерттә материалқәа рышьҭаҵарҭақәа рыргаларазы аусеиҿкааратә база азырхиаразы аусурақәа мҩаԥысуеит. Ихыркәшоуп ацемент-бетонтә зауадқәа руасхыршьҭаҵаразы аусурақәа, ихацыркуп дара азауадқәа реибыҭара аус. 

Аусеиҿкааратә база ҭахкаауп, амаҭәахә аагара иалагоуп. Ашьҭԥраара-ртәаратә цәаҳәа, аԥсҟырҵәиратә мҩақәеи адгыларҭеи реиҭашьақәыргылара мҩаԥысуеит аамҭеихшара иақәыршәаны. 

Аҳәынҭқарра Ахада анапынҵа ҟаиҵеит апроект анагӡара иадԥхьалоу аминистррақәеи аусбарҭақәеи русеицура арӷәӷәаразы.

Аилацәажәара ахыркәшара ашьҭахь Аҳәынҭқарра Ахада ашьҭԥраара-ртәаратә цәаҳәаҟны аусурақәа шымҩаԥысуа дахәаԥшны ибеит.  Аҳәынҭқарра Ахада инаҵшьны иҳәеит ауснагӡатәқәа рынагӡара ахаҭабзиареи апроект анагӡаразы иазгәаҭоу аҿҳәара иазку аамҭеихшареи рықәныҟәара, ҭакԥхықәрала рызнеира шаҭаху атәы. 

Аԥхьаҟа, иааиуа атуристтә аамҭазы иазԥхьагәаҭоуп еиԥҟьарада авиеимадара аиҭшьақәыргылара. Уанӡа, ҳазҭоу ашықәс азы имҩаԥысраны иҟоуп аҳаирпланқәа рдәықәҵареи рыдкылареи ртехнологиа аус адулара алзыршо атесттә реис.

Аҟәа. Лаҵарамза 14, 2024 шықәса. Аԥсныпресс. Лаҵарамза 14 рзы Аҳәынҭқарра Ахада Иусбарҭа аҿы имҩаԥысыз аилацәажәараҟны аҳәынҭқарратә бызшәа аҿиара иадҳәалоу апроблемақәа ирылацәажәеит. Абри азы адырра ҟанаҵоит Аҳәынҭқарра Ахада ипресс-маҵзура.

Аилацәажәара аартуа, Аҳәынҭқарра Ахада иҳәеит аҳәынҭқарратә политика аҿиараҟны ихадароу ахырхарҭақәа ишыруаку аԥсуа бызшәа аҿиара.

Аҟәа. Лаҵарамза 13, 2024 шықәса. Аԥсныпресс.  С. Ҷанба ихьӡ зху Аԥснытәи аҳәынҭқарратә драматә театр Башкортосҭан имҩаԥысраны иҟоу амилаҭтә театрқәа рфестиваль ахы аланархәуеит. 

Лаҵарамза 16 – 23 рзы имҩаԥысраны иҟоу  VIII амилаҭтә театрқәа Жәларбжьаратәи рфестиваль «Туганлык» Уфа ақалақь аԥҵара 450-шықәса ахыҵра иазкуп.

Лаҵарамза 21 рзы  Мажит Гафури ихьӡ зху Башкиртәи академиатә театр асцена аҿы Аԥснытәи атеатр башкиртәи ахәаԥшыҩ иднагалоит Ф. Достоевски ироман «Ауаа ӷарқәа» («Бедные люди») амотивқәа рыла иқәыргылоу  В. Семеновски испектакль «Ловелас».

«Туганлык» 1991 шықәсазы Ареспублика Башкортосҭан  акультура Аминистрра аԥшьгарала Уфа ақалақь аҿы аҭоурыхтәии акультура-бызшәатәи еиԥшызаара рыла ишьаҭарку атеатралтә культура, аиҩызара, аимабзиаратә еизыҟазаашьақәа ареспубликақәеи атиурктә дунеи рысценатә ҟазара аныҳәа аҳасабала   еиҿкаан.  

2024 шықәсазы Афестиваль  раԥхьаӡа акәны амилаҭтә теарқәа Рфесттиваль ахьӡ аманы имҩаԥгахоит. Уаанӡа уи «атиуркбызшәатә театрқәа рфестиваль» ҳәа ахьӡ ахын уажәы уи аформат аҽарҭбаауеит.

Афестиваль афиша аҿы  – аспектакльқәа 14, урҭ рахьынтә ҩба – аконкурснҭыҵтәиқәоуп: Иҷыдоу асас иаҳасабала Афестиваль ахь ааԥхьара зауз Мажит Гафури ихьӡ зху Башкиртәи академиатә драматә театри А. С. Пушкин ихьӡ          зху Псковтәи атеатри (Урыстәыла Амилаҭтә драматә театр – Алеқсандртәи атеатр)   аспектакльқәа.

Аконкурстә программа аҿы иҟоуп  – Ҭаҭарсҭан, Ҟазахсҭан, Кыргысҭан, Нхыҵ Уаԥстәыла- Аланиа, Чувашиа, Калмыкиа, Аԥсны, Тува, Даӷьсҭан, Мари Ел рҟынтәи атеатралтә коллективқәа рыспектакльқәа.

Аҟәа. Лаҵарамза 13, 2024 шықәса. Аԥсныпресс.  Лаҵарамза 24 – 25 рзы Ф.А.Искандер ихьӡ зху Аурыс драматә театр аҿы Фазиль Искандер ирҿиамҭа амотивқәа рыла аспектакль «Ахьча Махаз» аԥхьарбара мҩаԥысуеит.

«Ахьча Махаз» - Фазиль Искандер еицырдыруа иепикатә роман «Сандро из Чегема» ановеллақәа иреиуоуп. Мыцхәы ацәажәара згәамԥхо, агәаӷьра змоу ахаҵа, зажәеи зуси еимадо анхаҩы, зыԥҳацәа зыргәааз дахьзырхәыз Махаз изку ажәабжь ауп.

Аҟәа. Лаҵарамза 13, 2024 шықәса. Аԥсныпресс. Аԥсны ашколқәа зегьы рҿы аҵыхәтәантәи аҵәҵәабжьы гоит лаҵарамза 22 рзы, ҳәа Аԥсныпресс ахь адырра ҟаиҵеит атәыла аҵара Аминистрра ауаажәларра рымадара аҟәша аиҳабы Аслан Кәыҭелиа.

Уи иҟаиҵаз адыррақәа рыла, 2024 шықәсазы  153-атәыла ашколқәа ирылгоит 1900-ҩык инарзынаԥшуа аушьҭымҭацәа.

«Ҳара 12-ҩык амедал аиуразы акандидатцәа ҳамоуп. Жә-ҩык «ахьтәы» медал аиуразы акандидатцәа роуп, х-ҩык «араӡны» медал аиуразы акандидатцәа роуп», - ҳәа иҳәеит Аслан Кәытелиа.

Аҟәа. Лаҵарамза 13, 2024 шықәса. Аԥсныпресс. Иаха иҟалаз ақәаршыҩ иахҟьаны Очамчыра араион ақыҭақәак аӡы рыҵалеит.

Лаҵарамза 13 рзы иауз ақәаршыҩ иахҟьаны ақыҭақәа Џьгиарда, Кәтол, Ӷәада, Кындыӷ, Аҭара аӡы рыҵалеит, ҳәа адырра ҟанаҵоит Иҷыдоу аҭагылазаашьақәа рзы Аминистрра апресс-маҵзура.

«Аҩарқәа ақыҭамҩақәа, ацҳақәа, анышәынҭрақәа аӡәӡәеит, аҩнқәа ирыҩналеит. Иҟалаз адыррақәа рыла, Араду ақыҭан иҟалаз амшцәгьы иахҟьаны иҵыҩрыз аҵла ахатәы ҩнык иақәҳаит.  Ааха зауз ҳәа аӡәгьы иӡбахә ыҟам. Кындыӷи Тамшьи ақыҭақәа иахьрыҵанакуа ареспубликатә мҩаду аӡы ахыҵәеит», - ҳәа  иазгәаҭоуп Иҷыдоу аҭагылазаашьақәа рзы Аминистрра иҟанаҵо адырра аҿы.